ابي ورشه تقلب يوكون من دفرنس الى دفرنسين

[غالي]

السلام عليكم ورحمة الله وبركاته

اخواني عندي يوكون موديل 2000 طبعا شارينه وكاله من العيسى
وللاسف انه دفرنس
وابي اقلبه دفرنسين اذا احد عنده ورشه او يعرف ورشه مضبوطه بس تكفون ماابيه يجرب على سيارتي

ابي ورشه قد اشتغلت من قبل تراني ما احب وجع الراس وارجع للورشه كل اسبوع من خراب يقابلني بسبة شغلهم

بالعربي ابي واحد مضبوط وله خبره

وكم تكلف؟

واذا كتب الله ولقيت الورشه الي تقلبه وعندهم سمكره

ابيه يكشف الشنطه ويخليها حوض يعني يطلع غمارتين فقط

هي خاربه خاربه وبنعميها :p

الي يعرف الله يجزاه خير يدلني واكيد تكون بالرياض ماابي برا الرياض لاهنتوا

وشكرا لكم:good:

[بيبسي]

والله ياخوي انا عندي لك رأي ...مادام اللي معك نظيف ومعكم وكاله...ترهيم دفرنس ثاني بيكون صعب وبيكلف كثير...احسن حل !!! انك تبيع السياره وتدور لك واحد محركاته نظيفه وممشاه حلو ويكون دفرنسين شد بلد ويكون بديه يمشي الحال... وعدل فيها براحتك ... وبكذا ماراح يكون فيه تكلفه

[غالي]

ايه اخوي معك حق

لكن الي معي بديه جيد او اقل من الجيد لو احد يبيه ب32 بعته عليه وزدت وشريت دفرنسين

بالعربي البدي مو ذاك النظف والمحركات الحمدلله مافيه شيء والمكينه ما شاء الله نظيفه والموتر ماشيء 120 الف بس لا تهريب زيوت ولا شيء
ولا عمره سافر الا من الرياض الى الشرقيه بس
يعني موتر مدينه بس
فا مدام اعرف الموتر ميكانيكيا نظيف ولا به خربات اللهم البدي بس هو الي بحاله جيده
حرام اني ابيعه واكسره صراحه
وتوه مفحوص ومجدده الاستماره
قلت اقلبه دبل واشتري معه موتر صغير اريح لي من وجع راس هالمواتر النار


وشكرا للنصيحه اخوي وجزاك الله الف خير :)

[بن داود]

يرجال غير شغل الوكاله لاتدور وتركيب دفرنس ثاني يبيلها ناس خبره

انصحك بعه واشتر ثاني به دبل

[shababi]

نصيحه بعه واشتر لك واحد ثاني والجمس تارسه المعارض وبتحصل انظف من الي معك

[راعي هوى]

والله ياخوي مثل ماقالوا الشباب حرام لانه راح يكلف شي واجد تبديل للقير وشيالات ودبل وظفيره وقصه مالها اول ولاتاي انا اقول افتك بعه واشتر دبل منه وفيه

[غالي]

على يدكم تخبرون لي واحد دفرنسين؟؟
2000 او 2001
بس ابي سعودي ماابي امريكي
وسعره معقول ومحركاته نظيفه
وشكرا لكم جميعا على النصيحه بيض الله وجيهكم

[sameer_1798]

أنت تقول ميكانيكيا نظيف لكن حط في بالك أنك بتغير المكينة و القير و الدفرنس الخلفي و تشتري دفرنس أمامي يعني بتغير الاجزاء المهمة
أنصحك توكل على الله و خذ بشور الشباب دور لك دفرنسين أفضل لك .

[بيبسي]

غالي وش فيه من سمكره اليوكون ووش لونه وكيف حالته الحراره والمكيف والرجه والحذفه ... بصراحه ابيه لسواق عليمي

[غالي]

اخوي سمير وش دخل اغير المكينه؟؟؟؟!!!!!!!!!

توني صراحه ادري اني اغير مكينه

اخوي بيبسي الي معي مسمكر رفرف قدام وباب خلفي كلها بالبدي جايه صدمتين مو قويه والباقي خدوش موجوده

والحراره ولله الحمد ماتجي النص تحت النص لكن ابشوف بالمعارض ان مالقيت موتر منيب بايعه

وشاكر لنصايحكم مره اخرى

[ابوعقل]

اسمع الكلام اللي يفيدك

بعه خارج المنتدى

لأن الشريطيه واجد ويبون يكسرون سعره

واذا تبي بيعه طيبه

وان شاء الله يجيب اكثر من 32

قبل ما تبدا الدراسه وده للمعارض

وانت وين ساكن علشان افيدك بالونيت ان شاء الله

[speed 557]

كلام شباب في محله و عين العقل

[شامخ ألهيلا]

اخوي بعه ودوور لو استعمال امريكي نظيف دفرنسين
لاتنسى البهذله ومشاوير التشاليح وقطع الغيااار واي مسمار يركب بيكون بحساابه ورااح يكلفك اكثر
ولاتنسى اخطاء الورش في التركيب يعني اذا اشتغل فتره ماراح يطول ولايكون بجوودة شد البلد

اخوك شامخ

[سحاب شقراء]

شف وانا اخوك غير الياباني لا تدور

خذ لك كروزر هدد قديم

اصبر واقوى من اليوكن

هذا الي انصحك به

واسأل اهل الخبرة من الي تعرفهم

[سيف الظفير]

بعه وخذلك شااااااص للبر وافتك من اليوكن

[sameer_1798]

اخوي سمير وش دخل اغير المكينه؟؟؟؟!!!!!!!!!

توني صراحه ادري اني اغير مكينه

اخوي بيبسي الي معي مسمكر رفرف قدام وباب خلفي كلها بالبدي جايه صدمتين مو قويه والباقي خدوش موجوده

والحراره ولله الحمد ماتجي النص تحت النص لكن ابشوف بالمعارض ان مالقيت موتر منيب بايعه

وشاكر لنصايحكم مره اخرى
أخوي غالي المكاين ماهي وحدة و الدفرنس الخلفي أيضا يختلف عن اللي عندك .
يعني يلزمك تغير القطع إلى قطع دفرنسين : المكينة , القير , الدفرنسات
وطبعا عمود الدبل و التعليق الأمامي .

[غالي]

والله اجل بهذله اخوي سمير


على كلام واحد يقرب لي برا النت سألته وقال مايجي تكلفتها 15 الف
ولا قال مكينه
دام السالفه فيها مكينه ونصيحة الاخوان ماقصروا بيض الله وجيههم

شوركم وهداية الله
ندور لنا جيب لو اخلي اليوكون للدوام والمشاوير


ماقصرتوا كلن باسمه وسلمت يمينكم وجزاكم الله الف خير

[لن أمل من العطاء]

الاشياء الواجب تغييرها في حالة تركيب الدفع الرباعي

1- الشاص ( لان فيه في الامرم مساكات تمسك الدفرنس الامامي وجمالات لجربوكس لدبل وتغغيير في مكان الجبركس حق السيارة
2 - الظفيرة الرئيسة للسيارة لان لا يوجد بها اسلاك الدبل
3- الكمبيوتر . (الوكالة لفا تستطيع تغير السوفت ووير للكمبيوتر لوضع خيارات الدفع الرباعي)
4- الفلنجات الامامية
5- الجيربوكس يتغير لان نهاية الجربوكس الدفع الخلفي عبارة عن عمود كردان والرباعي عبارة عن دائرة يركب بها جيربوكس الدبل
6- تغيير عمود الكردان الخلفي
7- تغيير اليايات الخلفية وتغيير المساعدات الخلفية والامامية والجوزات الاربع الامامية

الاشياء الواجب زيادتها يعني مو تغيير مثل ما ورد بالاعلى
1- دفرنس امامي بكامل ملحقاته من جلد ومسامير وحساسات وعكوس
2- جيربوكس لللدبل بكامل حساساته واسلاكه وعمود كردان امامي
3- شراء حامل لجربوكس الدبل

وحاجات كثيره ودقيقة

السعر يقارب قيمة السيارة نفسها وزد على ذلك الخرابات وسء التركيب وسوء القطع لانها من االتشليح والبهذلة وعدم الراحة وتخوف من الخلل المفاجئ

ولو يجزم لك من يجزم على قدرته في تركيبها بدون اي مشاكل وباقل التكاليف لا تصدقه ابدا ابدا

اخوكم


لن امل من العطاء