من مكشات,, قبل 200 سنه لـ( التنهاة ) ,, متعطلين بدون لغات

[حفرلوجيا]

سلام يالربع

بعض الشخصيات ( الحقيقية ) ستكون معكم ( هنا ) ... إذا رأيت الموضوع طويل خذ الجانب المعلوماتي الذي قد يهمك كثيرا .. والدلالات ... وخل الباقي :

الحقيقة

علق أحد الكتاب قبل ايام في أحدى الصحف على خبر عن مجموعة من الألمان بصدد تنفيذ مشروع أسموه ( السفر إلى الماضي ) . والخلاصة تفيد ان جماعة تنوي الغوص والعودة إلى عصر هتلر بغرض التوصل أو التأكد من بعض الحقائق في عهده . ولم يوضح تعليق الكاتب هل الجماعة بصدد مشروع فلم ومشاهد تمثيلية .. أو برنامج حاسب آلي يصمم ( تشبيها ) بعصور سابقة .. ولكن الذي رجحته ( وفقا لبقية التفاصيل ) أن هذه الجماعة ( بزعمها ) انها ستغوص في عالم الروحانيات و( الإقلاع ) إلى الماضي والعيش هناك ثم ( العودة ) من هذه التجربة !!!! :mad: ( انتهينا من فحوى التعليق ) .
-----------
طبعا الجماعة هذه قالت أنهم ( بصدد ).. يعني في المراحل الأولى لمشروعهم , وفي تقديري أن الإستقراء الصحيح لأفضل النتائج النهائية للمشروع هو أن الجماعة بكل الأعضاء ستنتهي إلى ( الإقامة الدائمة في أحد عنابر شهار حق المانيا وبس ) :p .. ( تذكروا شهار ألمانيا وبس .. في نهاية الموضوع ) ;)...

هنا

----------- ماعلينا .. الذي يهمنا.. سوف ( نقلع ) إلى الماضي قبل مائتي سنه في مشروع ( كشتة ) كلف بقيادتها رجل ذو إهتمامات مكشاتية متنوعة .. ويتمتع برؤية( أكاديمية ) يحتاجها المشروع وهو المشرف على منتديات مكشات أخونا أبو تركي ( السمح ) .. ويضم ( الفريق المكشاتي ) كل من المشرف ( أيمن ) لأنه خبير سيارات وعنده سيارة بليزر تحتاجه الرحلة.. وماتعوق معه الطعوس والعروق والجروف .. ولو تبيه يرقى جبال طويق سواها وهو متكي باليد اليسرى على الدركسون واليمنى ( يلعب ) بها بسبحته .. كما يضم الفريق العضو بمكشات أخونا أبو أحمد ( القماري ) لأنه رجل ( صاحب أنتكة وكيف ) ويحب عمل الأشياء على يكونها وخبير في الأجهزة اللازمة للرحلة( قارمن , الاتصال اللاسلكي والفضائي ....الخ ) .. والعضو الرابع ( مكاتبكم ) أخوكم حفرلوجيا ( قالوا لي اسمك جايزٍ لنا خلك سكرتير اللجنة وبس ) وحطوا بالكم من نهاية .. ( وبس ) .;);) ...
------------------------
وين الرحلة وتفاصيلها .. ووش صار فيها .. ومن قابلنا .. وماهي الاحداث والنتائج ؟؟؟؟ نرد لكم بعد مراجعة الموضوع والتأكد من دقة ( الوقائع ) .............. ( يتبع )

[حفرلوجيا]

---------------------- تابع لما قبله ........... الجزء الثاني

الرحلة للصمان .. والبرنامج ( نجهم ) فجر يوم خميس مافيه دوام ( قبل ميتين سنه ) والإنطلاق من الرياض بالبليزر .. ونضحي بروضة التنهاة ..
طبعا الدروب ذاك الزمان عسيرة ماهي مثل ( اللحين ) .. دق ايمن السلف و( يجور ) على البليزر حتى تعطل بروضة التنهاة . نزلنا .. وبدأ خبير السيارات أيمن بشبة النار وسوا القهوة .. وخبير الكيف والأنتكة أبو أحمد يحورف بالسيارة المتعطلة ( موزعين المهام وعارف كل واحد دوره :looney:..:p ) .. . وأبو تركي اللي مطقم بلبس رياضي عليه سديرية مخابيها مليانة فشق شوزن وقبعة مطبوع عليها عبارة ( مكشات .. في كل العصور والأوقات ) شاف زولين حول غنم نصاهم.. وصلهم ورأى النقيض بلبسهم .. ثياب مرودنة وعمايم وجدايل وعيون مكحلة ومحزم تتدلى منه خناجر وسيوف .. لكنه تشجع سألهم ( ونسى يسلم من زود رباطة الجأش :D ) : عندكم هرافي للبيع ؟.
جاوب أحدهم : مالك لوا .. أنت انس وإلا جن !!.. إذا أنت مثلنا ( عان ) الغنم بـ( المفلى ) خذ منها غرضك .. ولا هي لحية بيع دامك وربعك حوالينا .. وإذا أنتم مضحين هنيا .. انتبهو للغنم لاتهجمها الذيابة .. نبي ننهج يم ( الطرش ) بـ( المَندَا ) ونعود بها .:looney:
طبعا الزولين المرودنيين أحرجوا أبو تركي بالتلزيم واضطر يأخذ هريفي لكنه لزم عليهم بالغداء .. ورجع لنا وذكر سالفة المعزومين وقال : فهمت بعض كلامهم . عان : يعني شف أو شاهد , والمفلى : مكان رعي الغنم إذا هي حولك , وننهج : نروح أو نقصد , يم : جهة أو ناحية , الطرش : مجموعة من الإبل .. أما ( المندا ) ماعرفتها .. وش يقصدون ؟!
أبو أحمد ماصدق خبر طمر ( يناقز مبسوط :bounce:. ) وطلع كومة رز يربصه بالماء ويقول : مايبي لها مفهومية ياريس .. يقصدون عندهم مكان فيه برميل مندي وودهم نضبط به هالهرفي.
قال أبو تركي : لاتفشلنا مع ذولا ويصير ماهمك إلا بطنك حنا بعصر قبل ميتين سنه.. خل نتأكد من أيمن .. ولكنه لم يملك جواب .. قال ابو تركي أتصل يابو أحمد ( بالهاتف الفضائي تقدم ميتين سنه ) على أعضاء مكشات كود يرد علينا صقر أو المسفهل أو غيرهم اللحين ويبحثون ..
جاوب واحد منهم بعد البحث ووضح إن المندا : يعني المكان اللي تذهب له الإبل للرعي ويكون بعيد .. ( اربص بدل الرز ياأبو أحمد :D )
مع صلاة الظهر رجعوا الأثنين المرودنيين معهم الطرش و( نوخوا ) .. وكان الأول قريب من أيمن وطلب منه ان يحضر الـ( قَلَص) ... ماصدق خبر راح أيمن يطلعه من ونش البليزر .. وبأدب قال خذ ياخال .. ولكن هذا المرودن زعل وقال : علامك مثل النباطة .. الـ ( قلص ) حقنا هذا ( اللي نحفظ فيه التمر والقرص وزادنا ونعلقه على الجمل خلف الشداد من الجلد وله علاق من سيور الجلد ).
أشوى جلس الجميع يتقهوون .. سأل الثاني ( أنتم مسندين وإلا حادرين ) ..
أبو أحمد من زود الإهتمام طمر ( كالمعتاد ) يجيب مساند وقال له : خذ المساند ريح ظهرك ..
أيضا زعل الثاني وقال ( علامك .. انا سألت انتم مسندين ( يعني متجهين غرب ) وإلا حادرين ( يعني متجهين شرق ) .. مشينا يابو فلان لـ( الَصَلوقَعَة ) اللي ورانا ذولا مانتوالم حنا وياهم .
هنا قام أبو تركي يطيب خواطرهم وطلب منهم يجلسون ويتغدون..
( وعسى ماعادت عند ما سألهم وش هي الصلوقعة ) .. قالوا المرودنيين بصوت واحد : خل أيمن يعلمك تحصله بموضوعه مسميات التضاريس بخيمة المواقع البرية بمكشات (http://www.mekshat.com/vb/showthread.php?s=&threadid=539).. :D
هالمرة الطمرة ( دور أيمن ) .. جاب الكمبيوتر من السيارة يقول : مالقيتها بموضوعي .. وفجأة طلعوا المرودنين سيوفهم ناوين ... شر :(:(.. .... ليش ؟! ..
أرد لكم ........... ............................... يتبع

[حفرلوجيا]

-------- الجزء الأخير ................ الله يجيب العواقب سليمة .........

واحد من المرودنيين خطف الكمبيوتر من أيمن والثاني كسره بالسيف وقال : جايبين معكم صنع اليهود اللي ماعليها من الدين جلود :confused: .. .. وأثناء ماهم معصبين ويرفعون صوتهم بكلام غير مفهوم .. أبو تركي كان يفصخ سديريته اللي مليانه فشق و( يخفيها ) تحت الفراش ( حكيم ياقائدنا :D ) .. أما أبو أحمد ( طمر ) يجيب جميع الأجهزة اللي بالسيارة ويصفها قدامهم يقول وذي عاد ماتقدرون تقولون بها شي هي اللي ( مسنعتنا ) بهالرحلة و... :mad:
وقبل يكمل كلامه هدوا المرودنين على باقي الاجهزة يكسرونها .. وصار لك الوضع شريرة ( مبعثرة ) كأنك بحراج ابن قاسم بالرياض .. ( هذي والله المشكلة ..:( ) .
قام أبو تركي مرة ثانية وهالمرة قال ( داخلين على الله ثم عليكم ) اجهزتنا وخربتوها .. وورطنا .. اوصفوا لن الطريق نبي ربعنا بالصمان ..
هنا راحت عصبيتهم وقال الكبير منهم : شف حنا نبي نروح قدام لـ( الَصَلوقَعَة ) اللي هي الأرض الملساء اللي بدون حجر .. أما انتم شوفوا الزبارة اللي قدامكم إذا وصلتوها خلوها بيسراكم وأمشوا حتى تقطعون العروق وإذا طحتوا بالدكاك تياسروا وخلوكم مبارينها لحد تطيحون بأول الصلب...
وقبل يكمل قال أبو تركي : بس لاهنت .. من الدكاك ( اللي ياما قنصت بها بعد ميتين سنه ) أعرف طريقنا ..
هم تسهلوا على ركايبهم .. وحنا تسهلنا على بليزرنا تحت قيادة أبو تركي اللي يقول ماعليكم ربعنا والصمان واصلينهم الله لايعوق بشر واصلينهم :good:.. ... ولكننا استمرينا بعروق النفود مسافة طويلة حتى اشرفنا على أحد القرى .. وشوي وإلا ذاك الجيب قدامنا ..
( صدق كذب ..معقولة :looney: الأخ العضو بمكشات راعي عنيزه يستقبلنا ويقول مرحبا بكم ياخلفانهم أنتم بعنيزه وعشاكم بالبيت جاهز .. ( مادري قايدنا دليلة .. وإلا قاصدها ;) ) ... بعد ماتعشينا جاب راعي عنيزه ظرف كبير وقال أعرف انكم مرتبكين وبعضكم وراه دوام وبعضكم وراه ( شغل ) هذي تذاكركم .. وهي :
تذكرتك يابوسليمان.... مفتوحة للي تبي .. ويقول لي راعي عنيزة هذا لأنهم مهمشينك ماقمت بأي دور .. ولأنهم قالوا لك ... ( انت السكرتير وبس ..) :good:
تذاكركم .. ابو تركي وأيمن وأبو أحمد : ون وي ( خط واحد ) من عنيزه للطايف ..
عاد أنتم...... إفهموها ...;):D
وسلامتكم

[ابو شكاع]

ههههههههههههههههههههه

اتخيلكم وانت مثل لبس العصر الحجري

ياعندي ان الحرق لاعبن بكم منول لا كريمات ولا بودرة ولا شي هههههههههههههههههه

.......................

تسلم ونحتري الباقي

[عليان الليل]

ههههههههههه
ولو الخيال لاعب لعبته ...
ما قول الا الله يسعدك دنيا واخره
بس ودي ادري وش انت لابس يوم تروح معهم..

تحياتي..

[المربد]

رائع انت يا بو سليمان باسلوبك المميز

بس اظن انها شينة ان الواحد يترك خوياه بنص الرحلة ويعود بدونهم ...!!!

لو اني محلك كان ازعل على راعي عنيزة اللي يبي يرسلهم لــ (...) الطايف لأنهم اكرم من هالشيء ولو انهم خاروه بفكرتهم كشتة للماضي لكن نتحمل منهم لمعرفتنا بسوابقهم.

لك دائم الشكر والإعجاب بكتاباتك وبانتظار جديدك ...

[عبدالعزيز الدباسي]

وشلون يا ابو سليمان تمشي عليك هذي ،،،، اجل قايدكم دليله والا قاصدها ;) ;) ميه بالميه قاصدها ، ومثلك عارف كل الطرق تؤدي الى (( باريس )) .

وبعدين لا تغرك وداعة راعي عنيزة لانه يتمثل بقول الشاعر ( اذا رايت انياب الليث بارزة ... فلا تحسبن راعي عنيزة يبتسم ) وحتى لو عطاك تذكرة مفتوحة ، تلقاها غير مختومة ، يعني ما تستفيد منها ، وبعدين تبي تنادي بالجهاز على اقرب صلوقعة :p والا اقرب مندا :p :p ، ومن اثر الصدمة تبي تنسى المندا والمنتدى .

000000000000
وعلى فكرة يا ابو سليمان اكتشفت من موروثك الثقافي مدى التأثر البيئي على مخزون المفردات اللغوية لديك ومدى الارتباط الذهني لمناطق النشأة والطفولة ، ومنها اعتقد سهولة معرفة المنطقة التي نشأت فيها وهي بالنظر للمكان الذي يكون فيه جهة الشرق اطمن من جهة الغرب لذلك نستطيع التفرقه بين ( الحادرين ) و( المسندين ) ;) ;)

وتقبل تحياتي

[أيمن]

الله يرفع قدرك يا ابوسليمان ..
عز الله تشرفت بصحبتكم وصحبة خالي أبو تركي :) "راعي التكميلة" ..
والقماري أبو أحمد .. والتشرف بضيافة أبوحمد:) ..
بس من وين جبت قصة هالبليزر !!!
على العموم والله تخيلت نفسي بعد هالتصوير بصعود جبال طويق ان للبليزر رجلين وكراعين وعاض ثوبه قاعد يرقى :) ..

طيب نبي هالكشتة نفرها شوي ونقدمها .. وتتعدانا بعشرين إلى أربعين سنة ..
وش ظنك أبلبس تكميلة بعد أنا ..:eek::eek::eek: !!

تحيتي

[المترو]

ما شالله عليك ابداع حتى بالماضي كل اللي يلزمك تدق سلف خيالك ريوس الى اي رقم بالماضي وتخيل
الامور هذا قمة نقاوة الفكر والذهن ما شالله عليك تبارك الله
تصدق يا ابو سليمان اني بالكود ارجع كم سبوع والا شهر للذاكره وراء عاد كيف اتخيل 200سنه
لا واللي مزين علومك انك تخاوي خير صحبه اهل مكشات اهل العوم الزينه وعلوم الرجال
ملاحظه بما انك ذكرت لغات بموضوعك ترى اهل اللغات بمكشات كثيرين يا راع الزمل

وسلامتك

[المرصاع]

هلا بحبيبي أبو سليمان===>طاب بالدبس شلف:D

سلمت اصيبعاتك على هالعلوم السنعة اللي كلها غبرات ==>عبق الماضي:)

أقول هالحين هالشغل قبل200 عام :::
أجل وشلون يصــــــير بعد200 عام :::

بدل البليزر هيلكوبتر بابين دفرنسين:D
طبعا الربع هم هم اللهم الشنبات بيض===>يالله حسن الخاتمة:)

والربع اللي كسروا أجهزتكم تلقاهم يصنعونها ويباشرون عليكم:D:D


تقبل تحياتي:::

[صقر]

ابو سليمان الله يسعد ايامك .... سالفة طيبة ... وخيال رائع...

وعلى الطاري يوم الجمعة كنت أتمشى في منطقة شرق الزبيــرة ... ولقيت لي هكالشايب اللي عمره فوق ثمانين قاعد يتشمس في بطن شعيب صغير... وقفت عنده وسألته بعض الاسئلة وكنت احرص اني اسأله عن الربيع اللي بالمنطقة قعد الرجال يوصف لي منطقة ضاربتها وسمية قلت له وصف لي...

قال رح من خل الحزم (بأيمنك) ويوم قلت له وبعدين وين اتجه ....من هنا جنوب؟

قال لا رح .... سهيل... يعني جنوب غرب...

ومن يوم قريت هالقصة وانا اتذكر هالشايب وحكيه .. القديم..


ومشكور وبارك الله فيك...

[فـ(الجـوف)ـتى]

ههههههههههههههههههههههههه

مشكور يامبدع 0

[الطبيب]

حسبي الله ونعم الوكيل

منين جيب ها الكلام اللي كله غبار من القدم

تصدق اني جلست انفض الغبار عن جهازي بعد ما قريت الموضوع

طريقة طرح موفقه لموضوع ساخن

سلمت يداك ابو سليمان

وننتظر الجديد

اخوك اللي اكبر من الصغير

الطبيب

بس حلوه الصلوقعه!!!!!!!!

[خشم الحصان]

الاخ حفررررررررلوجيا
السلام عليكم
اخي الغالي سلامه الله
الي الله اشتكي من كتابتك فقد عنيت منها لدرجة من كثر الضحك غدة عيوني حمر كني
مهذي بصل حساوي ابوسليمان الله يوسع صدرك بلخير
مشكور علي هالمشهد الدرمي طاش طاش ماطاش
اخوك
خشم الحصان:D :D انت:good: وعقلك:light: بس سؤ:what: منين تجيب هالحكي
الله يرفع من قدرك اخوي ابو سليمان

[مراكي الذيب]

حسبي الله على بليسك جاني شدعضلي وانا اقرا مواضيعك مره بلاي ستيشن ميتين سنه قدام وشوي والا حنا راجعين اربع مية سنه وراى .

الظاهر انك تبي تودينا كلنا شهار من هالصلوقعه الزمنيه, تصدق اني تخيلت اني اقرا الموضوع بنفس الفتره الزمنيه وان شوشتي تقل عرفجه وردوني لمين الارض والكمبيوتر على شعفت البعير
:D :D

رائع يابو سليمان


الله يعطيك العافيه

[السمح]

يابوسليمان ما جبت جديد .. واحدة من ( سبتياتك ) <=== نسبة إلى يوم السبت ..
صرنا مدمنين وننتظر يوم السبت علشان نشوف وش كتب لنا حفرلوجيا :good: عسى ما يخلينا ولا يعدمنا من هالدرر اللي نشوفها منك ..

لكن هين لعنبو شيطانك كلنا لشهار وأنت لا .. :mad: ما صارت
وبعدين نبي نفصلك أنت ما تصلح سكرتير .. لأن أول مهام السكرتير إنه يكون أمين ويحفظ الأسرار
وشلون تجي هالحين وتفضحنا :p
إيه سكرتير ممتاز يفرق بين الزين والشين .. مهوب خبل يكتب اللي يبي ويورط مديره عند الناس :p

الله يسعد أيامك ويخليك لعين ترجيك

أحلى تحية

[حفرلوجيا]

توضيح :
اشكر من راسلني يعتب علي بسبب انني ( صغت ) بعض الكلمات .. وكان يرى أنها لهجة دارجة حتى الآن .. وأقول نعم هذا صحيح .. وما المشكلة .. خصوصا أن المرودنين ( منا ) وذكروا بعض الألفاظ , ثم أن أبو تركي كان يشرحها ( في سياق القصة ) لغرض التدرج في توضيح المعاني .. يعني لو خبط لزق سأل عن وش هو ( المندا ) .. ربما لم يكن مناسبا..
الشيء الآخر .. بعض الكلمات واضحة لنا في منطقة .. انما في بقية مناطقنا الحبيبة ربما كان لها إستخدام ومعنى آخر ... مما استلزم توضيح ذلك

وعلى أي حال ( أبنهج ) بكتابة الردود ( تفصيلا ) ..

اخوي أبو شكاع : شكرا .. في ذاك الزمان مايعرفون حروق الشمس .. جلودهم تتحمل ماهي ( ركيكة ) .

أخوي عليان الليل : شكرا .. كنت معهم لابس ( فروه ) .

أخوي المربد : شكرا .. بالعكس راعي عنيزه كريم ووده ان أبو تركي واللي معه يستمتعون بفواكه الطايف .. ولا له قصد ثاني .

أخوي شقردي : خلك من الموروث الثقافي ولا( تدحدر) بالتدقيق .. وبعدين لاتحاول تثير الفتنة بيني وبين أخوي راعي عنيزه .. عطاني تذاكر ( قطار ) مختومة..

أخوي أيمن : والشرف كان لنا .. وخل الكمبيوتر المكسور فدوة .. وانت تأمر نفرها لو تبي 100 سنة ... بس الوقت والفرغة والكشتة تجيب العلوم الباقية.

أخوي الرحال 2003 : ترى مانبي خوتك معنا هاليومين حتى نهاية الإختبارات .. الله يعطيك نقاوة الفكر والذهن وتتوفق بإختباراتك .. وترد لنا ( بدون دواوير حمراء ) .. ومتفوق ان شاء الله.

أخوي المرصاع : شكرا .. يانت رصعته .. وشلون ( غبرات وعبق ) .. ظنك يجتمعن ؟:rolleyes:

أخوي صقر : سجلوا عندكم مخالفة من صقر .. رايح للزبيرة ولا جاب لنا تحقيق .. ياخوي اتصورك لو تكشت لملحق داركم .. جبت تحقيق متعوب عليه ؟ .. لكن ماأصدق أراهنكم ان صقر يبي يجيب تحقيق عن الزبيرة .. بس متى ؟!

أخوي فتى الجوف : شكرا .. الله يهنيكم بالربيع هالسنة ياأهل الشمال .

أخوي الطبيب : شكرا .. لا تكفى امسح كل الغبار من الكمبيوتر ولاتخلي عوائق تقطعك عنا وتحرمنا من أفكارك ( الراكدة ) .

أخوي خشم الحصان : شكرا .. ياحبي لك ياشايبنا .. إلا وش لون عيالك .. قلت برمضان انك خايف يحجرون عليك من سجك وضحكك على الفطور .. علمهم إنك من مراجعنا بعلوم الخرايط .. حتى يعرفون ان ذهنك صافي .. شوري عليك .. لاتروح بـ( خرايطها ) .:D

أخوي مراكي الذيب : شكرا .. كنت ناوي أعتب على غيابك عن المنتدى بعض فترات متقطعة لكن مادام أضحكتنا بـ( الكمبيوتر على شعفة البعير ) .. العتب مرفوع .

أخوي السمح : شكرا .. يابو تركي قريت ردك وتذكرت سالفة اللي سرق ديك من حوش جاره وأكله .. ويوم صوت له جاره من بعيد .. ولاسمع وشو يقول ... قال : هاه .. وشو ديكه ..:p
أحد جاب طاري شهار .. كل الحكاية إن أخونا راعي عنيزه يبيكم ( تستمتعون ) بفواكه الطايف ..;)
ماقلنا شهار!!! .. إلا كان عندك سكرتير ناقل لك السالفة ( غلط ) .. افصله وريح بالك ..الله يريح بالك اليوم ودوم.