ابي تعلموني

[عاشق الدحروج]

السلام عليكم

انا ابي تعلموني شلن اسوي كبسه طيور صغار حق من 5 الى 10 اشخاص
وابي المقادير

[بن هدبه]

الأخ الفاضل: عاشق الدحروج
من تجارب اخوك المتواضعة في الطبخ؛ تنظف لك عدد لا يقل عن 100 طير صغير اذا بغيت تسوي حق 10 اشخاص تنظيف جيد وخالي من الريش تماما. تضع بصلتين كبيرتين مقطعين جيدا في الجدر و تحمس البصل حتى يصير لونه بني شوي ثم تضع فندوس ثوم كامل مطحون مع البصل لأنه بسرعة ينحمس مو مثل البصل وعطه وقت شويه مع التحريك حتى تشوفه تشرب الدهن وتغير لونه الى البني الغامج؛ ضع بعد ذك قطعتين من حبة فليفله لما لها من أثر كبير في القضاء على زفرة الطير. ضع البهارات التالية بمقدار ملعقة سكر كبيرة :
كزبرة ناعمة؛كمون؛؛كاري مصالة؛لومي مطحون؛شوية فلفل اسود مطحون. ضع بهارات حب مثل 5حبات هيل؛3 مسمار؛3 اصابع دارسين؛ورقتين غار؛ تحركهم مع الموجود في الجدر ثم تضع الطويرات وتحركهم على نار مو قوية و تسكر الغطا علشان ينزعون مايهم ويتشربون الخلطة والبهارات. عطهم عشر دقايق مع التحريك المتقطع ثم ضع ماء دافي وليس حار علشان ما تشد اللحمة حيل؛ خل الماي يغطيهم و طول على النار وخلهم يطبخون وبين فترة وفترة تطلع لك طير وتشوف درجة النضج ومستوى الماي؛ جيب عيش كنتري واستعمل قوطي الأناناس كمقدار لعدد الأشخاص لأنه ترس قوطي يكفي شخص في وجبة الغداء وشخصين في وجبة العشاء. نقع العيش بماء يغطيه بعد غسله عدة مرات لتنظيفه من غبار الخيشة والشوائب الصغيرة. لما تحس طيورك بيستوون ملحهم وزيد الملح شوية علشان العيش ؛ الأن عندك خيارين: اما انك تطلع الطيور وتقليهم بالدهن على نار هادية وتكبس العيش على مايهم أو أنك تقلل الماء وتكب العيش عليهم (الطيور) وتعادل نسبة الماي وتطول على النار حتى يبدى العيش يسوي حفر صغيرة وتقلب العيش بحذر حتى تستوي الحبة ويقل الماي ثم تخليه على نار هادية جدا ليما يدخن العيش وتحس أنه استوى. هذا باختصار جدا. وعليك بالف عافية حبيبي.

[عاشق الدحروج]

الله يعطيك العافيه
انا الحين بروح البر بيمع طيوووور :D
شكرا