خسرت !! يا اصحاب الهدد افيدوني وش هذا اللي صاير !!

[صاحب هدد]

السلام عليكم ورحمة الله وبركاته ........

اخواني شريت هدد موديل 99 قطري

وصلحت فيه الأذرعه والمقص وكذا شغله كلفتني 2500 ريال

ورفعته بكعكه 4 سم من الخلف ب 180 ريال

وركبت له جنوط فراشه + كفرات دنلوب جديده 3600 ريال

وشوي طلع لي صوت بالكرونه وحاولت اصلحها كلهم يقولون لازم تغير وغيرتها بـ 3500 ريال من الوكاله

طلعتها من الورشه :hot: القير صار مايعشق بالثالث يعني يفضي ويعشق تومماتيك طبعاً رحت للصناعيه قالوا توضيب !! قلت بكم قالوا 4000 ريال يعني انواع الخساير

السؤال مدري هذا اللي جاني هي نفس في الموتر والا الهدد هذي خرباته ؟؟

الله يعوضني خبر بس اني عفت المووووتر وش اسوي يا اخوان استخدم والا ابيع ..:j :hot: :hot: :hot:

[صاحب هدد]

ارجوا منكم مشاركتي بهذا الهم والتفاعل معي .....

[واثق الخطوة]

هلا أخوي
الجنوط والكفرات والكعكات ماهي خساير هذي إضافات منك وبإختيارك

أنت صلحت الأذرعة والمقصات وهذي أشياء تخرب بعامة الجيوب
وفي رأيي إنك أخذت الجيب بدون ما تفحصه أو تأخذ شور ميكانيكي
الحاجة الثانية لا تنسى إنه مودبل 99 بعني راح عليه تقريبا عشر سنوات وهو يكد في المدن
وفي الخطوط وفي البر طرد وهدد
يعني من الآخر شي طبيعي إنك تصرف عليه طالما مقتنع بالسيارة

الله يوفقك أخوي ويسدد خطاك

[رجل كريم]

كان الله بعونك اخوي لكن عسى مارفعت الموتر من الخلف بزيادة لانها راح تسبب عدم انسيابية لعمود الكردان ولي عودة ان شاء الله ان تيسر ذلك .,

تحياتي .,

[مشاغب شوي]

اول شي مبروك والله يطعمك خيرها ويكفيك من شرها

انا ماعندي خبرة بالتايوتا لكن

السيارة لها عشر سنوات تقريبا

والجيب بالذات مخصص للبر

وكل شي له عمر

والسيارة بهالموديل اتوقع لازم تطلب قطع

[سيف الظفير]

رأيي تبيع والشكوى لله




والله يعوضك خير


وفي السيارة ولافيك

[الشنه]

لا بالله موطبيعي

الكرونه لو فيها شي بان معك من اول ما شريته
وهالحين القير بعد

الله يكفينا وياك شر العين
الناس ما يخلون احد في حاله

حقي لك من الشور
تسبب وشف ربعك خذ من اثرهم ( فصم تمر او مسح نعالهم او اي شي ) ورش الموتر
اذا ما نفع
بع والله يخلف عليك
وش تحري تصدم او تنقلب لا سمح الله
بقا راسك اهم والحلال ادري غالي
لكن الله يعينك

[بواسامه]

مواري الموتر انه بيغربلك والله اعلم
ولا الهدد من اصبر المواتر بدون مبالغه لقله اللكماليات فيه
والظاهر ان موترك
كد عشر سنين وكرف وفاتح ثمه وبادي يطلب وطحت فيه
نصيحتي صلح ما يعيبه للمشتري وبعه والله
وكمالياته اللي كلفتك بعها لحالها وبتلقى لها زبون
وثاني مره لا تشتري شي الا فاحصه صح ولا من واحد تعرفه وتثق فيه
وحط في بالك ان كل هاللي جاك ابتلاء من ربك سبحانه في قوله(( ونقص من الاموال 0000 الايه))
فاصبر واحتسب وبيعوضك الله خير
واصدق ان بغيت تبيع

[عبدالرحمن 1]

لا حول ولا قوه الا با الله
اقسم با الله انك ضيقت صدري
الله يكون في عونك
وانا اتوقع انك مغشوش با لموتر
ولا منضول ولا حظك ردي
الله يخلف عليك ويعينك
تحياتي

[مسماري]

لا حول ولا قوه الا با الله
بيعه والله يعوض عليك خير منه

[ردن]

ارجوا منكم مشاركتي بهذا الهم والتفاعل معي .....



يعوضك الله خير اخوي

ولا تنسى ان اللي عندك هو لاند كرووووزر يعني شيك في جيبك

وتراك منت خسران اذا تبي تستخدمه وتكده ان شألله

ويعوظك الله خير باذن الله

[بنــي زيــد]

وسع صدرك وانا اخوك و اللي بالكون يبي يكون و شف انت وش ودك تسوي ان كانك عفت الموتر الشكوى لله بعه وان كانك بتجرب تصلحة و تكدة فالموتر ما شاء الله معروف على العموم لا تنسى الاستخارة
ولا يضيق صدرك وانا اخوك ولا شي تراه موتر وسع صدرك يا رجال و الدنيا اطول من اهلها
و تقبل مروري

[خشيمان]

والله وانا اخوك ما اشوف ان بلا في الموتر
زي ما قالو الاخوان الموتر له 10 سنين يكد
شيئ طبيعي يبي يطلب

والله يكون في عونك

[برق تميم]

والله انك رابع واحد يجيب او يشري سياره من قطر ويصير فيها بلا الله يعوضك خير أكثر الجيوم الي في قطر بالذات الهدد والسفاري ما تصير نظيفه يجيها حوف أقشر دخله المعارض وان جاب لك قيمه ترضيك بعه والمبالغ الي حطيتها الجنوط والكفرات والاشياء الاخرى لا تحسبها

[طارق الحربي]

طبيعي انه يطلب بما انه موديل 99

بس مهو لهالدرجه من الطلبات


اللي اعرفه ان رفعة الموتر تؤثر كثير على القير

اما اخسر عليه وصلحه وان شاء الله يبي يضبط ولا تنسى تقرا عليه

او بعه

[SuLTaN.M]

اول شي الله يجيرك ويعينك


من اول ما قلتا انه قطري وانا غاسلـ(ن) يدي


تلقى جايه جوور ما جا غيره هدرزات وفلتر ومسحه وغيره

الصدز دور الفكه منه بس

[هـدد]

السلام عليكم ورحمة الله وبركاته ........

اخواني شريت هدد موديل 99 قطري

وصلحت فيه الأذرعه والمقص وكذا شغله كلفتني 2500 ريال

ورفعته بكعكه 4 سم من الخلف ب 180 ريال

وركبت له جنوط فراشه + كفرات دنلوب جديده 3600 ريال

وشوي طلع لي صوت بالكرونه وحاولت اصلحها كلهم يقولون لازم تغير وغيرتها بـ 3500 ريال من الوكاله

طلعتها من الورشه :hot: القير صار مايعشق بالثالث يعني يفضي ويعشق تومماتيك طبعاً رحت للصناعيه قالوا توضيب !! قلت بكم قالوا 4000 ريال يعني انواع الخساير
سف
السؤال مدري هذا اللي جاني هي نفس في الموتر والا الهدد هذي خرباته ؟؟

الله يعوضني خبر بس اني عفت المووووتر وش اسوي يا اخوان استخدم والا ابيع ..:j :hot: :hot: :hot:

ياصاب الهدد
التكاليفك هذي ب13780+قيمة السياره +أشياء ناسيهن
لو انت شاريلك باترول سفاري :good: تو جديد ضمان الوكالة كرت ب138الف
أزين لك من الترزز بقطري :no:
لكن مافات إلا الشر لاتحسف لاتاقف الابالمعارض ويعينك الله على شوية خسارة
همن شاور قبل تشري
تقبل مروري

[راعي بيشة]

أقول الحقيقة ما عليك ملام

والله يحق لك تزعل

بس تصدق اذا المشكلة وقفت على ها الخساير فراسك السالم

والله لا يجيب أكبر

كان معي سيارة أحبها

وهي في أحسن حالاتها

وبعدين كنت أخاف عليها من الغبار ومن أدنى شي

وصدمت بها فأصبت بإحباط وكنت آنذاك ما أقدر أصلحها

وبعد وقت ليس بالطويل بعد أن شبعت إحباط جاني خبر وفاة عزيز ، فنسيت السيارة وتمنيت لو فقدت كل أملك بالدنيا من مال وان فلان معنا لكن

الحمد لله ، الله لا يجيب أكبر


صاحب الهدد أدري انك تقول : طبعاً ، المال يعوضه الله بس أنا أتكلم عن مشكله وحلها ،

ومع هذا أنت وأنا بحاجه لسماع مثل هذا الكلام


وآسف

[بدوي جنوبي]

اتوقع ان سبب خراب الكرونا الرفع الزائد من الخلف

ادخل هالرابط واقرا الرد رقم 37
۩۩ موسوعة صيانة الدفرنسات ووزن الكرونه برضو بالصور ۩۩ (http://www.mekshat.com/vb/showthread.php?t=85484)

والرد رقم 56


راجع هالرابط قد يفيدك

۞ (http://www.mekshat.com/vb/showthread.php?t=87376) ‏ صيانة اعطال العمدان و الصلبان اكيد بالصور ۞ (http://www.mekshat.com/vb/showthread.php?t=87376) ‏


اخي الكريم صاحب هدد

لا تضيق صدرك اذا كانت الكرونا سليمه قبل الرفع وتغيير الجنوط والكفرات ،،، اقترح عليك ترجع السيارة لوضعها الطبيعي وان شاء الله
يصير تغيير ،،

بالنسبه للقير لا تستعجل وتسوي توضيب حاول تبحث عن ورشة مناسبة
وابتعد عن المراكز الكبيره ،،،

نسيبي عنده فورد 2001 اكثر من ورشة قررت ان القير يحتاج توضيب ،،، بعد ما جربت السيارة اتضح ان القير سليم وقوي جداااا

المشكله اللي يشتكي منها هي حدوث نتعه علي سرعه 80 الي 100
مثل التقطيع ،،،،

المشكله هي كهربائيه بحته ما لها علاقه بأي شي ميكانيكي
غير بواجي وكويلات وطرمبة بنزين وحساس هواء

واشياء اخرى لكن الي الان لم يكتشف العطل

حتي الكمبيوتر ما حدد المشكله

المقصود انت لا تستعجل قد يكون خراب الترس الثالث من حساس ،،


بالتوفيق ان شاء الله

[صاحب هدد]

جميع الأخوان اللي ردوا على الموضوع اقول جزاكم الله الف خير والله يبعد عنا وعنكم الحسد وهذا الدنيا ما يبيلنا الا الصبر والإحتساب والحمد لله على كل حال


شاكر مروركم ووقوفكم معي

[سيف الظفير]

الله يعينك الموتر بدأ يطلب من الكرف والكد

ومحسودًً عليه بسبب التظبيط

[صاحب هدد]

الله يعين اخوي سيف الحمد لله

واليوم ثالث مره ارجعه لصاحب القيرات كل ما استلمه يخرب

[أبو أمين]

الله يعينك والعوض على الله

[علي عليوه]

الهدد القطري إن ما شريته من أحد تعرفه وإلا لا يهمك نادر تطيح بالنظيف

ويكون بعلمك ترى بلا الكارونه بالقطري شئ أساسي

ومادام الكارونه موليه وش ترجي من القير والمكينه ووالله إني طحت بـ 2002 مثل موترك الله يعطي اللي شراه خيره ويكفيه شره

لكن ما غيرت له إلا قزوز وبس ,, وعلى طول حرقته بخساره 4000 الله يعوض علي وعليك

لكن أبشرك موترك له زباينه وبالهبل ,,, ازرق به الطايف وشف وش يعطونك سعر

بس لا تخفي خراباته على الشاري - نصيحه -

الله يعوض عليك بخير منه يارب

[صاحب هدد]

عاد الشكوى لله طحنا فيه والله يعوضنا ويعوضكم خير

ساموه مني بالرياض 65 الف ريال بخراب الكارونا اللي فيه والموتر مكلفني 77 الف والله يجيب الخير ..

[ابوعقل]

الخساره بالعمر وانا اخوك

بعه وتوكل على الله والله يعوضك بأحسن منه

ان شاء الله

[أبو علياء]

القطري لعن والديه


والا بيعه بدون نفس

[غالي]

ابو علياء

هل تعلم هاللعنه الي اطلقتها ستبقى ربما ايام او شهور او سنين؟

هل تعلم انك ستحيا وهي ستموت؟

الله يهديك ويغفر لك يارب العالمين

والله يصبرك اخوي صاحب الهدد ويعينك ويوفقك ويسعدك دنيا واخره

ترا ياما مرت علينا مواتر نشتريها ونلقى نفس مشاكلك وانا اخوك

وياما خسرنا بلاوي

اقسم بالله العظيم شاري لكزس 460 موديل 2007 في شهر 2

ماكملت معي ثلاث اسابيع

وجوا سكارا وصدموني فيها يمشون 130 تقريبا او اقل شوي

ويعلم الله ان الابواب والمراتب والمسجل بقراطيسها وريحة الجديد فيها

والله ثم والله ثم والله

اني بايعها عقب الحادث بشهر وشوي تعقدت منها طبعا ماصلحت الصدمه
ماجلست معي شهرين او شهرين واسبوع

وبعتها ب238 الف

+

تقريبا راس مالي حاطه فيها

الحمدلله والشكر على كل حال

فا احسب كم الخساير الي خسرتها

فا مانقول الا الحمدلله والشكر على العافيه والله يزود النعمه علينا ولاينقصها اللهم امين

مالك سامع لشكواك الا ربك سبحانه

ومالك مفرج للهم الا ربك سبحانه

ومالك رزاق كريم الا ربك سبحانه

ادعه بقلب صادق وتذلل له سبحانه

وان شاء الله مايخيب رجاك ويحل مشكلتك او دلك على الي فيه خير لك


اتمنى لك التوفيق اخوي :)

[اسدهم]

الله يكفينا وياك شر العين
الناس ما يخلون احد في حاله

[ابو هشام]

اول شي مبروك والله يطعمك خيرها ويكفيك من شرها

معليش أخي

لازم تشيل "من"

لأن المعنى بيصير معكوس

يعني يكفيك شرها

مو يكفيك من شرها (يكفيك من شرها يعني يزيدك شر من شرها وأنا متأكد أنك لاتقصد ذلك)

العذر والسموحه

[البيـرق]

الله يعوضك خير............

هذي بعض مواتر قطر يفحطون فيها ويرفعون على كفرين.....بشكل غير طبيعي

وغير الترهيم لان عندهم الباترول والهدد اغلب مواتر الشباب.....وخذ جور عليها

ورأيي لك ان كان الموتر مافيه اي مشاكل اخرى او اي شي مضيق صدرك بالسيارة

صلحه والله يعوضك.......ولا وده السوق وان جاب لك سعر يرضيك...بعه

وانا ياما صلحت وخسرت واجد بكذا موتر وآخر شي اكرهه وابيعه.........

والله يعيننا وياك.................

[ابومدين]

لاوالله الا اهل ذيك الديار يعفلون الموتر عفل
لانهم الغالب يغيرون كل سنة سنتين ولذالك يحللون الموتر

لكن اسأل الله ان يعوضك خير ونصيحة لايضبق صدرك ابد
لان الله هو اعلم بحالك منك وكيف يبتليك ليرفع لك الدرجـات

[.أبوعبدالرحمن]

ماقصروا الاخوان الله يعطيهم العافية وبالذات اخوي واثق الخطوة

[صاحب هدد]

الخساره بالعمر وانا اخوك

بعه وتوكل على الله والله يعوضك بأحسن منه

ان شاء الله

الله يجزاك الجنه

[صاحب هدد]

القطري لعن والديه


والا بيعه بدون نفس
جزاك الله خير وحاول تتعود على عدم اللعن مع اني اعرف انك مو قصدك اللعن


ابو علياء

هل تعلم هاللعنه الي اطلقتها ستبقى ربما ايام او شهور او سنين؟

هل تعلم انك ستحيا وهي ستموت؟

الله يهديك ويغفر لك يارب العالمين

والله يصبرك اخوي صاحب الهدد ويعينك ويوفقك ويسعدك دنيا واخره

ترا ياما مرت علينا مواتر نشتريها ونلقى نفس مشاكلك وانا اخوك

وياما خسرنا بلاوي

اقسم بالله العظيم شاري لكزس 460 موديل 2007 في شهر 2

ماكملت معي ثلاث اسابيع

وجوا سكارا وصدموني فيها يمشون 130 تقريبا او اقل شوي

ويعلم الله ان الابواب والمراتب والمسجل بقراطيسها وريحة الجديد فيها

والله ثم والله ثم والله

اني بايعها عقب الحادث بشهر وشوي تعقدت منها طبعا ماصلحت الصدمه
ماجلست معي شهرين او شهرين واسبوع

وبعتها ب238 الف

+

تقريبا راس مالي حاطه فيها

الحمدلله والشكر على كل حال

فا احسب كم الخساير الي خسرتها

فا مانقول الا الحمدلله والشكر على العافيه والله يزود النعمه علينا ولاينقصها اللهم امين

مالك سامع لشكواك الا ربك سبحانه

ومالك مفرج للهم الا ربك سبحانه

ومالك رزاق كريم الا ربك سبحانه

ادعه بقلب صادق وتذلل له سبحانه

وان شاء الله مايخيب رجاك ويحل مشكلتك او دلك على الي فيه خير لك


اتمنى لك التوفيق اخوي :)

الله يرحم والديك على الكلام الطيب والله يخلف علينا وعليك بالخير


الله يكفينا وياك شر العين
الناس ما يخلون احد في حاله

صدقت والله اخوي لو تركب سيكل حسدوك الناس عليه


معليش أخي

لازم تشيل "من"

لأن المعنى بيصير معكوس

يعني يكفيك شرها

مو يكفيك من شرها (يكفيك من شرها يعني يزيدك شر من شرها وأنا متأكد أنك لاتقصد ذلك)

العذر والسموحه
جزاك الله خير


الله يعوضك خير............

هذي بعض مواتر قطر يفحطون فيها ويرفعون على كفرين.....بشكل غير طبيعي

وغير الترهيم لان عندهم الباترول والهدد اغلب مواتر الشباب.....وخذ جور عليها

ورأيي لك ان كان الموتر مافيه اي مشاكل اخرى او اي شي مضيق صدرك بالسيارة

صلحه والله يعوضك.......ولا وده السوق وان جاب لك سعر يرضيك...بعه

وانا ياما صلحت وخسرت واجد بكذا موتر وآخر شي اكرهه وابيعه.........

والله يعيننا وياك.................

شاكر لك مرورك


لاوالله الا اهل ذيك الديار يعفلون الموتر عفل
لانهم الغالب يغيرون كل سنة سنتين ولذالك يحللون الموتر

لكن اسأل الله ان يعوضك خير ونصيحة لايضبق صدرك ابد
لان الله هو اعلم بحالك منك وكيف يبتليك ليرفع لك الدرجـات

الله يرفع قدرك اخوي


ماقصروا الاخوان الله يعطيهم العافية وبالذات اخوي واثق الخطوة

وانت كذلك ماقصرت على مرورك

[سوبر VTC]

الله يعوض عليك خير و ان شاء الله تكفير ذنوب
و انا من رأيي انك تصلح الموتر
و تصبر الى الشتاء ان الله كتب لنا عمر و صرنا من الحيين
و تبيعه بالشتاء
و الجيب طلابته واجد سواء كبار او شباب
لكن اهم شي تكون و قفت الموتر صح و يلزم تلميع البدي
و يمكن عقب ما تلمعه يجوز لك الموتر
ارجو اني افدتك
تحياتي

[اح ب2267]

والله وانا اخوك ما اشوف ان بلا في الموتر
زي ما قالو الاخوان الموتر له 10 سنين يكد
شيئ طبيعي يبي يطلب

والله يكون في عونك

[صاحب هدد]

الله يعوض عليك خير و ان شاء الله تكفير ذنوب

و انا من رأيي انك تصلح الموتر
و تصبر الى الشتاء ان الله كتب لنا عمر و صرنا من الحيين
و تبيعه بالشتاء
و الجيب طلابته واجد سواء كبار او شباب
لكن اهم شي تكون و قفت الموتر صح و يلزم تلميع البدي
و يمكن عقب ما تلمعه يجوز لك الموتر
ارجو اني افدتك

تحياتي



جزاك الله خير على النصيحه الطيبه



والله وانا اخوك ما اشوف ان بلا في الموتر
زي ما قالو الاخوان الموتر له 10 سنين يكد
شيئ طبيعي يبي يطلب

والله يكون في عونك

يا اخي الكريم والله فيه مواتر اعمارها اكثر من كذا و لاتطلب الا القليل لكن اذا كان استخدام الموتر نظيف لكن حصل اللي حصل والحمد لله وشاكر لك مرورك