المساعد الشخصي الرقمي

مشاهدة النسخة كاملة : عطل في قير الاتومايتيك Vxr98 تجاربك وخبرتك مطلوبه .. الفزعة


الشقردي
08/07/2008, 10:33 AM
السلام عليكم

قبل حوالي الشهر صرت أحس ان القير اذا غير من واحد إلى إثنين يغير بسرعة, وبعدها بفتره صار إذا جا يرد نمرة يعطي صوت طقة ويحصل هالشئ اذا مشيت على سرعة 40 ودعست البنزين, ويزيد صوت الطقة إذا سويت نفس الحركة على سرعة 80 فما فوق,

باقي والتغييرات طبيعية وسلسه جدا 2-3-4 ,

حست بين الورش اللي يقول لي كلتشات قير لازم نفك ونشوف
واللي يقول احتمال فضاوة في الدفرنس والعكوس الأمامية أو الفلنجات (ما أدري بالضبط وش سمّى):confused:

الوكيل أبو جميل رحت لمه جزم انه قير وعطاني أسعار خياليه بدون ما يركب السيارة وشكله يبي يصرفني.

يقول بس نفك القير بـ 1800 ونعلمك الخلل واذا ما صلحته عندنا تاخذ السيارة بسطحة مفكوك قيرها:mad:
وزودها يوم قال مستحيل تطلع التكلفة بأقل من 15000

عجبي ان الموتر ما جاه كرف وهو ماشي 240 ألف, زيت القير أغيره كل 60 ألف تقريبا:no:

أرجو من واجهته نفس المشكلة أو حولها يدلي بدلوه , ويدلنا على بعض الورش اللي شغلهم زين ومجرب

ولا نستغني عن أهل الخبره

ودعواتكم بالتوفيق والله يجيب العواقب سليمه :(
البدر1
08/07/2008, 10:38 AM
ممكن تكون الضفيره الموجودة داخل القير تاكد من الاسلاك وذللك بفك الكرتير التاكد من الاسلاك
Magellan
08/07/2008, 10:51 AM
أخوي أولا حتى تحكم لابد إنك تعاير الزيت فإذا كان أحمر ولافيه حرق فكلتشاته سليمة
وتغيير الزيت وفلتر الجربوكس ضروري اذا كان الجربوكس سليم اما اذا كان هناك خلل في الكلتشات
او التروس فبقاء الزيت والفلتر ووجود البرادة او اثر الاحتكاك مهم لسد المسام والفراغات لبقاء الجربوكس اكبر مدة ممكنة ...
أما الصوت فعادة يكون من الصليب عند الدفرنس أو الطنجرة (البطيخة) ممكن فيهن فضاوة
ابوعقل
08/07/2008, 11:39 AM
وين موقعك؟؟؟؟؟؟؟؟؟
الشقردي
08/07/2008, 02:02 PM
حيا الله كلن باسمه

لمزيد من التفاصيل
الزيت توي مغيره من شهرين تقريبا وأحمر
جاري التأكد من الكارتير حاليا

موقعي الرياض

وشكرا للجميع.
Magellan
08/07/2008, 02:09 PM
حيا الله كلن باسمه

لمزيد من التفاصيل
الزيت توي مغيره من شهرين تقريبا وأحمر
جاري التأكد من الكارتير حاليا

موقعي الرياض

وشكرا للجميع.


قيرك يفصل بالنمر يعني يشبك ويفضي من حاله ، وهل أنت مركب مبرد قير وترانزقو وشفت كات وإلا لا ..
ثم لو شيكت بالكارتير ولقيت برادة حديد فإعتبر قيرك مودّع
والأفضلية دائما لترايستار ثم شالنجر
طبعا الشغل لازم يكون معه ضمان على الأقل 6 أشهر
الشقردي
09/07/2008, 10:56 AM
الأخ ماجلان

كان يسوي هالحركه الصبح بس أول ما أشغل السيارة وأرجع ريوس من كراج البيت واذا وقفت على النزله حقت الكراج تحصله يفضي ثم يشبك ثانيه, ويعدين أبي أسوي هالحركة ماتطلع أبد , ومن تالي ماعاد صار يسويها أبد.
هذي الحاله الوحيده اللي كان يشبك ويفصل فيها وأنقطعت.
ترايستار يكلمونك من طرف خشومهم يقول مزحومين (صناعية الخرج)
وشالنجر يقول بس أمريكي.
وتراني ما ركبت ولا شي من هاللي تقول الموتر شد بلده.
واذا لقيت برادة حديد وش اللي مودع: الكلتشات ولا التروس ولا ..., أرجو الإفادة.

شاكر لك إضافتك.
Magellan
09/07/2008, 11:45 AM
يفضي ويشبك معناته القير يحتاج توضيب لأن أسنان تروس لبعض النمر رايحه فيها
بالنسبة لووجدت حرق مع برادة فمعناته الكلتشات رايحة فيها ...
عموما 98 موديل مر عليه 10 سنين ولا تخاف عادي يخرب ....كذلك في القير العايدي لازم تغير ديسكو كلتش بعد مده
والأسعار ماعندي خلفية الأمريكي أوضبه بين 1300 إلى 2000 ريال مع فكه وقطعه
لكن الياباني بالتأكيد إنه غالي بالحيل
الشقردي
10/08/2008, 01:07 PM
كل الشكر لمن أدلى بالنصيحة والمشورة
الخلاصة

وديت السيارة لورشة الجامعة حولنا خصوصا يوم شفت شغلهم والضمان 6 شهور والسعر حول الباقين

للفائدة اللي حصل التالي
شغل اليد 2500
طقم كلتشات كامل (هنا سبب المشكله) وقطعه سماها فولبودي تتحكم بالتغييرات
+ وجيه وربلات تغيرها على الدرب
القطع بحوالي 5300
الاجمالي 7800

والسيارة أبشركم رجعت أحسن من أول حتى العزم أختلف هذه بالنسبة للنتعه
أما مشكلة انه يفضي فكان نقص بسيط في الزيت والتروس سليمه

يوم وديت السيارة له قال هذا عمر الكلتشات وعشانك تغير زيت القير بانتظام صبر معك ولا توهم مغيرين لواحد موديل 2003

والسلام
سفاري 2008
10/08/2008, 02:46 PM
اخوي الشقردي وين موقع ورشة الجامعه ولك جزي الشكر والتقدير
القبقب
10/08/2008, 03:06 PM
أحب أنصحك ياخوي الشقردي
قير اللاند الاتوماتيك حساس جدا ولازم ماتتاخر
في تغيير الزيت انت تتاخر في تغيير الزيت
لازم تغير كل 40 الف كيلو مهب كل 60 الف
Magellan
10/08/2008, 04:16 PM
اخوي الشقردي وين موقع ورشة الجامعه ولك جزي الشكر والتقدير

ورشة شارع الجامعه ،،
طبعاُ متخصصين أمريكي 100%
وهي ورشة مشعل على مخرج 9 وأنت متجه شرق ، قبل قاعة المرسلات على اليمين
يعني تلقاها في محطة ...


أخوي الشقردي إذا التوضيب بـ7800 أجل بكم توضيب المكينة
أتذكر واحد يقول لي 13 الف ريال:mad:
الله يعين على الغلاء وأنا أخوك
والله يعوضك بموتر أطيب من موترك
الشقردي
19/08/2009, 08:58 AM
على فكرة ورشة الجامعة اللي أقصدها هي اللي داخل جامعة الملك سعود

وشكرا للجميع ولو انها متأخرة