عطونا الحل يا النشاما والله ما صارت ؟؟؟؟؟؟؟؟؟؟؟

[عاشق الإف جي]

الســلا م عليكم جميعا

بسألكم عن حاجه مره ضروريه في الإف جي رقم 1 يعني الي ما هو فل كامل . وياليت تفيدوني . او تشوفون ايش الحل ؟

انا طلعت للنفود والسياره اثناء ما اطعس فيها مانع الانزلاق يكون شغال وما تمشي كأنه فيه شي ما سكها ( يعني على طول تغرز بالطعوس والسيوف ) ولا فيه زر عشان افصل مانع الانزلاق . يقولون فيه فيوز بالكبوت تفصله اذ بغيت تدخل النفود او البر . بس هذا مو حل كل ما بغيت ادخل النفود افتح الكبوت وأفصل الفيوز ؟ ياليت تشوفون لنا حل ؟ لانه مره صراحه عقدتني ؟
مع العلم بأن رقم 2 فيه زر يفصل مانع الإنزلاق ؟؟؟؟؟؟؟؟؟؟؟؟؟؟؟؟

[gsb]

والله مالك الاتشوف رقم 2 كيف مشبوك زاره بالكمبيوتر والأجهزة الي يحتاج تزيدها اذا كان فيه ,عن طريق كهربائي مختص وفني حقيقي عن طريق دراسة وعلم وخبره ويفهم في كمبيوترات السيارات مظبوط
فيه ناس سووها بالوكالات
بس للسيارات اخرى غير الاف جي’ الاف جي لا اعلم ودمتم .

[سحابه]

اخوي عاشق الاف جي
كم تمنيت اني افيدك وإن شاء الله الاخوان مايقصرون معك

[xahmaedx]

المعروف ان السيارات اللي فيها مانع انزلاق يوجد بها زر يوقف
المانع مثل الومينا لاكن الاف جي صراحه ماعندي اي خلفيه

[روحي شماليه]

ماقد ركبته ولا افيدك

لاكن مايقصرون راعين الا F J

تقبل مروري

[ابوقاسم]

هلا اخوي
اذا المسئلة فيها فيوز وتعرف مكانة بالكبوت
رح لكهربائي فاهم وخل يوصل لك الفيوز بمفتاح داخل الكبينة وتفصله وقت اللي تبي وانت بالسيارة
تمنياتي لك بالتوفيق

[عاشق الإف جي]

مشكورين ياأخوان ماقصرتوا

[حي النزهه]

السلام عليكم ورحمة الله وبركاتة جميعا

اخوي بالنسبة لمشكلتك اللي انا أعتبرها ميزه ابعطيك المعلوم
بالنسبه لمانع الإنزلاق عندك نفسه اللي في الفل كامل الفرق بينك وبين الفل كامل هو الاكسسوارات والدوف لوك
يعني مافي شي اسمه فاصل مانع الانزلاق بالنسبه للفل ولا الستاندر لكن تقدر تركب فاصل عند اي ورشة اذا تعرف ورش تسوي لك فاصل مانع انزلاق وبالنسبه للي اعرفه فيه ورشه قريت عنها في احد المنتديات اسمها السوافي بالرياض بس الصدق ينقال انا ماعمري رحت لها وانشالله بروح لها وابي اعرف وشو شغلهم لاني ابي اركبه بعد انا في واحد في احد المنتديات مركبه ومنزل له مقطع على اليوتيوب بس المشكله انه بالامارات اتمنى اخوي افدتك والاخوان اللي يعانون من هالمشكله لهم بالنسبه للي بالامارات يمدح السياره بعد ماركبها بس ماشفت احد من الشباب في المنتديات مركبه بالرياض مر على ورشة السوافي وتكفى كانك ركبته نزل له موضوع لاني متردد بصراحه مدري اركبه ولا لا وبيني وبينك الواحد يخاف على سيارته لو اني بالامارات كان ركبته عند نفس اللي ركبه الرجال ..... وسلامتك اخوي

لاتنسانا من دعاك والاخوان ربي يوفقك يالغالي

[ابوعقل]

ورشة سوافي يركبون فاصل

مكان الورشه بالرياض

[عاشق الإف جي]

بيض الله وجهك أخوي ( حي النزهة ) ما قصرت

[قرموع]

اخوي انا كنت اعاني نفس المشكله بس رحت لسوافي وركبو فاصل لمانع الانزلاق والحمد لله تمام بس خلي واحد عندهم اسمه فيروز يركبه لك لانه احسن واحد عندهم ودقيق ودربك سالم

[عاشق الإف جي]

أخوي قرموع مساك الله بالخير
بأي مكان حطلك الفاصل وإذا أمكن صورة أكون لك من الشاكرين

[قرموع]

قدام القير في اماكن فاضيه جنب زر الحساس وبعدين لا تخاف شكله جميل ومكانه صح والصوره ابشر

[عاشق الإف جي]

تراي أنتظر الصورة

[قرموع]

اسف على التأخير


http://www.mekshat.com/pix/upload02/images73/mk37276_sadasw.jpg
تحياتي

[بيبسي]

الفاصل تركيبه سهل انا ركبته عند مركز سوافي بمخرج 18 بـ80ريال وركب لي فاصل اسود مقارب للديكور وخليته يركبه على يسار الدركسون بجنب ازرار المرايات الجانبيه عشان مايكون واضح وانا اشوف انه افضل مكان