سؤال عن افضل نوع كفرات بالون 900/16

[بيبسي]

اخواني الاعزاء.... السلام عليكم ورحمة الله وبركاته
حبيت أسألكم عن افضل نوع كفرات بالون مقاس 900/16 انا سألت بالرياض ولقيت نوعين اندونيسي وياباني ... وش رايكم وش النوع الممتاز واللي متوفر عندنا بالرياض ووش مواصفات النوع الجيد يعني كم غاط ...لأني قريت بالمنتدى ان فيه انواع تنشق على طول ولا تتطول وانتم عارفين هذي كفرات وهي اهم شي بالسياره ... اللي يعرف لا يبخل علي الله يعطيكم العافيه ...

[جنتل1]

افضل كفر ابو جمل (ماكسس)تيواني والله انه من الكفرات المضبوطه وهو كفر قوي 100% ويوجد نوعان منه 6 كاندس 8كاندس وهذا افضل واقوى ويمسك رقعة التوبلس اللي هو 8 كاندس ويااخس اخذه وتوكل على الله وتراي مجربه من زمان وقنصت فيه بماكن والله ماتصدق وعره والله ماخبر انه ضرب معي وصناعنه تيوان واشير عليك فيه ولاتتردد وعلى العموم اي كفر بالون عند السير عليه بعد وقفه طويله تقريب ست ساعات او اكثر يكون فيه هزه خفيفه (عرجه)في الكفر لاانه لين وبعد مسافه تذهب العرجه

[بيبسي]

افضل كفر ابو جمل (ماكسس)تيواني والله انه من الكفرات المضبوطه وهو كفر قوي 100% ويوجد نوعان منه 6 كاندس 8كاندس وهذا افضل واقوى ويمسك رقعة التوبلس اللي هو 8 كاندس ويااخس اخذه وتوكل على الله وتراي مجربه من زمان وقنصت فيه بماكن والله ماتصدق وعره والله ماخبر انه ضرب معي وصناعنه تيوان واشير عليك فيه ولاتتردد وعلى العموم اي كفر بالون عند السير عليه بعد وقفه طويله تقريب ست ساعات او اكثر يكون فيه هزه خفيفه (عرجه)في الكفر لاانه لين وبعد مسافه تذهب العرجه
مشكور اخوي جنتل1 الله يعطيك العافيه ... بس فيه شباب بالمنتدى مامدحوه وواحد قال انه انشق بعد شهر ... والثاني يقول مدة الماكسس ابوجمل ست شهور بس ...

[.أبوعبدالرحمن]

اتوقع الماكسس هو الافضل لاني والله مالي علم بالبالون


لكن الماكسس اشوفه منتشر مع اللي مركبين بوالين وبالذات مقاس 900

[جنتل1]

مشكور اخوي جنتل1 الله يعطيك العافيه ... بس فيه شباب بالمنتدى مامدحوه وواحد قال انه انشق بعد شهر ... والثاني يقول مدة الماكسس ابوجمل ست شهور بس ...

ياخوي من اللي يقول مدته 6 اشهر على حسب وضعك في المقناص والهواء فيه ومشاويرك انا جلس معي اكثرمن 6اشهور ومانب اقر وسافرت عليه يااخي الى اماكن والله ماتصدق وماتحرك الكفر والله ماتلاحض عليه انه تحرك ورفيقي مركب الكفر له اكثر من سنه وسافر عليه الى مكه عدة مرات ولى اماكن بعيده ولله ماتصدق ولكفر عطه هواء ولاعليك عطه ثلاثين هواء وتبي تدعيلي وبعدين الكفر خفيف على الموتر وانصحك ركبه وفي الختام اقول (ليس المهم ان يقنع الناس برايك ولاكن المهم ان تقول ماتراه حقاً)

[ممتر البران]

انحش عن الماكسس
صحيح قوي ويتحمل لكن فيه اجود منه وقد ما تدفع يلقى راج وانتشر لرخصه
من عيوبه يتمسح بسرعه
وضعيف بالنسبه للشوك ما يبنشر معي الا بالجوز
وعلى الازفلت تكرمون ما يصلح اذا اكثر وقتك بالبر ركبه لانه مهوب متمسح وبيعيش لكن اشر لك درزن رقع والله يعينك
عليك بالسيام تاير رقم واحد
لكن يعيبه ان ماله وكيل على حسب كلام كم واحد يعني ما تدري وش مصدره
و رقم ثنين سموتومو
ما مثله وان كانك تبي نقشة بالون خذ الشاهين في سخيف وفيه عريض ولا الدنلوب نفس نقشت البالون بعد لكنهن الثنين الاخيرات مهمب بالون لكن حول الدعوا بالمقاس والشكله والنقشه واكفا على الازفلت وبالبر طويلات باع ما عليهن
ولهن وكلاء كلهن الا السيام
للمعلوميه الدنلوب نفس اللي يجي على الشاص الستاندر
بس يبيلك تتعب عشان تلقا الاخيرات اما الاول ما يبيله تعب

هذا والله اعلم
تحيتي لكم
ابو سعد

[بيبسي]

مشكور اخوي ابو عبدالرحمن واخوي ممترالبران ... مثل ماقلت الدنلوب والشاهين السخيفه هذي ممتاز وخصوصا مع الجنوط الحديد ..

[بيبسي]

اللي عنده معلومه يفيدنا .... ولا خاب من استشااااااااااااار ...

[رعد الجنوب]

السلام عليكم ورحمة الله وبركاته

انا لي تجربة مع البالون الماكسس 900 جنط 17 على Gxr
جربته مقناص مناطق وعرة جدا مقناص ضلع ممتاز جدا جريته ثلاث مرات كفر ممتاز انس البنشر او انه يضرب معك ,لكن لاانصح باستخدامه داخل المدن او عند نزول الامطار , خلاصة النصيحة لاتستخدمة الى اذا كنت طلعاتك للبر كثيرة وخاصة للا ماكن الوعرة ,
واذا كانت ناوي على ماكسس خذه من الوكيل مباشرة ارخص بالسعر وتاريخه جديد الوكيل الهاجري موجود في الدمام وبريده .
تحيتي وسلامي

[بيبسي]

الله يعطيك العافيه اخوي ...رعد الجنوب ... بس انا بالرياض وين القى الوكيل .. وكم اسعاره مقاس 16

[خشيمان]

والله انا عن نفسي مركب بالون ولا عجبني

يا خي ما ينفع في الديرة
ما هنا رساوة
ثقيل بالحيل
اذا كان به ماء بالزفلت الله يعينك

بس بالبر ما عليه كلام

[بيبسي]

اجل مالي الا اخذ ماكسس رخيص وماهوب حسووووفه ... كنت ناوي اخذ سيام وهو غالي شوي ... بس ابي اركبها معي اف جي ونازل شوي وودي ارفعه بكفرات البالوووون ماابي العب فيه بالياي والمساعدات والكعكات..

[لعّاب المنايا]

سيااام تاير 8 غاط

ولا تشاور وأنا اخوك ,,

وش نوع موترك ؟؟

[بيبسي]

اف جي كروزر ...... بس اخاف اني ماارتاح لها وارجع شد البلد وش رايك

[حرب]

نصيحه اخويه ركب ماكسس 8 غاط وعلى مسؤليتي وتأييد لنصيحة بعض الاخوان

[الطبشي]

السلام عليكم ....الماكسس...والسيام تاير...ماعليها كلام

[بيبسي]

خشيمان ... لعب المانيا ... حرب ... الطبشي
مشكورين اخواني الله يعطيكم العافيه ..

[ناوي نيه]

شف المركز الاول سيام تير
المركز الثاني (هيرو) وهي الممتازه متوفره في المحلات وسعرها ارخص من السيام
المركز الثالث المكسس

[بيبسي]

اول مره اسمع بالهيرو من وكيلها وهل تنباع بالرياض وبكم سعرها الله لايهينك تراي مالي بخص فيها ...

[بيبسي]

للرفع ,,,,,,

[رعد الجنوب]

السلام عليكم

اخوي وكيل كفرات ماكسس الهاجري الرياض ت2444649

تحيتي وسلامي

[ناوي نيه]

والله ماأعرف مين وكيلها بس انصحك وبشده على الهيرو وسعره يمكن يفرق خمسين عن المكسس

[بيبسي]

اخواني ... الله يعطيكم العافيه

[فهد-بوعبدالله]

بالنسبه لي مجرب الافضل
1- سياام تاير مفوقه شي
2- هيرو ممتازه جدا
3- مكسس اكثر الي يركبونها لانها الوحيده تجي مقاس 17

[بيبسي]

اجل شوركم وهداية الله ... خلاص ركبتها ولله الحمد

[شبل ثرمد]

مسى الخير يابيبسي
ما قلتلنا وش ركبت كفرات ومنين وبكم السعر

[بيبسي]

ركبت ... سيام تاير اخذنا طقمين انا وواحد من الشباب بصراحه هي اعرض شوي من الماكسس وضمانها سنه ... واخذتها الكفر بـــ 520 ريال ... بس بصراحه ترصيصه لك عليه ابي ارجع ارصصها وين تنصحوني ووش افضل الارضي او العادي

[بيبسي]

ركبت كفرات بالون سيام تاير بس بصراحه ترصيص اللي ركبها لي لك عليه ابي ارجع ارصصها وين تنصحوني ووش افضل الارضي او العادي... الله لايهينكم