عورة (gmc) مكشوفة هل من ساتر لها ستر الله عليه ...

[علي عليوه]

صديق لديه جمس سوبربان موديل 2006


خرب عنده قفل الشنطة واضطر لتركها مفتوحة طوال الوقت ( يعني وينك يا حرامي )


طبعا الوكالة طالبين مبلغ خرافي للاصلاح


قلنا نطرح الموضوع على الخبراء هنا لعلنا نوفر هالمبلغ لرمضان الله يشرفه


المشكلة أن الخراب طارئ وبدون أي عبث من صاحب السيارة أو فني


وأعتقد أن المشكلة إكترونية بحته فهل من حل لديكم


لا حرمكم الله الأجر


وأشكر كل من ساهم بالموضوع وبأي مشاركة


والسلام عليكم ...


,

[ابوعقل]

انا عندي جمس 2006

خرب القفل اللي ورا

البيبان كله تقفل الا الشنطه ما تقفل

بس كان على الضمان وصلحوه

بس شفلك كهربائي شاطر وده

تلقا فيه قطعه سوداء داخل الباب حق الشنطه

تتحكم بالقفل الخراب منه

وين ساكان علشان افيدك اكثر ان شاء الله

[ABO AL-HESH]

والله ياخوي صارت معنا بجمس نفس موديلك وعيت لا تفتح الشنطه ابد ..
لما وديته لكهربائي فتح الشنطه وفك الديكور حقه ولقى قطعه منكسره.. وقيمته غاليه.. لازم يفكه وتروح تدوره بالتشليح.. وبعده بشهر خربت نفس القطعه مع عمي .. الله يعينك

[راعي المقانيص]

مثل ماقال اخوي ابو عقل الخراب في الكهرب وتكون غالبا في البرمجه

[هـدد]

2006 يعني منتهي الضمان
على قولة اخوي ابوعقل
دورلك كهربائي جيد واشور عليك بورشة الجابري بالصناعيه القديمه بالرياض
والله يعينك كل السيارات الإمريكيه مشاكلها كثيرة

[علي عليوه]

أشكر الاخوان ابو عقل

Abo Al-hesh

راعي المقانيص

أشهب مطور

على ردودهم الطيبة ,, جزاكم الله خير وكتب لكم الأجر

بالنسبة لاخوي أبو عقل ولا يهونون الاخوان:

أنا رحت للتشليح وحصلت قفل فيه مفتاح ويركب مكان القفل القديم بالضبط

ورحت لمحل مفاتيح وقال ممكن أسنن لك الدقمة هذي على مفتاح الوكالة وتصير تفتح السيارة كاملة بمفتاح واحد

وسويت الشغلة هذي كلها ,, لكن ماني مرتاح لهالطريقة ودي بشد البلد بس الوكالة حارة شوي

والسيارة الآن موجودة بالرياض يا أخوي أبو عقل .. ننتظر شورك الله يبارك لك بعمرك

وبكرة إن شاء الله أحاول أروح للورشة اللي قال عليها أخونا أشهب مطور ونشوف وش رايهم

وعسى الله يكتب لنا ولكم الصالح من الأعمال .....

أكرر شكري لكل من تجشم عناء الرد ,,, لا شل الله أنامله ...

[علي عليوه]

للرفع للرفع

[شروكي ربع]

أنا رحت للتشليح وحصلت قفل فيه مفتاح ويركب مكان القفل القديم بالضبط

ورحت لمحل مفاتيح وقال ممكن أسنن لك الدقمة هذي على مفتاح الوكالة وتصير تفتح السيارة كاملة بمفتاح واحد

وسويت الشغلة هذي كلها ,, لكن ماني مرتاح لهالطريقة ودي بشد البلد بس الوكالة حارة شوي





الحمد لله مادام السيارة ضبطت وش تدور بعد ؟؟

وتراه قفل لا راح ولا جاء وش ترجي من ورا شد البلد ؟؟

الحمد لله مادامه يفتح ويقفل الحين انتهت المشكلة ..

تعوذ من الشيطان وخلها كذا مافي احسن منها .

[Mr.SAG]

والله مآلي فيه والحمد لله مآقد صآرتـ معي بس انشآء الله فآدوك الأخوآن ,,

[محمد الصرير]

مادام الله يسرلك حلها وانحلت المشكلة اترك الوكالة بلا هم وبلا غم تراها وحش علينا تاكل وبس ما ترحم ، احمد ربك وأنا خوك ، والقرشين اللي معك للوكالة اولابها عيالك عسى الله لا يحوجنا للوكالات ، والله يسرلك أمرك وكل مسلم . ودمتم سالمين

[ابوعقل]

أنا رحت للتشليح وحصلت قفل فيه مفتاح ويركب مكان القفل القديم بالضبط

ورحت لمحل مفاتيح وقال ممكن أسنن لك الدقمة هذي على مفتاح الوكالة وتصير تفتح السيارة كاملة بمفتاح واحد

وسويت الشغلة هذي كلها ,, لكن ماني مرتاح لهالطريقة ودي بشد البلد بس الوكالة حارة شوي...

القفل اللي انت شاريه ممتاز وعملي جدا واحسن من اللي كان راكب :good:

نصيحه لا تغيره ابد :no2:

[علي عليوه]

الاخ شروكي ربع

جزاك الله خير وبارك الله في رايك

Mr.SAG

شكرا على مرورك ومشاركتك جزاك الله خير

محمد الصرير

جزاك الله خير والظاهر إن الدراهم تبي تمسدح ببطينات عيالي على رأيك أنت والاخوان

أخي العزيز أبو عقل

أشكرك من أعماقي على اهتمامك ونصيحتك ,,, وأنا أشهد إنك ما قلت إلا الصحيح

لكن هناك نقطة أحب أوضحها للاخوان اللي يقولون مالك ومال الوكالة شغلك عدل وخل شد

البلد يولي

المشكلة إن الشنطة ما تنفتح ولاتنقفل إلا بالمفتاح يعني من المحتمل جدا إني بعد استخدامها أنسى

أقفلها

وكنك يا أبو زيد ما غزيت !!!!

أما شد البلد ارعص على علباة هالريموت ونم مطمئن

بس الحمدلله كل شئ أهون من شئ واللي وفرناه ماهو بخل حاشا

وإنما حسد مباح في نظري للوكالة وقطعا لأطماعهم لا رزقهم الله فيما كسبوا منه كسبا فوق

المعقول


وجزاكم الله عني كل خير
.