مما يحير بعضنا لاجاء يغير كفراته حقت الجيب وش يختار نرجوا الدخول من الجميع ليعطينا خب

[ملاحق السيول]

السلام عليكم ورحمة الله وبركاته أما بعد ممايحير بعضنا لاجاء بيغير كفرات الجمس أو الاند كروزر يتحير وش أفضل شيء ونتكلم عن جميع أنواع السيارات ذات الدفع الرباعي فما ذا تنصحونه به نريد محاوره نرجو من الجميع المشاركه وجزاكم الله خير الفائده للجميع

[خالدعبدالعزيز]

يقول المثل لا بغيت تحيره فخيره
ويقول المثل لولا اختلاف الاذواق لبارت السلع
ولكن بالنسبة لي افضل الدنلوب لو ماصراخه كان طلع احسن كفر واذا جيت اغير ماركبت الا هنكووك

[ملاحق السيول]

جزاك الله خير

[السفير2006]

الدونلوب عندي افضل
وشكراا

[ملاحق السيول]

جزاك الله خير

[شعال]

اخو اعتقد اختيارك لنوع الكفرات على حسب طبيعه المكان
يعني لو انت رايعي خطوط وطلعات على خفيف او انك راعي نفود او حجره
على حسب

ا

[ملاحق السيول]

جزاك الله خير أبغا نتكلم عن النوعين للفائده

[الخلف2010]

عليكم السلام


بصراحة انا ناوي اشتري كفرات بس محتار والكل يقول دنلوب بس الى الان ماشريت بس منهم من يمدح يوكوهاما :confused: تحيا تي ,,,,,,,,,,,,,,

[عقاب طويق]

عليك بالكفرات اللينه مثل ميشلان تدري ليش لأنك لو حسبتها فأنت ممشاك على السياره 95% منه في السفلت و5% بالبر فا ليش تجهز السياره بكفرات يابسه وتعذبك من أجل 5% ممشى بر

[شامخ ألهيلا]

اخوي دنلوب وبس لو يصارخ وتسمع اصواته لايهمك هو الكفر المناسب للجيب

دنلووب وبس

واذا شريت اشتر من الوكيل بقشان
لان يوجد في السوق اماراتي مو زين

دنلوب او كراعينكم :D

اخوك شامخ

[صاحب الكابريس]

الدنلوب وبس هذا رأيي

تحياتي

[بن عاقول]

أنا أعتقد إن الكفر الصحيح اللي يجي على نفس السيارة من المصنع وذلك
من خلال تجربة حيث كان عندي جيب تريل بليزر شريته وكالة 2003 في هاذاك الوقت كفراته كانت ميشلان
وماشية زي الحلاوة مايحتاج تنسيم كثير في البر المهم من اللقافة رحت وغيرتها بكفرات دنلوب مقاس أكبر شوي
من المقاس المصنعي بزعمي أبرفع السيارة صار الموتر مهوب طبيعي وبهذلني ناهيك عن الأصوات في الطريق
والحاجة إلى تنسيم كثير المهم رجعت كفراتي وقلت أركب كعكات علشان الإرتفاع ومشت الأمور تمام لذا أنصح
بتغيير الكفرات في حال الحاجة إلى نفس المواصفات اللي جاية مع السيارة صدقني الوكالات ماتختار عبث لأنهم
يتعرضون إلى تعويضات وملاحقات قانونية إذا تعرض الزبون لحوادث بسبب رداءة الكفرات يعني الموضوع فيه
إختبارات مصنعية

هذا رأي والله الموفق

[لبيد بن ربيعة]

أميز الكفرات بنظري من واقع تجربة : ميشلان ، ويليها : جوديير
بشرط أن تكون ذات مواصفات عالية

[لعّاب المنايا]

سيااام تااااير للجيب ومافيه غيرهـ بنظري

[ملاحق السيول]

جزاكم الله خير يا رجال

[بيبسي]

دنلوووووووب وبس.... جربتها باكثر من جيب وهي رقم 1 حتى لو تتطلع صوت... ياليت يجي منها بالون 900

[سوبر VTC]

الافضل بلا منازع المشلان الامريكي سفر او بر لكنه غالي و عيبه انه جنبه ضعيف و سبق اني جربت المشلان الفرنسي اللي يركبونه للجيب تصدقون ماراح و لا نص عمرهن الا هن مصعررات من الجنب المشكلة تاريخ الانتاج جديد
لكن انا انصه بالهانكوك سعر معقول و لين و ممتاز بر و سفر و ياكل المطب و بالرمل مممتاز كنك منسم الهواء

[آه ياقلبي]

إيه لا شريت جيب علمتكم
أنا حدي ونيت منها وجاي وبالتوفيق لي ولكم جميعاُ
يالله ترزقنا من فضلك في هاليوم الفضيل

[.أبوعبدالرحمن]

موضوع جدا رائع


من ناحية الكفرات حاليا مركب على سيارتي كفرات يوكوهاما والصراحة الكفر ممتاز لكن يعيبه القساوة شوي

كذلك يمشي ويلقط حصا بسبب نقشة الكفر وسعره ارى انه مناسب جدا وهو ارخص الكفرات اليبانية بعد الدنلوب

كذلك كفرات يوكوهاما عملية جدا وفي المقابل انها يعيبها انها تزلق وفي الرمل ممتازة وفي المقابل يعيبها قسوتها شوي



ومن ناحيتي انصح جميع اللي بيركبون كفرا بالدنلوب الياباني الاصلي ووكالته بالرياض بن زقر لانه الين الموجود تقريبا

كذلك من ناحية النقشة تقريبا هو الانعم على الزفلت وانتم بكرامه وعلى الرمل كذلك جدا ممتاز لكن يعيبه الصوت

عند اللفات وهذا ارى انه ميزة ولكن البعض يقول ان الصوت مزعج وايضا ارى الكثير يمدحون التويو ولا اعلم عنه اي شيء



وفي انتظار الفائدة من بقية الاعضاء