الوالد قرر يشتري شاص ويبغى نصيحتكم

[المري]

السلام عليكم

كيف حال الاخوان جميعا..

قرر الوالد أنه يشتري شاص 2004 ديزل فقلت له : انتظر سوف اطرح الموضوع على أهل مكشات والله انه يعرف مكشات وأخبره باللي اشوفه من اعلوم الحياء واعلوم الخير وعن تجارب السيارات وخاااصه عن
مشاركات اخوي صقر لان مشاركاته قريبه من اقلوب الشيبان.


بس في شي مشغلنى اشوي وهو اني ماأشوف سيارات الديزل منتشره بكثرة فما السبب؟؟


وهل لها مشاكل في المستقبل ... ؟؟؟


في انتظار ردودكم

شاكر لكم

اخوكم / المري

[الحاتمي]

اخوي المري
عدم انتشار الشواص الديزل فقط بين الشباب
والا الشركات والمزارع واصحاب المعدات يفضلون الديزل على البنزين
والشاص الديزل مافيه كلام خصوصا للشيبان اللي ماهم بحاجة قوة ونشاط الشاص البنزين
اما المشاكل الديزل اقل مشاكل واعطال واوفر وقود
بس مشكلته الوحيده ان سعره جديد اغلى من البنزين..
وتراه يكد كد واسال اصحاب المزارع والحديد.
ولا له اي مشاكل في المستقبل الا انه بعد مرور الوقت يبي يزداد الدخان الاسود الخارج من الشكمان
وهذي ماهيب مشكله واذا بغيت تصلحه توظب طرمبة الديزل.
واقل صيانه من البنزين.

عموما مبروك مقدما والله يعطيكم خيره ويبعدكم عن شره يالمري
وسلم لي على الشايب
الحااااااااااااااااااتمي

[صقر]

هلا وغلا بالمري

سلم لي سلام خاص للوالد.. الله يخليه لك

بالنسبة لسؤالك

1- شاص تويوتا وهذا قوي ويمسك سعره اذا جاء يبيع

2- شاص نيسان وهذا احسن في نظري من التويوتا حيث انه راسي واقل مطبات بس عيبه انه يتفكك وما يمسك سعره

3- فيه سيارة غزت الاسواق هاليومن وهي سيارة (ايسوزو) وانا اشوفها مع الناس شكلها حلو وواسعة وفيه منها دبل واتوقع انها ممتازة وسعرها اقل من التويوتا والنيسان.

بقي ان الوالد الله يسلم راسه هو اللي يقرر

بالنسبة لعدم انتشار الديزل ... فكلام الحاتمي صحيح صحيح...

وشكرا

[المري]

مرحبا ومسهلا بالحاتمي

وعزالله انك كفيت ووفيت يالسنافي ولا عاد خليت للنشامى اي اضافة .


وتقبل تحياتي اخوك / المري



******************


اخوي صقر

تسلم وماقصرت وفعلا النيسان ازين متعب بس يتخلل بسرعة.

اخوك / المري

[Bader-M]

الصراحه
اختيار موفق
والديزل
يصلح لشبان;)

[شايب الصمان]

السلام عليكم ورحمة الله وبركاته
الاخ المري

الشاص الديزل مثل ماذكر الاخ الحاتمي بس فيه شغله اذاكان الوالد من الناس الذين يستخدمون الدبل كثير فاانصحه باالديزل واذا كان من وقت لوقت فاالبنزين احسن وارغب عند البيع ... على العموم عندي شاص 2002 بنزين والله انني مرتاح كثير منه ولله الحمد بس لاتقرب النيسان اشاص ..


والله يوفقكم

[محمد محمود]

والله يعطيك كم خيره ويكفيك شره يارب العالمين ، بس أنا أرى إن الشاص بنزبن أحسن من الديزل وأقوى وأصبر بس تظل المسألة وجهة نظر ........................محمد م محمود

[اسيزو 4x4]

والله انا با نصحك نصيحة ما تندم ان شاء الله عليها

خذو ونيت اسيزو ديزل تربو ودبل اريح لشايب اذا كن بيستخدم

والله الموتر مجرب ومن اقوى سيارات الدبل

وبعدين المكينه 3000 سي سي و138 حصان قوة هايلة....
وبا التوفيق واهم شى رظا الوالدين..........

[سماء وماء]

سلامي لك وللوالد وللمشاركين

سيارة الديزل يقولون سيارة اجودي يعني راعي مزرعه او محطة بعارين او غنم وعنده مشاوير كثيره وغيره ولاتدور .
اما ان كان راعي مقنايص ساعة بالشمال وساعة بالغرب لاوالله خل ياخذ البنزين.
يقول الشاعر:


بارض عفاش خبير القار ماقزة ...... مايقطعه كود لاند كروز ممتازي
لادش له رملة(ن) وشنباته اهتزه ...... تفوت بيعه وتصبر وانت معتازي


وسلامي للجميع

[المري]

جزاكم الله خير يااخوان وماقصرتو ويامال العافية..


قبل يومين جربت جيب لاندكروزر موديل 2002 ديزل وكان عزمه ماشاء الله

عليه قوي , والظاهر ان الوكالة طورت الديزل.. ماعاد هو زي اول...


شكرا لكم جميعا..


اخوكم / المري