لاتحككون بالصمان يامطاريس الثمامة

[حفرلوجيا]

سلام يالربع
على عجل تصفحت جريدة الرياض اليوم .. وكالمعتاد التصفح من قفا .. ووقفت عند كاركاتير الأستاذ عبد السلام الهليل .. التالي :

http://www.mekshat.com/pix/upload/images3/slamh22.jpg

طبعا الهليل طرح ( سخرية لاذعة ) .. لكن هل يسمح لي المشرف اعلق على الكاركاتير ( مادام الهليل أطرى الصمان والكشتات ) ؟
يقول الريس شقردي .. تفضل :
شكرا أبو عبد الله..
قعدت أحلل ..
االهليل هو اللحين يبي ( يلذع ) من ؟ ..
الأبو اللي يشاهد التلفزيون .. في إشارة لتطنيش إهتمامات الابن والإنشغال أو ( اللهو ) عنه وعن التحدث إليه وفيما يفكر به ؟ ..
أم ينتقد وضع بعض الأبناء اللي عادة بمثل هالصورة والشكل تجدهم يتسكعون بالأسواق مدودل جواله بيد .. والثانية ( زقارة ) يتميلح بهن قدام ( كل سواد ) يشوفه ؟.:mad:
أم ان الهليل يدق على ( بعض العوايل ) اللي خلطوا الكبريت مع النار .. وصايرة ( بعض البيوت ) كوكتيل يدوج به السواق والبنت والشغالة والجذع .. في شكل خطير .. نسمع من جراءه أحيانا كوارث ومأسي ؟:(:(
وإلا ان الهليل يعالج مسألة تكرار سماع ( الصمان والكشتات الطويلة ) عند بعض اللي توهم على حد البلوغ .. ويمكن هالكشتات ( تجر ) إلى مالايرغبه رب الأسرة ؟.:confused:
الأكيد .. أقول ياعبد السلام لاتحوم ( الكبد ) .. لاتكون تبي تظهر لنا ان نوعيات مثل ( خكري الهيئة ) اللي انت راسمه نبي نلقاه ورانا وحولنا إذا نوينا ( نغسل ) همومنا بالصمان .. تكفى ياعبد السلام ارسمهم مثل ماقال ( المطنش ) من الثمامة وحولة .. وقلهم ( لاتحككون بالصمان يامطاريس الثمامة ).:mad:
وسلامتكم

[عاشق الشروكي]

اخوي حفرلوجيا يبيلك تتحمل هالمطاريس تراهم كثروا ويتنططون في كل مكان بس زينتهم ما يبعدون مثل ما قلت من الثمامة وجاي وشكرا لك

[الحاتمي]

الاخ الغالي حفرلوجيا
هالاشكال اعرفهم زين مايبعدون وتراهم اذاوصلوا خزام كانهم بالدهنا
ويخافون النوم بالبر
ولايمكن يكشت مع راعين بر يدري انهم يبي ينامون بالبر وهو يخاف من الذيب يجي بالليل ويصحيه ويعضه:D وبعدين اذا راحو للبر هالنوعيات من يقعد بالاسواق الشيبان;)

[سيف السيف1]

أقول الله ايخلف على المسلمين والله إن الواحد ينقهر أحياناً اذاشاف من ها النوعيات قزع ولا شقوة وغنج ومعه جيب وأيكوم وقارمن وجميع انواع الأناتل فوق السيارة, لواتوديه يم الطرفيه ضاع..:rolleyes:
طبعاً حاطينهن زينة ولا ما يعرفولهن؟؟

[عبدالعزيز الدباسي]

الصراحة عنوان الموضوع مسكت :good:

ولو ما فيه رسمه ولا تعليق كان يكفي ، لان العنوان متعوب عليه ، ومثلك عارف هالمطاريس ذيابه وكلهم مفهوميه ، ويصيدونها وهي طايرة ، طبعاً من زود الذهانه .

ومن ناحية تعليقاتك يا ابا سليمان ، ترا العين غافلة والفكر مشغول ،،، فخذ راحتك

وبالنسبة لكاريكاتير الهليل و تحليلاتك اشوف ( وبعيني المغمضة ;) ) الأتي :

الاب ما قصر جاب كل شى لعياله وأمَّن لهم سواق وشغالة ومربيه وحتى الدش الدولي مشغله وش يبون اكثر من كذا ، لازم يتفرغ لمشاكلة الشخصية وحساباته الفلكية .

والابناء يا اخوي ما شين مع الموضة ، تبي الاجانب يقولون عنا اننا متخلفين ، وبعدين ما لاحظت الظاهرة الجديدة راعين الدبابات زي اللي بافلام هوليود ولابسين الجاكيت الجلد ، صراحة حركة ، نا قص بعض السلاسل ، طبعاً هذا( للمطخطخين ) والا الضعوف حركة الطاقية اللي تقل غضارة لبن رهيييييبة والياقة اللي تقول مصدات امنية .


اما العوائل اللي تقول عنهم اخلطو النار بالكبريت ، يعني وش تبيهم يسوون يخلُّون الشغالة تتحجب
;) والا يحطون قواطع بالبيت على شان ما يصير فيه اختلاط ، وبعدين البنت اذا بغت تروح مع السواق يعني لازم تشغل امها واخوها الصغير على شان يروحون معها ، لا ياخوي تروح بالحالها اسرع واستر للعائلة ;)

اما عاد كلامك ان الصمان والرحلات الطويلة صارت عادة ،،، مهوب بس عند اللي توهم بالغين ، فيه ناس بالغين عمرياً لكن قاصرين ذهنياً ، يستفيدون من تكرار روحات الصمان انهم يختون بعض المرات يعدون اعمد الجسر وهل هن على عددهن ، والا زادو الاعمدة ، وفيه ناس يعدون عيون القطط على الخط الشرقي ، طبعاً اكيد ان بعضهم العدد يختلف وهو رايح ، والا بعد ما يرجع :rolleyes: :rolleyes:

[الفردوس]

صدقت يا أخوي
الله يفكنا من هالنوعيات في الصمان
وخاصة اللي معه قدر وجالس يطبل
ياهو مزعج

[المربد]

لافض فوك
دائما مبدع ،
واسال الله العظيم ان يصلح شباب الأمة ويبارك فيهم ،
ولعل انشغال المطارس بالبر يصرفهم عن امور اسوأ،،
ولو بصراحة اني اتضايق لما يسمرون على الطبول الى آخرالليل...!!

[علوم رجال]

الغريب يا جماعة الخير اني كنت بالثمامة يم جهة العاذرية الاسبوع الماضي ، واستغربت كثرة المخيمات اللي ما تدري هو مخيم والا مدينة ملاهي ، من كثر اللمبات اللي حاطين ومن كثر الدبابات اللي عندهم ;)

وطبعاً فيه اكثر من كرفانه وشفت شى ما تصدقونه ، وحده من الكرفانات قاعدين يركبون فيها مكيف سبلت ، وسخانه ، وحاطين تلفزيون ما قد شفت كبره الظاهر 100 بوصه ، لاني وانا قاعد ادور من برا اشوف الشاشة واضحه ، واكيد تلفزيون بهالحجم مركبين دش وفيه 7 امبي ، يعني اي قناة في العالم طالعة عندهم ،،

وشفت بعد سيارات حقات بر اول مرة اشوف شكلها . بعضهن مثل الهامر وبعضهن مهوب سيارات عادية تقول سيارات العاب ،،

طبعاً اكثر المخيمات اللي في ذيك الجهة من هالنوعية وهالمستوى .

سؤالي يا جماعة الخير ، الحين ذولا يستمتعون بالبر مثلنا ، وهل يلقون المتعة الحقيقية من الطلعة ، لاني اشوف نفسي ما انبسط الا اذا ( الفحن) الهواء وانكسر اظهري من الشغل ، و( تمشقت ) ايدي من البرد .

[حفرلوجيا]

أخوي عاشق الشروكي : شكرا .. و( الخكارية ) ماأظن المكشاتيين يتحملون تصرفاتهم وممارساتهم .. حتى بالثمامة ( وش ذنب العوايل المحترمة اللي ماتعدى الثمامة أو أطراف الديرة )
أخوي الحاتمي : شكرا .. هذا بلا ابوك ياعقاب ( بلاويهم بالبر وبالاسواق ) .. لكن ليش لا .. ممكن الشيبان المتقاعدين ( يخدمون ) المجتمع بالتواجد المتناوب بالاسواق ويكون معهم صرار ( حبحر ) من حق الرس أو حايل ( يعني مثل التي إن تي ) وإذا عتب ( الخكري ) السوق يدور ( السواد ) يبطحونه على شان يخلون أموره ( حمراء ) يعني ( يدكون ) خشمة من هالصرار .. وإن بغوا ( مكان ثاني غير الخشم ).. بهالطريقة يكون للشيبان المتقاعدين تواجد ( فاعل ) بالاسواق ..;):D
أخوي أبو فارس : شكرا .. الأناتل مع القزع وبقية الديكور .. هذا عنوان ( الأب ) على قولتك ( الله يخلف ).:(
أخوي شقردي (:D:D).. ) حسبي الله على بليسك .. تقول: ( يحطون قواطع بالبيت على شان ما يصير فيه اختلاط ) وتقول :(اذا بغت تروح مع السواق يعني لازم تشغل امها واخوها الصغير على شان يروحون معها ، لا ياخوي تروح بالحالها اسرع واستر للعائلة)
وقف عند ذي .. أوجعت القلب.. الله لايبارك باللي يعد أعمدة الجسر من ( اللي يوجس ) .. والمشكلة باللي ( يعد ) أعمدة ( الكهرب ) عندنا و( أسلاكه ) ضاربة و( العيال ) ( دق فليفل ياكمون ):mad:
أخوي الأسعدي : شكرا .. ( الله يضحك سنك ) وين طحت باللي يطبل بالقدر .
أخوي المربد : شكرا .. ليت النوعيات المقصوده يصرفهم البر عن العلوم الردية .. ومانقول إلا ماقلت ( ياالله الصلاح ).
أخوي علوم رجال : شكرا .. واللي مثلك ( غشيم ) بعلومهم .. ولو نزلت بكشتك للثمامة وصافحت واحد منهم كان ( تمخشت ) ايده ( وتدمت ) .. حي والله ها( اليد الممشقة ) .. ومعك ترى على نفس التردد:good:

[بـــدر]

كلن يتمتع بالطريقه الي تعجبه بس عاد دش وتلفزوين في البر هذا الي ماعمر مرت علي:D

[حفرلوجيا]

أخوي بدر .. شكرا .. كل يغني على ليلاه .. بس على شان مانظلم العقال اصحاب المخيمات الكبيرة اللي يشيلون الدش والتلفزيون لغرض إرضاء كل الأذواق اللي برحلتهم ..ماودك نقول.. ماكل من شال التلفزيون بالبر نعده من ( المطاريس );)

[حقاوي]

http://members.lycos.co.uk/cometdesign/upload/data/89/8963b6d7c1c86406360360a366ee1ddb.jpg

[عليم العطش]

السلام عليكم ورحمة الله وبركاته
اخوي حفرلوجيا الاخوه الكرام اللى علقو علىالموضوع الله يسلمكم ويعافيكم الصمان منطقه مقطوعه قبل 20سنه ولايروح لها الا اللى عنده حزابه قويه من سياره وزنانه وراس صاحي لكن هالوقت صار الصمان مثل
طراف الرياض 3ساعات وانت وسطه كله خطوط ودير وهجر خط الحفر من شماله وخط اللى بين قريه وجراره والخط اللى بين هجر الصمان وخط ابن هدباءواحد يسميه المقانيص واحد يسميه المراسيم
وخط المبيحيص ولاعاد فيه مهالك وخرايم مثل منول اي واحد يقدر ياصله ولا به تغاريز من الاصل مثل الدهناء
والنفود حتى مطاريس الثمامه اللى تقولون صار عادي عندهم0

لكن قولو لي هل وصلو جو غنيم هل وصلو ثعبلوت هل وصلو الحباكه ،ابا الفرايس ،خور القعدان،قلمه الركبه
عروق شيبه ،المحاكيك، شقه المنخلي ،هل وصلو طويل الخطام هذه الاماكن مايصلها الا الشباب الصاحي كلها بالرمله 0
اخوي علوم رجال هل دفنك الذاري خمس ايام مستمر وانت قانص بالصمان. هل خربت سيارتك لمده يومين مالقيت
من يسعفك بالصمان واقرب ديره عندك حوالي 400كيلو هل مشيت ثلاث ايام بالدبل الثقيل على طول
هل طحت بالرباضه لين طفى الموتر ورجلك على البنص هل نزلت مع عروق يطيح عقالك عند رجليك0
هذه الامور لاتوجد بالصمان اللى صار مثل طراف القصيم عند اهل القصيم0
في منتدى مكشات لم اجد من يكتب عن جنوب المملكه وليس المقصود عسيربالجنوب انما من خط الحجاز السريع الى نجران الى وادي الدواسر الى السليل الى الرمله احسن مكان لسعه الصدرعندي .اكثر مايكتب عن الدهناء والصمان ونفود الشمال ذلك النفود العظيم0
اذا شاهدتو مطاريس الثمامه في الرمله علموني لأنكم لن تشاهدونهم 0
تحياتي ياذيابه الصمان:)

[حفرلوجيا]

أخوي حقاوي .. شكرا .. شف الفرق بين الشنب .. واللبس المايع .. فعلا ( طعس ) ..
لكن اللي رسم الكاركاتير هل يقصد انهم بس يبي يسألون ؟;)
....................
أخوي عليم العطش.. شكرا .. وهلا والله بالذيب .. بس ( هون عليك ) .. ودي إذا سمحت لي أوضح بعض الأمور ليس لأني ( عليم ) ولكن لأني ( فقط ) كتبت الموضوع اللي ( تزين ) بردك .. فأقول :
1- المطرسة اللي أعنيها في هذا الموضوع تنطوي على ( الميوعة , والإتكالية , وقل الدبرة , وعدم إحترام الآداب .. وأمور أخرى حولها مما لايخفى ( المكشاتيين ) .
2- التهلكة وضرب الدروب العوج ووضع الحال بمأزق لايفهم أنها العكس .. إذ ان ( الحزابة ) أو المرجلة .. حكمة أولا واخيرا ..
والمهالك والخرايم اللي تقول عليها من أول .. اللي أظن اننا يمكن ان نسأل عنها أهل الأسياح يوم هم (زمان أول ) متخصصين في نقل الرجال ووغدانهم من ديره لديره ( يوم الدروب عسيرة ) .. أول ماطاحوا سكان نجد واللي حولها بالسيارات بدل ( الدواب ) .. فاقول الخرايم والتهلكة راحت من زمانهم .. فالحمد لله ( الآن الوضع إختلف ) .. وشخصيا ماعندي استعداد أضرب دروب تنقطع بـ( قرنبع ) كل شوي متعطلة .. وادعي اني ( ذيب ) .
3- قولتك ضرب ثلاث أيام بالدبل الثقيل ( تحملني واسمح لي أقول .. قوية شوي ) لان اليابان وغيرهم ماخلوا قاصر وإن ( قصر شي ) البركة بالورش المتخصصة اللي منها الموجوده بـ( المنطقه الصناعة ببريده ) اللي فيها شباب ( وطني ) مايبطون يرهمون مكينة طيارة لقطار .. ونبي نشوف قطار ( يطير ) :D
4- الرباضة اللي يطيح بها الواحد لين تطفي السيارة .. مالها داعي إذا كنت غير مضطر .. يعني إذا ودي اروح أمارس هوايتي ( ايا كانت ) بمتعة لا أحد يقنعني أني أصير ( ذيب ) اذا نحرت المناطق اللي أورط نفسي ومن معي بها.. ( وإن طحت بالرباضه حاليا .. فهي غشامة مني ) .. يعني لا تقول خل ( الجي بي اس ) راسي .. فالمغامرة ( ان كنت غير مضطر ) لازم تكون محسوبة , وتأخذ من الخبرة .. والعلم .. والتقنية .. مايريحك .. وتخلي ايضا ( الحزابة ) بين عيونك لما قد يستدعي الأمر .
5- أظن ان الإنسان ابن البيئة والمكان حتى بـ( هواية الكشتات والقنص ) يعني اذا كانوا القصمان وأهل سدير والشرقية يستمتعون بالنفود والصمان لاتلومهم .. مثل استمتاع أهل الشمال بالدبدبة والحجرة .. أو استمتاع أهل الوادي والسليل بالربع الخالي .. ولاتنسى البيئة الإقتصادية يعني على قد ( فلوسك وخوياك ) مد مقناصك ومكشاتك .
6- أعلن من هنا بالنسبة لي أن الوصف اللي أطلقته يا( عليم العطش ) وهو ( ذيابة الصمان ) شرف لاأدعيه وتهمة لاأنفيها .. بس اني ( ربوي ) بهـ( المنطقة ) اللي يحز بنفسي لو ( هقيت ) ان ( مايع أو عوج ) يبي ( يمطرس ) بها .
وسلامة الجميع

[عليم العطش]

السلام عليكم ورحمة الله وبركاته
اخوي حفر لوجيا سلمك الله ودام عزك0
من ردك نما الى علمي انك لست من الذين يرودون الجزء الجنوبي من المملكه لذلك لااعتب عليك لو كذبتني
فهناك مقوله ربما لعلي بن ابي طالب كرم الله وجهه غير متأكد هي(لا تحدث الناس بما لا يعرفون اتريد ان يكذب الله ورسوله) لكن ادع لك السؤال عن وضع الرمله في القيض 0
ومن توقيعك يااخي من خلال موضوعك وزنتك وعرفت من انت.
اخي الهزلاج انا لااعتب عليك بل اسعدني ردك وتفاعلك0
لاهنت
:) :) :)

[هبوب]

http://www.athagafy.com/somman/images3/Dsc00028.jpg:good: :good:

[صفوان]

الأخوان الأفاضل حفظهم الله

السلام عليكم ورحمة الله وبركاته

اسمحوا لي أبين أمور إن شاء الله ما نختلف عليها وهي:
- أننا إخوان ولا شك في ذلك.. فاذا كنا كذلك فلابد علينا انتقاء الألفاظ وأعذب الكلام وأطيبه للطرح والردود على سواء.
- أن المشاركة هي تطرأ أحياناَ لحب المشاركة وإفادة الاخوان في المنتدى ولا يقصد بها إيذاء أحد أو جنس معين من الناس.. هذا هو الأصل الذي لا نشك فيه من قِبل الاخوان إلا ما شذ عن القاعدة فيلمس له العذر لعله لم يعلم بحال المنتدى ونقاوة المقصود والهدف المنشود منه.
- لا يخفى على الجميع أن مشاركات الاخوان جميعاً هي من باب إفادة المشاركين في المنتدى والمشاهدين من أصحاب هواية الصيد والرحلات.. فينبغي علينا الظهور بمظهر يليق بشخصية تنم عن السماحة والعون والافادة للآخرين وصدق الكلمة.
- أمر مهم جداً وهو أن مشاركاتنا في هذا المنتدى يطلع ويشاهدها الكثير من داخل وخارج المملكة وخصوصاً مجلس التعاون وباقي الدول العربية.. فعلينا إظهار كل ما هو حسن عن بلدنا وعن أخلاقنا حتى لا ينطبع في تصور الآخرين بعض ما قد يكون من زلات عفوية غير مقصودة قد يستقبلها الطرف الآخر دون تمحيص فيتشكل من ذلك صورة لا تليق بنا!
- وأخيراً.. نريد من الجميع إغلاق أي موضوع قد يفتح باب شرٍ على المنتدى ويضر بهدفه المنشود ويصبح بعد ذلك باباً للتجريح "لا قدر الله".. كنا ولم نزل أن شاء الله إخواناً متحابين فيه متسامحين بيننا دالين على الخير بإذن الله.
نسأل الله أن يجنبنا الفتن ما ظهر منها وما بطن.. والحمد لله رب العالمين، والله من وراء القصد.

وعندي إقتراح للجميع وأنا في هذه الساعة المتأخرة أحاول تحويل شريط فيديو إلى ملفات "ميديا بلير" حتى نشارككم بعض ما يفيد!:cool: أريد منكم صرف الموضوع إن سمح لي الأخ/ حفر لوجيا حفظه الله
وأهديكم بعض مقتطفان لرحلتنا إلى جنوب المملكة "خاصة إن الأخ/ عليم العطش حفظه الله يخبرنا بتقصيرنا في حقه من إعطاء بعض المناطق حقها من الشرح أو الذكر:)
هذا صيد أرنب باحدى الأودية
http://www.mekshat.com/pix/upload/images3/Cap0046.JPG

وهذا صيد حجل بوادي آخر
http://www.mekshat.com/pix/upload/images3/Cap0016.JPG

المزيد يتبع في موضوع لاحق إن شاء الله.. وش رأيكم:good:

على فكرة الصور خاصة بمنتدى مكشات "رغم قصر النظر وقلة الزادِ" :D

آسف على الاطالة وتراكم سهرتنونا الليلة.. هذا واحد يخاف من امرته ":D "

أخوكم صفوان

[حفرلوجيا]

اخوي هبوب : شكرا .... صورة حلوة لكن كأنها في ( أواخر العقارب ) اللي العشب والبر يبدأ بعدها ( يترنح ) .. لكن الله يلحقنا( أول العقارب ) .. ونتمتع .
أخوي صفوان : شكرا .. يمين بالله إن أفكارك ( نور على نور ) وسبق ونوهت قبل أكثر من شهر تعليقا على أحد ردودك في موضوع ( الضبعة ) .. كما تأكد لي في ردك على موضوع ( الصيد ليلا ) انك يبدو من الذين يحاولون أن تكون أفكارهم وطروحاتهم تؤدي دورا و( رسالة ) راقية .. وعلى ذلك أكرر تسجيل إعجابي مرة أخرى بما تطرحه .. وفي رأيي ان مثل ذلك يعطي منتدى مكشات بعدا ( مختلفا عن الآخرين ) .. وبعدين لاتستاذن أنت تأمر أمر ... وقراءة وطاعة.
-----------------
أخوي ( عليم العطش ) : اشكرك لعدة أشياء :
1- أشكرك على ردك وحماسك ونصيحتك لي بأن أتوقع .. وإن كنت أرى انك حملت بعض الكلمات في ردي السابق على غير ماتحتمل . لكن ( ماشي ) .
2- أشكرك على الوصف الجديد الذي وصفتني به مع أنني اشوف معنى واحد لكلمة ( هزلاج ) , ولم أرغب البحث عن معانٍ أخرى أوالتقعر في لغة البلاغة و( الأدب ) .
3- أشكرك وبدون ( بحث بالتفاصيل ) على حسن ( ظنك ) في أخوك عندما وزنتني من ( توقيعي ) .. لكن بودي أن ( أكشف ) ان توقيعي بيت ( مقتبس ) من قصيدة للشاعر الكبير أحمد الناصر .. وفيها أبيات كثيرة يحق لنا أن يكون كل بيت منها ( ميزان دقيق ) ومنها :
يا ابو حـمــد هـــذا زمــان التهاويل ----- أثر الرجال أشكال ذيب و نعامه
أحـــــد توهــق به و هو مثل ما قيل ----- كنه علــى حــوش البهم اردامه
اليا اشتبهت بوزن بعض الرجاجيل ----- اسمع كلامه و اوزنه في كلامه
السـالفـة تحتاج شـــــرح و تفصـيل ----- دايم يغر الناس كبر الجهـامـــه
4- أشكرك ان أتحت لي الفرصة ( لاحقا ) لأن ( نرد ) في غير هذا الموضوع بما ينفع ( المكشاتيين ).. ويوسع صدورهم .......... وأستودعك في امان الله وحفظه.
وسلامة الجميع

[راعي الطويلة]

يا شباب ......... يا كشاته

بدون ما أذكر أسم وأنسى الثاني .............. علومكم علوم رجال وكلامكم درر يستفاد منه ...... ليش ما نخليه للأستفادة والأفادة .......... مثلاً الأخ عليم العطش يعتب على الأكثرية بعدم ذكر المناطق التي سماه والأخ حفرلوجيا ........ ما بعد شفت مثله بالنباهه وفن الطرح .. ((( مبدع ))) .......... تعالوا نتذاكر كل الأماكن اللي تستاهل الروحة والكشتة ...... وشد الرحال ونشرح عنه بطريقة مفهومه للكشاته وكل واحد يدون معلومات تكون مفيدة للجميع (( نبي نستفيد )) وبعدين الديرة مفتوحة اللي يبي يكشت أو يقنص يختار ربعه اللي يخاوونه وما عليه من الباقين ..... (( دع الخلق للخالق )) وهذا والله من باب الحرص على كل الأخوان من كسب السيئات والغيبة (( وتراكم حرار )) المهم تكفون ترون الموقع ثري بكل علوم الرجال خلوه يستمر على هالمنوال ولا تبخلون بالمعلومات اللي تفيد وما تمس أحد ((( :p ))) ..........


أخوكم الصغيرون

راعي الطويلة

[صفوان]

والله ضحكتني يا أخ/ راعي الطويلة..:D
شكلك تخطط لبعيد.. يعني تبي تعرف وين حن نروح فيه.. ها:D تبي تأخذها باردة مبردة "جاهزة":cool:
يعني حنا نتعب وندور المرباع والمقناص الزين:( وندل عليها.. يا سلام:eek: ها الحركات مكشوفة:rolleyes:
على العموم تراني أمزح:D أبشر بسعدك:good: بس قل وينك فيه وندلك على أقرب منطقة تشرح الصدر "هذا تراه واحد مباحث لا تصدق":D يعني ان عرفت بالفهلوة ولا بليّاه!!

عاد ها الحين وقت الجد خلاص.. سكوت
الأخ/ حفرلوجيا.. وراك تراقبني! لا.. وبعد حافظ الردود!! حاطني براسك ها. تراك والله العالم انك تصلح مشرف "ما شاء الله عليك".
تحياتي القلبية لك خاصة ولكل من يساهم بارتقاء مستوى المنتدى الى ما يرضي الله ومن ثم القائمين عليه والمشاركين فيه والزائرين أيضاً.. حفظ الله الجميع.
وعندي عتب عليك شوي من حيث المبالغة في الاطراء.. "لا تعين الشيطان على أخيك"
وتراني ما أستاهل ها الوصف مرة وكلنا ذو تقصير، والمقصود هو المشاركة بما يفيد والبعد عن التجريح أو ما يغضب الأخرين.. ولمعرفتي القليلة بالمنتديات وفوائدها، هناك بعض المنتديات أصبحت مرتعاً للسباب والشتائم والردود التي لا يرجى منها مصلحة ما.. الا أنها قد تسقط المنتدى من عيون الأخرين ويصبح كأن لم يكن بلا فائدة ولا هدف منشود.
وعلى فكرة ها المنتدى هو أول منتدى أشارك فيه رغم معرفتي بالحاسب والانترنت منذ زمن "بس لا تسأل عن العمر":D ولا السبب أيضاً لقناعة ما!

تحياتي للجميع

صفوان

[حفرلوجيا]

أخوي راعي الطويلة : شكرا .. وعافاك على الإطراء .. وأنت طلبت يكون هدفنا نعطي بعض معلومات ونتذاكر بما يفيد وندع ( الخلق للخالق ) ... سم ( سمعا وطاعة ) .
أخوي صفوان : شكرا .. إلا تستاهل ونص .. وتكفى أجل طلبات راعي الطويلة ( نمون عليه ) .. ركز جهدك على استكمال موضوعك( فتاوي الصيد ) اللي طرحته بخيمة الصيد ... حتى نستكمل حنا حفظه والإستفادة منه بارك الله فيك .

[صفوان]

حفرلوجيا: السلام عليكم ومسّاك الله بالخير

جلست كم دقيقة أفك خطك في كلمة " أجل " بدون تشكيل.. وراك ما كتبتها " أجِّل ".. ظنيتها أجَل بمعنى الموافقة.. وبعدين ما ركب المعنى معاي.. وجلست أحوس:( ياليت تستخدم تشكيل الحروف.. من فتحة وكسرة وضمة؟ وخاصةً الشدّات.. ليتم معرفة القصد! مع ليش تبي تتعب شوي لكن تتعود عليها وبعدين مافي مشكلة.. وِلاّ تبي نشارك بموضوع فتاوى في اللغة العربية:D

بخصوص طلبك.. أبشر، إن شاء الله يَتيَسّر لنا إضافة عليها وإستكمال للموضوع.. وعَرض خاص لك لو عندك استفسار أو تبي أبحث لك عن مسألة معينة:what: لا تتردد في طرحها إما بموضوعنا "الفتاوى" أو على الايميل الخاص بي "بس لا تعلِّم أحد":rolleyes:

تحياتي القلبية

صفوان

[ابو شنب]

والله انكم صازين يا الربع هالناس عرفو الصمان وازعجونا.