وش افضل شي لرفع الاند الجي اكس اار

[شامخ ألهيلا]

السلام عليكم

اخواني المكشاتيون

حبيت اسالكم وش افضل شي لرفع الجيب بحيث لاتخرب شكله ولايصير مرفوع بالحيل ولاينزل عند التحميل عليه

هل هي البالون
ام الكعكاات
ام المساعدات الاستراليه

اخوكم
شامخ ألهيلا

[ابوعقل]

اليايات الأستراليه

ممتازه واحد من اخوياي مركبه على هدد

اكيد عندك خبر ان يايات مقاسات

[ابولولو]

عليكم السلام اخوي شامخ كان معي في اكس ار حطيت كعكات 3سم وغيرت الياي تغير وارتفع وسط

[شامخ ألهيلا]

اخوي ابو عقل تقصد المساعدات ولا فيه يايات

اخوي ابولولو الله يخليها لك
هل يلزم تغير اليااي مع الكعكاات

[خيام الندم]

يالطيب نصيحه ركب بالونات اللي بوسط الياي انا مجربهن شي خيال يرتفع الموتر على المقاس اللي تبي
ومطب خيااااااااااااااااااالي
يبدأ يلعب الجيب يطامر كنك على سرير شي خيالي مع البطانيج اذا قام الجيب يرتفع وينزل .. ويسبح مع البطناج القوي والقشع .........
مطب لين لين مرررررررررررررررره
نصيحه ركبها وعمليه للبر والتحميل والقنص ورخيصه ب 900 مع التركيب بشارع العروبه بالرياض
مقابل مستشفى العيوووون
ركب وارقد ....... شي مجرب بصراحه عمليه وقويه وربما احد يقول لك لاتركبها مهيب زينه
هذا رأيي انا فقط انا معجب فيها جدا وفي مطبها الخيالي .. نصيحه لاتروح الرمايه وتشري يايات وانتبه تركب كعكات تراها تضغط على الياي ومعد يصير بالياي مساحه للمطب ويصير الياي ضاطه عليه الكعكه ماياخذ راحته الياي مع ومايرتاح ظهرك .................. 17 جمادى اخره 1429 هـ

[الشقردي]

أوافق
دوار العويضة

[باثفايندر03]

الكعكات تعبر ورخيصه
اليايات افضل في التحميل واقسى
البوالين اغلى والتحكم من عندك

هذا وضيفه كل وحده بختصار...

[ابوعقل]

اذا تبي ترفعه من ورا

ما يحتاج تغير المساعد

ركب الياي الأسترالي على طول ((وبيرفع الموتر))

اما الكعكات فاشله

يمكن تنكسر عليك

والبالون اللي يتكلم عنه دوار العويضه

انا سمعت عنه بس يمكن لا قدر الله ينفجر مع الضغط

وانت شف وش يناسبك وركبه

[شامخ ألهيلا]

دوار العويضه يامااااال العافيه انا ميولي على البالون من زمان بس خايف منها ومعي زميلي مركبها لها 3 سنوات ويمدحها

الشقردي لاهنت على مروورك

باث فايندر ربي يسلمك على هالمعلومات وبيض الله وجهك

ابوعقل سلمت الياي او المساعدات الاستراليه ارتفاعها ثابت على ماظن وفيها قساوه
وسعرها حوالي 500 ريال وتركيبها اقل شي 200 ريال المجمع 700 فرق 200 ريال عن البالون مع التركيب

اتوقع اني راح اركب بالون وبنزل صورة عن قريب ان شاء الله



لاهنتوا يارجاال

اخوكم شامخ الهيلا

[ابوعقل]

تركيب الياي ب 200

ليه تركي ((هذا خويي)) لقي افلوسه بالشارع

والله التركيب اقل من 80 ريال

ننتظر الصور ((طريقة التركيب))

[بيبسي]

الا ياشباب البالووون هذا وش وظيفته ووشلون يتركب وهل يصلح لكل السيارات ..وبكم .. وهل هو يجي فوق الياي ووشلون تتحكم بالارتفاع زي الهيدروليك يعني .. ابي شرح مفصل الله لايهينكم

[شامخ ألهيلا]

ابوعقل وين الي يشتغل بي 70 ريال هالحين الا ابو يمن يشتغل لو تقول بعشرين
بس على قوله الهندي واحد صلحه عشره خراب وانا ماثق فيهم

هلا فيك اخوي ببسي
طال عمرك البالون يجي على شكل طولي ويدخل داخل الياي ويكون له مخرج بلف يحطون داخل الرفرف
وتتحم في الارتفاع والنزول من خلال هالبلف

اخوكم شامخ

[الشويش مرسي]

السلام عليكم

والله ياخوي انا معي جي اكس ار وركبت له كفرات بالون وارتفع علما بأن يوم كان كفرته شد بلد كان نازل للارض بالحيل ويوم ركبت البلون تغير شكله بالمره

[سنجااار]

المساعد الاسترالي خذ مقاس اربعه ممتاز ولا ينزل الموتر مع التحميل أل شي مايلاحظ

[الشقردي]

الشويش مرسي
خوينا يحكي عن البالون اللي يدخل داخل الياي بشكل عامودي بحيث لو نفخته تمدد وسحب معه الياي لأعلى, واذا حملت يصير الياي ماسك ولا ينزل وفي نفس الوقت مطبها مريح بعد التحميل. بعكس كفرات البالون صحيح ترفع الموتر بالكامل وشكلها حلو بس اذا حملت الله يعينك على المطب.

أخوي شمخ الهيلا:
البوالين أنا ماركبتها الا بعد ما سألت وحكى لي واحد راعي طرد طيور وقنص يقول ماشية معي ولا شفت منها عوق, وانت تعرف راعي الطير اذا كفخ ما ينظر الارض وهو يمشي.

بس أهم شئ تنتبه لهواها مع غيار الزيت ونصيحه قالها لي واحد يستخدمها من فترة. الضغط لا ينزل عن 15 إلى 12
ولا يزيد عن 25
وفيه موضوع عنها في المواضيع المميزة.
وبالتوفيق