تفاصيل رحلتي الي الصمان نهاية الاسبوع الماضي 23-25/10

[* رمش العين *]

انتظروا التفاصيل قريباً واخبار راح تعجبكم انشاء الله
وياحبنالنا

[* رمش العين *]

بسم الله نبداء
انطلقنا من الرياض باتجاه رماح مع طريق الشرقيه وبعد ماتعدينا رماح باتجاه شويه وقبل شويه ب40 كيلو حطينا الرحال بالنفيدات وتعشينا ونمنا ( طافين طالعين من دواماتنا - يازين الاجازه) والصبيح توجهنا لم شويه وتعديناه لم ( ام عقلا الشملول ) وقبله ب4 كيلو بوه فيضتين وش زينهن ربيعهن خفيف لاكن الخير مقبل انشاء الله واستمرينا بالرحله باتجاه ( الرفيعه ) الوضع عادي جداً وبعد الرفيعه امرحنا بمكان كله ملح والصبيح شغلنا ماجلنا وحطينا احداثيات ( ام قرين) ويوم وصلناه لقين به امياهتن واجد وبعد اتجهنا الى ( حسنا السبق ) وبالطريق الي حسنا شفنى العجب من ام قرين باتجاه حسنا لمسافة 15 كيلو تقريباً فياض امتراصه جنب بعض وربيعه زين بالحبل وفيه فيضه تحت جال ما ادري وش اسمه لكن خزنت احداثيه به امياهتن اتوحش يعني بدون مبالغه بحيره بمساحة 2كيلو في نصف كيلو وبعده الى حسنا الارض مابه شين يذكر الين جينا حسنا وماراح طرق الخطوط له عبث حيث انه تسوى المشوار ولاابي احرق عليكم المتعه روحو لمه ولاانتب امتحسفين انشا الله ( والشكر لاخواني المشرفين الكرام السمح ونفل الي جابو طاري حسنا الاسبوع الماضي )
وياحبنالنا

[طباخ العزبه]

ما قصرت يا رجل عزالله انك جبت العلوم الغانمه :good:

بنشدك ياخوي حسنا مفتوح شبكه ؟ يعني تدخله السياره ؟

وليتك تكمل معروفك وتعطينا كم احداثيه من الفياض الزينه الي بين حسنا وام قرين

ولا تعبت يا الذيب

[* رمش العين *]

جزاك الله حير على مرورك ياخوي ياطباخ العزبه
بالنسبه لحسنا السبق بوابته مفتوحه وجلسنابه وتغدينا يوم الجمعه
والحداثيات مهب معي هالدقيقه لكن اغدين احطه بالموضوع باكر انشاء الله
ويــا حبـــنـــا لــــنــــا

[عبدالعزيز الدباسي]

الحمد لله على السلامة اخوي رمش العين .

ومشكور وما قصرت على الاخبار الزينة والعلوم الطيبة

[صقر]

مشكور اخوي * رمش العين *


رحلة وكأننا معكم بس وين الصور (لو واحدة)

واخبار طيبة والله يتبع للأمطار بالتبوع المباركة ...

مشكور وبارك الله فيك ....

[* رمش العين *]

اخواني الكبار الشقردي وصقر اشكركم على مروركم ويشرفي تعليقاتكم
وبالنسبه للصور للاسف ماكان معي كاميرا وبالرحلات الجايه انشاء الله نطعم الموضوع بالصور
اخوي المشرف الرائع شقردي امل ان كان ممكن تضيف للعنوان تاريخ الخميس والجمعه الماضيه لاني مالي صلاحية اضافه لوه
اخوكم الصغير رمش العين ( ابو متعب )

[نفل]

السلام عليكم ورحمة الله وبركاته

اخوي رمش العين

مشكور والله يعطيك الف الف الف عافية على العلوم الزينة والله يبشرك بالخير وبصراحة ودي اسأل عن الطريق بين الشملول ( ام عقلا ) الى الرفيعة تقول عادي قصدك ان الارض مهيب ممطورة من المطر التالي والمنطقة مابها ربيع ؟ ولا مربعة بس ربيعها وسط . ومشكور مرة ثانية

اخوك نفل

[* رمش العين *]

اخوي الغالي نفل مشكور لمرورك وبالنسبه لاستفسارك عن المنطقه الي شفتوه ان الارض ممطوره لكن ماربعت لدرجة انوه مالقينا محل انتغادابوه الى عند دركال بوه ماء والله يجيب الخير

[أبرق الضيان]

أشكرك أخي رمش العين على التقرير الجيد ، و لكن المرة الثانية خذ كميرة لأن الكاميرة تغني التعليق هذا كله أو جله .

ثم ودي تعلمنا معنى ( امياهتن ) !!!!

إحداثي موقع روضة حسنا السبق :

050 11 27
818 24 46


:D :) :)

[نقا هشال]

* رمش العين *
مشكور
وماقصرت على العلوم الزينه

[* رمش العين *]

اخواني ابرق الضيان نقاهشال جزاكم الله خير على كلامكم الطيب واوعد اخوي ابرق الضيان البي طلبك في الطلعه الجايه وقريبه مهب بعيدة

[عبدالعزيز الدباسي]

بشر يا ابو متعب عسى العنوان جازلك

[عاشق الشروكي]

مشكور اخوي رمش العين على المعلومات بس تكفى لا تنسى الكاميرا المرة الجايه لان الصور اعتبرها تتويج للرحلة وذكريات حلوه لا تنسي ولك تحياتي

[* رمش العين *]

تسلم اخوي ومشرفنا الغالي شقردي وجزاك الله كل خير

[hiskol]

أخوي رمش العين مشكور على العلوم الزينة , سمعت إن الطريق من شوية إلى الرفيعة مزفلت هل هو صحيح أم لا . وش أخبار العجاج صبح الجمعة بالصمان عسى ماأثرعلى النبات .؟ وشكراً

[* رمش العين *]

مشكور اخوي hiskol على مرورك وبالنسنه للطريق بين شويه والرفيعه غير مسفلت ولكن يشتغلون فيه وتنجبر تطلع عن الردميه في بعض المواقع من كثرت المعدات الي فيه
وبالنسبه للعجاج يوم الجمعه انشاء الله انه ماراح ياثر على النبات لانه في حسنا السبق بعد الظهر ما درينا بالعجاج وسط الفيضه

[Khalid AlGhamdi]

ومن تفاصيل الرحلة اننا تقابلنا على الجهاز :D وان شاء الله نلتقي في رحلات جديدة باذن الله .

عموما انا صورت صور من حسناء السبق ومن بربك دغيم ومن ام قرين وللمياه ولكن ماهي موجودة عندي الحين وانا اكتب هالرد ، عموما انا بطلع اليوم ان شاء الله للصمان وبجيب معاي صور جديدة غير القديمة حقت الاسبوع الماضي وان شاء الله تعجبكم واذا حبيتم تشوفون صور الطلعة اللي فاتت فانا بنشرها بعد اذن اخوي رمش العين ( داخل عرض بموضوعه ) :)

[* رمش العين *]

حياك اخوي MaxPower وبيض الله وجهك وماني ناسي معروفك يوم عطيتني احداثيات حسنا السبق على الكنود
وخذ راحتك الموضوع موضوعك وموضوع الجميع وانشاء الله نتقابل في ارض الصمان
ومشكور ياراعي الفزعات

[راعي الرغبه]

اخوي رمش العين السلام عليكم ورحمة الله وبركاته,,,,,,,,,,,,,
والله ماقصرت وبيض الله وجهك على ها العوم الزينة :good: :good:

[ابو شكاع]

ما قصرت يا اخيي

وترى احد الاعضاء اللي هو اخينا ابرق الضيان طلب معنى كلمة ((امياهتن))

غديك تشرح له

الصراحة غريبه انك ما فهمته يا ابرق الضيان ؟

وتسلم

[جبل كميت]

تسلم يا رمش العين
ومشكور على المعلومات القيمة
بارك الله فيك
أخوك
جبل كميت

[* رمش العين *]

مشكورين اخواني ابو شكاع وراعي الرغبه وجبل كميت وكل من مر وعلق على الموضوع وبالنسبه لاستفسار خوينا الغالي عن معنى كلمت ( امياهتن ) في الحقيقه هي كلمه من التراث الصيني ولو رجعنا للمعاجم الفنزوليه والمراجع الموزمبيقيه في المكتبات الهنديه في بريطانيا لوجدنا ان الكلمه ذات اصول نجديه قصمنجيه وتعني ( كميات كبيرة جداً من الماء ) وياحبنالنا - واذا فيه اي استفسار عن معنى كلمت ( ياحبنالنا ) الرجو الرجوع الي الاخ ابو شكاع وداري فيه واحد يبي يقول طيب وش معنى شكاع ترانا ماحنب خالصين من مواضيع الاناشيد اليوم