تنصحونن اركب كفرات يوكوهاما على الباترول والا لا ادخل ورد

[ولد البدائع]

معي ربع باترول 2006 عليه كفرات بريجستون جنط 17 ودي اغيرهن للقساوة في النفود ولا يفرش الكفر اذا بغيت تنسم بالنفود وقاسي مطبه اما بالخط شى ثاني
ودي اركب يوكوهاما نكشة الكفر مهبول ويتحمل
وش رايكم تنصحونن والا لا
علشان ماتوهق واشتريه وهل يتحمل الباترول والا لا واناانتضر منكم ردودكم
سلبيات وايجابيات انتضر ردودكم

[القناص]

ميشلان
فان لم تجد
فدنلوب
وانحش عن الباقي.

[escape_man]

شف وانا اخوك .. هذي وجهة نظري وتجربتي

يوكوهاما الموجود بالسوق حاليا يقولون انه كله وارد دبي .. حتى اسعاره رخيصة نسبيا وهذا دليل يفند :) ماذكر سابقا ويدلل على صحة المقولة ..

برجستون .. ممتاز وفوق الممتاز رغم ان تحملها للحرارة والسرعة تصنيف B ومو A وكذلك ضد الانزلاق ضعيف نسبياً. والموجود بالسوق ايضاً وارد دبي ولايوجد ياباني اصلي الا بوكالته وتلاقيه فارق عن وارد دبي احيانا بـ 120 ريال.

دنلوب .. يقولون جيدة وتتحمل لكن بالنفود تراها مثل البرجستون .. بل اردى وعقب سنة اجدععععهن.

يوكوهاما .. يابانية بالاصل ولايوجد مغشوش منها حتى هاللحظة و مقياس السرعة والانزلاق والحرارة A يعني مناسبة لاجوائنا.

ميشلان .. مع احترامي لرأي القناص .. حرق قروش .. قاشية وتتسحك بسرعة واذا جاء عز القايلة فكنك تلعب سكيتي من الانزلاقات والتصريخ.

الله يوفقك ودعواتك

[ولد البدائع]

شف وانا اخوك .. هذي وجهة نظري وتجربتي

يوكوهاما الموجود بالسوق حاليا يقولون انه كله وارد دبي .. حتى اسعاره رخيصة نسبيا وهذا دليل يفند :) ماذكر سابقا ويدلل على صحة المقولة ..

برجستون .. ممتاز وفوق الممتاز رغم ان تحملها للحرارة والسرعة تصنيف B ومو A وكذلك ضد الانزلاق ضعيف نسبياً. والموجود بالسوق ايضاً وارد دبي ولايوجد ياباني اصلي الا بوكالته وتلاقيه فارق عن وارد دبي احيانا بـ 120 ريال.

دنلوب .. يقولون جيدة وتتحمل لكن بالنفود تراها مثل البرجستون .. بل اردى وعقب سنة اجدععععهن.

يوكوهاما .. يابانية بالاصل ولايوجد مغشوش منها حتى هاللحظة و مقياس السرعة والانزلاق والحرارة A يعني مناسبة لاجوائنا.

ميشلان .. مع احترامي لرأي القناص .. حرق قروش .. قاشية وتتسحك بسرعة واذا جاء عز القايلة فكنك تلعب سكيتي من الانزلاقات والتصريخ.

الله يوفقك ودعواتك

الحين تقول يوكوهاما وادر دبي ومغشوش
وتقول ثانية يوكوهاما ياباني اصلي ولا فيه مغشوش مافهمت :no2:

[غضنفر]

انا جربت اليوكوهاما على جنط الــــ 17
في البداية اول ما لفت نظري
هو رخص سعرها
الكفر شريته بــ 410
بينما الدنلوب 275\70\16 الان سعره 410 ريال!
في البر ما يفرق عن البرجستون كل كفرات الــ 17 ما تفرش زين
يمكن يكون اخف شوي من البرجستون
في الخط ما له صوت
لكن الكفر ضعيف مع الجمب في الحصى

[ولد البدائع]

انا جربت اليوكوهاما على جنط الــــ 17
في البداية اول ما لفت نظري
هو رخص سعرها
الكفر شريته بــ 410
بينما الدنلوب 275\70\16 الان سعره 410 ريال!
في البر ما يفرق عن البرجستون كل كفرات الــ 17 ما تفرش زين
يمكن يكون اخف شوي من البرجستون
في الخط ما له صوت
لكن الكفر ضعيف مع الجمب في الحصى

طيب مشكور ماقصرت
ولا هل يعيشن ويتحملن والا لا
ماهمن الحصا انا ابيه دريه وخط تتحمل وهل يتاكل من جوا الكفر والا لا تنصحن بهن خط وديرة والا لا وعمرهن الافتراضي واجد او لا
اما البر معي هلل وكفرات شواهين
الله يجزاك كل خير

[غضنفر]

طيب مشكور ماقصرت
ولا هل يعيشن ويتحملن والا لا
ماهمن الحصا انا ابيه دريه وخط تتحمل وهل يتاكل من جوا الكفر والا لا تنصحن بهن خط وديرة والا لا وعمرهن الافتراضي واجد او لا
اما البر معي هلل وكفرات شواهين
الله يجزاك كل خير
والله
ما جربتهن الا 9 اشهر
ما شفت منها خلاف
الكفر ياباني لا تخاف منه
اليوكوهاما معروفه شفها تعيش على الونيتات

[مقلع الرمث]

لا يكون وراد دبي وتوكل على الله

[.أبوعبدالرحمن]

وانا اخوك اليوكوهاما ممتازة وتتحمل لكن يعيبها انها تزلق مع حرارة الزفلت



لكن انصحك بالدنلوب ممتاز في البر ويتحمل الجلد والخطوط والنفود


ولا تنسى الاستخارة

[سعد777]

انحش عن اليوكهاما ممتازه مع الطعوس بس البر والمطناج الله يعينك تكره شي اسمه كفرات ولا رجال تمشي 10

[عاشق السيل]

اليوكوهاما قوية جدا وتتحمل كل أنواع الظروف ( حرارة ، نفود ، حصى ، شوك ، أرصفة ، خطوط ) بصراحة فيها قوة تحمل غريبة بس أهم شي تكون اليابانية الأصلية واحرص بعد على النقشة الجديدة علشان ماتطلع صوت ونة ،،،

و مشكلتها إنها تزلق بالأسفلت الحار ومع الوقت تصير قاسية ،،،

أما إذا كنت تبي كفرات لينة ومريحة وناعمة وتتحمل الخطوط وممتازة بالنفود فلا تتعدى هنكوك بس تراها أقل تحمل من اليوكوهاما ،، وهذا من واقع تجارب والله يوفقك للي فيه الخير ،، وتقبل مروري يالغالي ....

[escape_man]

الحين تقول يوكوهاما وادر دبي ومغشوش
وتقول ثانية يوكوهاما ياباني اصلي ولا فيه مغشوش مافهمت :no2:

آسف وانا اخوك

اليوكوهاما يابانية على ذمة اهل المحلات

والي قصدت بانه وارد دبي الي هو التويو ولكن معاد يمديني اعدل وهو ماذكرته بالسطر الثاني من المشاركة 2 بهالموضوع

اكرر الاعتذار

[المميـز]

انا متعامل مع الفايرستون وممتاز جدا

[سعد777]

انحش عن اليوكهاما ممتازه مع الطعوس بس البر والمطناج الله يعينك تكره شي اسمه كفرات ولا رجال تمشي 10

آسف قصدي هنكوك مركبها على الأكسبدشن 265/ 70

[مخاوي الكشات]

الصراحة بعض الكتاب صراحة غسلت يدي منهم أجل في أحد في العالم يسب جودة الميشلان الفرنسي !!!!!؟؟؟؟ أو ينتقد الدنلوب ؟؟؟؟؟ يعني إسمح لي من يقول هالكلام ماعنده سالفة نهائيا ولا تسألني أسأل أهل المقناص والنفود والشعبان ..

البرجستون جودة لا يعلى عليها الصراحة تتعب وأنت تقول جودة .. يعني كفر أكثر من رائع يتحمل لثلاث سنوات وهذه أنا واقف عليها هالقصة أعرف شخص معه جيب البرجستون جلست معه 3 سنوات ومازالت صح يمكن حبلت ولكن لوشفتها ممكن تقول لها سنة أو كثر بشوي . .. تعض الأرض عض ولكن فيها ميزة سيئة ألا وهي قساوتها الشديدة لدرجة لا توصف ومطبها قاسي وهذا عيبها الوحيد والقشة التي قصمت ظهر البعير ..

الدنلوب جودة ممتازة تتحمل الكثير ممتازة في الحصيان والشعبان وطرب في النفود كفرات لينة وهذا الكلام ليس من شخص آخر انا شخصياً محربها أكثر من رائعة ممتازة في كل شيء وفي إعتقادي أنه أفضل كفر لسبب أن يصلح في كل الأماكن قد لا يكون ذا جودة عالية مثل البرجستون ولكنه لين في النفود قد لا يكون لين مثل الهانكوك في النفود ولكنه يتحمل الشعبان والحصيان ولا تخرب أو تمحى نقشته ... يعني كفر يصلح في كل الاماكن والشاهد الله على كلامي أنه في النفود أكثر من رائع والله أن الكفرات فيها 35 ومبطوحة من ليونته وهو أنواع وأجدد نوع اللي الآن موجود على جيب اللكزس 2008 والفكسار 2008 وهذا فيه ليونه شديدة .. ولكن فيه ميزة يراها البعض سيئة والآخر يراها رائعة اللي هي التصفير فالكفر يطلع صوت صفير أو تفحيط خيالي يعني لو تطلع سيارتك من كراج بيتكم وتكسر يسار أو يمين علشان تمسك الدرب تسمع أنواع الصفير كذلك مع المديورات ..أرى أنه هذا ليس عيب كبير ممكن أنه يفسد الكفر أو يستاهل أنك تغير الكفر عشانه ..

الميشلان الفرنسي هنا انت تسأل عن عظيم والعظيم الله هذا بشكل موجز لا يوجد أجود منه بتجربة أحد الإخوان وكلام الأعضاء المجربين لهذا الكفر ولكن عذروبه سعره الغالي طبعاً فيه احد الأخوة هذا الكفر جلس معه 100 ألف كيلو وأنواع الرقيع بحكم المنطقة اللتي يسكنها ومع ذلك صابر ..

الهانكوك نقشتها جميلة كتابتها أروع ولكن للنفود والشارع فقط تصبر صحيح ولكن نقشتها تتأثر في الشعبان والحصيان وهذه أنا مجربها شخصيا ولكنها وللحقيقة تصبر صبر أيوب ولكنها مع الحصيان والشعبان والكد تحبل ونقشتها تروح غلطة ..

اليوكوهاما هذي طال عمرك ماجربتها هذي عند جارنا عنده جمس يوكن دفرنس الرجال راعي على قولتهم مطيريش وراعي بران ونفود يقول لي أنه مركبها لأنها لينه في النفود وأنها ممتازة والصراحة أنها لينة كذلك نقشتها ممتازة صبورة وماشفت الكفر إلى الآن محبل ولكن لاحظت ملاحظة وهذه ضربة في جودة اليوكوهاما ألا وهي اني دايم أشوف كفراته منسلخ أو منفقعة عليه في الخط دايماً بشكل غريب شفته أكثر من مرة ألقاها مركب الإستبنه وحاط كفره في الشنطه يعني خرجت من هذا المنظر بإستنتاج أنها ما تتحمل المسامير يعني علطول تدخل فيها أو أنها ذات جودة مش ولابد وقد شفت مرة كفرلجارنا متقطع رايح غلطه منفقع عليه ..ودايم هالمنظر أشوفه مع أنه مايستعمل السيارة واجد لأن علمه يستلزم منه عدم إستعمال سيارته بل إستعمال سيارات الحكومة ..لذلك خفت من اليوكوهاما ..

آسف على الإطالة ولولا غلاك ماقلت هذا كله ..

[ولد البدائع]

شكرلكم لكم على مشاركتكم جميعا والله يجزاكم عنا كل خير

[escape_man]

الصراحة بعض الكتاب صراحة غسلت يدي منهم أجل في أحد في العالم يسب جودة الميشلان الفرنسي !!!!!؟؟؟؟ أو ينتقد الدنلوب ؟؟؟؟؟ يعني إسمح لي من يقول هالكلام ماعنده سالفة نهائيا ولا تسألني أسأل أهل المقناص والنفود والشعبان ..

البرجستون جودة لا يعلى عليها الصراحة تتعب وأنت تقول جودة .. يعني كفر أكثر من رائع يتحمل لثلاث سنوات وهذه أنا واقف عليها هالقصة أعرف شخص معه جيب البرجستون جلست معه 3 سنوات ومازالت صح يمكن حبلت ولكن لوشفتها ممكن تقول لها سنة أو كثر بشوي . .. تعض الأرض عض ولكن فيها ميزة سيئة ألا وهي قساوتها الشديدة لدرجة لا توصف ومطبها قاسي وهذا عيبها الوحيد والقشة التي قصمت ظهر البعير ..

الدنلوب جودة ممتازة تتحمل الكثير ممتازة في الحصيان والشعبان وطرب في النفود كفرات لينة وهذا الكلام ليس من شخص آخر انا شخصياً محربها أكثر من رائعة ممتازة في كل شيء وفي إعتقادي أنه أفضل كفر لسبب أن يصلح في كل الأماكن قد لا يكون ذا جودة عالية مثل البرجستون ولكنه لين في النفود قد لا يكون لين مثل الهانكوك في النفود ولكنه يتحمل الشعبان والحصيان ولا تخرب أو تمحى نقشته ... يعني كفر يصلح في كل الاماكن والشاهد الله على كلامي أنه في النفود أكثر من رائع والله أن الكفرات فيها 35 ومبطوحة من ليونته وهو أنواع وأجدد نوع اللي الآن موجود على جيب اللكزس 2008 والفكسار 2008 وهذا فيه ليونه شديدة .. ولكن فيه ميزة يراها البعض سيئة والآخر يراها رائعة اللي هي التصفير فالكفر يطلع صوت صفير أو تفحيط خيالي يعني لو تطلع سيارتك من كراج بيتكم وتكسر يسار أو يمين علشان تمسك الدرب تسمع أنواع الصفير كذلك مع المديورات ..أرى أنه هذا ليس عيب كبير ممكن أنه يفسد الكفر أو يستاهل أنك تغير الكفر عشانه ..

الميشلان الفرنسي هنا انت تسأل عن عظيم والعظيم الله هذا بشكل موجز لا يوجد أجود منه بتجربة أحد الإخوان وكلام الأعضاء المجربين لهذا الكفر ولكن عذروبه سعره الغالي طبعاً فيه احد الأخوة هذا الكفر جلس معه 100 ألف كيلو وأنواع الرقيع بحكم المنطقة اللتي يسكنها ومع ذلك صابر ..

الهانكوك نقشتها جميلة كتابتها أروع ولكن للنفود والشارع فقط تصبر صحيح ولكن نقشتها تتأثر في الشعبان والحصيان وهذه أنا مجربها شخصيا ولكنها وللحقيقة تصبر صبر أيوب ولكنها مع الحصيان والشعبان والكد تحبل ونقشتها تروح غلطة ..

اليوكوهاما هذي طال عمرك ماجربتها هذي عند جارنا عنده جمس يوكن دفرنس الرجال راعي على قولتهم مطيريش وراعي بران ونفود يقول لي أنه مركبها لأنها لينه في النفود وأنها ممتازة والصراحة أنها لينة كذلك نقشتها ممتازة صبورة وماشفت الكفر إلى الآن محبل ولكن لاحظت ملاحظة وهذه ضربة في جودة اليوكوهاما ألا وهي اني دايم أشوف كفراته منسلخ أو منفقعة عليه في الخط دايماً بشكل غريب شفته أكثر من مرة ألقاها مركب الإستبنه وحاط كفره في الشنطه يعني خرجت من هذا المنظر بإستنتاج أنها ما تتحمل المسامير يعني علطول تدخل فيها أو أنها ذات جودة مش ولابد وقد شفت مرة كفرلجارنا متقطع رايح غلطه منفقع عليه ..ودايم هالمنظر أشوفه مع أنه مايستعمل السيارة واجد لأن علمه يستلزم منه عدم إستعمال سيارته بل إستعمال سيارات الحكومة ..لذلك خفت من اليوكوهاما ..

آسف على الإطالة ولولا غلاك ماقلت هذا كله ..

انشاء الله انها ماتاصل حد انك تغسل يدك من اخوانك

القضية دردشة ونقاش وسوالف بمجلس والكل ينقل تجربته وماوصل اليه من معلومات .. حتى بالحديث تلاقي وصل لمالك مالم يصل للشافعي وعكسه صحيح.

انا الميشلان قلت انها تتسحك وتزلق خاصة اذا الاسفلت حار وهذا خطر على اصحاب الجيوب مثلي ومثلك .. محد ناقص موتره يفر لو سنتي وهو مركب مساعدات وكعكات وشاقص بكبد السماء

ودج المواضيع وتلاقي غالب الناس تذمها ...

البرجستون ماعليها كلام وعلى فكرة Traction & Temp, Speed = BB
يعني مو افضل شي وبالسرعة محدودة وتحملها للحرارة جيد ولكنها مو افضل شي مع اني امووووت فيها والسرعة المفترض ما تتجاوز 150

اليوكوهاما Traction & Temp, Speed = A
والسرعة الي ممكن تمشي فيها بهالكفرات فوووق 200 مما يعني انها قياسيا افضل الموجود

التويو قلنا انها وارد دبي وانا عندي اشكال بهالمسئلة وتوقف

الدنلوب جبارة وقوية بالشعبان والحصى مثل خويتها البرجستون لكنها بعد سنة مووو مضمونة Traction & Temp, Speed = B . وصدقني تسبيدتي بتنفطر عليها لكن لا تذكرت انها بعد سنة جادعهن تحسفت.

يعني بالموجز وانا اخووووك القضية نقاش فلا تحجر واسعا وترمي الناس بالكلام الي يضيق الصدر

مو كل الناس متعصبة واحنا مثلك ندور الخير لربعنا مع ان النفس احيانا تقووول ( وشلك بالناس وغثاها)

بررررب

[رجل كريم]

[b]ميشلان .. مع احترامي لرأي القناص .. حرق قروش .. قاشية وتتسحك بسرعة واذا جاء عز القايلة فكنك تلعب سكيتي من الانزلاقات والتصريخ.






اسمح لي اخوي كلامك غير صحيح .. انا جربت البريدجستون والتويو واليوكوهاما والهنكوك والفايرستون وكلها لابأس بها مع بعض الاختلاف النسبي بينهم من حيث التماسك والقوة والراحة والعمر الافتراضي . اما الميشلان وهذا ما اقصده بغير صحيح فهذا شيء آخر الميشلان قساوته مقبولة ويعمر كثير وحق كرف شديد وسرعة عالية وتطعيس ومشي على الصخور ومناورات شديدة وتحميل وصبور فوق العادة حتى لوكان يصنع خارج فرنسا .. يزيد عن البقية من خمسين الى مية ريال لكل كفر حسب النوع ..

انصح بالميشلان . وعليك بالاستخارة .


تحياتي .,


الجيب باطارات ميشلان

http://up3.m5zn.com/get-7-2008-tmelyx4symc.gif (http://up3.m5zn.com/showimage-7-2008-tmelyx4symc.gif)

[escape_man]

اسمح لي اخوي كلامك غير صحيح .. انا جربت البريدجستون والتويو واليوكوهاما والهنكوك والفايرستون وكلها لابأس بها مع بعض الاختلاف النسبي بينهم من حيث التماسك والقوة والراحة والعمر الافتراضي . اما الميشلان وهذا ما اقصده بغير صحيح فهذا شيء آخر الميشلان قساوته مقبولة ويعمر كثير وحق كرف شديد وسرعة عالية وتطعيس ومشي على الصخور ومناورات شديدة وتحميل وصبور فوق العادة حتى لوكان يصنع خارج فرنسا .. يزيد عن البقية من خمسين الى مية ريال لكل كفر حسب النوع ..



انصح بالميشلان . وعليك بالاستخارة .


تحياتي .,


الجيب باطارات ميشلان

http://up3.m5zn.com/get-7-2008-tmelyx4symc.gif (http://up3.m5zn.com/showimage-7-2008-tmelyx4symc.gif)


ماتشوف وانا اخوك انك استعجلت علي شوي ومافهمت قصدي

انا ماذميت ميشلان وادري انها طيبة .. وادري انها تتحمل الكرف وحقت شعبان وجروف وكل الي خاطرك فيه

انا ما انكرت هالشي علشان يكون في كلامي معارضة لقناعتك الشخصية بالكفر

انا اقول بميشلان انها تتسحك وتزلق وقاسية

هل سمع احد اني قلت انها ردية ولا تتفقع ولا ماتنفع للرمل ولا الحجر :confused:

تحياتي لك

[بيبسي]

غير الدنلوب لا:no2: تدور .. وعن تجربه اكثر من مره في الباترول واللاند كروزر

[gsb]

إذا بغيت كفر اشتر الكفرات من وكالتها تحصل اصلي وموديلات شف النقشة والي تناسبك والمواصفات كذالك أو تحرص ونت تشري من الموزعين احتمال الغش وارد يمكن تحصل كل الانواع بس مغشوشة الااذا كنت هفك الأول هو الرخص. وكان عمرك رخيص

[رجل كريم]

انا اقول بميشلان انها تتسحك وتزلق وقاسية

هل سمع احد اني قلت انها ردية ولا تتفقع ولا ماتنفع للرمل ولا الحجر :confused:

تحياتي لك


[SIZE="4"]حياك الله اخوي بن غييثيات

لا ماقلت شي الكتاب باين من عنوانه .;)

واسمح لي برضو غير صحيح:D الكفرات شديدة التماسك على السرعات العالية ولا تطلع صوت ولاتتمسح ولا تزلق اللي في الصورة قطعت معي 65 الف كم ولازلت محتفظ بها وبركبها قريبا لان البالون تمسح وما عاد ينفع . وهي قاسية لكن قساوتها مقبولة ونزلت توها للسوق نقشة جديدة واكيد افضل من سابقاتها .

تقبل خالص تحياتي .,

[خلاوي3]

أنا جربت الهانكوك ممتاز وخوي معه ميشلان خرب عليه قبلي مع اني أشد منه في الأستخدام

[ABO AL-HESH]

شف ياخوي انا غيرت كفراتي قبل 3شهور الي فيه اول برجيستوون 17 من حيث الصبر مافيه مثل البرجيستون لكنه قاسي مره وهذا السبب الي خلان اغيرهـ غيرته وبعد مشاورات بالمنتدى رشحوا الدانلوب ..
واروح واركب الدانلوب الواحد 450 وكان اليوكاهاما 430 العلم ركبته وليتي ماركبتهـ ثقيل وقاسي نفس البرجستون ومايمشي الموتر بالنفود الا اذا نسمت على15 ...انا انصحك باليوكاهاما واذا كان السعر مايفرق معك ركب ميشلان فرنسي لانهـ يصبر ويعيش ولين بالنسبه لدانلوب.. بالتوفيق ان شاء الله

[ابوتركي666]

من واقع تجربه لا تعدى دنلوب

[ALOTAIBI]

ولد البدائع اسعد الله اوقاتك انت والربع الموجودين بالخير
صادق والله البرجستون قاسي وثقيل ومطبه قوي حتى مع الاسفلت , عاني مركبه على جيب Gx 94
متعبه الموتر بالحيل وكانت عليه دنلوب متسوى مع احترامي باللي يمدحونه حقت جبال وحرة فقط وكذلك التويو ما تصلح للجيب جنب الكفر ضعيفه , ادنا ضربه بسيطه على الجنب يحبل الكفر ولا يصلح
اما اليوكوهما صراحه حلوه على الموتر وميزتها : ناعمة يعني المطب يخف , وخفيفه على السياره. وجودتها مثل البرجيستون وقويه وتتحمل الحموله
صراحه انا ابا اغير بعد البرجستون الى يوكوهاما
وتوكل على الله

ولمعلومية وكيلها الجميح ان ما خاب ظني

وتقبل رد اخوك العتيبي وان شاء الله افادك

[مواسي الطعوس]

لو توضح اكثر استخدامك كان تريح اللي يجاوبونك واجد.

الدنلوب افضل كفر في الرمل وممتاز كذلك بالخط .لاكن بالبر العر والحصى ولا بريال.

والكفرات تختلف حسب حجم الجنط 16 او 17 وكذلك العرض للكفر فاذا جربت 16 لاتحكم على ال17 والعكس وكذلك من ناحية العرض .

ودمتم سالمين

[ولد البدائع]

مشكورين ماقصرتو على ردودكم


نويت على يوكوهاما بسال هل هو يتحمل الباترول والا لا هذا سؤالي

[ولد البدائع]

اشتري يوكوهاما والا دنلوب

[escape_man]

اشتري يوكوهاما والا دنلوب

كثرنا هرج والواحد استحى منكم

لكن وانا اخوك نصيحة .. اذا بتشتري كفرات مثلاً فاستشر .. والاخوان اتوقع ماقصرو بهالجانب

بقى شغلة وهي انك تنزل السوق وتسئل عن عدة شغلات

تحمل الحرارة .. الثبات وعدم الانزلاق .. السرعة المسموحة للكفر .. نقشة الكفر

هالشغلات ماتتوضح لك الا اذا نزلت السوق

[عاشق السيل]

مشكورين ماقصرتو على ردودكم


نويت على يوكوهاما بسال هل هو يتحمل الباترول والا لا هذا سؤالي


ركب يوكوهاما وانحش عن الدنلوب ،،،

والله ثم والله ثم والله إن تدعيلي !!!!

صحيح إن الدنلوب قوي ويتحمل ويصبر سنوات لكنه قاااااااااااااااااااااااااااااااسي جدا جدا جدا وأطرافه تتقطع مع الوقت ( تتقرض ) ،،،

لكن اليوكوهاما لين وممتاز ونفس جودة الدنلوب والنقشة تصبر حتى ثلاث سنوات ماتتغير !!!

[shaheenshah]

خذ اللي عندي:
الخيار الاول: ان كانت الميزانية حلوه فلا تتعدى الميشلان الفرنسي ومن واقع تجربة استخدمتها ثلاث سنوات وجاها خطوط الله أعلم بها ويوم جيت اغيرها نقشتها ما تغيرت اللهم ان الكفرات صارت قاسية نوعاً ما وهذا شي طبيعي في كل الكفرات ولها قدرة عجيبة في تحمل الحرارة والسرعات العالية.

الخيار الثاني الدنلوب

الخيار اللي انحش منه ولا يطري عليك انك تفكر فيه: الفايرستون والتويو

[al-nashmi]

خذ اللي عندي:
الخيار الاول: ان كانت الميزانية حلوه فلا تتعدى الميشلان الفرنسي ومن واقع تجربة استخدمتها ثلاث سنوات وجاها خطوط الله أعلم بها ويوم جيت اغيرها نقشتها ما تغيرت اللهم ان الكفرات صارت قاسية نوعاً ما وهذا شي طبيعي في كل الكفرات ولها قدرة عجيبة في تحمل الحرارة والسرعات العالية.

الخيار الثاني الدنلوب

الخيار اللي انحش منه ولا يطري عليك انك تفكر فيه: الفايرستون والتويو


وين راح ردي قاعد اكتب ساعة... واخرتها بعد اعتماد المشاركة ما لقيته:no: :mad:

على العموم ردي قريب جدا من رد اخونا شاهن شاه ... بس توسعت فية كثير واخرتها:confused: ضااااااع

[تيرنيدو]

لا اله الا الله اسمع خير الكلام ما قل ودل
طالع للمواصفات بالكفر اهم شيء تكون كلها بحرف A وما عليك من الباقي الاهم الحرااه تكون A والبروشر اللي هو الضغط يون A وما علييييييييييك من القيل والقال للعلم الدنولووب صار اندونيسي مو ياباني يعني لا يغرك الاسم القديم وا1اااااااااااااذااااا لزمت فخذ برييييييييييييييييييييللي وما جاك عندي وربي يسهل امرك