فزعه يارعين القيور

[rpk]

السلام عليكم احب ان اطرح مشكلتي عندكم وارجو من الله ثم منكم حل مشكلتي في قير جمسم موديل 2001 تماتيك المشكله هي انه مايغير النمره بسرعه والنمره الاخيره مايغيرها :(

[mok]

السلام عليكم
اخوي مشكلت القير مشكله ان كله حساسات وقلق
واحمال يكون عندك حساس او ترس خربان
افحصه كمبيوتر قبل ما تفكه

[سحابه]

مرعلى كم ورشه حتى تتأكد قبل ماتقك
الله يسهل عليك

[آل علي]

ترس التزامن

يسبب نفس المشكلة
ويغير ب100ريال

في الصناعية القديمة ولا تغير القير تراة مو خربان

[سوبر VTC]

هلا بك اخوي احتمال فلتر الزيت موسخ متسدد و الزيت مو نظيف
و بعضهم ينظف حسسات القير و يضبط
و احد زملائي غير (هلال) حق تغير النمر ب 300 ريال و ضبط
و انا اعتقد ان القير التماتيك كلتشات يعني مهوب زي القير العادي تروس
تحياتي,,,,,,,,,,,,

[mok]

انا يا مكلمك مغير ترس حق 2006
بعد مافصل القير ورجع شبك طق والحاصل رقم 2 و4 مايعشقها غيرت ترس اوترسين وحزام

[rpk]

مشكور ياوجيه الخير لاكن حيروتوني اصملو لي علي حل واحد وجزاكم الله خير ولكم من الدعاء

[طارق الحربي]

الشغله صارت معي ب 94 جمس تماتيك

اما كلتشات او فحمات

وهي رخيصه بس المشكله بفك القير وتركيبه هو الغالي


انصحك اذا انك بالرياض تروح لورشه العتيبي بالصناعيه القديمه شارع الامير سلمان

متخصص قيور امريكي وشغله نظيف ومرتب

اما الحساس ماله دخل بتغيير النمره

على العموم رح وشف وش يقولك وهو يبي يوريك القطع وكل شي وتشوف بعينك وش الخربان

[monsixnet]

هلا بك اخوي احتمال فلتر الزيت موسخ متسدد و الزيت مو نظيف
و بعضهم ينظف حسسات القير و يضبط
و احد زملائي غير (هلال) حق تغير النمر ب 300 ريال و ضبط
و انا اعتقد ان القير التماتيك كلتشات يعني مهوب زي القير العادي تروس
تحياتي,,,,,,,,,,,,



اضم صوتى الى صوت الاخ سوبر VTC

[مفخرة الارض 0666]

صارت معي بجمس 91 وغطية القير بشرع أزرق وحطيته بالحوش

[rpk]

يعني لو فحصت الموتر بلكمبيوتر تطلع العله

[لن أمل من العطاء]

انتبه تفك القير

ثانيا المشكله عندك بسيطه جدا جدا

عليك بعمل الالي
هو وانت تمشي بالسيارة حاول تغير التعشيق عن طريق تحريك عصا القير فاذا استجابت التغييرات بسرعه فاعلم ان الكلتشات والتروس ما بها اي شكله

هناك حساسين مهمتهم التغييرات ممكن يونوا عطلاننين او نهاية عمر لهم

عليك بالفحص بالكمبيوتر ولكن بشرط اللي يفحص يحدد لك رقم او اسم الحساس العطلان ويغيره على مسؤوليته

اخيرا

انت وين مكانك


اخوك


لن امل من العطاء

[rpk]

في الرياض الله يبشرك بالخير ان شاء الله المشكله بسيطه

[Magellan]

اهااااا
الموتر صعبه تغييراته والرابع مايلقم
طيب أخوي قبل ماتدخل بهالحوسة كلها وسالفة القيور ...شيّك وأنا أخوك على حساس الهواء اللي في الخرطوش بين فلتر الهواء ومنظم الهواء(اللهات) يمكنّه ممصّع وأنت ماتدري يعني تأكد إنه شابك بالخرطوش

[سوبر VTC]

اهااااا
الموتر صعبه تغييراته والرابع مايلقم
طيب أخوي قبل ماتدخل بهالحوسة كلها وسالفة القيور ...شيّك وأنا أخوك على حساس الهواء اللي في الخرطوش بين فلتر الهواء ومنظم الهواء(اللهات) يمكنّه ممصّع وأنت ماتدري يعني تأكد إنه شابك بالخرطوش

حلوه (اهاااااااااااااااا)
شكلك خبره الله لا يضرك

[Magellan]

حلوه (اهاااااااااااااااا)


شكلك خبره الله لا يضرك



وإياك يا أخوي الكريم ..وبحفظ الله جميعا


لكن أعتفد خوينا( قد) يحتاج للتوضيب لو نمرة الترجيع خربت معاه إذا تطورت الأوضاع معه بعدين
عموما الفحص بالكمبيوتر يظهر لك كل شيء وإذا أوضح أن هناك هبوط في أداء القير ستحتاج إلى فكه ،
قد يكون ترس ، حزام ، كلتشات، طنجرة،،،،الخ

[rpk]

ان شاء الله ابفحص كمبيوتر وارد لكم

[rpk]

احب ابشركم ان القير ماطلع فيه شئ وان المشكله كلها كانت من البواجي واسلاك البواجي التجاريه وزاد الطين بله ان البخخات وصخه فكان تاخير القير بسبتها والحمد لله ان المشكله جت على كذا والسلام عليكم

[جيب الربع]

لاتقرب الجنسيه السوريه تراهم نصابين100%100

[Magellan]

احب ابشركم ان القير ماطلع فيه شئ وان المشكله كلها كانت من البواجي واسلاك البواجي التجاريه وزاد الطين بله ان البخخات وصخه فكان تاخير القير بسبتها والحمد لله ان المشكله جت على كذا والسلام عليكم


أخوي الكريم الحمدلله جت خفايف
ولو راجعت موضوعي المثبت بأعلى الصفحة عن تنظيف منظم الهواء للشفرات والجموس،،
لستغنيت عن قيام العامل بتنظيف البخاخات وقمت بها بنفسك بقيمة لاتتجاوز 15 ريال..
وأنصحك بفلتر رياضي k&N أمريكي يحفظ اللهات والمكينة والثلاجة والبخاخات من الوسخ

[rpk]

عز الله انكم ماقصرتو لسرعه الاستجابه ولتفاعلكم مع المشكله الله يقصر عنكم كل شر امين