ابي رايكم بسرعة.. توي شاري موتر!!!

[برق الضحى]

السلام عليكم..

بحمد الله شريت GX-R 97 وراعيه الاول مركب فيه تانكي مويه تحت.

فانا ابي رايكم هل اشيل التانكي وارجع الاستبنه ولا اركب الاستبنه بالباب ترهيم طبعاً؟

والسؤال الثاني والمهم..

تنصحوني اغير زيت الدفرنسات والقير ولا اكملهن والسلام؟

[صقر]

أولا مبروك السيارة ويطعمك خيرها ويكفيك شرها

ثانيا الموتر مجهز لك مركب لك التانكي ... ونصيحتي لك انك تتركه بمكانه وتستفيد منه.

ثالثا ما فيه داعي تغير الزيوت الا من زيوت الوكالة .... واللي اعرفه ان زيت الدفرنس ما يغير ... وانما يزاد عليه اذا نقص...

ومبروك.. مرة أخرى....

[برق الضحى]

الله يبارك فيك يا اخوي ويجزاك خير..

وتسلم على ردك.

[تركي عبدالله]

السلام عليكم ورحمة الله وبركاته اخـــــــوي بـــــرق الـــــــضــحــى مـــــبروك المـــــوتـــــر اقــــــــول راي لاتـــــشــــيــــــل الــــتــانـــــكـــــــي المـــــاء لــــــه فــايــــده ويـــقــــول المـــــثـــــل انــــــقــــل الماء لورجــلك على الماء لاتــــــغـــــير السويل زوده فـــقط اذ كــان نـــاقــــص تــــر اذ غـــــيرتــــــه يـــصــيـــرله صــــــوت بلمـــبارك

[برق الضحى]

يعطيك العافيه اخوي تركي واللهيبارك فيك..

وان شاء الله اباخذ بشوركم.

[الربع]

أولا: الله يطعمك من خيرها ويكفيك شرها
والله كانك راعي بر لا تشيل التانكي
أما بالنسبة للزيوت مدري عنها والله
وشكراااااااااااااااا.

[طمطماية]

الله يطعمك من خيرها ويكافيك شرها

ونصيحتي ياخوك لا تغير زيوت القير والدفرنس إلا عند الوكالة

وإذا قيرك تحسه ثقيل ... وخاصة إن الوقت بارد ألحين . فغير زيته عند الوكالة وشف الفرق .

إسأل مجرب وأنا خوك


بس يمكن تصير فيه حنه خفيفه في القير إذا كان زيت القير الموجود عندك حق ( أبو يمن ) وغيرته لزيت الوكالة

جرى التنبيه

[علوم رجال]

الله يطعمك من خيرها ويكافيك شرها

اخوي بما ان السيارة موديلها 97 يعني ان لها ست سنوات ، وانت ما تدري وش راعيها مغير من الزيوت او السيور او البواجي ، وما تعرف وش اللي يبي تغيير ومن اللي ما يبي .

اذا كانك من الرياض انصح انك تروح (( للرشيد )) موزع للشركة معتمد وعنده عمال فلبينيين ممتازين وارخص من الوكالة ، واطلب منهم تشييك كامل على السيارة ،،، وطبعاً غير كل شى يمكن يغير ،،، كل هذا يبي يكلفك من 1000 الى 1500 ريال .

بعدها تكون مطمن وسيارتك على كيفيك ،،، وتقدر بعدها تعمل جدوله لمواعيد تغيير الزيوت والسيور ....الخ

[المواكب]

اخـــــــوي بـــــرق الـــــــضــحــى مـــــبروك الجيب .. السلام عليكم ورحمة الله وبركاته .. انصحك تفك التانكي وتركب الاستبنا مكانه المخصص بالنسبة للماء عب الجراكل وبس والجيب افضل شيء يكون بلدة بالنسبة لتركيبك الاستبنا بالباب انا مرة علي والقاعدة كسرة الباب من المطبات ورجعت وركبت الاستبنا في مكانه المخصص الله يطعمك خيره ويكفيك شره والله يحفظك ... اخوك المواكب

[برق الضحى]

يعطيكم العافية جميعاً وماقصرتوا الله يجزاكم خير..

[الأسد الذابح]

الله يعطيك من خيرة ويكفيك من شرة

الأســ الذابح ــــد

[أكشت سعة صدر]

جيب ما فيه تانكي مااااااااااااااااااااااء مهوب جيب ودي بالجيب دفرنس قدام ما يشتغل ولا يصير بدون تانكي هذا أولا ثانيا الاستبنة تركب لها قاعده خارجية على الباب وتضمن الباب علشان ما ينكسر وتنخرع القاعدة والله يطعمك من خيرة ويعديك شرة.

[عليمي2000]

والله ياشباب انا شريت لاند كروزر 2000 ولاني ما اعرف عن صاحبه اش سوى فيه وكم واحد استعملة فلذلك قمت بتغيير السوائل كلها الدبل والقير والدفرنسين والبواجي والسيور والفرامل وشحمته ولكن وهقتوني يوم تقولون ما يغير زيت الدفرنسات بس يزاد مع اني لقيت زيت الدفرنس الخلفي متآكل يعني فيه برادة حديد وكان في اعتقادي انه ضروري تغييره

[خشم الحصان]

الاخ
برق الضحي
السلام عليكم
اخي مبروك السياره وتكسرها بالعافيه في ربوع الصمان و الدهناء
الله يعطيك من خيرها ويكفيك شرها
اخوك خشم الحصان

[abuwaleed]

الاخ /برق الضحى

شاهت ردود الاخوان ولاحظت انهم ماخذين فكره خلط عن تغير زيت الدفرنس!!!!!!!
زيت الدفرنس لاابد ان يغير كل 40000الف كم اذا كنت تستعمل الدبل ------
اما في الظروف العاديه كل 60000 كم لان الدفرنس عباره عن تروس حديد واذا كان الزيت غير
لزج تتاكل التروس وبعد تاكل ال حديد تاتي المشاكل من صحن البنيون والكرونا عليه لابد
المحافظه على الزيت والفحص باستمرار.
وانصحك ان تذهب الى الغرابي عند الي يبعون زيوت الجمله وخذ نوع فوكس(سوبر جير) الدرجه 140
قيمه الجالون 15 ريال خذه غيره بنفسك مايبي شى او رح لواحد مضبوط يغيره لك 15 ريال
يعني 30 ريال احسن من ابو يمن ب 50او60 ريال.

[بـــدر]

السلام عليكم ورحمة الله وبركاته
انا استغرب واتعجب عند ما اسمع واحد من الاخوان يقول: لاتغير زيت الدفرنس ولاقالك زيت الدفرنس فقط يزاد ما يغير:mad: ليش يا خوان انتم الي صنعتو السياره وقمتم بتجارب عليها حتى ثبتو هذا النظريه
عجيب والله.

انا استخدمت اكثر من نوع من السيارات وكل مره استخدم نوع اقرا كتيب الصيانه المرفق معها وكلها تنص على تغير زيوت التشحيم بصفه استمرايه على حسب نوع القياده يعني اسيارت التي تتعرض لقياده شاقه يتغير زيت المحرك كل (3000) كلم وزيوت القير والدبل والدفرنس الامامي والخلفي كل ( 40000) كلم، وهذا الكلام مو من راسي جايبه هذا من كتيب الصيانه مع كل سياره .

المشكله يا خوان تكمن في (اليماني ) الي تغير عنده الزيت يحاول يقنعك ان لازم تغير الويت كل 1500 كلم عشان يزيد تصريف الزويت الي عنده فابتالي يزيد المكسب :mad: حسبي الله على الي دخلهم ها البلد .

اذكر مره في موقف طريف مر علي في شركة مرسيدس الجفالي طلبت زيت دفرنس وقالي الموظف وهو من الجنسيه الفلسطينية (زيت الدفرنس ما عم بغير بس بيزيدو وقلت اكييد قال لا هيك تعلمنا من الي إبلنا )
المصيبه في كلمة تعلنا من الي قبلنا
لاكن نصيحه كل واحد يقرا من كتيب الصيانه هم الي صنعو السياره وهم الي ادرى بصيانتها.

على موضوع زيت الدفرنس تاكد من رقم اللزوجه هل هو ( 90 ) او (140 )SAE.

[برق الضحى]

يعطيكم العافي وماقصرتوا..

الخلاصه ان الكتيبات حقت السيارة تقول غيروا والتجارب تقول لا..

والبعض يقول انك اذا غيرته بدا الدفرنس يون والله اعلم.

[عباث]

السلام عليكم ورحمة الله وبركاته
اخوي ان ركبت الاسبير على الباب ترهيم راح يتشعر عليك الباب .
لان السبير اللي بالباب شد بلد يكون الباب مدبل من الداخل . انا اقول شل التانكي وشف له مكان داخل
شنطة الجيب اما تبطحه على ارضية الشنطه او توقفه مثل المسنده على المراتب الخلفيه والتوقيف افضل
الحلول اللي توصلنا لها من تجارب ربعنا اصحاب الجيوب الصوالين

ولك تحياتي