اقتراحات مناطق للصيد

[العديد]

السلام عليكم ورحمة الله وبركاته
تحية للجميع
ودي أسأل أهل الخبرة اللي حدقوا أو صادوا بشباكهم عن مناطق حول الجبيل لأني حقيقة طول عمري أصيد في منطقة محصورة من أبو قميص(حدود الإمارات) إلى بريقط (الخبر) وما أعرف مناطق شمال هالخط ؟ فإذا تكرمتو تفيدوني

[Bo Rashed]

وعليكم السلام ورحمة الله وبركاته

حياك الله اخوي العديد

ذكرتني ببو ريقط الله يذكرك بالشهاده كانوا اهلنا ايام اول يروحون يصيدون فناتير هناك قبل لا يعرفون الدجاج وكانت المحامل تتذرى فيه عن هوا الشمال اذا هب

نصيحه من مجرب ( خلك على مجنونك لا يجيك اللي اجن منه)

انا واعوذ بالله من كلمة انا جربت وحدق وحطيت غزول في اسياف جنوب وشمال الدمام مثل

بو قميص
ظلوم
العجير
الزخنونية
راس حربه (ممنوع)
قصار عمار العماري
القرية
الزبنه
القريه
جزيرة بن بادي
هاف مون
راس بو ريقط
الخبر
الدمام
راس تنوره
رحيمه
راس الغار (ممنوع)
الجبيل
راس بو علي (ممنوع)
مركز بعد ابو علي ناسي اسمه
الخرسانيه (ممنوع)
راس الزور (ممنوع جهة الجنوب وهو المكان الزين ومسموح من الشمال لكنه كاشف بالنسبه للهواء وفيه سمك جارح)
منيفه
تناجيب (الاماكن الزينه ممنوعه)
السفانيه
راس مشعاب (ممنوع)

المكان اللي مكتوب قدامه ممنوع تحتاج لتصريح عشان تروح له الله يعينك تدور لك واسطه

ولكن احسن محل حدقت وحطيت غزول فيه هو 1- القريه 2- الخرسانيه 3- راس بو علي 4- منيفه 5- الزبنه

وانا انصحك اذا تبي تروح شمال انك تروح منيفه صيدها زين للغزول والحداق وذاريه عن الهوا

ولكن كقاعده عامه السمك اللي تصيده جنوب دايما طعمه اطيب ويكون اسمن من سمك الشمال لان الجنوب ارضه ومراعيه طيبه مثل القريه والعجير

تحياتي

[العديد]

مشكور يا بو راشد كفيت ووفيت لكن منيفه كم تبعد عن الدمام وما قصرت مره ثانية

[Bo Rashed]

حاضرين للطيبين اخوي العديد

منيفة تبعد 180 كيلو عن الدمام وهي بعد محطة الخالدي اللي براس الزور وقبل محطة مفرق نعيرية

واذا عزمت تروح علمني اوصيلك احد من اخواني يدليك المحادق الزينه لانهم الحين مخيمين هناك وبيكونون موجودين هناك لمدة شهرين او اكثر انت علمني وابشر بالخير لكن عجل عشان تلحق على الشعم الحين تلقاه متروس في منيفه

[النقرش]

إخواني أنا من بوظبي بس وين أبو قميص بعد السلع والحدود

[Alhzzen]

بوقميص تشوفها تحت قطر في الخريطة تلقاها راس لاف على الامارات
مشكور اخوي بوراشد على الرد


شكرا

[ابوميدار]

صبّحكم الله بالخير شباب ... ( لاني انا داخل الفجر علييكم )
كيف حالكم انشالله بخير وصحه وسلامه .... انا جديد على المنتدى وانشالله اخذ منكم المعلومات الطيبه عن طرق الصيد ...الخ
انا مو مبتدأ لكن..اسمي نفسي شبه مبتدأ.. لاني من عرفت البحر وانا اروح اصيد فيه واخترع اشياء للصيد من دون ما اسأل احد واجرب كل شي ... المهم شباب لا اطول علييكم انا من الاحساء واقرب بحر للأحساء العجير(العقير) وهذا البحر غريب عجيب ماعمري صدت فيه شي عدل .مافيه اللا هالحاقول في وجهي.حتى يوم صدت شعمه صغيره وانا ساحبها جه الحاقول وعض نصها ...شباب ماعليكم امر اللي يعرف مناطق بالعجير فيها سمك يخبرنا ولكم الشكر والله .. مابي احد يقولي في هالمنطقه سامع عنها .. ابغيه اهو راح وصاااد ^_^ لاني تعبت وانا اسمع.. ويقولون لي في هالمنطقه واروح ولا اصيد شي .. واتمنى تقولون لي عن الشعم في اي الشهور من السنه يكون متواجد.. لاني كنت سنه من السنين رايح هافمون .. في منطقه جنب شاليهات طبعا مكان ممنوع ^_* بس انا دخلت من ورى شباك وعبرت المهم هذاك اليوم المكان ملياااان شعم على كبر الكف واكبر منه والحمدلله من دون مبالغه صدت حدود ال54 شعمه.. وهم متواجد سمك السبيطي بس مو عارف اصيده وكان حذر جدا.. المهم ان من هذاك اليوم لليوم وانا اروح نفس المكان مو لاقي ولا شعمه السبب ....؟؟؟ ولكم الشكر