لمحترفي التطعيس : نبي نصايحكم وخبراتكم

[ابو شقط]

السلام عليكم جميعا : ياشباب نبي بعض النصائح والخبرات من محترفي التطعيس ودخول البر عن : افضل طرق التطعيس بالسيارة ذات القير التماتيك والخيارات التي يجب القيام بها لاني بصراحة جديد على القير التماتييك وزي ماتعرفون فيه : d ,1,2,3, وغير ذلك ، طبعا السيارة دفع رباعي ، وشكرا لكم ( دعوة للنقاش واخذ الاراء من اعضاء المنتدى الرائع )

[MR.HKR]

الموضوع يعتمد على اشياء كثيره لابد من عرضها واضحة..
اولا السيارة 4 ولا 6 ولا 8 سلندر ...
طبعاً القاعدة الثابتة في اي سيارة هي تليين الكفرات بالنسبة لجيوب (( التنسيم)) من 30/20 على حسب نوع الكفر وعرضة.
بعدين تعتمد على خفة اليد في السواقة اثناء التطعيس اذا كنت تتمشى ,D مايضره بس اذاكنت تعافر وطعس تجي هنا احتراف التطعيس يعني جاك نفود كبير ومسكت معك ترقى وسيارتك 8 سلندر عشق على 2 لان فيه تعشيقتين الاول تاخذ فيه عزم والثاني الشده في الرقية ب 2 احسن ....

وارجع واقول التماتيك فقط 8 سلندر مريح في كل شي بعده يجيك محرك 6 سلندر اما اذا كان موترك 4 سلندر لاتكالمني...

اخوك MR.HKR

[ابو شقط]

ياخوي الموتر يوكون دفع رباعي ، وشكرا للك ومانستغني عن الخبرات والنصائح

[ساري 111]

توجيهات عامه للسيارات الأمريكيه فقط // (السيارات الاميركيه تختلف قيادتها عن اليابانيه بالنفود)

أولاً قبل تدخل النفود طق الدبل .. يعني قبل لاتغرز

وإذا غرز الموتر لاتقعد تحاول فيه بالخفيف ابداً لأنه راح يعدم كلتشات القير على طول طق الثقيل

ثانياً اذا تبي تمشى بالخفيف نزل القير الى الأول ولايطلع للثاني ابد
ولاتخاف الموتر راح يمد معك الى سرعه 65 وانت مرتاح ولو تبي تعطيه رح يصل معك الى 90 وهو بالأول
اليوكن يجيب 90 بالأول 140 بالثاني 180 بالثالث

ثالثاً اذا تبي ترقى طعس جامد حط الثقيل ونزل القير للثاني وحط رجلك (الموتر راح يوم بالثاني بالحاله ذي)
واحلق اشنبي ان مابيض وجهك ...

بس بالأول والأخير لاتنسى تنزل الهواء الى 20 او 15وبعده ماوالله يرده شي
ولاتنسى ان قوة الموتر بدون سواق فاهم بالتطعيس ماتسوي شي

واي سؤال ثاني

[ابو شقط]

مشكور اخوي على التوجيهات ونشوف كمان توجيهات اخرى من اخوانا المكشاتيين ، لكن عندي سؤال : هل اليوكون فيه قفل للدفرنس تماتيك يعني اذا فيه كفر يفر في الهوا يوقفه

[ساري 111]

هل اليوكون فيه قفل للدفرنس تماتيك يعني اذا فيه كفر يفر في الهوا يوقفه

ايه فيه .. بس قفل الدفرنس ماراح يفيدك إلا اذا كنت مثولث
(الأمريكي نادر يثولث بسبب قفل الدفرنس يشتغل تماتيك)

اما اذاكنت مغرز بأرض مستويه ماراح تستفيد من هالخاصيه شي

لعلمك قفل الدفرنس اللي باليوكن يفرط الكارونه بعض الأحيان اذا فحطت على ارض جامده مثل الأزفلت

[ابو شقط]

اخوي : وش معنى ( مثولث ):confused::confused: واعذرني اتعبتك معي

[Ibrahim.O]

اخوي ساري 111اللي يبي يدخل يتمشى بس او على قولتهم يتبطح يعني بهداوه بدون تطعيس ولامراقىما ادري عن وضع القير والدبل يكون بأي وضعيه ؟

[مستكشف الدروب]

اخوي : وش معنى ( مثولث ):confused::confused: واعذرني اتعبتك معي

مثولث يعني الموتر فيه كفر واحد يدور والباقي ما يتحركن وهذي تصير اذا تعلق الموتر على جنب غالبا

[مستكشف الدروب]

اخوي ساري 111اللي يبي يدخل يتمشى بس او على قولتهم يتبطح يعني بهداوه بدون تطعيس ولامراقىما ادري عن وضع القير والدبل يكون بأي وضعيه ؟

يكون بالثقيل اذا كان ما راح يتعدى سرعة 50 اذا كان المكان غراز قوي ولا فيه مطر


اذا كان فيه مطر ومنسم الكفرات يكفي الخفيف

[عاشق السيل]

وعليكم السلام ورحمة الله وبركاته ،،،

الشباب ماقصروا الله يعطيهم العافية بس أبقول اللي عندي :

أول إجراء تسويه قبل تدخل الرمل إنك تنسم الكفرات 20 إذا كان الكفر من النوع اللين أو 15 إذا كان الكفر من النوع القاسي وبعدين ادخل الرمل بدون تشغيل الدبل وإذا حسيت إن الرمل اللي قدامك أقشر يعني فيه صعوبة شغل الدبل الخفيف وخذ راحتك بالتمشي والقير على D أما الدبل الثقيل لاتفكر إنك تشغله إلا إذا غرزت تغريزة صعبة أو بغيت تسحب واحد مغرز وسيارته ثقيلة ممكن تحط الدبل على الثقيل وبعدين افصله وارجع للخفيف ،،

ومن ناحية نمر القير 1 و 2 و 3 هذي إذا بغيت ترقى نفود طويلة ولأن القير يريح وبالتالي يطيح عزم الموتر حط القير على 1 إذا بغيته مايتعدى الأول ولايمكن يريح وإذا حطيته على 2 مايتجاوز الأول والثاني أما 3 يعني القير ياخذ راحته بين ثلاث نمر ،،

و كل اللي قلت لك لايمكن تطبيقه بالحرف الواحد ،، لكن بالتجارب وكثرة الدخول للنفود تبي تعرفك على القير بشكل أكبر من الكلام اللي تقراه من أي خبير والمسألة كلها رؤس أقلام ونقاط ممكن تبدأ معها وتستمر من خلال التجارب ،، ولاتنس إن الخبرة اللي كسبتها تبي تنجح على سيارة معينة وممكن تفشل في سيارة أخرى يعني باختصار السيارات تختلف اختلاف جذري بالتعامل معها أثناء التطعيس !!!

آسف على الإطالة وتقبل مروري يالغالي ....

[مخاوي الكشات]

<?xml version="1.0" encoding="windows-1256"?>
<message><![CDATA[الصراحة ماراح أقولك أني خبير ولكن أنا مجرب الاتوماتيك في النفود :

1- لازم يكون عندك ثقة بنفسك وبموترك هذه بدونها والله لن تفلح .
2- إذا كان موترك يوكون معناتها 8 سلندر والموتر قوي التنسيم مهوب ضروري في بعض الأماكن والأوقات والوضعية خلها D إذا كنت راح تتمشى في نفود زينة جراتها مهيب واجد أرضها ماسكة حتى الدبل ماتحتاجه .. طبعاً هذي الطريقة ماتصلح في كل مكان وتحتاج منك تكون ذا خبرة ولو بسيطة لأنه إذا دخلت النفود وأنت مانسمت ومسرع وتقامز بالموتر وأنت مانسمت هذا يضر الموتر وممكن يتفكك ويحتاج تربيط بعدين وكذلك تضر مساعداتك وتستهلك بنزين لأن مشي الموتر وهو منسم أريح ولا يحتاج تدعيس في بعض الأماكن ..
3- إذا حسيت إن عزم الموتر فتر أو ضعف لا تدعس بنزين بقوة خلك على دعستك وإن شفت أن الوضع تأزم زود على خفيف وبالتدريج طبعاً تقول ليه ؟؟ لأنك إذا حرقت للموتر ممكن أنك تحس أنه بدا يمشي لكنه في الحقيقة قاعد يمشي ويحفر في نفس الوقت وفي النهاية راح تغرز طبعاً أنا مستعد أحلف أن أغلب اللي يغرزن وبسبب تدعيس البنزين عند فتور عزم الموتر.. طبعاً إذا كان عندك دبل ومنسم إن شاء الله ماعليك خوف ..

4- في النفود إستخدام الفرامل خطير في بعض الأحيان يعني خلك مهدي حتى لو في النهار خاصة إذا فرضاً رايح للدهناء المعروفة بسيوفها وعروقها أو رحت لنفود وجايها عج والسافي لاعب دوره هنا السيوف راح تكون أكثر وأطول وحادة يعني طمرة الموتر من فوقها إن كانك على سرعة واردة وممكن على أقل تقدير تجيب التندة أو يروح الموتر وتتفقع مساعدته أو يعلق الموتر فلا دبل وغيره ممكن ينفعك ..

5- إذا صرت نازل من طلعة في النفود أو مكان مرتفع أو نزلته مستقيمة لا تحاول الإكثار من الفرامل او دوس الفرامل بقوة لأنه إن كان موترك لحيته حابه الأرض فهي سيئة لأن لحية الموتر قد تنشب في الرمل وراح تتطلع بس ممكن تضرر اللحية أو الصدام حتى لذلك إستخدام الجلنط اليدوي وهو غير موجود في سيارتك لذلك لا بأس من إستخدام الفرامل شرط عدم الإكثار أو الدوس بقوة ..

6 طبعاً إذا لقيت قدامك طعس وتبي ترقاه ومأخذ مسافة طويلة خله على D
وبدون دبل وإن حبيت بدبل وأكيد الدبل أريح وأسرع .. وفيه عندك النمر 1 و2 و3 يعني مادام أنك راقي طعس أفضل تحط ثلاثة إذا المسافة بعيد بينك وبين الطعس حتى تجيه على سرعه ولا تحرق للموتر وإن كانك قريب 2 وأمش طبعاً فرضا إنك رقيت وشفت عزم الموتر فتر رده بـ 2 إن كانك على 3 وده بواحد إن شفت إن سرعة الموتر وصلت 50 ليش ممكن تروح مكينتك غلطة لو رديتها مثلاً لواحد وأنت تمشي 80 لأنها خارج نطاق نمرة الواحد وسعة النمرة تختلف من موتر لآخر ..

7- إذا أنت سايفت والمقصود بالمسايف يعني نازل من طعس بميلان يعني بدال ماتنزل بشكل عمودي للأرض تنزل بشكل أفقي تقريباً يعني من اليمين للشمال أو أنت راقي طعس بالعرض يعني من اليمين للشمال أو العكس هنا وفي هذه الحركة خطورة المثولث وهذه الدبل يساعدك فيها كثير .. لكن ماهي الطريقة إلي تخليك بإذن الله وغالباً ماتثولث خليك على دعستك وروح وكمل وإدعس زيادة بعد إذا حسيت إن الموتر بيثولث ..
وهذه لازم تكون خبير وإلا خطر الإنقلاب وارد ..

8- لا تستخدم الدبل الثقيل واجد وإلي يقولك إذا بغيت تتمشى إستخدام الثقيل إسمح لي يبي يعدم موترك نوعاً ما أولاًَ بالثقيل لازم ما تتعدم نمرة الواحد والموتر بيسير ثقيل بالحيل وتكره عمرك ويصرف بنزين بزيادة وش الله حادك دامك 8 سلندر إن بغيت تتمشى حط الخفيف وأمش على كيفك إن بغيت تمشي 80 .. الدبل الثقيل للغراز الشديد للسحب إذا كان إلى أنت ساحبه غاطس وموتره ثقيل .. وهذه نصيحة مني طع شوري ..

أعذرني على الإطالة وأنا أدري أن ردي ليس شافي ولا كافي .. ولكن طولت عليك والشباب ماراح يقصرون ..
وفيه نصايح أخرى إن أسعفني الوقت .. ذكرتها فيما بعد .

[ساري 111]

بصراحه مااحب النقاش وتطويل المسأله
بس بأختصار قير الياباني يختلف تماماً عن الأمريكي(يعني لاتحط خبرتك بالياباني هنا)
الياباني يعيطك قوة جر بالأول وعزم بالثاني
الأمريكي بالجر مهب باالحيل اما بالعزم خذ ولد بالأول فقط
اما الثاني بالأمريكي مايسوي شي بالنفود إلا بالثقيل (بسبب ان كارونه الأمريكي يختلف مقاسه عن الياباني)

احب اللفت الأنتباه ان التمشي بأرض مهب وعره مايحتاج تعليم
كلامي السابق للأرض الوعرة واللي الموتر مايمشي فيها بسمحه نفس

[عاشق z71]

عليش اخوي ساري بعقب على كلامك

وهو ان الامريكي اقدر اقولك انه صنع للجر وانت تقول انه مهوب بالحيل

لا معليش اصلا الياباني الي مايصلح للجر نهائي

ونا متاكد ن كلامي ومشكور يالغالي

[ساري 111]

و
هو ان الامريكي اقدر اقولك انه صنع للجر وانت تقول انه مهوب بالحيل

لا معليش اصلا الياباني الي مايصلح للجر نهائي

ونا متاكد ن كلامي ومشكور يالغالي

كلامك صيحيح بس ماينطبق على اليوكن ومقاس 1500

قوة الجر وتحمل الحمل بمقاس 2500 واعلى انا معك قوة جر هائلة جداً وماتضر الموتر

اما بالنسبه لمقاس 1500 واللي من ضمنه اليوكن مايتحمل الجر
فكثر الجر وثقل الحمل يأثر على قير الموتر وكلاتشاته ويأثر على عكوسه وكاورينه .. الخ

انا اتكلم من تجربه سوبربان 2001 سوبربان 2003 سوبربان دينالي 2005
يعني فاهم شغلة الجموس حتى النخاع

[shababi]

اذا تبي تطعس شيء واحد مهم لازم تسويه

الى هو تنسيم التواير الى 15-10 وبس

[سوبر152]

اذا تبي تطعس شيء واحد مهم لازم تسويه

الى هو تنسيم التواير الى 15-10 وبس

[عاشق z71]

كلامك صحيح اخوي ساري وهو ان 2500 تحمل اكثر


ولكن هل تقارن 1500 بالياباني هذا شي مستحيل

صحيح ان 2500 مايتقارن مع 1500


وكذالك 1500 مافي امل يتقارن مع الياباني مثل جيوب التويوتا مثلا

لانه لصالح الجمس

هذا مااشوفه انا والله اعلم

وش رايك انت ؟

[KREEM9]

نسام الكفرات وامش مع الدروب البسيطه وعدم الدعس باقواه حتى اليعدم عليك القيار وارفق عليه تاروه حللك وسيقه فان والشباب ضياع راح باعيلك افضل من الذي يضحكك وبعدين يضحك عليك ودفع الربعي نعمه واليس نقمه وشكرآ

[MR.HKR]

كلامك صحيح اخوي ساري وهو ان 2500 تحمل اكثر


ولكن هل تقارن 1500 بالياباني هذا شي مستحيل

صحيح ان 2500 مايتقارن مع 1500


وكذالك 1500 مافي امل يتقارن مع الياباني مثل جيوب التويوتا مثلا

لانه لصالح الجمس

هذا مااشوفه انا والله اعلم

وش رايك انت ؟

السلام عليكم
معليش تسمحولي اشارك معكم في هذي النقطة ..
انت تقول مافي سيارة يبانية تقارن بالجمس 1500 انا اقولك مالك لوا اذا جينا الى نفس مواصفات مقارنة مع الجمس 1500بالأخص اليوكن (العادي ليس دينالي) انا اقولك نيسان ارمادا اقوى منه سحب ,,,حتى في سعة المحرك اكبر 5.6والجمس 5.3 ..
الوحيد ارمادا الذي يسحب دبل وزنة 3 مرات , مثل الجمس 8.1 (( طبعا يبطي على 8.1)) ...

اما من ناحية التجربة الميدانية انا اقول مواجهات صارت معي وشفتها.
بافندر 2005 يتساحب مع يوكن كلوهم تمتيك الباث سحب اليوكن مع العلم هذا 6سلندر 3.5 وايوكن 8 سلندر 5.3 صراحة انواع الاهانه,,والدبل شغال.
في اكس ار يتساحب مع جمس حوض 1500 سحبة الفي اكس ار طبعا كلهم 4*4 وكلهم مشغلين الدبل.

انا مع شاص 2003 ونش دفلك تساحبت مع تاهو و جمس حوض 1500 و اكسبلور , وكلهم كسرت روسهم
طبعا انا مشغل الدفلك وهذا الي خلاني انسم فيهم وللأمانة كنت مركب فلتر..

وارجو منك اخوي عدم الاستهتار في السيارات اليابنية مع احترامي وتقدير للجموس فقط 454(7.4) و الجديد 498 ( 8.1) ....

اخوك MR.HKR

[عاشق z71]

اخوي الغالي مستر هكر

اولا لو جيت تقارن الارمادا باليوكن كلامك صح

اصلا انا اظم الارماد لامريكي ماظمه للياباني ماشالله

لاكن انا ذكرت فوق بسيارات تويوتا


وشغلة انك سحبت بالشاص جمس يوكون مع احترامي لك طبعا


هذي ماتدخل المخ وذالك لاسباب

اولا شف مكينة الشاص وشف مكينه الشاص تلاقي الجمس اقوى

شف قير الشاص وشف قير الجمس تلاقي الجمس اكبر واقوى

شف كوارين الشاص وشف كوارين الجمس تلاقي الجمس اقوى
شف الدبل حق الجمس وشف دبل الشاص تلاقي حق الجمس اكبر واقوى
واخيرا واهم شي بشغلة السحب شف الوزن لانه العامل الاساسي بهذا التحدي تلاقي الجمس اثقل بمية مره عن الشاص

فوشلون انت قدرت تسحبه بالحبل <<< الله ماشفناه بالعقل عرفناه



تقبل مروري