هل تعرف قيمة هذه السيارة في السوق؟

[أيمن]

بسم الله الرحمن الرحيم

حياكم ربي وبياكم، ومساكم وصبحكم بكل خير وعافية ونعمة مواتية ..

هذا الموضوع عبارة عن سؤال عن سيارة معينة بمواصفات معينة ومعرفة قيمتها ..
وبذلك سيخدمونك إخوانك في مكشات بقيمة السيارة التي تود شراءها أو بيعها، حتى لا تغبن في الشراء، ولا تظلم في البيع ..
المطلوب عرض مواصفات كاملة مشتملة على هذه الأساسيات :

اسم السيارة، ونوعها
موديل السيارة
قراءة عداد الكيلوات
لون السيارة
ذكر بعض المشاكل التي طرأت على السيارة وذكر ماتم إصلاحه ومالم يتم إصلاحه
أشياء أخرى إضافية تود عرضها

أملي أن تعم الفائدة للجميع، وأن تقتصر الردود على عرض مواصفات السيارة أو إجابة سؤال عارض السيارة.
تحيتي

[أيمن]

وأبدأ بعرض هذه السيارة التي تهم زميل عزيز :

وجد سيارة تويوتا حبة وربع، ويسمى ثلث (شراع)
لونه بيج
موديل 82
ماشي 90 ألف
لا يوجد مكيف
المحركات سليمة جدا (المكينة والقير والحرارة)
البودي نظيف بالحيل مصبوغ بوية فرن
الداخلي أيضا ممتاز، وشراع شبه جديد ومبطن بسدو.

الموتر موقف في إحدى الجهات الحكومية، وقد أثر ذلك على كفراته.

كم تتوقعون سعره، وهل الجيب الربع بنفس مواصفاته يفرق سعره؟
أرجو الإفادة من خبراء وشريطية :D مكشات ..

ومن ناحية الكشف عليه، فما أهم النقاط التي يجب الكشف عليها وفحصها للتأكد من سلامته وخلوه من المشاكل؟

تحيتي

[المري]

تسلم اخوي أيمن..

أما بالنسبة لي فاأنا أريد :

هايلكس غمارة وحده ديزل موديل 2003 او 2002

بكم قيمتها ؟؟؟


تسلمون جميعا..

واللي خابر لي وحده نظيفه جزاه الله خير..


اخوكم / المري

[ذيب البر]

هلاااااااااااااااااااااا فيكم

ايمن فكره حلوووووووووه

بس ترى الجيب الي انت مخطط عليه ابكسبك فيه :p

كانك تبي تبيع وكان تبي تستعمل الله يعطيك خيره ويكفيك شره


تحيااااااااااااااااااااتي

[العناء]

اخوي ايمن الصراحة الفكرة روووووووووووعه

وانا ابي اسئل عن الجمس 4X4 غمارة

موديل من 93 الي 98

القير عادي

ودي اعرف كم اسعارها

ومشكورين مقدماً

[أيمن]

الله يحييكم جميعًا .. وبانتظار الجميع في الإفادة ..

أخوي العناء ..
من قريب واحد من الزملاء شاري جمس 98 دفرنسين غمارة ما شي 40 ألف، يعني نظيف بالحيل ..
بـ (40.000) ريال.
وعليك المقارنة .

تحيتي

[خشم الحصان]

الاخ اعزيز
ايمن
السلام عليكم
اخوي سوف اعطيك نبذه بحسب خبرتي وعلمي والله اعلم عن الجيب الشراع او الثلث حيث انني
امتلك مثل هذا النوع منذ حولي 10 سنوت
السعر والله اعلم حدود 14000 ريال او يزيد حسب ماذكرة من الموصفات
لكن هل القير علي كراسي ربل يعني خليجي او علي ربله وحده سعودي
هل له دقل لوك خليجي او فناجيل يعني دايم محمله كفرات قدام
القير 3 نقل او اربعه والخامس الروس (لئن المديلات القديمه تركب القيور علي بعض تاكد)
السست شد بلد او هنديه يمكن انها مغيره
هل المكينه 2f
مبرد الزيت طولي ام قصير
هل يوجد صدر علي الكرتير حق الزيت(صاجه)
النقاط التي يجب الكشف عليها
1- المكينه2- القير3-الاديتر صيخه وحط ماء شد بلد سعر الماء الجلون 30ريال بس ارقد بعدها
4- البلف هو موجود ان كان موجود غيره ولاتشيل البلف 5-طرمبة الماء6-طرمبة البنزين
7- السلف وخاصه الجلب حقته8-اسلاك البواجي مع البويبينه حقة البلتين9-جلب السست الامامي والخلفي
و ربلة الدفرنس الخلفي تجي علي جونبه فوق لم الكفرات تردع في كراسي مثبته في الشاص ان كان انها متفزرهغيرها بشد بلد لا تاخذ تجاري اسبوع ولها منقطمه10-ليات الفرامل ليها محترقه11- واير الجلنط
البريك اليدوي12- الطبات وتري فيه وحده في خلف المكينه لم الغماره13-كراسي المكينه تاكد انها ماهيب
منفصله واذا بغيت تختبرها حط علي الرفارف بيالتين في نصفهم ماء وشغل الموتر وهو بارد والي ترج
اكثر من اختها فهو الكرسي الخربان14- الصوف المكينه و القير و الدفرنسات و الرمنات الاماميه
15-السوايل

العيوب في الثلث
1-تطعج الرفارف الخلفيه اذا كانت الكفرات عريضه
2-قرقعة الشراع والحل هو وضع تلبيسه علي الحنايا ثم يشد عليه الشراع
3-تندية الشراع و الحل هو بخ الشراع من فوق بديزل وقت الصيف ثم دور لك مرغه غبار لين يكسب
الشراع غبار ولبقه في الشمس لين تطير ريحة الديزل وعقبها لو تلبقه تحت شيب منانقط نقطه
4- الدريش لبلستكيه الي في الشراع حط لها غطا من نفس الشراع يطوي من الخارج واذا جاء الصيف نزل الغطاءولبقه لين السنه الجايه ولاعليها حيث ما تيبس وتكسر
5-قرقعة البيبان و الدريش البيبان حط ربل تجاري يجي سميك ويقضب البيبان عن القرقعه
الدريش ماعندي اي طريقه الا اني ارصها بكوعي
6-الرفارف الاماميه تطلق و الحل هو وضع سبايت وشدها بمسمير
7- الفيوز قص الضفيره وحط قاعدة فيوز امريكي كبس بدال الفيوز القزاز
المميزات التي يمكن ان تضعها في الثلث
1-طاره هواء
2- ونش سحب كبير
3-سخن او دفيه وذلك بترهيم مبرد زيت القير حق جمس قديم ومد له ليات من الطرمبه وحط له حنفيه نصف
بوصه واذا جاء وقة الشتاء افتحها وحط علي المبرد مروحه صغيره وشغلها تموت من الحر
4-موصير امان فوق راس السائق
5-تونك ماء محل المرتب او نقل الكنداسه تحت دعسة السائق ووضع تانكي محل الكندسه
7-وضع او تفصيل مخابي علي جوانب الشراع من الداخل وضع السيور و الشتراك وغيرها فيه
هذا مالدي و الله اعلم
اخوكم الفقير الي ربه
خشم الحصان


:D :D

[مهيلان]

سلام عليكم جميعا

اشكر ابو حمد على الفكره الجيده
وابدا بمشاركته
الجيب الشراع اتوقع انه من 11 ــ 12 الف .. في هذي الايام بس .

المري : بتلقى الهايلكس اللي ذكرت بــ : 33 ــ 37 الف ريال .


العناء : جمس 92 قطع عشره قير عايدي ابيض نضيف بـ : 27 الف .

هذا ما لدي ودمتم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[بايعها]

السلام عليكم ورحمة وبركاته

شباب صبحكم الله بالخير

ابي رايكم ... كم يسوا هالموتر ...

جيب باثفيندر 2003
ماشي 55000 تقريباً
فل كامل مراتب مخمل
واللون فضي
الموتر نظيف نظيف ما شاء الله عليه

[عنبري تمير]

صالوم GMC
بدون دبل

موديل: 91
الون :اسود مع ذهبي
مشي الطبلون 120000
كم يسوى ياربع

[راميهن]

السلام عليكم
شكرا اخوي ايمن على ذا الموضوع وشوف ذا كم يسوى ذا الايام

ددسن ،98،جي ال ، البدي نظيف الا طقه في الرفرف الايمن اللي قدام ، المكينه والقير والاشيا ذي ماشاء الله نظيفه ، ماشي 240000 .













تحياتي

[محمد محمود]

هلي 2002 glx غمارتين سعودي نظيف وممتاز بالحيل ماشي 30000 كم يسوى

[Bader-M]

بالله
بليز
80
مركب له وجه 90
الون اسود
المكينه مجدده
بالله كم يسوى
......

[أيمن]

وينكم يا أهل المعرفة بالأسعار، شاركوا معنا وأفيدونا ..

تحيتي

[مهيلان]

السلام عليكم

محمد محمود
الهايلكس يسوى 44 ــ 45

عاشق الدداسن
الجمس يسوى 35 الى 38



راميهن
الددسن بــ 20 ــــ 19 الف

طاير بالعجه

البليزر من 7.5 الى 9 الاف

وتحياتي للجميع

[ابو ســــاره]

باثفيندر 2000 عادي بدون فتحة وجير عادي ماشي 180000 ك م الون ذهبي واسفله برونزي

عطونا كم يسوى الله يحفظكم

[نجمة سهيل]

بايعها:heart:

الباثفايندر هذا سعره من 60 الف الى 67الف ،

ابو ساره:heart:

الباثفايندر هذا سعره تقريبا من 30الف الى 33الف بالكثير :)

[abos3d]

لاند 2003 VXR خليجي ضمان البازعي اللون ذهبي كل الصيانه في الوكاله نظيييييييييييييييييييييف ما شي 19000 بالله كم يسوى نسيت اقولكم انه استبنتين شد بلد مركبه و جنوط 17 انش

[Abu-Sulaiman]

السلام عليكم يا اخوان

جيب ربع تويوتا 2002 سعودي مركب له جنوط جيب لكزس ماشي 75000 فيه حكة بسيطة بالتندة من اثر سقف كراج ولا فيه اي صدوم ولا سمكرة .

كم يسوى بارك الله فيكم

[عليمي2000]

الأخوة الكرام
السلام عليكم ورحمة الله وبركاته
وبعد
لاند كروزر gxr موديل 2000 خليجي
البريمي 2 تانكي غير معدل ماشي مائة الف كيلوا
خلفية لكزس جناح 2 وسائد هوائية بودي نظيف كفرات نظيفه
كم يسوى بالريال السعودي حيث اني ارغب بالشراء فماهي نصائحكم لي ؟

[راكب الهلي]

السلام عليك ورحمة الله وبركاته

اولاً اشكر الاخ ايمن على هذا الموضوع المفيد

بالنسبة للباثفايندر اذا كان فظي من داخل بيج فهو احسن لون عند الشريطية وتقريباً يسواله على هذي المواصفات حول 60-65 وطبعاً انت وشطارتك


والله اعلم

[عباث]

السلام عليكم ورحمة الله وبركاته
الاخوه الكرام كم يسوا شروكى باب واحد موديل الفين الون كحلى نظيف بلحيل ماشى 130000
ولكم تحياتى

[نجمة سهيل]

الشروكي الباب واحد الكحلي يسوى له 20 الف وبالكثير 22الف،

وانتبه لايغشونك ، ترى قبل فتره عرض على الوالد شروكي باب واحد ابيض موديل2001 ماشي60الف ب30الف ريال ، يعني انتبه !

[عباث]

السلام عليكم ورحمة الله وبركاته
ان كانت هذي اسعاره فتكفى افزع لي ودور لي شروكي باب واحد وخذ السعي .

ولك تحياتي

[نجمة سهيل]

ابشر وانا اخوك ، وان شاء الله ابطلع بكره الصبحيه اخذ لي جوله على المعارض ، وابشر بالي يسرك ،

بس ترى تزعلني منك بهالكلمه
وخذ السعي . مابينا شي الله يسلمك ،

[نجمة سهيل]

اخوي عباث حصلت لك شروكي سبورت قير تماتيك موديل 2001 ماشي 70الف ب39الف ريال ،

على فكره الجيب كامل ماهو ربع ، شرايك يصلح لك ؟

وفيه شروكي ربع موديل 2000 لونه كحلي ماادري بالظبط كم ماشي ، لكن محدود ب30الف . .؟

[سموثي]

السلام عليكم ورحمة الله وبركاته
بصراحة أحلى من ذا المنتدى من مشرفين وأعضاء ماشفت عيني علييكم باردة
ياخوان أمس الوالد أشترى دتسن وتوي اليوم أشوف الموضوع وحبيت أعرف هل سعره مناسب أو غلبونا
المواصفات:
الموديل:2002
اللون:أبيض , غمارتين
بدي نظيف مررررررة وماكينة نظيفة
ماشي:65000km
شكراً لك اخي المشرف أيمن على هذا المقال

[البرق]

السلام عليكم ورحمة الله وبركاته

لقيت هاي لوكس غماره

4 شنكار (بدي صغير)

موديل 92 ماشي 90 الف

حجم 2400 النظافه وسط

كم تسوى قيمتها ياجماعة الخير .

تحياتي ...

[->أبو خالد<-]

بسم الله الرحمن الرحيم

السلام عليكم ورحمة الله وبركاته


الصراحه اكثر شي شدني لتسجيل هذى الموضوع المفيد


والصراحه ان كل المنتدى مفيد الله يجزاكم خير ويكتب لكم الاجر اللهم امين



انا ودي اشتري جمس حوض ولقيت واحد في معارض النسيم وكنت عجل موديل 97 والبدي نظيف


وقفت سالت عن سعره قال بـ 25 الف ونسيت اسال عن المكينه كم


ولقيت بعد جمس حوض غماره ونص امريكي الظاهر انه 94 بـ 35 ألف


وش رايكم السعر مناسب

وكان احد خابر لي واحد فانى ودي اشتري


والله يجزاكم خير على جهودكم

[الجيب الربع]

السلام عليكم ورحمة الله وبركاته

جيب تايوتا ربع موديل 1986

ماشي 177000 كلم ( مشي حقيقي مو منقص )

مصندق لونين كحلي ورصاصي

مرتبه وحده بالخلف بالعرض ............ مكيف حار وبارد............المراتب على نوابض تضبطها على وزنك

قزاز اوتوماتيك والقير عايدي.....

المكينه 4 سلندر ياي أمامي وخلفي جنوط جي اكس ار93 خليجي وكفرات ميشلان عريضه

كم يسوى يااخوان الله يعافيكم؟

:good: :good: :good: :good:

[الفحل 2003]

السلام عليكم
انا لقيت جمس شكمانين (454) موديل 80 والموتر مفحوص ومجدد بس ابغى اعرف كم يسوى في السوق .
وفية جمس قطع (10) موديل 88 ابيض اللي وجهة اربع شمعات كل شمعتين جنب بعض ونوعة شفر وليس جمس وهو وارد العيسى والسؤال كم يسوى في السوق .
وانا شاكر لكل من سيساهم في افادتي باسعار هذه السيارات وسلامتكم .
الفحل 2003

[أيمن]

أخوي الفحل أسعارهن على حسب نظافة المكينة القيور ..
وهي تتراوح غالبا ما بين 18-25 غالبا طبعا للدفرنسين .

تحيتي

[الصقر الجارح]

يالنشامى .. ابنشدكم عن الجيب الربع تاويوتا
احد عندة خلفية عن سعرة من موديل 99-2000 نرجوا الافادة مشكورين


تحياتي ...............

[زيزوم]

السلام عليكم ورحمة الله وبركاته

{GMC}
موديل1977
ماشي47الف
الاون اخضر و اخضر فاتح في النص

مصفح 400

[أبـ [مطلق] ـو]

طيب شباب . .

ابيكم تسمون لي هاذا . .

موتر واحد اعرفه معرفه قويه

موتره ددسن 92 شاريها له شريطي مجنووووون بمعنى الكلمه مشاء الله الله لا يظره

يطلع لك الي انت تبي بالسياره

المهم شراها بـ 18 الف . . وكم واحد جا يسأل عن الددسن هاذي جايها صدمات شي

وهي جاها صدمه وحده وخفيييفه جداً مع باب السواق

والآن معه تقريباً 4 او 5 شهور . . إستعمال نضيف ( ههههههه تعبان فيها كل يوم يومين يغسلها


ابيكم تجيبولي لها سعر الله لا يهينكم . .


تحيااااااتي للجميع . . :)

[كشات]

بسم الله الرحمن الرحيم
السلام عليكم ورحمة الله وبركاته

الاخوه الاعزاء
كم يسوى شاص ديزل92
ماشي 380.000
البدي نظيف ماغير دقه بسيطه باب السواق(تسمكرت من غير فك الخط)
القير فيه صوت بس حسب كلام السوداني اللي بورشة صبيا بالدمام(خبير جيوب) ان الصوت ماله تاثير وعقب ماطلع الصوت رحت عليه لصلاله(عمان)ولا صار شي ولا تغير شي
مشيت عليه عقب الصوت حوالي 15000 كم
المكينه تصرف زيت قليل (من يوم انه جديد) حسب كلام الوكاله انه شي طبيعي حيث ان المكينه ديزل
موضب طرمبة الديزل قبل سنه ونص
الصندوق ملبس صاج قلفنايز من يوم انه جديد
الاسيات والابواب والسقف ملبس قماش(شموا) يعني جخخخخخخ

اغير الزيت والفلتر(السيفون)جميع كل 5000 كم
رديتر تجاري
ونش سحب
السست مسحب 4 ريش ورا و 2 قدام

ابي اعرف كم يسوى الله لايهينكم

وهذي صورته


http://www.mekshat.com/pix/upload/images4/Copy of docu0005.jpg
والصوره اللي باعلى صفحات المنتدى لنفس السياره :(

[كايين]

ياجماعه ..

تويوتا لاندكروزر VX-R

موديل : 2000

عداد : 131000

اللون : اسود ومن داخل جلد بيج

القير : توماتيك

مواصفات : فتحه وتانكي اضافي وصدام اضافي وجناح خلفي ..

وارد : البريمي ..

التشييكات : دائما كل 5000 تقريبا في الوكاله ..

اتمنى انكم تعطوني السعر المعقول .. :)

تحياتي .. :)

[صائد الضبان]

السيارة : جيب باترول ( سفاري )
الموديل : واحد وتســــعــــون 91
اللـــون : أحــــــــــــــمـــــــــــــــــر
مميزات : نظيف داخليا ً وخارجيا ً ، القيــــر عادي ، طبعا ً دبل ، عزمه قوي جدا ً ، ماشي 270ألف كيلو متر
السيارة ليست في المعارض ولكن عند صاحبها .

[خيال الغلبا]

في اكس ار موديل 94
ماشي 200000 كيلو
زيتي اخضر
قير تماتيك
بفتحة

[خيال الغلبا]

سبحان الله من زمان طرحت سؤالي ولم اجد اجابة
يعني مافيه احد يعرف ؟

[خيال الغلبا]

لايوجد احد

[خيال الغلبا]

يالله