|-|-| ياجماعة الخير عطونا رايكم عن الشاص لشخص تحت سن الـ20 |-|-|

[ريلاكس]

..

السلام عليكم ورحمة الله وبركاته ..

حياكم الله يجماعة الخير


أخوي ناوي على شاص وأنا معارض على كلامه

أخاف على سمعت أخوي وللعلم أخوي تحت سن 20

أنا أقول لأخوي ان الشاص مثل ما أرى انه لنوعين

شخص كبير بالسن

أو من شباب العرابجه وأنضر له أخو جيب الربع

ومثل ماتشوفون أنتم البعض ياخذ الشاص يقول موتر بر

وياخذه يضبط عليه جنوط لكزز وتغبير وتجاليد من الكلام هذا

بنتضار آرائكم

وشكرالكم ..

[الروقي نت]

اخوي ريلاكس
ماكل من شرا الشاص عربجي
وفيه بيت يقول في الشاص
سلعه ثمينه للرجال الثمينين*** راع الولع يشريه لو باع ثوبه
اشتر له شاص ولا تبالي

[ABO AL-HESH]

يا ابن الحلال وش عليه من الناس دامه واثق من نفسهـ ..اهم شي لا تعطيه الا موتر بخاطره .. دامك تقدر

[حر الشمال]

لا ان شاء الله اخوك قدها وقدود
حتى انا اخوي يبغى جمس حوض وهو تحت سن العشرين
اهم شي يكون عنده الموتر الي بخاطره

[winchester]

الشاص لجميع الاعمار

بس من ناحية الحاجه أهل الابل أكثر مـايستخدمه

بالعكس أنـا أشوف اللي يركـب الشاص شخص رزيـن ليس لفئه معينه من الناس

دمـت بود

[سليمان911]

اخوي ريلاكس توكل على الله

[راعي المسرى]

والله الشاص أفضل من الربع بكثير وأثقل .

الله يطعمه خيره ويكفيه شره

[قاطع الفيافي]

ابد عطه اذا تقدرون علية والله يعطيه خيره ويكفيه شره

[عريدان]

الشاص ما عليه كلام الكلام راعيه لازم يكون راكد وخبير بمثل هالنوعية...

[شقران نجد]

اخوي ريلاكس هذا شاااااااااااااااااااااااااااااص

تغنو فيه كبار الشعار وليس عرابجة الشعار

توكل على الله وخذه له بالعكس هو موتر رجال

[B.A]

والله ان تروح نص فلوسه على القراطيس والتغسيل والجنوط انا عندي اخوي معة 2006 والله لايعيد الساعه اللي شراء الموتر الولد كل شوي وهو مار على مخباتي ولهف هذي 100 وهذي 200 كلها على المغسلة ومحلات الزينه وبنزين من الغالي 95 واذا بغينا نعبي الغاز او نحمل اي شي قام يتهرب ويحط من هالاعذار والله ان معي لومينا 2008 صايره تقل سيارة مزرعه والسبب هالمراهق هو وموتره!!! وانا اخوك إن قلبة الايه صار الشاص موتر تترزز وكشخه واللومينا سيارة تحميل ومكده


نصيحتي عطة سيارة صغيرة وخله يقضب الارض والله لين شراء جيب سواء ربع او شاص ان تبي لك ميزانيه لتظبيط موتر مصنوع للتحميل والتنزيل والبنهاية خسرانا والله يكتب اللي فيه الخيرة

[سفاري نجد]

السلام عليكم ورحمة الله

واحد من ربعي اشتراه لولده بعد الحاح وزعل أشتراه له طفره 4 اشهر ملّ منه وباعه ،،،

مطاير بهالشوارع ،،،

وما قصر الاخ f.s

[بـــ نجد ـــرق]

هلابك اخوي

المسألة مهيب مسأله عمر سوأ صغير او كبير

المسأله مسألأة الغرض من استخدامه هل هي تحميل او خطوط او بر

فأذا كان بيستخدمه داخل المدينه فأنا اضمن لك راح يتضايق منه وانا جربت شاص الوالد في الرياض وفي الزحمات فــ بهذلني شوي لان الشاص طويل مره واذا بغيت تديور ماياخذ التديوره مثل السيارات الثانيه

وانت تقول ان اخوك عمره 20 يعني احتمال انه يدرس في كلية او في جامعه وراح يبلش به في المواقف

عموما اذا بغيت نصيحتي عطه شاص يجربه لمده اسبوع او حوله لان فيه سلبيات ماينتبه لها الواحد اليين يجرب الشي فأذا جاز له الوضع الله يبارك لكم في الشاص ويعطيكم خيره ويكفيكم شره

[هـدد]

من حصل شي يستاهله
وإذا كان تحت 20يعني وإذا خله ياخذ حقه على قولك من العربجه وبكرى يكبر ويغدي رجل
أزين حتى إذا كبر وصار في نظرك رجل يقول من طلحت على السيارات ومعي شااااااااااااااااااااااص

تقبل رائيي ومن ثم تقبل مروري

[سيف2008]

عطه الموتر الي بخاطره
وترا العرابجه الي تشوفهم هذولي أهلهم معطينهم مجال للعربجه مهو السيارة الي عربجيه هاذي حديد يخوك ملها دخل

وبعدين جنوط الكززس حلوه علي الشاص:-) (وجهة نظر)

وبعدين هو لو عربجي وبراسه والله لو تعطيه باص تعربج فيه
ولا راح يلعن والدين أي سيارة تعطيه مهي علي مزاجه لأنه راح يحس إنها عقاب وهو مغصوب عليها

أنت حاول تفهمه بلين وشوف له شاص هنا ولا هناك خل يجربه يمكن يغير رايه وإعرض عليه سيارات ثانيه مناسبه وتحس إنها بتعجبه


والله يوفقكم لما فيه الخير والطاعه

[النحيف]

ماقصروا الربع بآراؤهم بعدين خل أخوك يسوق باترول ربع والله يبي يعجبه لأنه ممتاز واللي بعمره يرتاحون له خصوصا ً إذا صار سفاري...


وجهة نظر!!!

[المميـز]

انا اشوف الشاص مايسوقه الا رجال

ولا يهون الباترول <<< تراه موتر ثقل وعقل

والله يكتب لكم اللي فيه الخير

عليكم بالاستخاره بعد الاستشاره

[سوبر VTC]

شف ونا خوك عطه اللي يبي و كل شي يهون
الا
الجيب الربع سواقته فيها تهور
بمعنى ان الربع رفيع ودايم يقلبن و المشكلة يسقونهن صغارين
و اخرته يقلب لا و الموتر ماشي بعد 5000الاف وكاله
انت تدري لو تجي ملف خفيف و انت ماسرعت بالحيل عادي يجي على التنده
و المشكلة مهوب راسي بالخط و لو تهوز بالطارة خفيف او تغفل عن الخط جاب العيد على طول يقلب
و غير كذا صارت وفيات بالقصيم بسبب الجيب و الطيران و اغلبهم صغار سن
عليك بالشاص و الا باترول و الا جيب صالون
تحياتي

[برق طويق]

إذا بلغ الفتى عشرين عام مايعرف امور الموجبات
فلا ترجيــــــــه إن كان حي ولا تبــــــكيه إن كان مات
:confused:

لا تقول وش موقع ذا الكلام من الاعراب ;)
ـــــ
يا اخوي سجل عندك بعض الامور
المقدرة المالية
استخدام السيارة
مكان السكن مدينة قرية هجرة
عقلية الولد اللي هو اخوك
مستقبل الولد ترى بعض السيارات تشجع على البر وتخلي الشخص يضيع وقته على الدجه
أخيرا اعلم ان اخوك امانة في عنقك اذا كنت انت وليه

واذا تبغى نصيحتي اترك عنك الشاص حتى تحتاج اليه حاجة ماسة
والسلام عليكم

[العبقري 1]

الولد هذا إذا كان عنده شغلات على الشاص مثل ذهاب لإبل وحمل أشياء خاصة بها شعير وبرسيم ونحو ذلك مع شوية تمشيات وخرجات له شخصياً فالشاص أفضل سيارة أما إذا كان غرضه كله لعب وتطعيس أو حمل أشياء صغيرة فلا داعي للشاص أبداً وقد يكون فيه خطورة لا سمح الله لا تحمد عقباها .... وأهم شيء ... سلوك الولد ومع من يمشي ويعجب بتصرفات من ؟؟ .

[بيبسي]

يشتري له سياره سغيره او جيب صغيرياخذله اف جي احسن من الربع واوسع ابررررك ... وش يبي بالشاص وهو طالب

[مقلع الرمث]

اخوي ولد عمي معه واحد موديل 2008 ونش شريناه له بذاك المبلغ اللي تمسك راسك منه المهم الولد اصغر من 20 سنه والموتر اللي معه ونش طبعا والحين تعال شف الموتر يلحسه من تحتيه تلحيس وغبار ووجع راس وصبغات ومدري ايش ومطب عظيم لكن كان اخوك مو راعي تمسيح ولاشغلانه لان اكثر الشباب الحين طايحين بالتسميح والنصب على قولتهم وهو ازين من التكسير ولا الفرق وانا احس ان الشاص موتر وازين من الربع ولا الفرق موتر رزه مااايحتاااج لكن الله يكون بعونك يبي يشفط منك بس 50 ريال غسيل من تحت وتلميع وتصييج وتغبير ولصقات وامور الشباب هاليومين واقول توكل على الله

[راعي الركيات]

تبي العلم الشاص سيارة تحميل وصحاري واستعماله لناس معينين مثل اصحاب الابل والشركات اما سيارت شباب ماتجي ابد
بالتوفيق ان شاء الله والله يصلح العطاء يارب ويخليه لكم

[dosss]

أخي العزيز ريلاكس ..


أولا أشد على يدك لحرصك واهتمامك بأخيك واستشارتك دليل وعيك


ثانيا أنت أعرف من غيرك بتربية أخيك وأخلاقه واهتماماته و 16 سنة و 19 سنة كلها تحت العشرين



ولكن هناك قاب بينهما ، والسن لا يحكم الشخصية ولكن يحكمها العقل والإدراك وتحمل المسؤولية


فإن كان الأخ من أصحاب الرزانة والحكمة في التصرف والاهتمامات السليمة فلا ضير من شرائه


وإن كنت ترى منه ميولا نحو تصرفات المراهقين ومتابعة لسفاسف الأمور فنصيحتي أن يصرف نظره عن


الموضوع بطريقة غير مباشرة ،
وعذر تعتقد منه قبوله وأن تطلب منه تأجيل الموضوع إلى الوقت المناسب لشرائه

[ريلاكس]

حياكم الله

مشكورين على الآراء

وأنا أخاف اذا أخذ الشاص يصير مثل ماقال أخونا f.s

يجلس يضبط عليه ودوران بالشوارع لأنه مب راعي تحميل

[هواوي]

اخوي ريلاكس

اشتر الموتر الي يبيه وخاصه انه موتر ماهو موتر تفحيط ولا مخاطر

ومدام في راس اخوك شوية فله فخلها يطلعها في التمسيح والتلميع احسن ما تاخذ له كامري يفحط به او موتر يرفع به


اخوك اختار الشاص لانه يحس انه يناسب شخصيته الرجوليه يعني اخوك مطنوخ يعني ذيب

عطه ونصيحه لا تشتريله غيره

وتذكر ان اقصى ما بيصير في لاشاص هو تنضيفه وتلميعه واشياء تعتبر ايجابيه نوعا ما

وبرضه تذكر ان الشاص ما فيه تفحيط ولا تهور ولا مقاومات ولا مطارده لبنات خلق الله

اشتر وتوكل على الله

[أبو هيلة]

حيآكم الله ,,

الحق حق ,, لو آنه ربع عآدي يمشي الحآل ,,

لكن شآص ,, آنآ من يوم شفت الشاص تسحب سساته ,, وآنآ غاسل يدي منهم ,,

تسحب سسااته وتشال خطوطه ,, وكل يوم جنوط شكل ,,

حركآت والله مالها دآعي ,,

يمسكه وآحد ما عمرهـ طب النفود ,, والله شيء غريب ..

مشكور آخوي على الموضوع ,,

تقبل مروري .

[ريلاكس]

حياكم الله

بنتضار البقيه

[هـدد]

حياكم الله

بنتضار البقيه

إلى هآلحين تحتري ياحول ياأخيك
ملاحضة:- اليوم الجمعة حراج في مزاد الرياض الدولي على 25 شاص

[ريلاكس]

إلى هآلحين تحتري ياحول ياأخيك


ملاحضة:- اليوم الجمعة حراج في مزاد الرياض الدولي على 25 شاص


حياك الله
أشهب مطور

[مخاوي الكشات]

شف وأنا أخوك شباب أمس مهوب مثل اللحين .. اللحين يشترون الهليات والربوع والشيصان مواتر الرجاجيل والبر علشان مايسمونه (( النصب )) والزبرقة والتلميع يعني أخوك إن كانه راعي كشتات طويلة وحلال يوديه ويجيبه فإنه يستاهل أما غيره فهو ما يستاهل تطق 120 ألف على شيء مايحتاجه بعدين شباب اليوم هامهم النصب أنا مأقول إني كبير أو شايب بل أعرف لحركاتهم كلها يبي يركب جنوط لكزس (( وهذي كلن يركبها أنا لو عندي شاص أركبها )) همين يسحب سست وتجاليد وتغبيره وتلميع كفرات وتمليع وتصييج وتستيب أسفل الموتر وتنسيم الكفرات على عشرين علشان تطلع على قولتهم ( بطح ) ويطلع شكلها نصب أو حلو ويدلي يغطس دبة موتره نيكل ولا وبيصير فيه تجمعات نصب يجون الشباب من العصر إلين 11 الليل أو أكثر يوقفون الموتر بشارع معين ويطفون السيارة ويشغلون السكن ويعرضونها ويخلون خلق الله يناظرونها وكل هذه الأمور لها مقاصد أخرى فهذه الحركات مايسويها إلا (( إسمح لي وهذا المنتشر بين الشباب مايسوي النصب إلا البزرنجية والشاذين ليش علشان يفقق الورع الفلاني والولد الفلاني ولعيون فلان ولعيون زعطان )) أعذرني على الجرأة ولكن هذا حال شبابنا ولكن شف أنت أخوك وأنت أدرى بأخوك وشف مواتر أخوياه وركز عليه ولا تدلي تعطيه من هالدراهم على الفاضي وأبيك تكلمه وخل نفسك فاهم في الامور هذي قدامه علشان مايعتقد أنك مخفة أو سبيكة ويدلي يقول أخوي الكبير مايدري عني خلك فاهمه وحط عينك بعينه ..

وشكراً

وإنتبه فيه ملاحظة مهمة لو تلاحظون أن الشباب اللي معهم هدد أو شاص أو ربع وحقين نصب وحركات تلميع وغيره تلقونهم يربطون سبحة عند المساكة اللي يسار السواق فوق عند التندة اللي يتمسك فيها السواق إليا بغى يركب هذه الحركة متعارف عليها عند الشباب تعني أن راعي الموتر عنده ولييف أو ورع ... ويتفاخر راعي الموتر بالحركة ..

[مخاوي الكشات]

اخوي ولد عمي معه واحد موديل 2008 ونش شريناه له بذاك المبلغ اللي تمسك راسك منه المهم الولد اصغر من 20 سنه والموتر اللي معه ونش طبعا والحين تعال شف الموتر يلحسه من تحتيه تلحيس وغبار ووجع راس وصبغات ومدري ايش ومطب عظيم لكن كان اخوك مو راعي تمسيح ولاشغلانه لان اكثر الشباب الحين طايحين بالتسميح والنصب على قولتهم وهو ازين من التكسير ولا الفرق وانا احس ان الشاص موتر وازين من الربع ولا الفرق موتر رزه مااايحتاااج لكن الله يكون بعونك يبي يشفط منك بس 50 ريال غسيل من تحت وتلميع وتصييج وتغبير ولصقات وامور الشباب هاليومين واقول توكل على الله

إي والله انك صادق هذا حال شبابنا وكله لمآرب أخرى الله يصلحهم ..

[ريلاكس]

شف وأنا أخوك شباب أمس مهوب مثل اللحين .. اللحين يشترون الهليات والربوع والشيصان مواتر الرجاجيل والبر علشان مايسمونه (( النصب )) والزبرقة والتلميع يعني أخوك إن كانه راعي كشتات طويلة وحلال يوديه ويجيبه فإنه يستاهل أما غيره فهو ما يستاهل تطق 120 ألف على شيء مايحتاجه بعدين شباب اليوم هامهم النصب أنا مأقول إني كبير أو شايب بل أعرف لحركاتهم كلها يبي يركب جنوط لكزس (( وهذي كلن يركبها أنا لو عندي شاص أركبها )) همين يسحب سست وتجاليد وتغبيره وتلميع كفرات وتمليع وتصييج وتستيب أسفل الموتر وتنسيم الكفرات على عشرين علشان تطلع على قولتهم ( بطح ) ويطلع شكلها نصب أو حلو ويدلي يغطس دبة موتره نيكل ولا وبيصير فيه تجمعات نصب يجون الشباب من العصر إلين 11 الليل أو أكثر يوقفون الموتر بشارع معين ويطفون السيارة ويشغلون السكن ويعرضونها ويخلون خلق الله يناظرونها وكل هذه الأمور لها مقاصد أخرى فهذه الحركات مايسويها إلا (( إسمح لي وهذا المنتشر بين الشباب مايسوي النصب إلا البزرنجية والشاذين ليش علشان يفقق الورع الفلاني والولد الفلاني ولعيون فلان ولعيون زعطان )) أعذرني على الجرأة ولكن هذا حال شبابنا ولكن شف أنت أخوك وأنت أدرى بأخوك وشف مواتر أخوياه وركز عليه ولا تدلي تعطيه من هالدراهم على الفاضي وأبيك تكلمه وخل نفسك فاهم في الامور هذي قدامه علشان مايعتقد أنك مخفة أو سبيكة ويدلي يقول أخوي الكبير مايدري عني خلك فاهمه وحط عينك بعينه ..

وشكراً

وإنتبه فيه ملاحظة مهمة لو تلاحظون أن الشباب اللي معهم هدد أو شاص أو ربع وحقين نصب وحركات تلميع وغيره تلقونهم يربطون سبحة عند المساكة اللي يسار السواق فوق عند التندة اللي يتمسك فيها السواق إليا بغى يركب هذه الحركة متعارف عليها عند الشباب تعني أن راعي الموتر عنده ولييف أو ورع ... ويتفاخر راعي الموتر بالحركة ..


حياك الله أخوي مخاوي الكشات

هذا الي أن خايف منه وأخوي مايهوى البر على الخفيف يعني ولاعنده عزبة للبر ولاراعي تحميل

ومثل ماقلت ياخذون مواتر الرجاجيل ويزبرقونه أما مثل ماقلت عن السبحه فهي أنواع والحمدلله اني فاهم الأمور ذي سبحه صفر وحمرا ومن الخرابيط ذي الله يهديهم

شكرا لك.. مخاوي الكشات

[مخاوي الكشات]

حياك الله أخوي مخاوي الكشات

هذا الي أن خايف منه وأخوي مايهوى البر على الخفيف يعني ولاعنده عزبة للبر ولاراعي تحميل

ومثل ماقلت ياخذون مواتر الرجاجيل ويزبرقونه أما مثل ماقلت عن السبحه فهي أنواع والحمدلله اني فاهم الأمور ذي سبحه صفر وحمرا ومن الخرابيط ذي الله يهديهم

شكرا لك.. مخاوي الكشات

الحمد لله أنك تعرف هالأشياء .. ومادامه مايهوى البر وش وله تشري له شاص .. يعني لا تحرمه فيحس أنك بخل عليه به ولكن إشرح له أنه غير محتاج له وإلعب في مخه دور له شيء لو يأخذ FJ سعره في حدود سعر الشاص لكنه شبابي وزين للبر ورزة في المدينة ويواجه .. طبعا أحب أقولك شبابنا ينقسمون لثلاث أقسام :

1- ناس حقين كشتات وبران ومقناص .. ولاتخلوا هذه الرحلات من المتعة مثل التطعيس ..

2- ناس حقين نفود ومراقى وتطعيس .. ولاهوب حقين كشتات واجد ..

3- وناس حقين مدينة فقط .. وكشتة في السنة .

..

[monsixnet]

_
الشاص أفضل

الله يطعمه خيره ويكفيه شره

[ريلاكس]

الحمد لله أنك تعرف هالأشياء .. ومادامه مايهوى البر وش وله تشري له شاص .. يعني لا تحرمه فيحس أنك بخل عليه به ولكن إشرح له أنه غير محتاج له وإلعب في مخه دور له شيء لو يأخذ FJ سعره في حدود سعر الشاص لكنه شبابي وزين للبر ورزة في المدينة ويواجه .. طبعا أحب أقولك شبابنا ينقسمون لثلاث أقسام :

1- ناس حقين كشتات وبران ومقناص .. ولاتخلوا هذه الرحلات من المتعة مثل التطعيس ..

2- ناس حقين نفود ومراقى وتطعيس .. ولاهوب حقين كشتات واجد ..

3- وناس حقين مدينة فقط .. وكشتة في السنة .

..


الله يحيك أخوي مخاوي الكشتات

جزاك الله خير

[ابوعيدالدوسري]

معليش عندي سؤال واحد

وش سالفه السبحه >>>>>> مايدري وش السالفه
فهمت من كلام الاخوان انه عنده وليف ؟؟ طيب وش سالفه السبحه الصفرا والحمرا ؟؟ لاحول الله والله تعقيد السالفه .

صحيح اني مادري وش السالفه بس نبي نعرف وش الشباب هاليومين طايحين فيه ومعليش على الاطاله

[ab.zayed]

اخوي ريلاكس اذا اخوك من النوع الي سهل اقناعه فسوف تستطيع اقناعه اما ان كان راسه يابس فلاتتعب نفسك معه اشترله شاص وخله يرضي رغبته وراح يقتنع بعد ما يجربه والحمد لله الشاص من السلع الي ما راح تخسر فيها

[عبد المجيد]

والله الشاص وأنا أخوك موتر متعب ومو حق مشاوير رايح جاي لا حق شغل غما تحميل أغراض أو لزوم البر
لكن يوميا مداوم فيه ورايح عليه وجاي عليه وإذا جاء يودي الأهل ابتلش بروحه هذي مشكله
غير كذا شهر ولا ثنين وراح يطفش منه
اذا كان راعي بر على خفيف فخذ له هايلكس وبعدين لامنه كبر شوي وحس انه فعلاً محتاج للشاص وقتها لها حلاّل

[كروزيا وبس]

مشكووووووووووووووووووووووووووووووووووووور

[قاهر الشعبان]

هلابك اخوي

المسألة مهيب مسأله عمر سوأ صغير او كبير

المسأله مسألأة الغرض من استخدامه هل هي تحميل او خطوط او بر

[سيف الظفير]

خذله اللي يبي وخله ينبســـــــــــــط


ومن متى صار الشاااص للعرابجة !!!!!!!!!


ويمكن اذا اخذ له شاص بيكون من راعين المكشات


ويكون راعي بـر احسن من الهياته بهالشوارع وما فيها من مشااااااااااكل

[إعصار]

انا دراي انا الردود كانت كثيرة ..


لكن حبيت اشارك ..


اذا هو راعي زبرقه.. لا وألف لا ..


اما اذا كان شخص عايدي ماتهمه هذي الحركات ..فالشاص زين وبخليه يحب امور زينه كشتات قنص روحات وجيات ..