مطلوب استشاري اصابات جيب لاندكروزر //

[خالد77]

السلام عليكم ورحمة الله وبركاته

مشكلة سيارتي الجيب gxr موديل 03 رجة غريبة بعد ضرب المطبات الخفيفة مثل المطبات اللي قبل المطبات الصناعية وهذه الرجة ماتطول تاخذ ثواني بل أقل

لاتقولون ترصيص لأني غيرت الكفرات قبل اسبوع ورصصتها

ولاتقولون وزن أذرعة لأني كل شهر تقريبا أمر الميزان وأشيك

ويمكن أقول كراسي المكينة لأني سبق وأن أكلت لي مطب أقشر وبعده نقدت على سيارتي وبعض الأحيان أقول يمكن من العمود لأني اسمع صوت يجي ويروح إذا مشيت حول ال 100 وإن زدت فوق 140 راح الصوت تقريبا

وقبل الختام أبغى ورشة ممتازة ولاتقولون العضيب لاندكروزر لأني كنت أجيه وودعته قبل اسبوع لأن شغلهم بعد الضمان يبين لكن وش رايكم بورشة التاج مدحها لي واحد وشكرا لكم على تحملي وسعة صدوركم ......

[مقلع الرمث]

اخوي شيك على جلب العمود الامامي اللي امام الدفرنس الامامي راكب مع الجوانب كانه بركب ممكن تكون مرتخيه اشوي وتسبب الرجه وشيك على مساعد الدركسون يكون سبب رئيسي للرجه لكن انصحك بميزان الدرع امين جدااا ويعلمك وش فيه سيارتك وعندهم عمال تمام التمام روح لمهم بالصناعيه القديمه حول ميزان اليرموك اسأل عنه كلهم يعرفونه ميزان الدرع

[MR.HKR]

المشكلة اخوي كثير تمر علينا ابدا اول شي بالبسيط
رصص كفراتك على سرعة عالية لان البناشر يرصصونها على سرعة 80 كلم رح للعضيب او المجد الي في الصناعية القديمة ورصص على 160-180 كلم أنشالله تروح الرجة ....

[خالد77]

الله يعطيكم العافية اخواني لكن هل ميزان الدرع يعرف المشاكل الميكانيكية وشكرا على مشاركتكم ؟؟؟

[العقارب]

وشيك على مساعد الدركسون يكون سبب رئيسي للرجه
اكيد منفقع

[رملان]

مساكم الله بالخير
ملاحظه/لاندكروزر 1998--2007مافيه مساعد دركسون
مثل ماقلوا الشباب رح ميزان الدرع
وقبل هذا تاكد من كراسي دودة الركسون والسياره طافيه احد يحرك الدركسون شوي وناظر الدوده من تحت كمبروسر المكيف ومن تحت الدينمو

[أبو LAMeS]

تحياتي أخوي خالد إذا الموتر كأنه يزحف يمين أويسار إذا ضربت المطبات اللي تقول... يعني مثل ما يقولون الموتر( يهز وسط ) شيك على المساعدات والله يوفقك لحل المشكلة

[بارق تميم]

السلام عليكم ورحمة الله وبركاته

شيك على كراسي المكينه

لكن ورشه ماعرف بالرياض ورش


رصص كفراتك على سرعة عالية لان البناشر يرصصونها على سرعة 80 كلم رح للعضيب او المجد الي في الصناعية القديمة ورصص على 160-180 كلم أنشالله تروح الرجة ....
انا قد قالي واحد من العيال ورحت لمهم ترصيصهم على 100 مايتعدى
مع العلم اني مرصص ترصيص ارضي

تقبلوا مروري

[بواسامه]

عمود التوازن الخفي والامامي وربلاته
شداد الدفرنس الامامي والخلفي وربلاته

[خالد77]

علومي باختصار بعد ماستفدت من بعض المشاركات المبكرة
أولا : صليت العصر اليوم الخميس بالصناعية ومريت ورشة التاج ورفعوا السيارة وشيكوا على العمودين وكراسي المكينة وقالو سليمة
ثانيا : رحت لميزان الدرع وشيكوا على الأذرعة وقالوا سليمة وقال لي المهندس مر الهيدروليك ومريتهم
ثالثا : مريت الهيدروليك عشان بشيك على الدودة وقال سليم والحين وش السوات ؟؟

[بارق تميم]

الله يكون بعونك وتلقاله حل انشاء الله

تقبل مروري

[سراب الصيف]

يمكن الموترفيه عين
ان كان فيه احد قالك ابي الوتر خله يذكر الله
لان السياره بتعوكس معك

الله يعينك بيقولون كل شي سليم وتبقى المشكله الى ان تبيعه

اخر حل بدل الجنوط

[شامخ ألهيلا]

تاكد من هالشي انا عانيت منه وهو وزن الرمان الي على الهوبات الاماميه يجي لها صاموله شد كبيره لانه في حالة خرط الهوبات يرجعونها واكثرهم مايعرف وزنة الرمان

وتاكد من الكفرات بعد ترا كثير ينجح في الترصيص بس مع السرعه يبان الخلل

هذي تجربتي مع معناتي سابقه في الاند

اخوك شامخ الهيلا

[.أبوعبدالرحمن]

شيك على دودة الدركسون لانه سبق وجيب الوالد حصله كذا وطلعت المشكلة من دودة الدركسون

[راشد الحربي]

انا عندي اخو موترك .. واخذه من واحد من الزملاء وهو آخذه وكالة .. يقول من يوم اخذته وكالة والرجه هذي فيه .. يقول سويت كل شي حتى رجعته للوكاله ومانفع .. يقول مايضبط إلا صار هوا الكفرات فوق اربعين ..

اشتريته انا منه .. وغيرت له الجنوط وركبت له جنوط 17 .. ياباني اصلي .. ورصصته ترصيص عادي كم مرة .. ولا نفععععععع ابدددددددددد .........

باقي إني ارصصه ترصيص كهربائي ..

وكان الله في العون ..

[ابوعاشق فهد]

شيك اخي على الرمانات في الكفرات الامامية هي سبب في رجت الكفرات

[خالد77]

يمكن الموترفيه عين
ان كان فيه احد قالك ابي الوتر خله يذكر الله
لان السياره بتعوكس معك

الله يعينك بيقولون كل شي سليم وتبقى المشكله الى ان تبيعه

اخر حل بدل الجنوط

أبشرك هذي مستبعدها تماما بفضل الواحد الأحد مع ان العين حق لكني متيقن بالله ومحافظ الله يحفظنا وإياكم وبعدين تراه كومة حديد مثل اللي مع الناس بس الاخوان بيض الله وجيههم بقولون وزن الرمانه وهذي وين تجي بالظبط ومن يظبطها وترا موتري خليجي وجنطه 17 والكفرات مثل ماقلت عمرها الآن اسبوع ومرصصه بس بديت أشك بالترصيص وياليت تتواصلون معي حتى أصل للحل الأمثل أو حرجت عليه ؟

[خالد77]

يمكن الموترفيه عين
ان كان فيه احد قالك ابي الوتر خله يذكر الله
لان السياره بتعوكس معك

الله يعينك بيقولون كل شي سليم وتبقى المشكله الى ان تبيعه

اخر حل بدل الجنوط

أبشرك هذي مستبعدها تماما بفضل الواحد الأحد مع ان العين حق لكني متيقن بالله ومحافظ الله يحفظنا وإياكم وبعدين تراه كومة حديد مثل اللي مع الناس بس الاخوان بيض الله وجيههم بقولون وزن الرمانه وهذي وين تجي بالظبط ومن يظبطها وترا موتري خليجي وجنطه 17 والكفرات مثل ماقلت عمرها الآن اسبوع ومرصصه بس بديت أشك بالترصيص وياليت تتواصلون معي حتى أصل للحل الأمثل أو حرجت عليه ؟

[شامخ ألهيلا]

اخوي خالد 77 تكثر الرجه تجي عند تغير الفحمات وخرط الهوبات الاماميه لان هناك رمانه ولها صاموله كبير ومحبس فاذا كانت محلوله ترج السياره واذا كانت مشدوده فانها تعدم الرمان وتسبب حرااره اماميه لسياره واذا بغيت توزنها ترا عند اكثر الميازين في الرياض وزنها بي 100 ريال وصراحه انا عانيت منها عند تغير الفحمات وصرت متعود عليها واجبر المكانيكي على وزنها وبعضهم مايعرف ان لها وزنه

[خالد77]

وأخيراً .....
المشكلة عرفتها 95 % وهي الدودة والعلم عند الله ومع الغبار بدا يزيد الصوت من جهة السيور وعلبة الدركسون من قبل وهي تندي والآن دلوني على أفضل ورشة للهيدروليك وأعطيكم التفاصيل بعد المعاناة ..

[ابوبدران]

السلام عليكم
شف ورشه ومصنع الطائر في الصناعيه القديمه شارع العنوز نهايته شرق او الجنبه لونها اصفر
لان كل الورشه تقريبا يصلحون عندهم

[رومل]

غير الربلات حقت عمود التوازن اللي يجي من عند المساعد الايسراو الايمن
ويلف من خلف المكينه شف ربلات مربوطه بالشاصي غيرها

ثانيا ---- يلزمك تشييك على الرمانات حقت العكوس يمكن تكون راخيه شوي

اتمنى لك التوفيق