ارائكم حول جيب الرانجلر

[الماجدي]

السلام عليكم ورحمة الله
أسعد الله أوقاتكم بكل خير يا أعضاء منتدى مكشات
ندخل بالموضوع
http://news-images.caradisiac.com/IMG/jpg/1/5/5/7/0/Jeep-Wrangler-1.jpg
http://news-images.caradisiac.com/IMG/jpg/1/5/5/7/0/Jeep-Wrangler-12.jpg
http://news-images.caradisiac.com/IMG/jpg/1/5/5/7/0/Jeep-Wrangler-3.jpg



أنا والله ودي آخذ لي جيب رانجلر باب واحد موديل 2008 أو 2007 بس يكون جديد من الوكالة
ــ
و قلت أبستشير الشباب على مميزات و عيوب الرانجلر
فأتمنى من جرب الجيب يعطيني رأيه
من جميع النواحي
سلبياته وإيجابياته
لاهنتو وشكرا لكم

[الكظيمة]

و الله حسب ما سمعت عنه.. أنه مب عملي.. و يدق سعره في المعارض..
إذا تاخذ شوري ، و نفسك في الموتر.. خذ لك واحد مستعمل.. على الأقل ما تغبن في سعره..
و اهم شيء الاستخارة..
موفق ان شاء الله..

[عاشق السيل]

وعليكم السلام ورحمة الله وبركاته ،،،

أنا جربت الموتر بالبر وهذا علمي فيه :

يتميز بالراحة والخفة والنشاط الغريب والقوة بطلوع النفود وصغر الحجم ،،

ويعيبه إنه ضيق ومايصلح إلا للمطاعس بس يعني راعي الكشتات والعزب والعدة مايصلح له ومن عيوبه إنه معروف للمراهقين يعني الناس بتشوفك بنظرة غير لائقة ( هذا واقع لاتزعل منه ) ومن عيوبه إن سعره يطيح على طول علشان كذا أنصحك نفس نصيحة أخوي الكظيمة إنك تاخذ واحد مستعمل وتتطيح اللي براسك وأنا متأكد إنك تبي تبيعه لأنك تبي تتضايق من تحميل العفش اللي ماله محل !!!

هذا اللي عندي وآسف على الإطالة والتقصير بالمعلومات وتقبل مروري يالغالي .....

[F J]

ما انصحك بمستعمل لانه صعب يرجع زي ماكان

واذا لقيت مستعمل عليه ضمان لا توفر..

صراحة الشروكي كله ما ينفع بلا ضمان لان قطعه غاليه

والجيب من تجربتي ممتاز جدا بالبر

لكنه ضيق..

[دغيم1]

السلام عليكم ورحمة الله وبركاته
أخوي هناك حكمة تقول
لولا إختلاف الأذواق .. لبارت السلع في الأسواق
كل إنسان وله ميول لسيارة معينة يعشقها ويتمنى الجميع يقتنيها
وعلى خلاف ذلك تجد من يخالفه الرأي لنوع آخر
بالنسبة للجيب - ماعليه خلاف - جيد ونشيط ومحركاته قوية
ولكن ......!
تبقى المسألة متوقفه على حسب إحتياجك أنت .
ومناسبته لظروفك وطلعاتك البرية
وبالنسبة لسعره عند البيع فهو ينقص منه الكثير
تمنياتي لك بالتوفيق
وعليك بالإستخاره
تقبل تحياتي

[غالي]

اذا عزمت وخذت بعد الاستخاره

انصحك بالقير العادي ولو لقيت درايش عادي افضل لك
يعني خذ اقل نوع
لان صناعة الشركه ماينفع تاخذ الفل ابد في كل سياراتها
بتقابلك مشاكل كهرباء وحراره وغيره
وانا مجرب الفل شيروكي
وجربت شيروكي سياحي وقير عادي
والله مااذكر اشتكيت من شيء ابد

ــــــــــــ
بالنسبه لي كرهت الشركه بعد اخر سياره خذتها منهم طلعت عيوني
شيروكي ((كاونتري)) 97
:)

[المميـز]

بالنسبه للشكل فهو حلو

وبالنسبه للعزم فهو حلو

وبالنسبه للتقنيات اللي فيه حلوووه

وبالنسبه للقير ممتاز و 6 غيارات بدون الريوس طبعاً

قبل اسبوع كان عليه عرض موديل 2007 وماباقي الا حبتين لونها زيتي
ما ادري هل هي فيه والا راحت الكلام هذا قبل اسبوع
سعره مع لوحاته بالنسبه لمودييل 2007 يطلع عليك من الوكاله صافي بـ 76 الف سعره حلو ومعقول والحق اذا كان فيه هذا السياحي طبعا

بس الشروكي اذا اخذته لاتقول اببيع !!

لانه ماراح يجيب لك الا نصل القيمه واقل

اما موديل 2008 متوفر ويبدأ سعره من 88 الف

عليك بالاستخاره بعد الاستشاره

وانا من المؤيدين لهذا الموتر

والله يكتب لك الي فيه الخير

.

[علي101]

آراء الشباب متناقضة ولن يتفقوا فريح نفسك
وبالنسبة للسيارة فهي جيب بمعنى الكلمة
استخر وواختر ما تريد وتوكل على الله

[مدمن فتك]

شف عزيزي الرانجلر نصيحه لاتشري جديد لانك تبي تتحطم اذا بعته واذا تبي تاخذه خذ مستعمل واذا رجلك حاره بالبر لايقربك

[ابوعقل]

خذلك واحد سياحي اقل مواصفات

الشروكي معروف بالقوه وهذا حجمه حلو

انا ركبته بالوكاله وارتحت داخل

ولا تفكر تبيع ابد

كده الاين مايقول خلاص

[Ibrahim.O]

اللي يقول ما يمسك سعره

انت شاري الموتر لك ولا للناس !! انت شاري الموتر لاستخدامك ولاشاريه عشان تبيعه !

[شروكي ربع]

شوري عليك دور نظيف موديلات 2004 او 05 وتحصلها في بحر الـ 30 وتوصل للـ 40 .


واذا جيت تبيع بعد كم سنة لن تخسر الكثير ولن تواجه مشاكل اذا كان نظيف .

[Ibrahim.O]

أخوي ترى فيه واحد للبيع في الرياض

نظييييييييييييييييف مامشىى 23 ألف بس موديل يا 2005 او 2006 ما اذكر بالضبط

اذا ودك تشوفه تراه موقف في شارع التحلية

[بـلـيـهـان 1]

بسم الله الرحمن الرحيمالسلام عليكم ورحمه الله وبركاتهحياك الله و بياك و سدد على طريق الحق خطاي و خطاك


بالنسبة للرانجلر فـ هو موتر ما شاء الله قوي جدا و يصلح للبر و الصخر و القشع و المطاعس و شارع و بحر ! و كل شي !


واحد من الربع كان عنده رانجلر بس موديل يمكن 2003 .. ماشاء الله عليه .. عندنا بالحي شي ٍ مثل القشع أو رمل بس طوله مترين .. تنقص شوي .. نرقاه و ننزل و الموتر يلعب يلعب ما عنده أي مشكله ..


الرانجلر موتر مخصص لهاذي الأشياء القوية ..


و إيجابياته /

قوي و ينقسم إلى 4 سلندر و 6 سلندرالقير العادي 6 غيارات غير الريوسمتميز فالبر و يفرض نفسه !يلعب لعب ما فيه أي مشكلهشكله أنيق و حلو و لا فتحت السقف شعور حلو !

مرونه


،،


سلبياته /


ما يحافظ على سعره

خراباته أكثر من الياباني

حرارته .. < أنصحك تركب مروحه ثالثه و تريح عمرك ..

صغير الحجم لمن يحط معه أغراض لكن على ما أعتقد تقدر تحط سله فوق ..





،،


هذا إلي عندي و آمل إني افدتك

شقران

[راعي النسنس]

من ناحيت نشاط نشيط

وخذ مراقا

مايرده شي

[anas]

اليوم كنا في البر مع واحد موديل 2004 الصراحة ممتاز ووصلنا به اماكن صعبة يتميز بالراحة والقوة وصاحبنا معاه قير عادي وطبعا طافي المكيف والحرارة ما تنزل عن النص والجيب دوبه ماشي 60الف فقط يعني نظيف ويوم سألته عن الحرارة قال هذي حرارة الرانجلر طبيعي تكون على النص .
وبيني وبينك يا اخي انا احب اطعس وانا مرتاح يعني مو اقعد اطعس وانا عين في الطعوس وعين على امبير الحرارة .