ياشباب أنا ناوي

[ملاحق السيول]

ياشباب أنا ناوي على الباترول 2008 فل كامل أفخم شي وعلى كلام قبل كنت حاجز لاند كروزر بحوالي 177000 ولاكن أمس كنت عند تيوتا وسألة الموضف قالي ترى حقك على الأقل شهرين وأن كنت حاجزه قبل شهرين وسألة الموضف عن التخشيبه والتحكم عن طريق الدركسون قال حقك بدون والله أنا تعجبة وفكرة بالباترل قلة نفس السعر ومواصفات أزين وقالي الوالد لاتخذ إلالاند كروزر وأن أبغا رأيكم

[ذيب طي]

والله يالحبيب انا من رأيي انك تحاول تقنع الوالد وتخاذلك بـــاتــرول
صراحه انه موتر عليه الكلام وقيمته فيه :good: وبعدين الباترول مايحتاج تستشير احد فيه أسطورة ٌ قديمة
ومحد يقدر ينكر لك تاريخه المعروف- يكفيك انه ياباني100% والرأي الاول والاخير لك

[ملاحق السيول]

جزاك الله خير وترى الوالد ماغصبني ولاكن قال التيوتا يمسك سعره والنيسان مايمسك

[باترول للأبد]

والله الباترول موتر ينشد فيه الظهر وخاصه لاصار 2008 سوبر سفاري ياسلام ياسلام

واللي يقولك الباترول سعره يطيح غلطان عند ولد عمي باترول ربع 89 مصبوغ وباعه بـ 28 الف فما بالك بالجدد

[أبو LAMeS]

جزاك الله خير وترى الوالد ماغصبني ولاكن قال التيوتا يمسك سعره والنيسان مايمسك
أسمع كلام الوالد يوفقك ربي يجب علينا طاعة الوالدين ما لم تكن في معصية الله

صحيح إن الباترول قمة سيارات الدفع الرباعي لكن طاعة الوالد أولى

حاول تقنعه إن مسألة مسكة السعر مبالغ فيها جدا وقل له يسلمك عليك أبو لميس ويقولك كان معي لاندكروزر جي أكس آر 2006 أخذته بـ 152 ألف وخسرني في حدود العشرين ألف ريال ريال ينطح ريال وكان ماشي فوق الأربعين ألف كيلو

أرجع وأقولك أسمع كلام الوالد الله يكتب لك الصالح

[ملاحق السيول]

جزاكم الله خير ولاكن إن شاء الله بأقنع الوالد

[shababi]

الباترول موتر بر لكن ما فيه مقارنة من ناحية الراحة اللاند افضل مليون مرة

[فارس العمور]

اللاند مبالغ بسعررررررره كثيررررررررررررررر والجودة انخفضت كثيرررررر

[بيبسي]

نصيحه لا تتعدى اللاند كروزر نصيحه لو انتظرت اربعه شهور وراي الوالد في محله اللاند افخم واصبر ويمسك سعره ... خذ النصيحه

[شورت]

السلام عليكم


نصيحه لاند كروزر وبس الباترول لايوجد منه في امريكا والسبب غير معروف اكيد في شي ولا ليش ما في منو في امريكا

[ملاحق السيول]

جزاكم الله خير

[احمد الدوسري]

السلام عليكم
نصيحتي لك لاند كروزر وارد البازعي مكتوب على الباب Made in Japan
نصيحتي لك لاتقعد تقول بعيد ياليت وياليت
وترا الوالد الله يطولك عمره ابخص منك انا مشيت على نصيحه الوالد وماندمت ..

وشكرا ....

[ملاحق السيول]

جزاكم الله خير

[شامخ ألهيلا]

تبي نصيحة اخ جرب الاثنين والصيانه والمركب وقطع الغيار

خذ لك لاند كروزر لو انه مصنوع في سيرلانكا

بعيد عن القيمه وعن كل شي
مركب الاند وصيانته وقلة اعطلانه تكفيك

من خلال وجودي في موقع مكشات من فترة عرفت شي واحد
ان الكل عنده قناعه داخليه للباترول ويريد ينقلها للغير بدون مصداقيه
لو احلف لوجدت ان من ينصحون في الباترول هو مجرد اعجاب بالشكل ولاكن وقت الشراء يتجنبوونه
انا جربت جميع سيارات النيسان من الصني والمكسيما والباترول والباترول الشاص والددسن
وتاكدت من شي ان افضل ماصنعت نيسان هو الددسن البخاخ فقط
انقل لك من خلال تجربتي
لايجيني احد ويقول فتك اعرف ان الفتك قوي ومكينته جبااره ولاكن لاتستطيع مقارنته مع الاندكروزر عملياً

لاتتعدا شوور الوالد اكبر منك واعرف منك

نصيحه قدمها لي شايب في المعارض يقول وقتها كنت شاري ماكسيما ونادني
وهو من اصحاب المعارض
يقول ياولدي اشتر مع الناس وبع مع الناس واركب مع الناس ولا تشذ عنهم

اخوك شامخ

[ملاحق السيول]

ماقصرة ياشامخ الهيلا كفية ووفية وجزاك الله خير أنت وجميع إلي ردو من الإخوان وذي من عوايدكم

[سيف الظفير]

خذ باترول من المسعود في الامارات واذا انت قليل الطلعات للبر خذ لاندكروزر بس بريمي

[ملاحق السيول]

ليش حق أبو جميل مهبب زين

[بيبسي]

لا تاخذ الا منه ...... عشان الضمان 100000كلم او 3 سنوات

[راعي طويلات]

من ناحيتي ماني مادح نيسيان ولاتويوتا الزين يفرض نفسه
من نيسان مواتر تبطي تويوتا تجيب مثلها ومن تويوتا مواتر ماجابت مثلها النيسان ومحد يختلف عليها
وبالنسبة لي عندك الباترول والددسن والمكسيما هذي عز النيسان والي يذمها ماجربها والا طاح له في مواتر منتهيه منها وحكم على الباقي أنه مثلها
أما التويوتا عندك الشاص والكامري >خصوصا 2002 وتحت غيرها لاتدور
والمثل يقول لولا اختلاف الاذواق لبارت السلع
يعني الي معجبه نيسان يشتريه والي معجبه تويوتا يشتريه
وعن نفسي لو يجيني فتك سوبر سفاري 2008 والا مسخره الارض أخذ فتك بدون ماشاور

[ملاحق السيول]

جزاكم الله خير وبارك الله فيكم ولوسمحت ياراعي الطويلات إحترم مفخرة الأرض لانه شيخ المواتر البريه ومايهون الباترول

[فيدورا]

ديرتي الفرعة..
ياخي طلّع قروشك من عبداللطيف جميل وخذ لك لاند من المعارض.. كثر التراب تراهن ، وش اللي تصبر شهور علشان تطلع موتر!! ومن ناحية الباترول انا شاريه جديد موديل ٩٥ كربريتر واستخدمته ٦ سنين والله ما أحط فيه الا زيت وبنزين وفلتر زيت.. وقبل لا أبيعه بشهر غيرت بواجي وسير وكفرات.. اللي يقول يقرقع صادق لكن موتري والله ما قد سمعت فيه صوت من اللي يقولون.

[ملاحق السيول]

هم يسون حجز بدون قروش

[ملاحق السيول]

للرفعععععععععععععععععععععععععععععععع

[كاشخ 24 ساعه]

شوف اخوي

خذ اي سياره تويوتا ماعدا اللاندكروزر الجديد

وخذ اي سياره نيسان ماعدا الباثفاندر الجديد

وسلامتك

[ملاحق السيول]

كلامك صحيح بالنيسان لكن التيوتا لاتأخذ البرادو

[كاشخ 24 ساعه]

كلامك صحيح بالنيسان لكن التيوتا لاتأخذ البرادو





ههههههههههههههههههههههههههه


البرادوا خذه ولا تشاور يالحبيب خاصه ان 2008 فيه هيدروليك

مكينته نفس مكينه اللاندكروزر 2008 السته سرندل ووزنه اخف وقوته 240 حصان ويوجد به خاصيه التحكم بالسيارة اثناء المنحدرات.

[ملاحق السيول]

البردو ممتاز لاكن اللاند كروزر 2008 أفضل منه بكثير خاصه 8سلندر

[abuud]

انا والله شريت باترول 2008 بعد ماشاورت وسألت اكثر من سنة بعده رسيت على الفتك ولله الحمد راحة وقوة

[راعي المقانيص]

تويوتا انهبلت من تالي وانا اخوك باسعارها الخيالية والخرافية


انا من المعجبين بـ تويوتا واكره السفاري ماهو باسباب خرابات ولا شي ولكن حاجه نفسيه والباترول بكل صراحه قوي وصلب وممتاز واكبر منافس للاندكروزر الي اخذ شعبيه بزياده عن اللزوم

ولقتنا لعبه انتي يا شركة تويوتا وقامت تلعب علينا وتضرب بالاسعار وللاسف حنا نراكض ونشتري وياليتنا نشتري وحنا نملك الفلوس كاش لا نعذب اعمارنا بالتقسيط والتأجير والمستفيد الاول والاخير انتي يا تويوتا ولكن لو قطعناها لمدة موديل واحد يعني سنه وحده ورحنا للبديل عن تويوتا مثل السفاري او ماشابه راح نشوف تويوتا تصدرت بالعروض والتخفيضات والاسعار الزينه


أجل كامري 2008 فل كامل جديده بـ 92000 ريال ؟ ؟ ؟ ! ! !


هذا ماعندي ياغالي واعتذر عن الاطاله

[ملاحق السيول]

والله كلامك بمحله

[Magellan]

أنت ياديرتي الفرعه حاجز Gx
8 سلندر وهذا من كل دفعه يجي سيارتين والباقي 6 سلندر
لو إنك طالب 6 سلندر كان فورا وبأجزاء من الثانية وفروه
المهم نخلص من الدوامة اللي حطيتنا في وسطها ياديرتي الفرعه ويوفقك بالموتر الزين وينتهي هالمسلسل المكسيكي اللي وصلت حتى Cnn:D
وتاخذ بنا دوره بهالمبروك إن شاء الله وتراه يستحق الإنتظار

[خوي عليان]

لانكلوزر وبس وش السفاري عادوالله ولدخالي ماخذ موديل2008 مهو مريع مر باعه على وحد بنفس قيمته ماخسر شئ بس اشترى 2004 123،000الف وسلام سلام ولاكن الاستخاره لبد منها

[سوبر152]

وعن نفسي لو يجيني فتك سوبر سفاري 2008 والا مسخره الارض أخذ فتك بدون ماشاور

[القبقب]

التويوتا وبس . يكفى أنك تركب موتر سموه شيبان اليابان مفخرة ألارض .

[سيف الظفير]

للمعلومية لاندكروزر 2008

فيه مشكلة مصنعيه وهي عمود الكردان يطيح من مكانة وصارت هذي المشكلة مع اماراتي وقطري وطلعت هذي المشكلة في بعض السيارات السعودية.


والوكلاء الخليجيين استدعوا السيارات على اساس العيب المصنعي من الكفرات.

[escape_man]

تبي نصيحة اخ جرب الاثنين والصيانه والمركب وقطع الغيار

خذ لك لاند كروزر لو انه مصنوع في سيرلانكا

بعيد عن القيمه وعن كل شي
مركب الاند وصيانته وقلة اعطلانه تكفيك

من خلال وجودي في موقع مكشات من فترة عرفت شي واحد
ان الكل عنده قناعه داخليه للباترول ويريد ينقلها للغير بدون مصداقيه
لو احلف لوجدت ان من ينصحون في الباترول هو مجرد اعجاب بالشكل ولاكن وقت الشراء يتجنبوونه
انا جربت جميع سيارات النيسان من الصني والمكسيما والباترول والباترول الشاص والددسن
وتاكدت من شي ان افضل ماصنعت نيسان هو الددسن البخاخ فقط
انقل لك من خلال تجربتي
لايجيني احد ويقول فتك اعرف ان الفتك قوي ومكينته جبااره ولاكن لاتستطيع مقارنته مع الاندكروزر عملياً

لاتتعدا شوور الوالد اكبر منك واعرف منك

نصيحه قدمها لي شايب في المعارض يقول وقتها كنت شاري ماكسيما ونادني
وهو من اصحاب المعارض
يقول ياولدي اشتر مع الناس وبع مع الناس واركب مع الناس ولا تشذ عنهم

اخوك شامخ

اوافقك الرأي او بعضه في ان للناس في ما يعشقون مشارب لكن انت قررت وحكمت وما انصفت بكلامك الي علمته باللون الاحمر فوق.

التويوتا ماعليها كلام والي بيقارن بينها وبين نيسان بالجودة من رايي الشخصي يغالط نفسه

ولكن من جهة ثانية .. مواصفات الباترول فل كامل وفوقه حبة راس ماتجيب الي بخاطرك من متجات تويوتا

اضف لذلك ان الباترول ومن تجربة شخصية ( فتك 2003 و فكس آر 2006) بالنفود وبالبر .. الباترول امتع بكثير ومافي وجه مقارنة بالراحة والجبروت ..

القضية قضية موازنة وليست فرض آراء .. الا من اعطاه الله سعة بالمال فهذا يحق له يتخير وربي يرزقنا وياه

الي على قد حاله وبالغثى طلع قريشات هالجيب .. من رايي ان الباترول ند قوي جداً وفيه بركة وعيوبه ترجع لسوء استخدامه

[وقيان]

الكروزر اقوى للاستخدام..هذي مافيها كلام..الباترول يتميز بعزمه... واللي قالك ماينزل سعره ..تراه يغشك...

و ان كانك بتغمض عيونك عن عيوب الباترول...نصيحتي لك لاتاخذ الا مستعمل..تلقاه جديد ونظيف وطايح من قيمته 10 آلاف الى 12 ألف ريال....حرام تاخذ جديد والله...و الرأي الأخير لك

[ملاحق السيول]

جزاكم الله خير وبارك الله فيكم على الردود الطيبه

[سلطان الغامدي]

نصيحه لاند كروزر وبس

[الادعج]

نصيحة لوجهه الله ..بخصوص اني انا ابشري سيارة وش اشري؟؟؟ مثل الامور هاذي حاول انك ترضي قناعتك الشخصيه وتشوف خاطرك لوشو مايل لهذا ولاذاك ...فيه ناس لوتقوله خذ لاندكروزر^2008 خصوصا^بــ20000 كان يقولك معصي ..وفيه ناس لوتقوله خذ باترول بــ20000 يقولك معصي ..المساله اهواء وخواطر وميول شخصيه ..يعني بالنسبه لي اشوف نصبه الباترول 2009 بالشارع ووقفته اطلق من الاند الجديد...بالاخير ارضي ميولك الشخصيه وخل عنك كلام فلان وعلان ..لاني صراحة اشوف شراء سيارة مهوب بالامر السهل

[يكفيني نظرة]

احمد انا معي باترول 2006 وماشريته الا من نقص الدراهم لكن التويوتا معروف انه متربع على عرش القوة يكفيك قطع غياره مناسب وتلقاه بالبقاله من كثرة توفره ولو يخرب يزينه لك الخباز مهوب الميكانيكي من سهولته وش لك بالنيسان وقطع الغيار الغالي على غير سنع هذا غير مشاكل الكهرب المشهورة نيسان بها والله يرزقك الموتر اللي يجمد على الشارب ويبارك لك به.

[ساري 111]

لاتعدى شور الوالد .. فهو الراي اللاند تكده ثلاث اسنين مايتغير فيه شي عليك هو الجديد واحد
اما الباترول قبل يتم سنه انواع القرشعه والديكورات وهو جديد اذا ضغطته بيدك ترقل وقبل يتم سنه يضعف عزمه عن الجديد بشكل ملحوظ وتلقى نفسك تلاحق الورش تغير بواجي وصفيات وتازن الديلكو وتعديل على الكمبيوتر وتركيب هدرز <<كل هالسواليف ماتلقاه إلاعند واحد معه باترول اما التويوتا غالباً تلقاه صامل ومهب بحاجه هالامور الاواحد متهور او مراهق

لكن لاتاخذ من عبداللطيف جميل خذ من البازعي او اليحيى او رح جبه انت من البريمي


لعلمك لو شريت لاند ولااعجبك يمديك ترجع تبيعه بخساره بسيطه وتشري باترول

بينما لو اخذت باترول ومااعجبك مايمديك ترجع للاند لان خسارته بتكون قويه شوي



موفق اخوي

[الصــرح]

لو قالك ابوك الله يحفظه خذ دباب ،،، لاتشاور احد وانا اخوك

انت ماتبي الخير والاجر والبركة والتوفيق وووو ؟

[ahmad995]

شامخ الهيلا كفى ووفى
لا انكر ان الباترول مكينه قوية وشكلة حلو
لكن مشاكله ما تعد ولا تحصى ومركبه مافيه اي مقومات الفخامة
انا اشير عليك تصبر شهرين في سبيل سيارة تستاهل هالمبلغ

[abofahd55]

اخوي احمد صبحك الله بالخير


وجهه نضر من اخوك ابو فهد


انا مجرب الاثنين التويوتا يطربك بقله الاعطال ورخص القطع وصرفيه البنزين

وعلي قوله الوالد شيك في المخبات واذا انت راعي تمشي في البر لا تتعدي التويوتا


اما اذا تبي تنشد عن الخط والراحه والمطاليع والعزم الفتاك لا تبعد عن الفتك

<<<<<<< اسال مجرب

[ابوسعد931]

عليك بالتايوتا ترى الوالد معه حق

[ابوحمد666]

شف الشيوخ وش تركب
تحياتيhttp://www.mekshat.com/vb/showthread.php?t=241147

[باثفندر]

شباب الله يهديكم الموضوع قديم الرجال إن شاء الله قد إنه شرا الموتر وقضى !!!!

[ابوطاقية]

الاخ سعد الغامدي منبش المواضيع القديمه والاخوان ماقصرو