سؤال بخصوص النور العالي للسوبر سفاري 2002-2004

[المميـز]

السلام عليكم ورحمة الله وبركاته

مساكم الله بالخير جميعا

سؤالي الاول بخصوص النور العالي للسوبر سفاري من موديل 2002 الى 2004

لأن الواطي يجي من الوكاله زنون ولكن العالي يجي اصفر يعني عادي

والزنون مغطي على العالي الاصفر

اذا كبست العالي ماكأني كبست شي

ولا ودي اركب زنون لأن الزنون اذا صار على العالي والواطي مشكله
يصير مايبين النور وقت المطر نهااااااااائيا وانا مجربها اول على سياره ثانيه

ولكن سمعت بأنوا غاز او غازيه وش وضعها ؟؟

وابي اسأل كل اللي معهم سوبر سفاري 2002 - 2004 وشلون النور معهم ؟؟؟

هل هم مسوين شي او مرهمين شي او مخلينه على حاله ؟؟؟؟؟

سؤالي الثاني /

عن البواجي : وين افضل محل لتغيير البواجي سواء بالقصيم او بالرياض

لأني سمعت ان تغيير بواجي الفتك لازم تفك الثلاجه !!!!

وكل كم تتغير بواجي الفتك ؟؟ يعني كل كم كيلو مثلاً ؟؟؟

هذا كل شيء واسف على الاطاله

ولكم جزيل الشكر ,,,

[راعي طويلات]

وعليكم السلام ورحمه الله وبركاته
سلمك الله بالنسبة لنور العالي أنصحك تخليه على وكالته وتريح راسك من فك وركب ويمكن يضبط ويمكن لا
والمحل الي يركب بواجي اي واحد يقدر يغيرها لك بس شف لك واحد فاهم الشغله و4 بواجي بيركبون معك بسهولة بس 2 يبي لك تفك الثلاجة وبواجي الفتك مالها عمر معين أنا موتري ماشي 170ألف وتوني مغير له بواجي قبل شهر من وكالته ماغيرتها

[المميـز]

شكرا لردك اخوي راعي الطويلات

طيب يوم غيرت البواجي فرق معك بالعزم ؟

[مقلع الرمث]

اخوي انا سيارتي ماجيت العالي ابدا النور الوطي زنون والعالي عادي لكن اناء مستاء منه لكثر روحتي وجيتي مع الطرق وافكر اني اغير النور واحطه غاز لكن مدري وين لكن انا اقولك لابغيت تغير بواجي غيرهن لكن لحم مسااامير الثلاجه وكانك تبي واحد يصلحه لك بالرياض ولا بالقصيم عندك واجد

[الحاتمي1]

السلام عليكم ورحمة الله وبركاته
انا قرات موضوعك بالنسبه للانوار انا انصحك لا تغير شي لا اذا لعبت بالوزنيه ما ترجع مثل اول وبالنسبه للانوار الغاز ما انصحك بها لانها نذوب الفيش النور لانها تسحب كهرب زياده وبحاله هذي لازم تركب كتاوت يعني شغله ما تستاهل 0
اما بالنسبه للبواجي استخدم بنزين 95 وارتاح من التفتفه والكربون والتقطيع 0
هذا ما اعرفه عن السفاري لاني مستخدم النيسان من موديل 93 الى 98
والله الموفق000
اخوكم الحاتمي

[قناص متقاعد]

بالنسبه لي يالغالي

معي فتك 2002 وشاريه من 4 سنوات وفعلاً كنت مستاء من النور الاصفر حق العالي ورحت للغرابي وشريت زينون اصلي بـ 1200 ريال وماشي معي زي الحلاوه ويكفي انه يكشف لك الخط واضح .

وبالنسبه لكلام اخوي العضو الحاتمي1 انها ماتضبط الوزنيه انا اقول اني ركبته ومعي تمام ووزنيته ما اختلفت ابد .

وكذلك اخوي معه فتك 2003 شاريه من سنه تقريباً وركب انوار زينون وماشيه معه تمام .

اما بالنسبه للبواجي

انا غيرتها اول ماشريت الموتر والى الان ولله الحمد مابعد غيرتها وللمعلوميه انا استعمل بنزين 91 ولا فيه اي مشاكل
وبعدين مايفكون الثلاجه .
بل يفكون وصله الهواء التي بين الفلتر والثلاجه فقط ، والشغله سهله

واي استفسار في الفتك انا موجود

[Black VTC]

تغيير البواجي كل 90 الف كيلو تقريباً وممكن يحترق عليك البليتين اذا خربت شمعة البوجي ... سعر تغيير البواجي تتراوح بين 150 الى 200 ريال حسب الورشة و سعر البوجي الواحد 50 ريال تقريباً واذا بغيت تشتري بواجي اشترهن من الوكالة وخل معك الاستمارة عشان رقم الشاص لان الفتك يجي له نوعين من البواجي الاول 50 ريال والثاني 19 ريال :) اما الانوار ما عندي علم

[حرب]

لاصحاب الفتك انوار ازنن الاصلي بالوكاله حول 6000 وبالامارات 2500 تقريباً بالوكاله ولازم اتغير الكباس لانه مايشتغل العالي ولا اتسويه بالامارات بشارع نايف فيه كذا كهربائي يعرفله يطلع سلك من الظفيره ويشبكه بالكباس وعلى الله التوفيق

[المميـز]

مقلع الرمث
شكرا على مرورك وبالنسبة للعالي فعلا سيء جدا ولكن ضيقة صدري يوم قلت لحم المسامير , الله يستر

الحاتمي1
شكرا على مرورك, ولكن وزنية النور اتوقع مالها دخل لو ركبت زينون
وبالنسبه للبواجي انا ولله الحمد ما اعاني من تقطيع بالسياره او ماشابه
واانا ما اعبي الا 95

قناص متقاعد
شكرا على مرورك, بما انك مركب زنون على العالي والواطي عندك زنون
طيب وش وضعه مع المطر ؟؟ تقدر تشوف الارض بوضوح ؟؟ والا تستعمل
الكشافات ؟؟
وبالنسبه للثلاجه هل لحمة مساميرها ؟؟؟؟؟؟؟
منتظر ردك اخوي

Black VTC
شكرا على مرورك, بالنسبه للبواجي اانا مريت على محل اسمه باتيس
بالقصيم وقالي عنده اصلي للفتك طقم بـ 140 ريال ويقول هذي الاصليه
اللي تجي راسين اما الراس واحد الطقم بـ 60 ريال ولا ادري عنه هل
هو صادق والا لا ولكن مثل ماتفضلت الوكالة اضمن منهم كلهم

حرب
شكرا على مرورك

[حمد808]

شريت بواجي2003فتك من العامودي يقول انها اصلية60ريال

[.أبوعبدالرحمن]

الله يوفقك

من ناحية النوور اذا تبيه قوي


ركب في العالي نور (( اوسرام )) مقاسها تجيك 100 ايضا صناعة المانية ومجربها على سيارات كثيرة

اما الواطي لا تقربه فهو اجمل للسيارة


ومن ناحية البواجي ان شاء الله الشباب يفيدونك

[مواسي الطعوس]

فعلا النور العالي ضعيف... انا استخدمته سنه ثم ركبت للعالي ( اوسرام) وجلس معي بعدها اربع سنوات ماشتكيت من شي ..... ولا راح يؤثر على الموتر لان الدينمو حقه 110 امبير ( الفتك) 2001م وتحت (90) امبير السيارات الثانيه بعضها 57 امبير (وهي دفع رباعي) فاذا ركبوا مراوح كهرباء يغيرونهن


البواجي غيرتها عند 150000 الف وكما ذكر البعض تمشي عليها اكثر لكن لايعطونك حق الموديل القديموهذه علامتها السنه اللي تربط اطول مرتين تقريبا من القديمه

[المميـز]

اوسرام هذا زنون والا عادي ؟؟

وكم سعره ؟؟؟

وهل يحتاج الى كتاوت ؟؟

ارجوا التوضيح من الزملاء

ولكم جزيل الشكر على التعاون

[مواسي الطعوس]

اوسرام هذا زنون والا عادي ؟؟

وكم سعره ؟؟؟

وهل يحتاج الى كتاوت ؟؟

ارجوا التوضيح من الزملاء

ولكم جزيل الشكر على التعاون
* هذا عادي وليس زنون
*سعر االواحده 15 ريال
* لايحتاج الى كتاوت

[المميـز]

* هذا عادي وليس زنون
*سعر االواحده 15 ريال
* لايحتاج الى كتاوت

بيض الله وجهك وماقصرت على المعلومه

اجل بإذن الله راح اركبها واشوف وضعها

[الربذي]

نفس المشكله وش الحل

[ابو فهد...]

الحل سلك لكتاوت وركب شمعات قوة 300

[المميـز]

:

الحل شمعات 100 واط اوسرام المانيه ممتازه جدا وسعر الحبتين 50 ريال

بدون ترهيم ولاكتاوت

: