بخصوص الجمس قطع عشره

[عاشق z71]

السلام عليكم ورحمة الله وبركاته

ياجماعة الخير انا قبل فتر رفعت موتري جمس حوظ قطع عشره موديل 2000


والحين ركبت كفرات كبيره شوي وابي ارفعه زياده


بالنسبه لقدام المسمار رفعته لاخر شي وابي ارفع زياده وش الحل ؟

مع العلم اني دايم اسمع بشغلة تقليب المسامير ياليت الي عنده فكره عنها يشرحلنا كيف ؟

او اي طريقه للرفع من قدام ؟

اما من ورا معروف ان ارفعه بالسست بس هل توجد طريقه غير السست ؟



اتمنى تفيدوني ياخوان

واكون لكم شاكر وممنون

[Ibrahim.O]

اخوي صدقني شغلة التلفيق تضر الموتر

واللي يقول لك اقلب المسامير فهو غلطااااااااااااااان

بيضر موترك لو تاكل مطب ولاشيء وانت مسرع

الحل ركب لك كت ترفيع ما ادري وين يبوعونه بس انت ابحث عنه

اول شيء انه مايضر الموتر وثانيا يعطيك رفعه حلوه خصوصا اذا كفراتك كبار

وثالثا شكل الموتر يطلع هبااااااااااال وهذي صورة غمارة شفر قطعة عشره مركب الكت :

http://www.cars-club.com/up/8-2-1/carsclub_79421052.jpg

لو تلاحظ في عمود تحت الموتر هذا هو الكت

ولو تشتريه من النت افضل

[طارق الحربي]

الكت غالي وتركيبه غالي


بس افضل وأأمن للموتر واريح

بس ابسألك الله لا يهينك وين سويتها وبكم وهل حسيت بتغير بمركب الموتر والراحه ؟

[عاشق z71]

يالغالي ابراهيم تدري عقب ماشفت الموتر الي انت حاطه كرهت موتري خخخخخخخ بصراحه موتر ماشالله رائع بمعنى الكلمه

وبالنسبه للكت انا سالت عنه غالي مره وبصراحه ماقدر عليه ؟

عشان كذا سالت عن طريقه ثانيه ونا ابي اساتفسر عن اي طريقه ثانيه مو شرط تقليب المسمار بس حبيت اعرف كيف طريقت التقليب .

وشاكر لك يالغالي تواجدك



اخوي طارق الحربي هلابك يالغالي بالنسبه للسست تقدر تركبها عند اي واحد بالصناعيه والمسمار عادي ترفعه بالبيت


وان كان قصدك عن الكفرات ركبتها بالغرابي والراحه خلني اعلمك

انا رفعت الموتر قبل ماركب الكفرات وكان مطبه اقشر لدرجة ان المسجل السي دي احيانا يقطع من قوي المطب


بس يوم ركبت هذي الكفرات الكبار صار تغير جذري بشكل ملحوظ حتى من ناحية السي دي صار مطبه مريح جدا جدا اريح من قبل ماركب سسته


وشاكر لك يالغالي وبالنسبه لك اخوي ابراهيم ان كان تبيني اوريك صورة الموتر ماعندي مانع بس ابيك تفيدني بالرفعه من قدام تكفى بغير الكت

[Ibrahim.O]

من قدام مافيه الا المساميرترفعها على آخر شيء

وبخصوص التقليب لو سويته وجا موترك شيء بتندم وتقول ياليت :)

انا موتري كنت رافعه من قدام ( جمس سوبربان 2005 ) والآن يبي تغيير جلد المقصات !! مع العلم اني رافعه شوي بس ..

المهم انا اقول اذا الكفر مايحك لاترفعه زياده واذا يحك يا انك تفك الكفرات واذا جت معك دراهم اشتر الكت

او انك تتأكد ان تقليب المسامير مايضر وتقلبها بس وجه الموتر بيلعب معك وممكن تحتاج انك تدبل المساعدات

وعلى فكره كم سعر الكت مع التركيب ؟

[ابوعقل]

لو تعرف احد يطلبلك قطع من امريكا

كان احسن

شف شلون

http://www.Pixsup.com/uploads/60d4fd73a2.jpg (http://www.Pixsup.com)

http://www.Pixsup.com/uploads/919af3b715.jpg (http://www.Pixsup.com)

http://www.Pixsup.com/uploads/8a67839bc7.jpg (http://www.Pixsup.com)

http://www.Pixsup.com/uploads/97efe43557.jpg (http://www.Pixsup.com)

هذا الرفع ولا بلاش

لا تقول سست ولا مسامير

انا كنت رافع الجمس من قدام

بس ما ينفع ابد

اتمنى اني افدتك بالصور

[صحن قلابة]

لاترفعه والله ان تندم انا معي واحد قطع عشره إذا مسكت الخط يلعب الهوى به لعب

[عاشق z71]

والله انكم تحيرون خخخخخخخ

بس ياجماعه ظروري الرفع لموتري اولا لاني ركبت كفرات كبيره واذا مارفعته بتظيع شكل الكفرات

ثانيا انا ماني راعي هبال انا اهم شي الشكل يطلع صح


طيب بسال عن شغله ويمكن تظبط

لو مثلا رحت التشليح واخذتلي مسامير حقت جمس حوظ 2500 تجي ارفع بكثير واركبها بدال الي عندي هل تتوقعو فكره ناجحه ؟



انتظر ردودكم بفارغ الصبر ؟

[عاشق z71]

للرفع الله يرفع مقداركم

[Ibrahim.O]

وش قصدك مسامير 2500 ؟؟

ياليت تقول لي كم سعر الكت مع التركيب

[ناوي نيه]

انت شف رح لمختص فاهم بهل شغلات واسأله قله بوش تنصحني

ياليت تقول كم يكلف الكت..؟

[عاشق z71]

هلا فيكم بالنسبه للكت تبدا اسعاره 3500

والمسمار الي اقول عليه ياخوي ابراهيم

الحين الجمس الحوظ الي يجي حجمه 2500 يجي ارفع من موتري الي هو 1500

انا اقول وش رايك اروح التشليح واخذ المسمار حقه حق حجم 2500 تتوقع خطه ناجحه ولا ماعندك احد خخخخخ


انتظر ردكم

[Ibrahim.O]

والله ما اظن انها تنفع

لآن الشاص حق ال 2500 يختلف عن ال 1500 والدفرنس يختلف واظن هذا هو اللي رافه الموتر

بخصوص الكت

انت تقول تبدا اسعاره من 3500 ......... يعني في انواع تختلف ؟

ووين حصلته في الرياض ؟

وبصراحة لو انا مكانك بأصبر لين يجي معي دراهم واركبه لانه بصراحة يستاااااااهل ويعطي الموتر نظرره

ولو انك جامعي او موظف جمع من هالمكافئة او الراتب يالله لك الحمد واشتره :d

[طارق الحربي]

ما اشوف انه مفيد

مجرد رأي :)

[Ibrahim.O]

هذا غمارة مفخذ عليه الكت طبعا 6 انش والكفرات كباااار مره ما اعرف المقاس

http://www.protrux.com/gallery_images/2007-04-06_11-06-42_seths_truck_001.jpg

http://www.protrux.com/gallery_images/middle_2007-04-06_11-08-55_seths_truck_007.jpg

[Ibrahim.O]

اخوي طارق انا اتفقع معك

لكن لو انك مكان اخوي صاحب الموضوع

مركب كفرات كبيره وتبي ترفع موترك

وش تسوي ؟؟

اكيد الكت هو افضل حل .... كشكل ومايضر الموتر

وعلى فكره اخوي عاشق Z71 ترى لو تقلب المسامير بيرتفع من قدام ومن ورى ينزل

يعني كنه مطروح من ورى

والكت لفت

يرفع من ورى وقدام

[طارق الحربي]

انا معك شكله حلو

بس وش فايدته للسياره ؟

هل اقدر احمل زياده مثلا ؟

[Ibrahim.O]

طبعا ماله علاقة بالتحميل

لكن انا مثل ماقلت في ردي السابق

اللي ركب كفرات كبار وتحك في البودي لازم يرفعه بالكت عشان مايضر موتره خصوصا لو انه جديد

لكن اللي ماركب كفرات ماله داعي يرفعه

[عاشق z71]

اخوي ابراهيم انا صرت معد انام باليل والسبه انت وذا الصور الي تحطها تعذبني فيها الله يصلحك خخخخخخ

والصوره الاخيره المفخذ هذا اخو موتري طبق الاصل حتى اللون والكفرات الي عندي نفس حجمها لاكنها ارفع


بس ماشالله الموتر الي انت حاطه ابداع ابداع ابداع


بس تكفى يابراهيم تكفى ابيك تستفسرلي عن قلبة المسمار لان هو الحل لوحيد الي قدامي

انت شكلك فاهم وعرفت وش الي انا ابيه

ابيك تشوفلي اذا منه ظرر ولا لا بغظ النظر عن لعب الوجه وبالنسبه لورا انا بزيد سسته منور اذا رفعته من قدام


عموما انا بنزلك صور موتري اذا تبي عشان تشوف وتحكم بنفسك


انتظر ردك يالغالي

وبالنسبه لاخوي طارق

انا الي اعرفه ان الكت ينفع للتحميل بشكل ماتتصوره هذا غير الشكل الخيالي الي يعطيه الموتر

يصير اذا حملت عليه ماينكسر ظهر الموتر بالهين


ومشسكورين ويعطيك العافيه


بانتظاركم

[Ibrahim.O]

اخوي ابراهيم انا صرت معد انام باليل والسبه انت وذا الصور الي تحطها تعذبني فيها الله يصلحك خخخخخخ


نفس حالتي والله
يا اخوي كلنا متعذبين من الحوض
موتر يوسع الصدر ودك تشتريه وتدخله في صالة بيتكم ... يكفيك منظره

عالعموم بخصوص قلبة المسمار باحاول اسال عنها
لكن اذا مافيه الا هالحل اقلبها وتوكل على الل بس خلك راكد شوي مع المطبات
او فيه حل ما ادري ممكن يكون ممتاز
انك تقلب المسمار وتدبل المساعدات تخليها دبل ممكن هذا ينفع ... بس ممكن يكلفك اكثر من سعر الكت !!!
بس مثل ماقلت الافضل انك تصبر لما تجيك دراهم واشتر الكت
او انك تشتريه من النت يكون ارخص واااااااااااجد

[طارق الحربي]

لا حول ولا قوة الا بالله


الظاهر اني ابصير مثلكم واركب كت :)

كنكم هيضتوني شوي

[عاشق z71]

انتظرك يابعدي

الا بسالك انت وش موترك خخخخخخ؟

[Ibrahim.O]

موتري جمس سوبرباان 2500 موديل 2005

وان شاء الله ناوي على السييرا Z71 الجديد بس خل يلين راس الوالد :)

بالنسبة لك اخو طارق

والله مهيب شينه ههههههههه

ركب لك كفرات كبيره مع الكت ويطلع موترك ماشاء الله

وهذي الصورة اهداء لكم بس بدون كت هههههههههههههههههههههه

http://www.cars-club.com/up/8-2-1/carsclub_68575993.jpg

[عاشق z71]

ماشالله اجل بتطق الجديد الله يرزقك بالي تبي يالغالي

والصوره تراها ماطلعت

وتراني انتظر ردك عن تقليب المسامير <<< نشبه خخخخ


اخوي طارق يالله طقلك واحد وخلنا نصلح قروب خخخخخ انا وانت وابراهيم

[طارق الحربي]

الموتر موجود 2004 مفخذ

بس الكت يبي له تفكير شوي :)

[Ibrahim.O]

أخوي عاشق Z71

رايح اشتري لي قطعة اليوم من الصناعية

وسألت واحد يمني راعي ميزان شكله فاهم

المهم يقول فيه شيء افضل من التقليب

اللي هو تشتري مسامير اطول من مسامير البلد

وتركبها بدل المسامير الاصلية ويرتفع الموتر

بس لازم تفك المقصات الامامية كلها

وبأسألك برى الموضوع شوي

لحية موتري اللي تحت الصدام طايحة شوي و كلبسات البلاستيك متكسره يبي لي كلبسات جديده

ورحت للجميح والعيسى ومحلات القطع وما حصلتها ؟؟؟؟؟؟ وين احصلها فيه

نفس الشيء أبي قاعدة الكشاف اللي في اللحية ؟؟

اذا عدنك علم وين احصلها عطنا خبر

[عاشق z71]

والله شف يالغالي

بلنسبه للكلبسات اذكر في واحد بصناعية علي بن علي ام الحمام

محل صغير سوداني لي يبيع فيه محل مختص كلبسات ومسامير المحل موجود جوا الصناعيه مع الورش موب برا مع محلات القطع اسال عنها كلن بيدلك عليه

وعندي اقترتح لك ازبن من الكلبسات رح اشتري مسامير وصواميل ووردات وركبها انت بنفسك شغلها اظمن من الكلبسات واسهل . فهمت علي ؟


وبالنسبه لليمني الي سالتلتي عنه طيب معقوله اخلى الموتر بدون مقصات : على حسب فهمي ان المقصات ظروريه جدا للسياره ومن الصعب اشيلها ولا وش رايك


ياخي والله مدري حيرتني ذا الرفعه ؟



وشاكر لك يالغالي تعبك وتعبناك معنا هاليومين ؟الله يعطيك العافيه وانتظر ردك بخصوص المسمار ؟ يعني اتوكل على الله واشيل المقص ؟



اخوي طارق الحربي : الرفعه مايبيلها ارفع موترك وتوكا على الله يغدي شكله وحش بين المواتر

[عاشق z71]

اخوي الهامور قصدي اخوي ابراهيم ;)

ابسالك تقليب لمسامير هل شغلته متعبه وصعبه وكم ياخذ وقت تقريبا ؟

[Ibrahim.O]

^^ياقافطني هههههههه

المهم

انا قلت لك المقصات لازم تفكها عشان تركب المسامير وترجعها

مافيه موتر يمشي بدون مقصات :)

اما الوقت ((( اتوقع ))) تآخذ وقت طويل شوي لانه بيفك لك المقصات والمسامير الاصلية وبيرجعها مره ثانية ............

انت لو تروح للصناعية وتساله عن كل شيء راح يوضح لك الامور كلها

أما الكت اخوي طارق ترى يبيلك تنزل القير والظاهر العمود اللي طالع من الدفرنس يبيلك ترفعه بعديعني شغله معقده شوي.......................

بخصوص الكلبسات اخوي عاشق Z71

رحت للمحل حق السوداني اللي في الزاوية ويقول ماعندي !!

والمسامير والصواميل اللي انت تقول عنها فيه مقاس محدد ولا اي مقاس ؟؟

نفس الشيء قاعدة الكشاف ماحصلتها لازم اشتري كشاف كامل جديد والان اللي راكب عندي كشاف واحد

والكشاف الثانيه ماله قاعده وشكل الموتر يفشل

[عاشق z71]

لا يالهامور <<< ماسكه معه يفظحك خخخخ

بالنسبه للمسامير قصدي راكب اي مسمار بصامولته يعني رح دور وخذلك مسمار قصير وركبه بدال الكليبس تراه اظمن واريح فهمت علي
يعني اهم شي مسمار وصاموله على قد الفتحه


اما قاعدة الكشاف والله مدري اذكر انا شريت كشافات زمان وخليت القديمه بالمستودع هل القاعده تجي راكبه بالكشاف ولا بالسياره ؟
اذا بالكشاف بدولك اياها بالمستودع وعساني القاها .

[Ibrahim.O]

أوكي بأجرب المسامير

والقاعدة نعم تجي مع الكشاف واذا حصلتها عطني خبر

[عاشق z71]

معليش توني ادخل من امس فلذالك بكره انشالله ابي انبش المستودع وادعي اني القاها .

[Ibrahim.O]

معليش بأسالك عن الدبل

هل واجهت مشاكل مع الدبل في موترك

لأني سنعت ان الدبل الكهرب حق الجمس خرباته واجد

[طارق الحربي]

وش الخراب اللي بالدبل ؟

او وش يطلع لك هل الازرار تطفى وتشتغل او رساله بالطبلون ولا وش ؟

[Ibrahim.O]

لا لا

انا ماعندي دبل

بس ابي اسال واستفسر

[عاشق z71]

هلا اخوي ابراهيم

بالنسبه للدبل حق الجمس مامنه مشاكل انشالله اذا كان الاستعمال سليم

بس لاحظت ان اغلب الناس تشتكي منه لسببين الا وهي

1: الدبل يجيم يعني تشبك الدبل تلاقيه ماينشبك وهذا غالبا يكون السبب ان الحساس مجيم او معلق والسبب هو عدم تشغيل الدبل لفتره طويله


يعني مفروظ الواحد اذا طول ماشغل الدبل يحاول يشغله كل بين فتره وفتره

2: هو ان الدبل يفصل عليك بالصيف

وهو سبب انك ترتفع درجة حرارة القطع بالدبل فيقوم اتوماتيكيا الدبل يفصل لمده معينه

وهذي صارت معي مره وحده رحت الثمامه وصلت هناك العصر وجلست اطعس ومشغل المكيف والجو حار جدا < سموم > وفجاءه اشتغلت اللمبه عندي بالطبوان لتدل على ان الدبل فصل

لاكنه بعد مابرد على طول رجع واشتغل


في شغله ثالثه الناس تشكي منها الا وهي خراب الحساسات

وهذي سببها الرئيسي انهم يشغلون الدبل والسياره تمشي او انهم يشغلون الدبل الثقيل بدون مايطفي السياره



وللمعلوميه بعظ الناس تقول حركة الحساسات الكثيره بالجمس مالها داعي


وهذا خطء لان وجود الحساسات يغنيك عن الفرارات الي العالم تركبها

والفرارارت يبيلك اذا دخلت البر تنزل بنفسك تشغله واظافه الى شكلها الفاشل يعني تخرب شكل الجنط

الحاساسات تغنيك عن هذا الشي


اختصار كلامي اذا استعمالك للجمس استعمال صحيح وسليم صدقني اكثر سياره بتريجك هي الجمس



وشاكر لك

[تمساح نجد]

اخوى فيه محلات فى الصناعيه القديمه عند حقين قطع غيار الجمله تحصلهم ورا البنك الأهلى فيه محلات متخصصه مساعدات وأى شى تبيه لزوم الترفيع أنشا الله تحصل عندهم او يفيدونك بى معلومه

[عاشق z71]

مشكور ياتمساح نجد والظاهر اني عرفتهم انت تقصد الي عند وكيل مساعادات جبريال ؟


بمرهم انشالله وبشوف