ما هو أفضل جيب للطعوس والتغاريز

[ابو هشام]

عندي نيسان باترول ما يعلى عليه

أتخيل لو في جيب نيسان حوض 8 سلندر ما أظن في جيب يتحداه


السؤال ما هو أقوى جيب يتحدى الطعوس والرمال ولا يغرز

وشكرا

[غالي]

مافيه شيء مايغرز اخوي

على حسب الارض وعلى حسب السيوف والسواق وغيره

لكن باعتقادي افضل جيب صراحه الاندكروزر الربع((الكبسوله)) والباترول الربع((السلقه)) والرانجلر

بسبة تقارب الكفرات الاماميه من الخلفيه + خفة الوزن + قوة المكينه في الكبسوله والرانجلر

ولكن للاسف الكل فيه عيوب:(
الكبسوله يقطع الظهر
الباترول يتفكك
الرانجلر حدث ولاحرج بالخرابات (حراره + عمود الكردان+ كهرباء.....إلخ)


والله اعلم

[ابو هشام]

أخوي غالي

أشكرك على الرد

المفروض الجيب ما يغرز

يعني يمكن ما تقدر ترقى طعس بس يبان معاك وتعاود ريوس ما تعاند.

ممكن تنزل نزله مالها مخرج إلا طلوع وهذي حصلت معاي لكن تحاول تطلع على جنب ما هو عدل.

ما أذكر غرزت إلا في طين وانت بكرامه أو صباخ

[مسماري]

الباترول الربع((السلقه))

والله اعلم

[عاشق z71]

ممكن تعطي واحد طاره هايلوكس او ددسن مهو دبل ممكن مايرده شي

وممكن تعطي واحد غشيم اقوى جيب متواجد وممكن يغرز لذالك انا اقول السواق ثم السواق ثم السواق


وشاكر لك

[هولان]

انا اقول يابعدي ولا يهونون الربع الدعوا كلها على السواق
كان السواق طاره والله لو معه ددسن 80 والله مايرده رداد
فيه جيوب آخر موديل والمكاين ياساتر خطر ان الموتر يطير تشوفه غاطس له بارض جلد والا بعد بالسكه ليش ؟
الجواب : تهايق بالغماره وشف اللي يسوق يعني بالعربي ( شف وجه العنز واحلب لبن )

[طحنون]

السواق والسواق والسواق ثم السواق
لاكن فيه نقطه وهي اهم من السواق وهي تنسيم الكفرات حتى لو جيب ودفع سداسي لازم التنسيم
لان فيه اماكن ورباضات مايمشي الجيب ألا بتنسيم حتى لو السواق محترف

[ملاحق السيول]

السواق والسواق والسواق ثم السواق
لاكن فيه نقطه وهي اهم من السواق وهي تنسيم الكفرات حتى لو جيب ودفع سداسي لازم التنسيم
لان فيه اماكن ورباضات مايمشي الجيب ألا بتنسيم حتى لو السواق محترف
:good: :good: :good: :good: :good: كلام صحيح :good: :good: :good: :good: :good:

[خالد77]

يمكن أخالف البعض في قضية السواق وأقول ليس على إطلاقه
(( فلا بد لليد القوية من سيف حاد ))
وبعدين الجيوب التالية ثقيلة وحقت نصب ورزة وخاصة التويوتا الجكس آر وثقيل دم وهذا ماجربته وعانيته بعض الشي ولاني مادح نفسي وأقول [رالي] لكن كان معي هايلوكس ولا أشيل هم بالنفود - بعض الأوقات - بس مجرد تنسيم ومسايس للعروق وحسن تصرف للوقوف ومافيه رحمة للمكينة بعض الأماكن وإن غرزت طلعته بجهد مقل والبعض يسميه [فرخ الجيب] لماذا ؟؟ لأنه خفيف ومكينته قوية ..
أما بعض الجيوب المكينة 4500 وبديه تقيل جدا والدبل (( عكوس )) يعني طول بالك !!
لكن اخوي شف السفاري أعتقد إنه أفضل للبر وقوي ..

[لابتي تميم]

والله يااخوي كانك تبي موتر مايغرو مالك الا جيب ماازدا وشكرا

[بيبسي]

اتوقع الكورلا افضل شي

[خشيمان]

طبعا زي ما قالوا الشباب السواق اول شيئ
ولكن مب معناته ان السيارة مالها شيئ ..بلا
جب احسن طاره وعطه موتر مشي حالك وشف .. يبي يتعذب
يعني السببين مهمة
وانا اشوف ان افضل المواتر هي الشاص والربع وبعدهم يجي موتري الاطخم (السلقة) مع ان مكينته ضعيفة نسبيا

[الروسونيري]

اتوقع ال gxr

[لعّاب المنايا]

باترول يالذيب

[ساري15]

ممكن تعطي واحد طاره هايلوكس او ددسن مهو دبل ممكن مايرده شي

وممكن تعطي واحد غشيم اقوى جيب متواجد وممكن يغرز لذالك انا اقول السواق ثم السواق ثم السواق


وشاكر لك


:good: :good: :good: كلاااااااااااام صحيح :good: :good: :good:

تبي شوري ... لاتعدى النيساااااااااااان وخاصة من 97 إلى 93

وجرب وشووووووووووووف ياراعي الطااااااااااارة

[ابو تمام]

الخيل من خياله السواق لوتجي معه كورلا ماغرزت يالغالي

[عاشق z71]

معليش رديت بالغلط .

[المميـز]

النفووود مو على السياره على السواق

والله شفنا ناس يدخلون بكوامري وكوابرس وغيره من السيارات الصغيره

وشفنا هايلوكسات تتصاقط جيوووووووووووووووووووووووب

يعني الموضووووع كله عند السواق

[asass]

انا اقول GX

[مسايف الطعس]

مافيه في التغريز أفضل من سيارتين

الربع باترول والربع تويوتا

أذا غرز نسم وعطه القثيل و1 وأكسر لطارة يمكن يسار ولاه طالع هذا في الباترول بس التيوتا مدري بس اكيد يسويها

[book00]

مثل ماذكر الاخوان المسأله على السواق + خفة السيارة + قوة المكينة + التنسيم

فأقوى الجيوب في الطعوس السيارة الخفيفة والقوية فالكبسولة والشاص مثلا ينطبق عليها هذا الوصف وكد الحمار ياسواق

اما بالنسبة للمكائن الكبيرة مثل 4700 ثمانية سلندر هذي الله يسلمكم عادة تكون السيارة وزنها ثقيل وواطية قريبة من الارض

على سبيل المثال ال Vx.r 4700 V8 وانا اذكر هذا الموتر لاني مجربه وهذا مايمنع ان يكون فيه موتر احسن منه المهم الموتر هذا الله يسلمكم فيه من القوة مالله به عليم لكن اذا بغيت ماياقف شيئ بطريق هذا الوحش ارفع الموتر الله لايهينك 7 سم وانطلق يا أسد وتعرف يومها وشو الفكس آر

[أبو بكس]

السلقه لاتتعداها

[النايف999]

طبعا زي ما قالوا الشباب السواق اول شيئ
ولكن مب معناته ان السيارة مالها شيئ ..بلا
جب احسن طاره وعطه موتر مشي حالك وشف .. يبي يتعذب
يعني السببين مهمة
وانا اشوف ان افضل المواتر هي الشاص والربع وبعدهم يجي موتري الاطخم (السلقة) مع ان مكينته ضعيفة نسبيا

بصراحه تعجبني صراحتك اخوي خشيمان فعلا السلقه الباترول عزمه ضعيف انا جربته وماتوقعته كذا هالعالم تمدح فيه ويوم جربته لقيته داج .. قلت يمكن الخلل عندي جربت واحد اقدم من اللي معي موديل 2000 وصار ادج وادج ... بصراحه خذلني دعايه عالفاضي مايقارن بالكبسوله انا جربته فرررررررق كبير

[خلاوي3]

من ناحية التجربة اقول الباترول بلا منازع

[راع الحيزى]

الجيوب التايوتا والنيسان فيها النشاط والخفه والإعتمادية بعد الله سبحانه وتعالى واصبر من غيرها
لكن اذا ودك تتكلم عن القوه مافيه اقوى وانشط من الجموس الدبل اذا كانت مكاينها 454 او 6000 او 8100 . هذه وجهة نظري مع اني احب الجيوب وامتلكها

تحياتي للجميع

[مكشاتي كوكتيل]

بصراحه أنا أشوف إن الربع بنوعيه السفاري والكبسوله هو أفضل شيء لخفتهما وارتفاعهما وتقارب كفراتهما يعني مايتعلق ولا يندحس بطنها في الرمله

[سيف2008]

الي يقول إن الدعوه سواقه تراه غلطان ياجماعه عطو واحد سواق كرولا على قولت البعض صح إنه بيمشي لكنه بيتعب ويحرق الموتر حرق غير إنه له حدود معينه ما يقدر يتعداها لو هوا أطلق سواق

لكن الشرط الثاني هو السيارة
وهنا نحن أهل النفود نفضل الشاص للمرتبة الأوله
وجيوب الربع حسب الترتيب التالي 1/تيوتا الكبسوله 2/نيسان باترول 3/مستوبيشي باجيرو

وبعدين الفتك ويجي بعده الاند الهدد

وفي الأخير الددسن والهايلكس

[صبي غلباء]

السلام على الجميع
زي ما قالو الاخوان بتوفر كل الشروط يعني السواق+السياره+تنسيم+ركاده ومعرفه متى يشد
فيه شباب رايحين للرمله على ددسن فيه منطقه متعبه مره يعني لازم صاجات وحاله
لكن وفقهم الله بجرة وايت توه جاي قدامهم يمكن قبل ساعتين ويمشون على ممشاه ويما فوق ويما تحت ويتعدون المنطقه بدون ولا تغريزه يوم شدو الموتر لحقو راعي الوايت وش صار بزر صغير متعلق بالدركسون لكن ولد المنطقه فضروري يكون الانسان عارف طبيعه الارض واهل مكه ادر بشعابها
والدليل فوز اهل حايل برالي حايل علما الخليجيين معهم سيارات مهب صاحيه بالتجهيزات
وفوز اهل عنيزه برالي عنيزه
وشكرا

[ابو علي96]

اف جي لو سواقه

[ابو علي96]

اف جي لو سواقه هندي:good: :good: :good:

[ابو هشام]

الي يقول إن الدعوه سواقه تراه غلطان ياجماعه عطو واحد سواق كرولا على قولت البعض صح إنه بيمشي لكنه بيتعب ويحرق الموتر حرق غير إنه له حدود معينه ما يقدر يتعداها لو هوا أطلق سواق

لكن الشرط الثاني هو السيارة
وهنا نحن أهل النفود نفضل الشاص للمرتبة الأوله
وجيوب الربع حسب الترتيب التالي 1/تيوتا الكبسوله 2/نيسان باترول 3/مستوبيشي باجيرو

وبعدين الفتك ويجي بعده الاند الهدد

وفي الأخير الددسن والهايلكس

هذا الجواب الفائز الأول

وشكرا على جميع الردود

[شيروكي97]

ملك التطعيس
الشروكي

[راعي طويلات]

النيسان 1_الفتك 2_الربع 3_الددسن
التايوتا (1_الكبسوله 2_الشاص)>>القلبه في مخباك للي مايوزن طارتهم 3_الهايلكس
الشروكي 1_رانجلر 2_السبورت والكلاسيك 3_ربع الشروكي
سواقه صح+تنسيم +أحد السيارات الي فوق=ارقد وأمن بإذن الله

[ذيب زلفاوي]

انا اقول الربع

[ناصر الدهمشي]

كل السيارات تغرز
لا سواق
ولا غيره
وفيه طعوس ماينفع معها لامكينة قوية
ولا سواق
شفنا انواع الجيوب مغرزه من مكينة 4 سلندر الى مكينة 8 سلندر مع الترهيم
لكن بعض الامور مثل السواق وتنسيم الكفرات وقوة هالمكينة تساعد
لكن ان السيارة ماتغرز مستحيل
ولا كورلا وكامري :) <-=-= تضحك هالسالفه
الدعوة على حسب الطعوس
يافيه طعوس حتى الدبابة تنشب فيها
والتغريزه لابد منه
لكن الواحد يحاول انه يبتعد عن بعض الطعوس لمصلحة سيارته ان كانت تهمه
من الدعس عليها واجهاد المكينة والقير والدفرنسات
والمقصد من الجيوب الدفع الرباعي انها تسهل عليك بعض المشاوير
للمرتفعات والمستنقعات والطعوس
لكن مايجي واحد مهوي يشوف الطريق الزين يجنب عنه ويروح للطعس
ويقول عندي جيب .. عقبه يجهد موتره ثم يجيك ويقولك موتري ترتفع
حرارته موتري فيه مدري وشو
لكن اني ارى افضل الجيوب واخفها
اللي تجي ربع سواء كانت تويوتا نيسان مسشتبيشي
<-=-= تراك طولتها

[هاوي بلادي]

فتك

لاتفكر ولاتحتار غير الفتك لاتختار

[icebird101]

تبي رايي

تويوتا اف جي الفل اوبشن سياره ما توقف, بعد شويه راح تمشي على سطح البحر<< مصختها صح؟

لا تقلي ربع نيسان ولا نص تويوتا

[براهيم الشمري]

اقول لاتعدي الشيروكي قراند من 2000 الي 2005

[ابو العز بلس]

احسن جيب مر علي وجربته في كل شيء والحمدلله ماشي

نفس اللي بالتوقيع

[سليمان 10]

في اكس آر 98 فمافوق قير عادي مع سواق نفود0وكل الله 000

[كم كيلو باقي]

^

كلام سليم

[شاص99]

من وجهة نظري انه السواق اولا ثم ياتي بعده ( قوة مكينة الموتر+الخفه ) ها الشيئين الي بين القوسين لازم يكونن جميع ولا اخربت الدعوه
فعلى سبيل المثال
لوكان باترول 2010 فيه قوة جبارة لكن عدم وجد الخفة تبي تخرب وهو يعبر الحال
اما لكن لوكانت هيلكس فيها من الخفة لكن المكينة وهي تعبر الحال

اما لو اجتمعة على ( شاص تويوتا او نيسان+ربع تويوتا او نيسان )
فهذي السيارات اجتمعة فيها القوة مع الخفة
علشان كذا ارشحهم النهن افضل السياراة بالبر وليس اقوى مكينه

من مقومات السواقة بالنفون

السواق+(قوة المكينه+الخفة)+هواء الكفرات= حدث ولا حرج

[زوم]

السلام عليكم ما فيه موتر مايغرز لكن هي على السواقه

[صليب الرأس]

الباجيرو نمبر ون في الرمال وهذه شهادة من رايلي سفاري

[صايد ابوعوايد]

صباح الخيرات للجميع ....
ياشباب ترى الموضوع له سنتين ....
لكن شدني الموضوع وحبيت اشارك معكم مع كل إحترامي وتقديري للجميع وكل الجيوب مافيه مثل جيب البرادو عن تجربة شخصية ... وهذا رأئي الشخصي وكل له رائه ولكم إحترامي وتقديري...

[بوه مير نيم12]

افضل جيب للتطعيس
رجلك اقصد السواقه .. بعض الناس تعطيه افضل جيب وكل دقيقه مغرز

[alanaziB52]

عن تجربه الباترول الربع مثل المزيون هذا ((( الله يذكره بالخير ويعطي راعيه خيره ويكفيه شره )))

http://www.mekshat.com/pix/upload04/images178/mk89529_19012010084 (medium).jpg

[اهل الردات]

الجي اكس ار مافيه غيره

[قايد تميم 1]

جيب زرق بالبيد معها تمزلق=اللي لمتاهات الفيافي عشقيا
عشق العشوق الي تعاشق وتعشق=تلقا الرضم من حدر بديه رشقيا
شقاق رشاق الفيافي ليا شق=يشبهن رشاش النياشن مطقيا
جيب على حلو الفيافي تمطق=مع الفجوج الي تعقد نطقيا
جيب سفاري للمساري تدلق=مشيه على غيره بدابها فرقيا
سميته الوافي وهو وافي حق=حقق وانا حققت فيه الحققيا
دايم على خوض الصعيبات يشفق=لا شاف صعبٍ قال ربي رزقيا
عزمه قوي ما عمر يومٍ تعلق=يا شاف حمر النفود فاع انطلقيا
يشبه لشيهان بالجو حلق=يا جاك مهو بشايفن له سمقيا
لا شم راس الطعس ارقب ودنق=والقمه نمره وانتهض وانصلقيا
يكسر عناد النفود حين يتزحلق=في سكته تسفي رمال الحمقيا
لا جا مع الضلعان وقام يتسلق=تقول هذا ما براسه علقيا
يفرح اذا شاف الوعض ويتشقق=قلبه حديد وقلب غيره مزقيا
لا مر طلعات الشباب يتعنفق=يقفى ولا يقفى شبيه الفشقيا
عذروبه انه دايم الدوم يسبق=يبدع جديد يقول منهو لحقيا
حب الوفي مني تملك وغلق=كامل وصوف الكنق فيه انطبقيا
من يركب البترول ما راح يزهق=ولا يعرف التهميز هو والزقيا
في خوة البترول تقسم وتنطق=خوة وفى خوة صويب الشلقيا
ارتسي على كبد المواتر وحرق=من بينهن يشدى لميع البرقيا
الجمس والتايوت والفرد الاخرق=كله مع البترول خاق وخقيا
كنق الصحاري دقدق خشومها دق=دقدق خشوم الي تريد السبقيا
خلاني الجى للخلا واتملق=لان الخلا من واقعي هو نفقيا
حاولت اقاوم لكن الهم حرق=كل الامل واخرس جميع النطقيا

[فتكاوي الرياض]

اي جيب او ونيت يطعس وحت المواتر الصغيرة اذا جت مع سواق صح وقيادة

لكن اذا قصدك على النشاط والقوة في النفود طبعا بقولهم بالترتيب

الشروكي خذ نشاط وقوه وخفه طبعا بغض النظر عن الخرابات

وبعده يجي الكبسوله ربع تيوتا

وبعدهم الفتك

[زحلطن]

اللي بالتوقيع تحت ماشاء الله تبارك الله ....غيره مافيييييه...

[دل البحار]

يمكن أخالف البعض في قضية السواق وأقول ليس على إطلاقه
(( فلا بد لليد القوية من سيف حاد ))
وبعدين الجيوب التالية ثقيلة وحقت نصب ورزة وخاصة التويوتا الجكس آر وثقيل دم وهذا ماجربته وعانيته بعض الشي ولاني مادح نفسي وأقول [رالي] لكن كان معي هايلوكس ولا أشيل هم بالنفود - بعض الأوقات - بس مجرد تنسيم ومسايس للعروق وحسن تصرف للوقوف ومافيه رحمة للمكينة بعض الأماكن وإن غرزت طلعته بجهد مقل والبعض يسميه [فرخ الجيب] لماذا ؟؟ لأنه خفيف ومكينته قوية ..
أما بعض الجيوب المكينة 4500 وبديه تقيل جدا والدبل (( عكوس )) يعني طول بالك !!
لكن اخوي شف السفاري أعتقد إنه أفضل للبر وقوي ..

معقوله على شان سواق محترف ترقى طعس بهيلوكس ما يطلعه الا كبسوله شابك الدبل او سلقه اجل ما صار طعس الطعس طعس غير الربع باترول والكبسوله والله لو كان شوماخر المطعس