ياشباب مكشات ياخبرة السيارات ياأهل الباثفيندر

[الحنشولي]

شباب مكشات ياهلا والله بشوفتكم ومتابعة جديدكم

أخوكم الحنشولي يبي فزعتكم

أنا بإذن الله ناوي أجوب الجزيرة من الرياض إلى تبوك ثم ابرجع من طريق الساحل الغربي

سيارتي باث فيندر 2005 وماشي 95000(95ألف)

حتى الآن ماغيرت فيه شيء ماغير الزيت واليسفون وأعبئ بنزين وغيرت الكفرات


(السؤال اللي يطرح نفسه مالأشياء المطلوب تغيرهها وفحصها قبل السفر

وماهي الورشه الجيدة وأين تقع وكم رقمها .

علما بأني من سكان شرق الرياض

الله يعطيكم العافية والصحة ويحفطكم من كل سوء تقبلوا تحيات زميلكم الحنشولي )

[سوسة حطب]

أخوي الله يهديك إلا لازم تغير شي :p

1- شيك على الكفرات إذا كان يبيلها تغيير لا تتردد .
2- شيك على البطارية ضروري .
3- الخراطيش والسيور ومساحات القزاز والانوار .
4- شيك على الفرامل .
5- شيك على أسفل الموتر اذرعه مقصات وغيره .
ودائماً تذكر أن هوناك أناس ينتضرونك في مكشات :D

[أبو أسامة]

تروح ورتجي بالسلامة .......

بالنسبة لصيانة الباث ........ شيك على الزيوت عامه يعني زيوت الدفرنسات والمكينه والقير وغير الفلاتر يعني فلتر المكينه والبنزين وفلتر المكيف عشان ما يغثك بريحة الغبره الله يكرمك ...... وشحم عمود الكردان وعمود الدبل وغير البواجي لأن البواجي للباث تتغير كل 100000 كيلو وأنت من بعيد عنها ..... وتأكد من سلامة شمعات الأنوار ..... ونصيحه دام أنت بتسوي ذا كله غير السيور أحسن لك حتى ولو كانت السيور اللي عليه لا بأس بها والسبب أنك مسافر وقد ينقطع عليك السير وتقعد تشر للعالم .... وتأكد من موية الرديتر ولازم تكون الأصلية لأنه تتحمل دراجات حراره عالية ولاتتبخر بسرعه والسبب الثاني الأهم أنه ما تسبب صدى بالراديتر....

بالنسبه للمكان اللي تعمل الأشياء سابقت الذكر فيه لا أستطيع أن أنصحك بشخص بعينه لأن الذمه واسعه عند الكثير من أهل الورش ..... والله المستعان .

والله يوفقك لما يحبه ويرضاه .

[الحنشولي]

سوسة حطب

أبو أسامة

الله يوفقكم ويرعاكم ويسدد خطاكم

ماقصرتوا الله يسلمكم ويخليكم

ومازلت اريد تحديد ورشة معينة متخصصة بالباث

اخواني مالي إلا الدعاء تراي مسافر ودعوة المسافر ماترد

[المحترف800]

تروح وتجي بالسلامه ...
1/ شيك على السيور وإذا بتغيرها أحسن إذا ماقد غيرتها لاني انا غيرت السيور يوم موتري مشى 60 وكانت تعبانه يعني تحتاج تغيير ..
2/ شيك على البطاريه والمويه والزيوت لان الأجواء عندنا بااااااااااااااااارده بالحيل:p :p ..
3/ الكفرات وماأدراك مالكفرات أهم شي ..
وتوكل على الله ولاتنسانا من دعاك ...

[الحنشولي]

أخوي المحترف 800 الله يزيدك من فضله

شكرا على هذه النصائح الرائعة

الله يسلمكم ويحفظكم وعذرا على ازعاجكم اخواني رواد مكشات
أخوكم الحنشولي