اش رايكم في كفرات ماكسس؟؟؟

[برادو97]

السلام عليكم

هل تنصحوني بكفرات ماكسس على سيارتي البرادو وهل تتحمل البر والأماكن الوعرة وكم اسعارها ،،،،

مريت اليوم على بن زقر وكيل دنلوب وحصلت الكفر الواحد بـــ468 ريال،،،، يقول السوداني الأسعار ارتفعت من يومين ،،،
وكيل الهانكوك بن شيهون السعر 370 ريال ،،،،،،اش راي اخواني الكرام دنلوب او ماكسس او هانكوك؟

وجزاكم الله خيرا

[بدوي جنوبي]

عليكم السلام

ال ماكسس الماني والمصنع في تايون

هانكوك سئلت عنه قبل اسبوع عند الوكيل بن شيهون ب كيلو 3 بجده
مقاس 16/70/245 يقول ب 360 ريال 2008
وان شاء الله راح اركب هانكوك

بالتوفيق

[برادو97]

شاكر لمرورك يامشرفنا الغالي،،،،

هل ينفع هانكوك في الأماكن الجبلية؟؟

[gsb]

مالي خبرة بالكفرات سوى ان الهانكوك مقاسه اصغر من الكفرات الثانيه الي مكتوب عليها نفس المقاس يعني تجيب نفس الكفر لنفس المقاس من شركة ثانية تحصل الهانكك اصغر.

[عاشق z71]

اخوي برادو 97 حبيت اسالك هل الكفر ماكسس الي لقيته انت كبير يعني حجمه كبير يواليت تذكرلنا كم مقاسه الي لقيته واكون لك شاكر وممنون

[ice.cube]

حسب علمي ان كفر الماكسس الموجود الان(جنط 16) تايلندي الصنع ,ولي زميل مركبهن قبل فتره وجيزه على باث فندر وحبل عنده اثنين من الكفرات وتمشكل مع الوكيل اللي في الدائري الجنوبي في الرياض الين تم استبدالها "وفق الله الجميع لمغفرت ورضوانه"

[مواسي الطعوس]

مالي خبرة بالكفرات سوى ان الهانكوك مقاسه اصغر من الكفرات الثانيه الي مكتوب عليها نفس المقاس يعني تجيب نفس الكفر لنفس المقاس من شركة ثانية تحصل الهانكك اصغر.


** صحيح الهانكوك اصغر من الكفرات المشابهه له في المقاس جربتها اكثر من مره ليش ؟

لان الكفر يقرب لاقرب رقم يعني يمكن يصير مقاسه 68 لاتكتب 68 تكتب 70 الارتفاع وكفر ثاني يمكن يصير مقاسه 72 او 71 ولاتكتب يرجع الى 70 لانها اقرب له من 75 وبهذا يكون فيه فرق بين الكفرات ( عسى الصوره اتضحت يا جي بي اس )

** انا جربت الما كسس ال 16 /265 الكفر مع الخط حلووو ومع البر ممتاز اقرب الكفرات تقريبا للبالون لكنه للتطعبس اثقل من الدنلوب ( مافيه غير الدنلوب للتطعيس )


** فيه ميزه مايزعج بالصريخ نثل الدنلوب وذلك عندما تديور( تلف )

[شروكي ربع]

ممتازة مجربة وعملية لأبعد حد ..

ودعستها حلوة ..

[عاشق z71]

ياجماعة الخير طيب محد افادني الله يجزاكم خير ابي اعرف هل الوكيل الي هنا يبيع حجم اكبر من 257 \70

ابي زي حقت المرهمات مثلا عل احصلها هنا وبكم تقريبا الاقيها


وشاكر لكم

[ممتر البران]

انحش سواء لموترك ولا غيره نصيحه

[ملاعب الريح]

جربت البالون ركبت طقمين ومرتاح معهن.........



ملاعبـــ

[الوسيطاء]

اخوي البالون الماكسس زين بسعره بس تراه ثقيل مره يفرق للكفرات الثانيه من لباوالين يعني يجي في المقارنه بي زياده نصف كفر بس الي مرغب الناس السعر والا البالون ازين شي سيام تير والله لامقارنه ولارساوه ولاغاط تقارنه وسعره 500 ريال للكفروكفرات المرهمات تراها مزعجه في الخط ولاهي قويه ابداً لانها مصممه للنفود فقط ومافيها غاط ان شا الله اني افدتك

[جو الشيخ]

عليك بالماكسس

[المعجب19]

والله انامركب ماكسس وممتازات في الطريق وفي الصحراء لكن مع النفودثقيلات

[مهوس صيد]

انا مركب ماكسس ما عليها اي كلام صارلها للحين سنتين ولا قالت شي ومجربها في البر تمام

[عاشق z71]

ياجماعة الخير وشو النع الي تقصدونه هل هو ابو نقشه قويه وصخريه انا ناوي اشتري هذا النوع وش رايكم فيه هل تنصحوني فيه لقيته نقشه وعره بـ 600 الكفر ودي اركبها على جمس وش رايكم

[ابوتركي666]

السلام عليكم ياأخي اولاً إذا أن

[ابوتركي666]

السلام عليكم ياأخي اولا إذا أنت راعي حجره يعني راعي أجبال وحصى عليك بالبالون الماكسس أكبر حجم معروف وسعره الآن( 1250) يوم الخميس السعر طقم 4 حبات وهن غنيات عن التعرفه
ثانياإذا أنت راعي طرق يعني إسفلت عليك بالشاهين مقاس 245على 85 اما سعرة فهو غالي يصل سعر الطقم في السعودية 1920ريال أما في الأمارات عطاني الطقم 1500درهم قبل ثلاث شهور وإنشاء الله يفيدونك الشباب اكثر وسأبحث عن البديل
والله يفقك ويعينك

[مساير الليل]

أهم شي لاتقرب هانكوك رديه بكل ماتعنيه الكلمة


لينه بزيادة ماتصلح الا لرمل


ركبتها على موتري أنشق الكفر بعد أسبوع
وغيرته بجديد أنشق من الجمب
مشيت بها على ردميه تقريبا 20كيلو
وتشوف أطراف النقشة متقطعة

[بـــ نجد ـــرق]

انا ياطويل العمر مركب في الشيروكي ماكسس

ميزتها ان سعرها مناسب وتتحمل في الحصى

لكن قاسيه شوي يعني مطبها يجي قوي

وفي الرمل ثقيله يالله يمشي الموتر

اتمنى اني افدتك

تحيتي لك

[راعي هوى]

ياخوي الماكسس حلو وانا مركبه على تاهو وماشاء الله كفر جدا روعه ولله الحمد
وتقبل مروري

[مقام البدر]

السلام عليكم جميعاً

انا عندي برادو ... وقبل اسبوع مركب له كفرات كومهو لقيتها الوحيده بنفس المقاس اللي مواصفاتها زينه

الحراره A والاحتكاك A

كفرات لينه وممتازه بالنفود وسعر الكفر بـ 420 ريال من محل بالغرابي

وللمعلوميه مقاس البرادو اللي معي ركبته حسب مقاس الوكاله السابق اللي مسجل على الباب 17 /60 / 265

وياليت تفيدني بمكان وكيل دنلوب ابتهاوش معهم عساهم للفليت

[احلى شين]

السلام عليكم ورحمة الله وبركاته
با النسبة للمكسس صناعتها تايون للمعلومية ام البلون انا مركبها من عشرة اشهر سعرها 340 ريال بس ترى تاريخاها الافراضي سنه وارمها لان دعستها تنمسح بسرعه وأثناء قيادتك تسمع لها زعاق اما بنسبه في اللفلفه والمديورات زعاقها عالي.
وبا النسبه للدنلوب تحتاج لستك مع الأيام تنقص هواء على حد تجربتي .
وشكراً للجميع

[بيبسي]

اخوي الحلوووو ... انا ناوي اركب ماكسس بالون 900 شرايك تنصح بها او دنلوب اندونيسي او سيام تاير والله محتار بينهم مع ان كفراتي جديده والسياره 2008 ابي رايك والشباب لاهنتو

[عاشق z71]

ياجماعة الخير لس اسبوع ونا ادخل الموظوع ابي واحد يقولنا عن الماكسس الوعره الي تجي كبار زي الي يكبونها المرهمات بكم قيمتها وش سلبياتها

[بيبسي]

هذي ماتصلح .... بتزعجك على الاسفلت قد فكرت فيها وركبها واحد اعرفه على اف جي ومل منها مركب الواحد فوق ال600 بس ماادري هي ماكسس والا لا ... انا تكلم عن البالون 900

[بـــ نجد ـــرق]

انا ياطويل العمر مركب في الشيروكي ماكسس

ميزتها ان سعرها مناسب وتتحمل في الحصى

لكن قاسيه شوي يعني مطبها يجي قوي

وفي الرمل ثقيله يالله يمشي الموتر

اتمنى اني افدتك

تحيتي لك

فيه اضافه

وهي اني مركب الكفرات من اربع شهور تقريبا

وامس اشوف الكفر (محبل) فيه بعج مع العلم ان الهوا حول 40

ابروح لشركة ماكسس وابتصاج انا وياهم لان عليه ضمان سنه

[احلى شين]

السلام عليكم ورحمة الله وبركاته
أخوي بيبسي... والله من ناحية وشرايك انا ماجربت الا الدنلوب والمكسس ومثل ما قلت لك الدنلوب تنقص هواء ام المكسس ما تنقص هواء ومكاتوب عليه تيوبلس وانا مركب مكسس من زمان ومرتاح معها،،

[بيبسي]

اخوي احلى شين ابشرك اخذت سيام تاير ..

[احلى شين]

السلام عليكم ورحمة الله وبركاته,,,
اخوي بيبسي الله يبارك لك فيها.
وقل لنا وش رايك فيها وهي تيوبلس ولا لستك.

[بيبسي]

لا تيوبلس ... وحليوه بس فيها رجه خفيفه سويت لها ترصيص عند اليروموك أرضي وظبطت يعني مو مره بقى شي خفيف بس بصراحه عطت السياره شكل ورفعته شوي وعلى ما أظن الكفرات اعرض من الماكسس

[aldhna1]

ياجماعة انا اعرف واحد من الشباب مركب ماكسس ورحنا انا وياه يم الشوكي والترباعة وضيعنا ليله كاملة ورفيقي الله يستر عليه قفلت معاه وصار يمشي في العرمة فوق ذيك الحصى بسرعه عاليه ويضرب الحصى ويطمر الموتر طمر والرجال مقفله معاه مغير يناظرني ويناضر طريقه تاله تل بسرعه عاليه بدون سكه وانا اقول في صدري الان الاربع كفرات بتضرب علينا كلها من ذا الحصى الي نطامر فيه مطامر من الساعه تقريبه وحده بالليل لين طلع علينا الصبح وحنا مضيعين ومطامر فوق الحصى وبسرعه عاليه شي غريب انا قلت اذا مابنشر الا كفرين انا ابعتبر هذي هي الكفرات القمه لان التجربه خير برهان والله ويستر علينا ربكم ونوصل الرياض مابنشر علينا ولا كفر وانا الي اروح اخبطه نومه ويوم اني صحيت وانا اروح للغرابي واركب ماكسس على طول بدون اي تردد . والتجربه خير برهان
وسلامتكم

[alyahya2]

كفو ابو فيصل (خميس مامات)بس اكيد خويك مااخذ بتعليماتك حطها فيه احسن مثل العويده

[aldhna1]

كفو ابو فيصل (خميس مامات)بس اكيد خويك مااخذ بتعليماتك حطها فيه احسن مثل العويده


هلا ابو محمد

المثل يقول من خلف ما مات وفعلا الحمدالله ان خميس مامات دامك انت موجود
:D

[الشقاوي22]

والله انا ارشح الهانكوك

يقولون انه خفيف مع الخط

ولا يسبب رجة للموتر

وشكراًُ

[ابو ناصر2020]

انا جربت الدنلوب و المكسس

ومن رايي تركب مكسس وتتوكل على الله

بس اهم شي رصص الموتر زين يعني كمبيوتر من الجهتين عشان تنسى رجه او غيره

[هـدد]

السلام عليكم
ماكسس نوعين تايلندي وصيني اكيد بتاخذ التايلندي مقاس245/75/16قيمة الكفر 330 وخذ تاريخ جديد
وتراهن مسكتات توكل على الله أنا مجربهن لي 3سنوات:good:

[الباثفندر 3.5]

الماكسس عيبه الرجه لا تقربونه
ابي اسأل عن الهانكوك هل يسبب رجه بالموتر؟×

[jeddal]

السلام عليكم ورحمة الله .. صراحة انا صارلي 4 سنوات استخدم كفرات ماكسس ولله الحمد ممتازة جدا وما عليها مشاكل .. دعستها ما تنمسح بسرعة بالاضافة الى انها ناعمة جدا في المشي ومريحة وما تسخن . ولكن بالنسبة للبر فطبعا الدنلوب لا يعلى عليه .. تحياتي

[يالبى الهلا]

ماكسسسسسسسسسسسسس صناعه تايلنديه تبي تقنعنا انه اصلي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[المرتاع]

ناس تمدح وناس تذم ياخي انا مركبها ونازل مع دروب وعره قسم بالله مافيه احلى منها الكفرات جبليه

[الباثفندر 3.5]

للرفع...........

[ماجد الثبيتي]

شباب موضوعكم له أربع سنوات ههههههه الله يرج بليسكم ,,,,,