حرارة الباثفندر وش سببها وماهي الحلول ؟

[ابو رواف]

السلام عليكم ورحمة الله وبركاته
أخواني الاعزاء أنا عندي باثفندر 2005 له تقريبا فوق الشهر والاحظ عليه ارتفاع في الحرارة طبعا الارتفاع يكون على النحو التالي :

1/ أثناء النهار الحرارة دائما تكون على النصف وتتجاوز ذلك اذا زادت سرعة المكينه فوق 2500 دورة .
2/ في الخطوط السريعة في النهار لا أستطيع تجاوز سرعة 110 كلم في الساعة يعني أن ضغط المكينة لابد أنه لايتجاوز 2500 دورة .
3/ في طلعة القدية الي منكم يعرفها وفي الساعة 1 ليلا تجاوز مؤشر الحرارة النصف يعني ثلاثة أرباع ولو طالت الطلعة وصلت الاتش واذا مشيت بعد الطلعة ترجع للثلث .
(في كل الحالات السابقة اذا تجازو المؤشر النصف يطلع عندي صوت ونه أشك والله أعلم أنه تفوير بالاديتر ويختفي الصوت اذا هديت السرعة ويرجع اذا وصل المؤشر النصف وتجاوزه .
ماهو تفسيركم لذلك جزاكم الله خير ؟

[شامخ ألهيلا]

اخوي شيك على الاديتر هل هو نظيف من الاوساخ
ووتاكد من البلف يعني طال عمرك سو تنظيف كامل لللاديتروهل يحتاج تسيخ وغير المويه

وتاكد من المراوح تشتغل معك

وتاكد من تماتيك المروحه

واذا كلها سليمه

تاكد ان راس المكينه فيه شي

[6670]

اخوي العزيز: واحد من الشباب نفس مشكلتك سوى كل شئ صارت المشكله من الرأس فيه ميلان بسيط.
وترى صاحبي سبحان الله نفس الاماكن والسرعات ترتفع.

[أبو فهد11]

الشباب إن شاء الله يفيدونكــ

لكن أخوي أحتمال يكون من دبة البيئه اللي في الشكمان (دبتين بيئه )

تكون متكسره من الداخل وتسد الهواء اللي بيطلع مع الشكمان

وكذا ترتفع الحراره

بس تأكد أول شيء من اللي قالوه الاخوان وهو الاديتر

[اسدهم]

شف بتحصل تحت الموتر من قدام الي تحت القزوز بتحصل دبة صغيرة قصها هي حقة البيئة
وتاكد من المراوح تشتغل معك

وتاكد من تماتيك المروحه

واذا كلها سليمه

تاكد ان راس المكينه فيه شي

[ابو رواف]

الله يعطيكم العافية على الردود والله أن خوفي أنه يكون من راس المكينة لكن من يقدر يدلني على ورشة تتأكد من هذا الموضوع أنا في الحقيقة لقيت عند الغروب بالنسيم فحص يسمونه فحص الحرارة وش رايكم هل يفيدوني عن ذلك ولا أكشف عن الراس وابيكم تدلوني على متخصص جزاكم اللله خير جميعا .

[ابو رواف]

اخوي العزيز: واحد من الشباب نفس مشكلتك سوى كل شئ صارت المشكله من الرأس فيه ميلان بسيط.
وترى صاحبي سبحان الله نفس الاماكن والسرعات ترتفع.

طيب ممكن تفيدني أخوي 6670 عن سبب الميلان وش الحل الي سواه الاخ الي ذكرت اذا كان بالامكان تستفسر لي منه حيث اني لم أقوم بعمل شئ حتى الان .

[شامخ ألهيلا]

هلا فيك اخوي انت شيك بالاول قبل تحكم على المكينه
ومثل ماقالوا الشباب بعد دبة البيئه رح شلها وجرب

[6670]

أخوي ابو رواف : سبب الميلان والله اعلم من الراس لأنه المنيوم لابد من المحافظه عليه من أي ارتفاع في الحراره
حتى لايميل وصاحبي مكانيكي فكه وداه للمخرطه وبين عندهم بالمقياس والسياره موديلها 2005 بس المشكله موترك راسين لازم تشيك على الاثنين .
والله يسهل أمورك وأي خدمه تلزمك ارسل على الخاص.

[6670]

تاااااابع
والحل يعمل للرأس مسح ويضبط ان شاء الله.
وصاحب المخرطه يعلمك هل يصلح او تبدله.

[المميـز]

اخوي ابو رواف شيك على ماء الراديتر اول شي هل هو ناقص او لا ؟؟

وبعدين ابدأ ابحث عن الحلول الثانيه

منتظر ردك

[shababi]

المشكلة من الراديتر لان راديتر النيسان يخرب بسرعة

اعرف واحد يشتغل في وكالة نيسان يقول اكثر مشاكل الحرارة من الراديتر


الحل : غير الراديتر وبتشوف كيف الحرارة ترجع طبيعية ان شاء الله

[سديراوي..]

شيك على الاديتر والمطاره

[ابو رواف]

أخواني شامخ الهيلا والمميز وشبابي و سديراوي أشكركم على اهتمامكم وان شاء الله راح افيدكم بلي يصير معي شكرا للجميع

[شروكي ربع]

آخر الدواء الكي , بمعنى آخر شي شف المكينة ..

أول شي الرديتر والمراوح ومو شرط انك تغيره أو تسوي تسييخ ! رح لواحد فاهم ويعلمك اذا كان الرديتر فيه بلا . ( طبع حق الرديترات ) .

يمكن يكون تنسيم موية ويمكن وصخ ويمكن مسدودة كثير من الفتحات و .. و .. الخ

أو تماتيك المروحة أو المروحة الكهرب ما تشتغل ..

عموما صحيح ان هاليومين الحرارة مرتفعه ولكن الباث ما يسوي كذا ..

يعني في أردى حالاته يوصل للنص ويوقف .

[باثفايندر03]

السلام عليكم

بالنسبه لموترك كم مشى؟؟؟

اذا كان ماشي فوق 100 الف غير اللديتر كامل وبتشوف الفرق...

هذا ما قاله لي احد المهندسين

[برق السما]

أول شي .. الله يعينك قل آمين !

,

ياكثر مشاكل الحرارة وياغثاها !!

,

أعتقد والله العالم أن المراوح مالها دخل , لأنها بتبين معك عطبها على طول !

يعني شيك اول شي على الراديتر نفسه , وأنصحك ( بتسييخ الراديتر ) أول شي ..

وإذا طلعت معك المشكله بعد ذلك لاسمح الله , شف المواصير والسدد , وآخر شي شيك على المراواح ..

[ابو رواف]

أخواني شروكي ربع - باث 03- برق السما
اشكر لكم اهتمامكم الموتر ماشي 114000 كم وللمعلومية والمشكلة هاذي مالها الا شهر تقريبا والحقيقة ابي رايكم هل افحصة فحص الحرارة وهل راح يفيدني ولا لا و ما أعتقد أن المشكلة من الماء ولا أعتقد أن المشكلة مشكلة وصخ بالاديتر فلو كانت كذلك كان احتمى علي ولو كان واقف الموتر المشكلة ما تجي معي الا اذا كان الموتر يمشي وعلى ماذكرت بأول الموضوع من حالات صارت معي حول ذلك جزاكم الله خير على الاهتمام وأرجو منكم المشورة .

[ابو رواف]

أخوي باث 03 اذا غيرت الاديتر ماهو الاديتر الي تنصحني به والمناسب للباث

[أبوناصر]

أبو الله يحفظك ويرعاك من كل شر ومكروه


المشكلة وبكل تأكيد من الرديتر ولا يحتاج الى تغيير بس صيخ الاديتر عند أطلق فني ب 100 ريال


وراح تضبط الحرارة من أبدع ما يكون


صارت معي نفس الأعراض في موتر 2003

وصيخته وضبط


بعد 3 شهور تكررت المشكلة وصيخته وضبط من ابدع ما يكون


وأتوقع السبب هو نوعيه المويه الأخضر المغشوشة الموجودة في السوق

للعلم المره الأولى حطيت مويه اي سي ديلكون

والثانية ازرق ألماني من وكالة مرسيدس

والآن مويه مقطره فقط


وأنا أقولك لا يلعب عليك أحد من ها العمالة غير وغير وفك وحط

بس رح لم واحد وصيخ ان ضبط الحمد لله واذا ما ضبط فأنت ما خسرت الا 100 ريال فقط

[سحابه]

ابو رواف
الاخوان ماقصروا

[الربذي]

انا مثلك بالضبط اذا تعديت 130 ترتفع واذا طفيت المكيف نزلت طبعا ترتفع فوق النص
وقالو لي شيك على اليات يمكن ينصفطن وماشيكت صرت اسافر بدري او بالليل موقتا لان مالي خلق في الورشات طبعا قد يكون سدد بالشكمان او انصفاط اليات او تماتيك المروحه خربان اذا انك وقفت تولع يعني ترتفع تراه من تماتيك المروحه وهو عالي ب500ريااااااااااااااااااااااااااااااال تخيل ولاغيرته للحين وتعزدت صرت 125 وقت الظهر والمكيف شغال بس لو اخليها 130 تشوف الحراره يوم تمشي
صرت بس 120 ولاعندي مشكله الا بالطلعات ترتفع بس طبعا طلعات خفيفه لاتذكر
الراس لاتجيه شيك على ثلاث
صيخ الاديتر شوف الخراطيش شوف الشكمان وخصوصا الي فيها مشغال تحت اسايق بالماسوره شيلها لانها تسكر المواسير
طبعا ثنتين واحده بكل شكمان 0

[أبوعمران]

هلا اخوي .. أولا الله ينجينا من نار جهنم هالايام الجو نااااااار

بالنسبه للحراره اخوي فإن ماتطلع من أحدى هالامور :

1- الرديتر قد يحتاج تسييخ او تغير .

2- الليات قد تكون مسدده او فيها عطب .

3- المراوح قد يحصل لها التماس وتتوقف بعض الاحيان .

4- الدبه قد تكون مسدوده .

واذا شيكت على كل شيء ولم ينفع البلا يصير من راس المكينه :)



أتمنى اخوي الكريم ان تزول مشكلة موترك في اقرب وقت ممكن :)


بالتوفيق

[ابو رواف]

شكرا للجميع بلا استثناء بشيك للاديتر واعمل له تسيييخ وارد لكم خبر ان شاء الله

[الربذي]

وانا انتظر ردك وعلومك0 بعد ولا تنسى الشكامين شيك عليهن والخراطيش
اما انا ابي اغير وش تغيره انت لانه نفس المشكطله فقط اذا مشيت فوق 130 تقريبا نهارا ومشغل المكيف بالليل لو امشي 150 ملفيه اي مشكلة 0000

[ابوعبيده]

اخوي ابو رواف معي باث وصار نفس مشكلك وايضا زميل نفس المشكل ورحنا الي راعي الاديترات سو تنظيف وتسيخ للموتر وطلع من احس مايكون ولله الحمد ..

[ابو رواف]

السلام عليكم ورحمة الله وبركاته

أخواني الربذي وأبو عبيدة عملت فحص حرارة وصارت المشكلة من وجيه الرأس في المكينة والسبب أنه بلوف الحرارة داخل وخارج المكينة تعطلت وسببت الحرارة في المكينه وأعدمت الوجيه ولاحول ولاقوة الا بالله
قدر الله وماشاء فعل وأنتبهو ياأخوان لايصير لكم نفس المشكلة .

واذا عندكم معلومات عن قع الغيار وكم أسعارها أرجو الافادة ولكم أجمل التحية .

[أبوناصر]

هل صيخت اخوي ولا الميكانيكي فحص وقالك


إذا ما صيخت فشوري عليك صيخ ولا يهمك كلامهم


أما اذا صيخت وما نفع الله يعين على الشيش الصعب


تأكد اخوي لا يكون الميكانيكي نصاب

[الربذي]

اسمع رجا رجا قبل صيخ الاديتر وشف لايكون الشكمان من سد وليات الاديتر شف دوس اذا احترت السياره وخل واحد تحت السياره يراقبهن بس لازم تكون محتره مره عشان اذا دست وفيه ليونه يبين
المشكله تدفع وتكلف نفسك ولا يطلع منه
جربهن وشوف

[همّام]

نصيحة محب

آخر الدواء الكي ..

ابدا بالراديتر ،، ترى كثير من الورش من جنبها والواقع يشهد ،،

أخوي نفس موترك 2005 ماشي 180000 ارتفعت الحرارة في طريق مكة عند المزاحمية وإذا وقف تبرد شوي
غير الطرمبة والبلف ، وفي الأخير صار الراديتر متسدد ما يمكن تسييخه .. اشترى جديد ورد الموتر جديد ما شاء الله ..

دمت موفقا

[gsb]

تأكد من طرنبة الما و شل بلف الحرار

[عربوطة]

المشكلة بكل الباثفندرات
انا معي واخواني اثنين معهم كلنا ترتفع الحرارة إذا مسيته
(((((((((العلاج ركب الرديتر لفتين ))))))))))))
لأن الرديتر حقه لفة واحدة

[snafiee]

أخواني شروكي ربع - باث 03- برق السما
اشكر لكم اهتمامكم الموتر ماشي 114000 كم وللمعلومية والمشكلة هاذي مالها الا شهر تقريبا والحقيقة ابي رايكم هل افحصة فحص الحرارة وهل راح يفيدني ولا لا و ما أعتقد أن المشكلة من الماء ولا أعتقد أن المشكلة مشكلة وصخ بالاديتر فلو كانت كذلك كان احتمى علي ولو كان واقف الموتر المشكلة ما تجي معي الا اذا كان الموتر يمشي وعلى ماذكرت بأول الموضوع من حالات صارت معي حول ذلك جزاكم الله خير على الاهتمام وأرجو منكم المشورة .


مساك الله بالخير


انا الان عندي نفس المشكلة في جيب لكزس من اسبوعين وحرارتة ترتفع أكثر من النصف اذا إذا تعديت 100 في الظهرية والمكيف شغال وديتة للوكالة وقالولي توماتيك المروحة والبلف والشكمان تمام مشكلتك يمكن في الراديتر ...!!

المشكلة الراديتر غالي وقلت بسيخ قبل اشوف يتغير شئ ولا لا ..بس رجع الوضع اسوأ والحرارة صارت ترتفع دايم ..!!

ابي اعرف وش الحل و وين فحصت فيه .؟

[النادر6]

اخوي لاتوجع راسك اذا الرديتر الي في سيارت رصه وحده اشتر رديتر اردني رصتين صدقني راح ترتاح . ويقول المثل اسئل مجرب ولاتسئل طبيب

[salih100]

حنى ليه نصدق منتحل شخصية المهندس الي بالصناعيه الي اصلا جونى ما عندهم سيارات ونهمل تجارب ناس سبقونى !!!!!!! بالصناعيه