إذا ودك تصور و( تعطي ) مكشات صورة .. وقف عند رأيهم

[حفرلوجيا]

سلام يالربع
تجاذبت اطراف الحديث مع زميل في العمل عن الصور والتصوير بـ( مكشات ) .. وكنت أعلق على مجلة أو نشرة ( لاأتذكر ) كانت معه متخصصة بالتصوير , اطلعت عليها سريعا ولكن لم أجد فيها ما ( أريد ) .. لاأدري هل لأانها موجهة لمحترفي التصوير أم لأنها مبنية على أعداد سابقة وبذلك يتطلب الأمر قراءات ( تراكمية ) .. ام بسب أنني ( غشيم ) بالتصوير وليس لدي المفاتيح اللازمة لفهم المطلوب .
تساؤلات صاحبها إطلاعي على عدة مواضيع طرحت في مكشات بتوقيت متقارب .. لاخونا الريس مكشات عن صور من مكتبته .. وصور ( لم تظهر ) من أخونا الريس السمح .. وإلا أخونا الريس شقردي ( دافنينه ومشقينه) الأخوان بالإشراف ولا نشوف منه إلا نزر يسير .. وكم موضوع عن صور يلتقطها المبدع المتألق أخونا نفل .. وصور عن الصمان اللي ( فجرها ) قبل ايام بالمنتدى أخونا راعي عنيزه .. وغيرهم الاخوان أيمن , الخبير , المسفهل ، صقر , نقا هشال , مراكي الذيب , جاروود , ماكس باور .. وإلا أخونا فرد حمزة اللي ( مطفي ) كاميرته عنا مؤخرا.. وكثير من ( المكشاتيين ) اللي ( خربت ) ذاكرتي ونستهم .
على اي حال الغشيم اللي زي حالاتي إذا شاف مناظر حلوه او حب ينقل ( وقائع ) لربعه فتح أفمه وقام يلقط من هالصور ( على غير سنع ) .. يحتاج ( يفهم ) ..;);)
طبعا الاخوان ماهم مقصرين لو بغيت أشتري كاميره .. أرشيف مكشات يزخر بأرائهم ومشورتهم ( المفصلة ) ..لكن لو حبيت أعرف كيف ألقط الصورة.. لكني لست محترفا ولا أبغى ( رأي مطبوعة متخصصة أو محترف ) أكون معه على غير ( الموجه والتردد ) وأصير ( كنك ماغزيت ) .. وش أسوي.. كل هالكلام الطويل الممل على شان ( الزبدة ) التالية :
الأخوان ( المكشاتيين ) سواء من ذكرتهم أو نسيتهم ( اللي مانستنصح بغيرهم ) مدعوون لإعطائنا خلاصة خبرتهم اللي أكتسبوها فيما يبدو لي بغير القراءات او متابعة مطبوعات المحترفين..
----- اسمع مايعرف بـ( كادر التصوير ) اللي أظنه يعني مجال الصورة وكيفية إختياره .
----- ( موضوع الصورة ) اللي بعده تطلع الصورة ناطقة بالمعاني و( المعلومات ) .
----- التحكم بالإضاءة و ( زاوية التصوير ) اللي ( ناشها ) بشكل مقتضب فرد حمزه قبل أيام تعليقا على أحد مواضيع نقا هشال.
----- جماليات الصورة اللي اكثر ماشفتها ( وهذا رأيي ) في صور نفل وراعي عنيزه وفرد حمزه ونقا هشال وآخرين .. و ( الغشيم ) اللي مثلي ماعرف كيف يتقنها مثلهم .
( أظن ) الأخوان اكتسبوا المهارات بالمران والتجربة .. ومن هنا في رأيي حلاوة ( النصائح المنتظرة ) .. في أنها ستكون غير معقدة ومبسطة للفهم ولا تتطلب ( قراءات تراكمية ) أو ( استيعاب إحترافي ) .. والرجاء ألا ( تستصغر رأيك ) .. لأن ماقد يكون واضحا وبسيطا عندك قد يكون ( غير معلوم ) لمكشاتي آخر .
لكن خوفتي إن ( الغشيم مثلي ) ماينفع به :(:mad: .. ولكن الأمل ان الغشم يتقنون مثلكم ( التصوير المبسط الجميل الناطق) :good: .. وبالتالي ستكون الصور ( على المنتدى ) تسوى تستاهل .
وسلامتكم

[الخبير]

السلام عليكم
والله يا حفرلوجيا انا عن نفسي إذا كنت فاضي تلقاني اتمغط عن المنظر وآخذ 3 صور على الأقل من زوايا مختلفة.
لكن إذا كان الوقت لك عليه مالك إلا وحدة وبس.

عموماً فيه كمرات للمحترفين بحيث إنك تقعد تلعب في الغالق وبلاوي ثانية، لكن خلك على ميزة التماتيك وبس.

[القماري]

حفرلوجيا يرغب في أخذ صور روعة ( مثل إلي عندي)
أقول أبو سليمان أحسن حل أنك تاخذ كاميرا ديجتل مع ذاكرة كبيره وصور المطلوب أكثر من مره لين تلقى إلي تعجبك وتضعها في مكشات ، وبعدين مواضيعك معظمها مصور وبدون صورة ( كيف ترفق صورة ؟؟؟!! ) أثريك ناوي تلعوزنا .
فيه مواقع يمكن تفيد المبتدئين مثلي ومثلك أعطيك مواقع والباقي عليك

www.arab-pics.net

www.foto-master.com

[راعي عنيزة]

فاكهة مكشات حفرلوجيا :)

التصوير فن واي فن يتجزأ من جزأين
- معرفه
- موهبه

والمعرفه ممكن ان الواحد يطلع على المجلات مثل ما تفضلت وعلى المواقع المتخصصه وينالها
ولكن تبقى مسئله الموهبه فتتمثل في الذوق في اختيار الاماكن والزوايا وطريقة اتخاذ وضعيات تخفي عيوب المكان وهذي فطريه وماظن احد يقدر يكتسبها

وان كنت اشوف ان كل ما كان الشخص موهوب بالتصوير فهو يخدع الاخرين بدون قصد ;)
لانك ممكن تشاهد صور للموهوب في مكان وتهبلك او بمعنى اخر تخرشك من زينها :D وتذهب له انت وتجده عادي على الطبيعه ، لانه هو اختار زوايا اخفت العيوب والقمايم ;) واختار وقت تزهى فيه الالوان لذلك تجد الصور احلى من الطبيعه بمراحل
وارى ان المصور لا حرج عليه انه يتبع هذي الاساليب لاستعراض فنه ومهارته في انتاج صور جميله لانه في النهايه يعرض لكم صور ولم يقل انه يعرض الواقع ;)

عموما يا بعدي الحمد لله معافيني الله من الثنتين الموهبه والمعرفه لذلك داجين على باب الله :D ولكن قبل اصور احط في بالي ثلاثة اشياء
- ارسم في بالك الصوره قبل تصورها ولا تستعجل ولا تتعيجز لان المصور عشان يصور فيضه يمكن يمترها من اولها لاخرها عشان يحصل زاويه تشبع خياله
- دائما خلي الشمس خلفك
- افضل وقت للتصوير بعد شروق الشمس وقبل الغروب تطلع الالوان على كيفك

وتحياتي لك يا خلفهم

[المربد]

صدقت اخوي ابو سليمان، انا من سنتين عندي كامرة رقمية (ديجتال) وجمعت مئات الصور على اقراص CD لكنها سجلت لنا ذكريات حلوة دائما نرددها.




عسى ما انت ناوي تصور الناس اللي بشارع الثلاثين ....!!! (الحلفاء، اللي تحالفت معهم)
انـتــبــــه ترى (يـقـبـصـونــك) اذا شافوك تصورهم.

[صقر]

حفرلوجيا .... مشكور على طرح الموضوع اللي جاء بوقته ويجب اننا ناخذ خلاصة تجارب زملائنا في المنتدى (خبراء التصوير)

ولا شك ان راعي عنيزة ذكر بعض النقاط المهمة والتي لن اعيدها بل أستطيع ان اكمل عليها من واقع تجربتي الشخصية.

1- يجب أخذ الاستعدادات الكاملة من بطاريات وشواحن وتوصيلات.

2- عند اخذ الصورة لازم يكون موضوع الصورة في المقدمة واحاول ان ما يظهر شيء يغطي عليه. أو يصرف اهتمام مشاهد الصورة. مثل وجود شخص أو وجود سيارة (الا عند استخدام هذين الشيئن كمقياس).

3- أثناء إلتقاط الصورة يجب التمهل وعدم الحركة حتى تخرج الصورة صافية.

4- يجب أخذ أكثر من صورة (يفضل أخذ 3 صور) لان التصوير الرقمي مجاني..

5- أنا احمل معي جهاز كمبيوتر محمول حتى اتأكد من نقاوة الصور وانها ستؤدي الغرض المنشود منها ... (حصلت معي اني رجعت لأحد المواقع لأني غيرت في اعدادات الصور فظهرت الصور على الشكل الغير مطلوب).

وبما أن الموضوع قد تطرق الى التصوير بشكل عام أحب ان اطرح بين أيديكم المشاكل التي تواجهني شخصيا

وهي :

1- تعرض الكمرة الى الضرر والتوسخ أثناء الرحلات على الرغم من انه يوجد معها غلاف محكم .

2- تعارض ميول المصور وبرنامج الرحلة مما يسبب الضيق لدى البعض .... وهذا قد يفقد المصور بعض التركيز .:mad:

[نفل]

السلام عليكم ورحمة الله وبركاته

اخوي حفرلوجيا

احرجتنا ابو سليمان وما ادري كيف اضيف على الموضوع خاصة وان الشباب ما قصروا . وما ادري وش اضيف على ما قالوا لاكن ابذكر لكم خطواتي بالتصوير والى ذكر اغلبها اخواني من قبل .

ذكر اخوي راعي عنيزة ( وان كنت اشوف ان كل ما كان الشخص موهوب بالتصوير فهو يخدع الاخرين بدون قصد لانك ممكن تشاهد صور للموهوب في مكان وتهبلك او بمعنى اخر تخرشك من زينها وتذهب له انت وتجده عادي على الطبيعه ، لانه هو اختار زوايا اخفت العيوب والقمايم واختار وقت تزهى فيه الالوان لذلك تجد الصور احلى من الطبيعه بمراحل وارى ان المصور لا حرج عليه انه يتبع هذي الاساليب لاستعراض فنه ومهارته في انتاج صور جميله لانه في النهايه يعرض لكم صور ولم يقل انه يعرض الواقع ) .

وبصراحة قال الحقيقة وبالمناسبة هذه احب انوه على الاخوان اذا اعجبتة صورة لايتوقع اذا راح للمكان ان يجده كما في الصورة وهذا طبيعي لان الصورة دائما تملح المكان زيادة وللتأكد من ذلك قم وصور واجهة بيتكم
الان قبل لاتكمل قراية :D وود الصورة لام العيال وقلها وش رايك بالبيت وشف وش تقولك هذا اذا عرفت انه
البيت اللي ساكنه به:D

نرجع للتصوير واقولكم وبصراحة اني اركز على //

1/ كثرة الصور( وهذه ذكرها اخوي القماري ) يعني لاتوقف عن التصوير حتى تدمع عيونك وتحول:D وهذه حقيقة وللمعلومية كل موقع آخذ عليه حوالى 35 صوره احيانا ومن عدة زوايا يعني تقريبا 10صور من كل زاوية وبمقاسات مختلفة ( يمكن تطلع صورة زينة واطبعها ) ومثال ذلك موضوع الصمان عدد الصور 362 صوره روضة دغيم لوحدها 165 صورة خلال ساعتين / وخريم 200 صورة خلال 45 دقيقة ......... ولهذا اخذت كرت تخزين سعة 512 ميجا يصور 5000 صوره بدقة 480 × 640 ويمكن يستغرب الاخوان هذه اكثر نقطة اركز عليها.

2/ وانا اصور اتخيل الصورة وكأني اراها على شاشة الكمبيوتر ( وكلما كثرت من التصوير كلما كان تخيلك
للصور قريب للواقع) وهذا السبب الي يخليني اكثر من الصور لان كل صورة تصورها تتعلم منها حاجة ولو بسيطة.

3/ وضوح الصورة ويعتمد على الكاميرا والمصور مجتمعة فالكاميرا يجب ان تضبط على اعلى دقة وليس
مقاس الصورة حيث الكاميرات الرقمية يكون عادة بها ثلاث مقاسات للدقة (نورمال/ فان / سوبر فان )
يعني خلها دائما على السوبر فان لاكن يجب ملاحظة انه ياكل عليك ذاكرة الكرت . ودائما اضبطها على
الاوتوماتيك لاني وبصراحة حتى الان اجهل اكثر من 70% من مميزات كاميرتي

أ / وبالنسبة لدور المصور فيجب ان تكون يده ثابته ومتوازنه بشكل افقي حتى لاتطلع الصورة مايلة
لاحد الجهتين .

ب / اذا الشمس ساطعة وودك تصور من زاوية لاكن الشمس تقريبا مقابلتك خل عدسة الكاميرا في موقع
ضلال اما بواسطة شمسية او ظلال شجرة ولو تلاحظون ان بعض الصور اكون بجانب شجرة صغير حتى
تظلل على العدسة وبكذا تكون حصلت على الزاوية المطلوبة رغم وجود الشمس قبالك تقريبا وهذه مهمة
اذا ودك يكون العشب ساطع ولميع :D .

ج / من خلال ما شاهدته اكتشفت ان افضل الصور الواضحة هي عندما تكون الشمس من يمينك اويسارك

4 / جمال الصورة
وهذا يعتمد بالدرجة الاولى على موقع التصوير ( اتكلم عن المناظر الطبيعية ) يعني لو حصل لك روضة
مربعة ومزهرة وبها شوية اميه مع كم مزنة وشوية نفيدات وكم شجرة من سدر وطلح ( كوكتيل لبناني ) :D فصدقني الموقع هو اللي يبي يعلمك التصوير لانه ابداع الخالق سبحانة وانت والكاميرا مجرد اداة نقل
للصورة لاغير .

5 / محتويات الصورة
احاول اترك وسط الصورة فارغ ( الاشياء المرتفعة مثل الشجر الجبال الطعوس تكون على اطراف الصوره )
احاول قدر الامكان ان تكون الصور تحتوي على الاقل ثلاثة عناصر اساسية ( عشب / ماء / شجر )
( عشب / سحاب / جبال ) ( نفود / ماء / شجر ) يعني ان يكون تنوع في الالوان

6 / الغيوم والامطار
الاحظ ان جميع الصور التي تعقب الامطار تكون جيدة ( يعني بعد ما يوقف المطر دق سلف واطلع البر
وكل الصور الي بتصورها بتكون روعة ) خاصة النفود

7 / لاتصور ابدا في العجاج راح تطلع الصورة رديئة جدا الا ما ندر .

8 / دائما احرص عل ان تكون الكاميرا معك مهما كانت مدة الكشته .

وآ سف ان كنت طولت عليكم لاكن حبيت اذكر لكم كل ما يدور بمخيلتي اثناء التصوير وهذا لا يعني انه الصحيح ( وركزوا على كلمة الصحيح ) يعني باختصار كل ما ذكرت يمكن ما يضيف شي للموضوع او يحقق اهداف اخوي ابو سليمان لاكن ذكره لي بالموضوع احرجني واجبرني على الرد وانا بصراحة ما عندي ذيك الخبرة اللي تخليني احصر نقاط محددة للتصوير الجيد لاني حتى الان كل يوم اتعلم شي جديد من المنتدى .

[المترو]

فعلا موضوع جاء بوقته لاني كنت بحلان بعمري بالتصوير مثلك عار ف اول سنه اطيح بالتصوير
امل اننا نجد عند مبدعين مكشات بالتصوير الافائده و التفاعل مع هذ ا الموضوع
و الا ترى نبي نسوي لهم قص ولزق من هالصور بتاعت العليميه مثلي
الشئ الثاني ترى يا حبايبي الله باليني بربع اذا شافو الكره معي بالبر ما عاد الايكسرونها اكره ما يشوفون الكرمه والنور بالليل ما نجرس الا بخرمس قال ايش قال هدوء
ماهو رايكم والعلاج لربيعي
وسلامتكم
الرحال2003

[رعد الجنوب]

مشكور يابوسليمان

طرحت موضوع يهم الاكثرية من اعضاء منتدانا الجميل
وخاصة في هذه الايام الجميلة التي من الله علينا فيها
بالخير والامطار وتكونت بعدها المناظر الجميلة في
برارينا الرائعه..
والكثير من الاخوان عرضو الكثير من الصور للا مطار ومواقع
الربيع التي جعلتنا نشاركهم في رحلاتهم من خلال صورهم الجميله

واقترح وضع خيمة للتصوير يعرض فيها تجارب الاعضاء
مع التصوير ومع انواع الكميرات واكسسواراتها..
خاصة مع تطور انواع الكميرات الديجتال.

تحياتي للجميع

[((( الحر)))]

اخي وعزيزي حفرلوجيا...!!!

باختصار
لاتقان فن التصوير يجب على ملتقط الصوره ان يحاول ان يجمع فيها عدة تضاريس او انواع امثله لذلك...

--الخضرة والماء والطيور...!!!

--النفود وشجرالغضى والجيب...!!!

--الخضرة والاشجار والماء....!!!

--الخضرة والرمال والجبال...!!!

ولعل اشهر صورة التقطت في هذا هي الصورة الخاصة بالخطوط الجويه السعوديه التاليه

ونرى فيها مدى اختلاف التضاريس ...!!!
http://www.mekshat.com/pix/upload/images3/imagevie22w.jpg

[عبدالعزيز الدباسي]

مع كل ما يملكه مبدعوا التصوير من ابداع وموهبة ، تظل يا ابو سليمان مبدعنا الدائم وعضونا القائم

وإن كان للابداع منبع فإنه في شخصك متطبع .

بارك الله فيك واحسن اليك ،،،،،

والحقيقة اني اغبطك على الحس الرفيع في اختيار الموضوع وعلى اسلوبك الساحر في الاستعراض .

[مراكي الذيب]

ما شاء الله عليك اخوي ابوسليمان حتى وانت تسب نفسك طلعنا بفايده:D :good:

تصدق ان الصوره اللي اجتهد عليها بالتبطح والتسدح على شان ادور الزاويه الزينه تطلع لك عليها , وبعض الاحيان تطلع لك صوره ماحسبت لها حساب احسن صوره :good:

لكن الله يعين اللي هاوي التصوير , واحد من الشباب اذا طلع معنا رحله كل يومه وهو يصور ,,,, والله لو انه من اعضاء مكشات كان مالقينا مكان لصورنا .

[فرد حمزة]

حفر لوجيا


عليكم السلام ورحمة الله وبركاته


حياك الله أبو سليمان

تصدق :) أني كنت ناوي أطلب فتح قسم للكميرات وفنون التصوير و التحكم اليدوي

لكن سبقني أحد الأعضاء وأدرج الموضوع .. وقد رأت إدارة مكشات غير نظرة صاحب الموضوع ... فهي على دراية وكفاءة بما يفيد منتدى مكشات :)

نعود ..

التصوير كما قال ابو حمد راعي عنيزة

يبقى تعلم فن التصوير

من حيث أختيار الهدف المراد تصويره
أحتواء الهدف على ماذا ؟
ما الذي يدخل مع الهدف في الصوره ومالذي يجب إستبعاده ؟
زاوية التصوير ؟
أختيار الوقت والموقع ؟
الفلاش متى يجب أن يعمل أو لا يعمل ؟
الحامل الثلاثي للكمرى وهذا مهم جداً إذا كانت تريد تصوير بدون فلاش ؟
الكمرى لها وضعيات للتصوير كثيره لكن للمبتدى يستحسن له أختيار الوضع الأوتوماتيكي

وأخيراً برنامج الفوتوشوف لعمل التضاد والألوان وتغيير حجم البكسل وتقليل الحجم

حفر لوجيا أبو سليمان

تقول أني مطفي الكميرى :D:D:D

وكاد أنك ما شفت ماضوعي هذا

يطيب لي دعوتك لزيارته :)
تفضل قص الشريط من هنا :D
http://www.mekshat.com/vb/showthread.php?s=&threadid=13717

[حفرلوجيا]

من المكشاتيين .. وليس من عندي .. درزن تعليمات للتصوير

الأخوان : الخبير , القماري , راعي عنيزة , المربد , صقر , نفل , الرحال2003 , رعد الجنوب , الحر , شقردي , مراكي الذيب , فرد حمزة .. أشكركم جميعا ونقدر لكم كل الذي أمديتمونا به من رأي وتجربة .. وكلامكم جميل .. وشخصيا استفدت منه وجمعت تعليماتكم وطبعتها وحفظتها سلمكم الله .. واسمحوا لي بتلخيصها بالتالي :

1- من البديهي أنك ستتأكد من استكمال الاستعدادات الكاملة من بطاريات وشواحن وتوصيلات وجميع مايلزمك من أدوات لازمة تحتاجها في موقع التصوير.
2- يستحسن أختيار الوضع الأوتوماتيكي إذا كنت لاتجيد التعامل( الإحترافي ) بتقنيات الكاميره.
3- اضبط الكاميرة إذا كانت رقمية على وضع ( أعلى درجة وضوح ومقاس للدقة ).
4- حاول أن ترسم في ذهنك الصوره قبل تصويرها ولا تستعجل ولا تتعيجز لانك قد تحتاج لمعرفة تفاصيل المكان أو الشيء الذي ستصوره حتى تصل للزاوية الأفضل .
5- قبل التقاط الصورة تأكد من أن موضوع الصورة ( الهدف الذي تريد تصويره ) في المقدمة بحيث لايظهر أمامه شيء يخفيه أو يغطي عليه.
6- حاول ان تترك وسط الصورة فارغا من الاشياء المرتفعة القريبة ( شجر , جبال .... ) التي يمكنك أن تضعها في أحد الجوانب .
7- أفضل الأوقات لتصوير الطبيعة هي بعد الشروق وقبل الغروب .
8- من الأفضل أن تكون الشمس خلفك وأنت تصور أو عن يمينك أو عن يسارك لكي تظهر الألوان زاهية في الصورة .
9- للأجواء دور في وضوح الصورة فالأتربة العالقة بالجو والضباب وما شابهها يقلل من الوضوح .
10- الإحساس بالجمال يعود إلى ذوقك , وبالنسبة للمناظر الطبيعية .. كلما احتوت الصورة على تضاريس أ و( ثلاث هيئات طبيعية وأكثر مثل شجر , ماء , سحاب , رمال , صخور وجبال , خضرة ....) كلما أعطت الصورة مزيدا من الجمال .
11- عندما تهم بالضغط على الإزرار للتصوير لابد ان تكون الكاميرة بشكل أفقي أو راسي متوازنة ( بلا ميلان ) وتكون يديك ثابتة حتى لاتهتز الصورة .
12- قد تكون بحاجة لأكثر من لقطة للمنظر الواحد تسهيلا لعملية أختيار الصورة الأفضل وإعتمادها.
وسلامة الجميع

[هوى بلادي]

مشكور

[أبو فراس]

السلام عليكم ورحمة الله وبركاته

اسف تراني غلطان

انا كنت ابدخل منتدى مكشات .... دخلت معهد التصوير الفوتوغرافي

ما شاء الله عليكم دروس بالمجان

[ذو الرمه]

بسم الله الرحمن الرحيم

السلام عليكم ورحمة الله وبركاته

شكراً أخي حفرلوجيا على هذا الموضوع والأخوان بارك الله فيهم وفوا وكفوا ، وكما تفضلت أنت والأخوة فإن التصوير علم قائم بذاته وكل موضوع من مواضيعه له فنه وطرقه وهو كالكتاب يتألف من فصول مختلفة.

حيث أن تصوير المناظر الطبيعية أو مايعرف بـ landscape لها قواعدها وكذلك المناظر الساكنة still life لها ايضا ضوابطها وقواعدها.
لكن أهم شئ في هذا الموضوع هو:
1- ترتيب المنظر وتجميع الموضوع المراد تصويره وهو مايعرف بـ composition .

2- زاوية الكاميرا.

3- تفحص المكان وأختيار الزاوية المناسبة له ، وهذا يتطلب من المصور أن يأخذ الوقت الكافي في أستكشاف المكان حتى يتمكن من معرفة الزاوية المناسبة لألتقاط الصورة النهائية.

4- الأستفاده من خاصية عمق المجال Depth of field وكذلك البعد البؤري focal lengh والذي تتميز فيه كثير من العدسات.

هذه بعض الأشياء التي يجب على المصور معرفتها ليتمكن من الحصول على صورة جيدة ، وفي الحقيقة هذا هو الموضوع الذي سوف أتكلم عته بالتفصيل في الموضوع القادم بإذن الله.

و السلام عليكم ورحمة الله وبركاته

أخوك أبو عبد العزيز

[راع الكحيلة]

مع احترامي لأساتذتي ..وما عرضوه من معلومات قيمة هنا والتي استفدت منها كثيرا..لكن

ودي امزح مع حبيبي بو سليمان واذكر له تجاربي


حبيبنا أبو سليمان

لا تتعب نفسك وخلك دخيل على الفن مثلي :)

ترا التصوير ها الايام يعتمد اعتماد شبه كلي على الكاميرا ومن ثم تزداد حلاة الصورة إن كنت راعي صيد

ولا أقصد صيد الحباري ولا الأسود إنما أقصد صيد المناظر

حط الكاميرا على الأوتو وصوّر لين تتعب عيون كيمرتك ..

وخلال هذه الفترة إذا اردت فتعلم على الراحة ولكن لا تؤجل اصطياد اللقطات إلى أن تتعلم

فالتعلم يكون ارسخ في الذهن إذا كان عمليا


نعود لموضوع الصيد

يعني وانت ماشي مثلا , رأيت منظرا إضطرك أن تتابعه بعينيك أو أن تلتفت إليه بين فترة وأخرى فاعلم أن هذا صيد ما يتطوف.

نظرت إلى منظر اخرج لفظ التسبيح من فمك غصب عليك ..فهذا صيد لا يعوّض

نظرت إلى منظر فهالك شكله واستعذت بالله منه فهذا صيد آخر

وانا التقطت صور كثيرة منها ما شاركت به هنا ومنها ما شاركت به في مواقع تصويرية متخصصة ولم اشارك بها هنا بسبب القدرة الاستيعابية للصور في الموقع واضطراري لتصغير الصورة هنا إلى 70 كيلوبايت مما يقلل من جمالها.

إليك هذا الصيد
الذي اصطدته وأنا والله لا زلت لا أعرف وشهو الاي إس أو... والا ..الأي أف..والا..ساتيوريشن ..والشي الوحيد اللي اعرفه عن هذي الاشياء انها ما توكل

بس ما عليك أعرف وشهو البيكسل وبعض الاشياء اللي تعلمتها لاحقا

يعني اجتهد واختر كيمرة مضبوطة تعدل لك قلة الخبرة




إليك الصور

بعد ما صلينا الفجر وتقهوينا إلا ذاك المنظر اللي ينزّل جبهتك لمولاك سبحانه وتعالى

وانا على المركى داخل الشراع و...كلييك
http://www.mekshat.com/pix/upload/images6/mk5247_sun rise1.jpg


دخلت عند واحدة من الكحيلات وولدها قبل ما ينفقون (الله يعوّض)
وخليتها تتحرك ثم ...كليك
http://www.mekshat.com/pix/upload/images6/mk5247_RUN1.jpg


سكبت الما ثم ..كليك
http://www.mekshat.com/pix/upload/images6/mk5247_water12.jpg

وغيرها كثير
والرك على الكاميرا ثم نظرات عيونك واللي يثيرها

طبعا التعلم يجي بعدين وأنا لا زلت في طور التعلم

الصور عن طريق كاميرا أولمبس ألترا زووم 750

[راعي الكيف]

ماشاء الله تبارك الله يا حفرلوجيا .... عز الله انك كفيت ووفيت .... وماقصرو الاعضاء كلن كب قدره


كذا المنتديات ولا بلاش !!!!!!!!!!!!!!!!!!!