رأيكم بـ سييرا 2008-2007 مقاس 1500غمارة [الأرشيف]

ساري 111

19/07/2008, 12:09 PM

السلام عليكم ورحمة الله وبركاتة

مساء / صباح الخير على الجميع

الحقيقه انا من المتابعين لهذا الصرح الشامخ والجميل والمفيد من قديم لأكثر من سنتين وحاولت اسجل مرراً وتكراراً ولكن جميع المحاولات تبوا بالفاشل ..

وهاانا اليوم تقر عيني بالعضويه معكم أسال الله ان يجعل لي ولكم فيها الخير والبركة
أحمل اليكم الشي الكثير من تجارب وخبره في عالم السيارات ان شاء الله نفيدكم فيها اذا احتجتو له

المهم

حبيت اخذ رأيكم بموضوع .. لاهنتو

طارى لي طاري هاليومين وحبيت اخذ رأيكم فيه

فكرت اخذ سييرا 5.3 الجديد 2008 بـ 110000

أولاً
ابي رأيكم بالموتر سوا اذا فيه احد جربه او احد يعرف احد جربه اوسمع عنه
كيف المشاكل فيه؟؟
كيف المطب فيه ؟؟
وكيف هو بالخط ؟؟
راعي لعب بالخط او ثابت وخذ بالحسبان اني راعي سرعه للأسف الشديد يعني 180وماجاورها
علماً اني اسافر اسبوعياً 300 رايح و300 جاي
يعني الموتر يخارج بالخطوط ومايتعب وإلا لك عليه شوي؟؟

أو تشوفون الرأي الثاني
وهو اني احتفظ بموتري الحالي أفضل لي
واشيل من رأسي فكرة الـ سييرا
موتري الحالي (هدد 2007)

الشكر مقدماً لكل من أدلى بدلوه في هذا الطرح

B.A

19/07/2008, 02:52 PM

الموتر والله ممتاز ولا فيه شي هذا من واقع تجربة استاجرته من محل بالرياض صراحه حب للموتر ودي بس اسوقه لمدة يومين اخذته وهو ماشي 55 الف كيلو مكينه ماتقارن بالهدد طيارة مشاء الله تبارك الله ومع الخط راسي انا سبق وانا كان معي هدد موديل 2006 فل كامل قير عادي قسم بالله العظيم فرق بين السيارتين لصالح الجمس مع ان الجمس جلس معي يومين والهدد جلس معي شهرين وكم يوم ومن ناحية مشاكله والله مادري عنه ولا اقدر افيدك فيه بشي

انا حصلت واحد ابيض عادي جدا ماكينه اصغر نوع بمعارض بريده ماشي 15 الف كيلو يسام 100 الف ريال وحاده راعيه 105 الف ريال صراحة اسعار جنونيه مع العلم انه بالوكاله الفل كامل سعره 107 الف بس غير متوفر

واذا فكرت تشري لك واحد خذ من الامارات اللي يجي فخوذ صراحه شكله حلو والمواصفات والله مدري وشي تفرق عن بعضها

وتبي نصيحتي خلك على موترك ماهو عيب بالسيارات الثانيه بس وجه تعرفه ولا وجه تنكره (خلك على جنيك لا يجيك اجن منه)

ويبقى بهذا المنتدى اشخاص لهم باع طويل بالجموس وان شاء الله رايح يفيدوك فيه اكثر مني مثل اخونا سيف الظفير واخونا لن امل من العطاء واشخاص اخرين لاتحظرني اسمائهم

والله يوفق الجميع

B.A

19/07/2008, 02:53 PM

انا ناوي على همر h2 2008 اذا خابر لي شي لا تنساني

ساري 111

19/07/2008, 08:49 PM

اخوي f.s
اشكرك جزيل الشكر على ماطرحت ووضحت وبينت .. ماقصرت بيض الله وجهك
الحقيقه الموتر اللي ذكرت مريت عليه وفيه اثنين واحد اسود والثاني احمر بمعرض شمال معرض العميريني وجنب معرض الحسن
بس اسعارهم جنون يقول الأسود يسام 107 وماشي 14 الف

ولقيت واحد مع راعيه ماشي 5000 يقول سيم قبل فترة 12
وفيه واحد من العيال طق صدره يبي يجيبه لي بعشره

واذا فكرت تشري لك واحد خذ من الامارات اللي يجي فخوذ صراحه شكله حلو والمواصفات والله مدري وشي تفرق عن بعضها

تقصد اللي يجي حوضه فيبر؟؟
هذا حسب كلام الناس يقولون انقطع عند2005 !!

ودي لو تأكد لي تكفى اذا تقدر واذا حولك صورة قريبه له تحطه خل نشوفه

مجالس الرجال

21/07/2008, 12:22 AM

مساء الخير للجميع000
اسمحلي ياصاحب الموضوع ولا يهون الاعضاء إن الموتر شكله هبيله وسعره مايستاهله وعليه وجهيه تقل اجدار ولا فيه اي حرف من الانسيابيه
واخيرا آسف على ذا الكلام يس الحق يقال

طارق الحربي

21/07/2008, 02:31 AM

موترك مافيه احسن منه ماشالله

خلك على موترك نصيحه لوجه الله

انا معي حوض 2004 مخفذ

الموتر ماشالله عليه رائع ومافيه شي

بس لو يبادلني احد بهدد وافقت :)

وقيان

21/07/2008, 02:39 AM

يقول ضيدان ابن قضعان...

مصممينه للفضــا قبل يفطــم....و يوم افطموه قالت القاع أنا له

باختصـــار..اذا ودك تسوق طيارة وانت على سطح الأرض..خذ لك جمس...انا كان عندي جيب 2006..وحاليا جمس 2006...لامجاااااااااااااااااااااال للمقارنة أبدآ....

و ان كان عندك عيلة صغيرة وخايف من الغمارة..خذ لك غمارة ونص تراه شيخ....

ابوعقل

21/07/2008, 03:07 AM

ساري 111

21/07/2008, 08:38 AM

الله يخليكم ويطول بعماركم على زود عمل صالح

بيض الله وجيهكم ماقصرتو ..

البقيه اللي عنده خلفيه عن اي شي بالموتر لايبخل علينا سوء من مميزات او عيوب او مشاكل

ان كان عندك عيلة صغيرة وخايف من الغمارة..خذ لك غمارة ونص تراه شيخ....

لو عندي عايله كان مافكرت فيه ههههه خويكم عزوبي

A . J . A

21/07/2008, 10:30 AM

الجمس بشكل عام مايحتاج واذا بتاخذ خذ مخصر Z71 (( انا قد شفة صورة لي 2008 مخصر ))
بس لازم يكون عندك سيارهـ صغيره ثانيه

انا سقة حق واحد من العيال والله ماشاء الله عليهـ طيارهـ
وسئلته كيف في البر قال مايحتاج

اتمني لك التوفيق يالغالي

الاحزان

21/07/2008, 10:55 AM

وعليكم السلام هذا اذا بتاخذه اخذه وانت مغمض لاكن بعطيك نصيحه وشي انا مجربه فيه انك اذا اسرعت عليه وبنجرت فيه الله لا يقوله انك تصير رماد((على سرعه فوق الـ 160))
ملقوف مثلي<<<<<<<<<

البيـرق

21/07/2008, 11:04 AM

هلا بك اخوي

انا كنت امتلك هذا الموتر سييرا 2008 فل 1500

بصراحة الموتر قوي جدا وراسي بس بس بس بس بس بس بس بس

انصحك نصيحة اخو لا تشتري الشكل الجديد ولا ب50

زفت جدا جدا من ناحية الجودة والقير كان بيطيح لانه مثل اليوكن الجديد توجد به مشكلة في القير

ووالله بعته ماتم معي شهر...........مشكلة القير تعاني منها الوكالات الان...واسأل الجميح والعيسى

اول ماتسوقه تستانس عليه بس بعد الاستخدام تكرهه.....والقير القير القير هو المشكلة

وانا بعته قبل لا يطيح القير وخسرت فيه مبلغ كبير...........عند التغيير من نمره لاخرى يفحط ويفز الموتر

انا نصحك حتى لا تتورط مثل ماتورطت انا فيه......وهذي صورة الموتر

http://up5.m5zn.com/photos/00138/mx5djko3bjni.jpg (http://up5.m5zn.com/photos/00138/mx5djko3bjni.jpg)

والمشكلة عرفت قيمتة التويوتا عقب ماجربت غيره............انصحك بالتويوتا وبس................

سيف الظفير

21/07/2008, 11:08 AM

الله يسامحك

معك هدد Gx 2007

وتدور جمس حوض 1500

يا اخوي الهدد يدور بالمنقـــــــاش

صدقني احتفظ في الجيب ولا تفرط فيه

نصيحة من أخوك

نصيحــــــــــــــة يا الذيب

B.A

21/07/2008, 11:48 AM

والله ياخوي ماعرف انزل الصور على الموقع بس لو تبحث عن طريق القوقل رايح يطلع لك ومكتوب على القزازه دبي ولونه ذهبي

وموترك زي ماقالوا الاخوان ترة حلو ولاتفرط فيه بس عيبه مكينته الضعيفه تصدق الددسن تنتفه تنتيف ولاياكل معها عيش مدري ليش جيب هذا كبر زوله بين السيارات وهو وليشه بالقومه وبالخط

ابو شكاع

22/07/2008, 01:50 AM

السييرا عشق
انا كان معي z71 موديل 1995 شاريه من دبي
مثل هذا بس لون أحمر
http://media.motortopia.com/files/10025/vehicle/4803e23bdb9a8/S6300536.jpg

ياخي موتر عز ...تحس إنك ملك وأنت تسوقه ...هذا غير إني مغير كناديسه ومركب له كناديس سوبربان 1995 يعني يلعلع لعلعة
يازين ذيك الأيام .....يفحط بالأول مسافة طويلة وكان فقط 3 تعشيقات والريوس الرابع
كان معجب به الكثير من الناس وبشكله ولونه وكان نشيط جدا
لكن يوم قرب الزواج بعته ....
عموما هي مواتر تجوز لناس معيين وتدغدغ مشاعرهم وأنا من هالناس
طيب اخوي مافكرت في التايتان ؟
رهيب شكله جدا وهو من نيسان

http://www.autospies.com/images/users/greenwad/gallery_08_titan_01.jpg

وتوي أدري إنه يجي منه اربع ابواب
وهو يجي 8 سلندر

سيف111

22/07/2008, 11:01 AM

اسأل عن الافلانش من شفر وشوف رد الناس وخبرتهم فيه ....

يمكن يجوز لك ...

اخى انا شخصيا عاجبنى والله يختار الصالح ويبارك لنا ولك

واذا جاااااز لك لا تنسانى من دعوه فى ظهر الغيب

سيف الظفير

22/07/2008, 11:48 AM

اذا معزم خذلك جمس حوض 2500 غمارة او غمارة ونـــــــــــص

واذا دراهمك واجد وملزم على الجمس خذلك 2500 غمارتين 4*4

موديل 2008

Ibrahim.O

22/07/2008, 01:00 PM

اخوي لاتدور الا z71 الصغير موتر يطربك لاشكل ولاقوة وفخامة كل شيء فيه زينالحمد لله حجزت واحد من العيسى وبأستلمه هاليومين ان شاء اللهبالنسبة لل 2500 حجمه كبيييير مره وصندوقه طويل وهذا عيب لان الطول مهوب زين في النفودبالنسبة لاخوي البيرقترى قير اليوكن الوتاهو الجديد كذا دايم يطق ويكون شادّ مره بس انت كان وديته على الضمان وصلحوه ؟بس ابي اسالك عن الموتر بشكل عام وش رايك فيه ... خصوصا في النفود ؟

مكشاتينيو

22/07/2008, 02:49 PM

http://www5.0zz0.com/2008/07/22/11/378154169.jpg

مكشاتينيو

22/07/2008, 02:57 PM

http://www6.0zz0.com/2008/07/22/11/143044823.jpgالداخلية

بيبسي

22/07/2008, 04:58 PM

بصراحه أستغرب منك تفرط بالهدد 2006 وتدور سيرا غماره وش تبيبه خلك على طير شلوى شيك بالجيب

mohmad

23/07/2008, 12:39 AM

:mad: :mad: :mad: :mad: :mad:
بصراحه أستغرب منك تفرط بالهدد 2006 وتدور سيرا غماره وش تبيبه خلك على طير شلوى شيك بالجيب

سوبر VTC

23/07/2008, 01:54 AM

عجيبه بعض الردود

الرجال يسالك عن السلبيات و الايجابيات

لكن مو معقوله انك تلزم على الرجال انه ما يبيع موتره

النفس و ما شتهت

لو اتفقت الاهواء لبارت السلع

ياخي الرجال معجبه الموتر و داخل راسه خله على راحته

بعض الناس يجبرك الا تاخذ رايه

تحياتي لكم

سوبر VTC

23/07/2008, 01:59 AM

شف ونا خوك

اهم شي انك تستخير و تشاور اللي يعزون عليك

طبعا 1500 ستة مسامير على ما اظن

و 2500 ثمانية مسامير

و انا ابشتري للوالد غمارة و نص

طبعا يجي غمارتين انت و احتياجك ما تراه الانسب لك

و ياليت تمر وكالة فورد و تشوف اللي عندهم يمكن يعجبك الفورد من ناحية المواصفات

طارق الحربي

23/07/2008, 04:07 AM

اخوي سوبر فتك

ياليت تقرا الموضوع زين

أو تشوفون الرأي الثاني
وهو اني احتفظ بموتري الحالي أفضل لي
واشيل من رأسي فكرة الـ سييرا
موتري الحالي (هدد 2007)

ثانيا اذا انت تبينا نلتزم بأسئله الرجال التزم فيها انت ولا تدخل فورد

و ياليت تمر وكالة فورد و تشوف اللي عندهم يمكن يعجبك الفورد من ناحية المواصفات

تبي تقولي انك تقول رايك وتنصح الرجال اقولك حنا نقول ارائنا ( بناء على سؤاله ) وكذلك ننصح الرجال ولا تتوقع اننا نبي له الشر ولا نبي له الخير ؟

سبحان الله يابعض الناس

سوبر VTC

23/07/2008, 05:59 AM

اخوي سوبر فتك

ياليت تقرا الموضوع زين

ثانيا اذا انت تبينا نلتزم بأسئله الرجال التزم فيها انت ولا تدخل فورد

تبي تقولي انك تقول رايك وتنصح الرجال اقولك حنا نقول ارائنا ( بناء على سؤاله ) وكذلك ننصح الرجال ولا تتوقع اننا نبي له الشر ولا نبي له الخير ؟

سبحان الله يابعض الناس

رحم الله من اهدى لي عيوبي جزيت خيرا يا طارق الحربي:) :)

اي شخص مو معصوم من الخطا لكن انت وصلته للشر و الخير يدافع البلاء:D :D

و انا عرضت عليه فورد و هو ما سال عنه اصلا لاني حطيت احتمال بالي انه ما يدري عن الفورد على الاقل ياخذ فكرة عن الفورد و يمكن يعجبه و الفورد يجي غمارة و نص ايضا عشان لو شاف الفورد و هو اصلا شاري جمس على الاقل ما يتحسف و لا يضيق صدره يقول ليتي شاري فورد هذا للتنبيه

بالنسبة لردود بعض الاخوان هذا العجب العجاب شف رد ببسي يقول وش تبيبه؟؟؟؟

الرجال طالب و جهات النظر لكن يجي واحد و يقول وش تبيبه:confused: :confused: :confused: :confused:

طارق الحربي

23/07/2008, 06:04 AM

Magellan

23/07/2008, 10:19 AM

سوبر VTC أنت :good:
بصراحة يعني ياجماعه الآدمي مهوب عايش مرتين ، خلوه ينبسط ..
يعني حرام يفكر إنه يشتري سيارة غير سيارته ...:confused:
وأنا أجزم إن إختلافكم مو بسبب إختلاف الجودة أو المسمى بين السيارتين
الإختلاف في صنفي السيارتين
وحده صالون أربع بيبان ووحده غمارة وصندوق..
ياجماعه الموتر يسحر الألباب خصوصا 2500 ،،:D
اخخخخ واحد رايح وطي معه ...شفته مره بجنبي واقف عند إشارة بحي الملز بالرياض وأطالع فيه ،،
ابد بدون مبالغة قلت موتر دورين ما أشوف إلا كفراته وفيه أزياق وصوت من جد يطرب الشيبان
طبعاً جديد وارد الجميح 2008 عليه جميحيات ووطيات جانبية منورة وغمارتين ..
ذكرت الله عليه وقلت ماشاء الله ،،
هذي قصتي وليش تولعت فيه ،،
بس ياجماعه ترى المواتر مثل الحريم ،ناس تصدف معهم ولا أحلى وناس يدورون بين الورش
شوفوا وقيان وأبوعقل وإبراهيم وغيرهم.. كلهم يمدحون الموتر ،يعني مخطين وإلا تنقصهم الخبرة :no2: ..
طيب لو واحد قال عنده جمس حوض غمارة 1500 موديل 2007 ويبغى يشتري هدد أتوقع تبون تنصحونه بنفس الوصية ، إقعد على موترك وش تبي بغيره :mad: ..

أقول كل نفس وماتشتهي بس يلزمك وأنا أخوك تجربة الجمس ولو بالإيجار، وإذا تبي نصيحة التوفير طق لك واحد أبورفرف موديل 2002 أمريكي بحدود 30 الف ريال من أمريكا مثل أخونا دمعة المحروم وموضوعه بالصفحة الثانية وخل الهدد معك ، سكر عليه وحطه بالتجوري:D

سوبر VTC

28/07/2008, 09:58 PM

يالبا قلبك على ادبك

صراحه اهنيك

واعذرني كاني زعلتك

بس ياخوي اتكلم عن نفسي انا رجال جربت اللاندكروز ومعي الحين رفرف غماره 2004 سعودي

واعطيه رأيي بصراحه

عن تجربه

حرام يترك هدد ويروح لجمس مهما كانت المغريات خصوصا ان سعر الهدد مرتفع الحين فراح يوفر بس انا ما انصحه ابدا

مجرد رأي

والاخ ببسي اشوف انه بين وجهة نظره بقصده ان الهدد افضل من الجمس

ومن ناحية الفورد اذا تبي رأيي بس مجرد رأي :)

مكينته اضعف واستخدامه اسوأ انا اقصد ال f 150 وطالع لا تقولي كراون فكوتريا وتجيبها مثال :)

لاني مريت بهالموقف ونصحوني فيه الناس وارخص بكثيييييييييييييييييييييير من الجمس يوم كنت ادور تخيل 2004 ب 31 الف وانا شاري موتري بفرق اكثر

عموما

المعذره

والله يجزاك خير ويرحم والديك

الله لا يهينك ما بيننا الزعل كلنا اخوان
شكله مصري:D :D :D
و الاختلاف لا يفسد للود قضية
وكلن ينام على الجنب اللي يريحه
لكن قبل تقريبا سنه شفت فورد غمارة ونص عند اشارة طبعا مفخم مع الجوانب بصراحه رزه:D
و لحس مخي من شكله و زينه
بس ما دري وش مواصفاته او نوع مكينته او مسمى هالنوع؟؟؟؟؟
اذا تفيدن ؟؟؟؟؟؟؟؟؟لاهنت
تحياتي لك

طارق الحربي

28/07/2008, 11:48 PM

شكله حلو بس كاستخدام ماينصحون فيه

اسعارهن ارخص من الجمس

انا عرض علي يوم كنت ادور فورد حوض غماره مفخذ موديل 2002 بحدود ال 30 الف ريال امريكي

بس طبعا مكروف ومن الشكل القديم مهو الجديد فما اخذته

انا عندي ان الجمس افضل من الفورد في سيارات الدفع الرباعي