مكيف السيارة يطلع معه ريحه (معفنه) اكرمكم الله

[صليب الراي]

الاخوه الاعزاء

سيارتي سوبربان 2006

لاحظت قبل كم يوم وبعد تشغيل المكيف تطلع ريحه (معفنه) اكرمكم الله . وكأنها زوليه جايها ماء
اذا احد مرت عليه المشكله هذي يفزع ويعلمنا وش السواة .

[Magellan]

صارت عندي بحالات نادرة ،،
ولاشفتها أو عاينت المشكلة
والظاهر إنه فلتر أو تنظيف ثلاجة
واللي مصبرني بالنهار دوام وعقب العصر تقييل ولافيه وقت أفضي فيه
والليل وقت فرغتنا يكونون مسكرين أغلبهم

[صليب الراي]

الغالي Magellan (http://www.mekshat.com/vb/member.php?u=11979)

يعني ضنك ان فلتر المكيف جايه ماء مثلاً , لان السياره توها جديده .

عموماً الله يعطيك العافية على تفاعلك السريع

[قرناس صلا]

غير فلاتر الثلاجه

[خلاوي3]

شيك على الثلاجة ممكن داخل فيها شي وفاطس

[سيف الظفير]

جزتك الله خير يا الغالي على طرح هذا الموضوع


انا املك نفس السيارة والموديل

وللأســــــف تهب علينا هبايب شينة

[سوبر VTC]

تاكد من فلتر المكيف اللي داخل الماصورة الصغيرة فوق الرفرف يمكن متلطس من رايش كلتشات الكمبرسور
اذا تبي هواء قوي نظف فلاتر الهواء اللي اسفل الديكور بين الراكب و السواق و الا اجدعهن و الغهن

[صليب الراي]

الاخوه
قرناس صلا
خلاوي3

شكراً على تجاوبكم .. السريع

نروح اليوم ونخليهم يشيكون على الثلاجه وفلترها

[صليب الراي]

الاخ سيف الظفير هلابك اخوي والله يجزاك ويجزي الشباب الي تفاعلوا مع الموضوع بشكل سريع كل عافيه

الاخ سوبر Vtc الله يعطيك الف عافيه على المعلومات القيمة هذي وان شاء الله اليوم بشيك على الي قلته

[رجل كريم]

قد يكون هناك تسرب لبعض الماء الى فرش المقصورة وهذا شي طبيعي يعني بسبب الرطوبة يكون هناك تكثيف لبخار الماء حول الثلاجة وينزل على شكل قطرات وخاصة ايام الرطوبة العالية , واذا اردت ان تتأكد اول ما تطلع الرائحة ضع يدك على الفرش خاصة خلف دعاسات البنزين واعلى منها . وممكن تستخدم مزيلات الروائح للسجاد وتنتهي المشكلة الا اذا كان هناك خلل ما .,

تحياتي .,

[الداهية]

حياك الله اخوي
انا عندي نفس المشكلة وموتري 2006
واستشرت احد الشباب الي مرت عليه المشكلة
وقال فك فلتر المكيف الي داخل الديكور الي امام الراكب طبعأ في الكامري وقم بتنظيفه
وإذا تبي يجي مع هواء المكيف ريحة طيبة ، قم بتطييب الفلتر اما بدخون او طيب بخاخ بعد التنظيف
هذا كلام واحد مجرب
وانا ما فضيت انظفه
وسلالالالالالالالالالالالالام

[Magellan]

عندي لكم حل أصرف
اللي هو صرفوا أحوالكم بال20 يوم الجاية وتحملوا لين يدخل سهيل
وعقبها ييسر الله ومايحتاج مكيف بإذن واحد أحد

[سوبر VTC]

عندي لكم حل أصرف
اللي هو صرفوا أحوالكم بال20 يوم الجاية وتحملوا لين يدخل سهيل
وعقبها ييسر الله ومايحتاج مكيف بإذن واحد أحد


اشوف كانك تستهر بنا :D :D :D


اضبط امورك و خلك حبيب:D :D

[ابوعقل]

الحمدلله انا عندي جمس 2006

ولا تطلعلي ريحه

غير الفلتر و نظف الثلاجه ونظف المروحه

وان شاء الله تروح

[مهوس صيد]

اذا تبي نصيحه ومجربه فك الفلتر حق المكيف ورح ونفخه عند البنشري وحطه معها اي ريحه تعجبك رشه على الفلتر

[ساري 111]

فيه غطاء تحت الديكور عند رجلين الراكب فيه 3 مسامير فكهن تحصل فلترين جنب بعض غيرهن وراح يضبط معك الوضع (سعرهم 70 ريال تقريباًً)

واحرص اذا مسكت خط تحط الهواء خارجي

[النحيف]

شف وانا أخوك



افتح الهوايه -الهواء الخارجي - اذا وقفت السيارة بالليل ونسم للدرايش يومين أو ثلاثة وتروح الريحة والأفضل انك كل المدة تفتح الهواية ( عن تجربة )


واسأل مجرب :good: :good:

[منظور]

الاخوه الاعزاء

سيارتي سوبربان 2006

لاحظت قبل كم يوم وبعد تشغيل المكيف تطلع ريحه (معفنه) اكرمكم الله . وكأنها زوليه جايها ماء
اذا احد مرت عليه المشكله هذي يفزع ويعلمنا وش السواة .


اخوي حصل معي هالشي تدري وش السبب طلع البطاريه خربانه والريح منهاا الين غيرتهاا وراحة الريحه

ياليت تشوف بطارية سيارتك وتفحصها قبل قبل تخسر في شي ثاني
دمت بخير

[الشامخ11]

حياك الله اخوي
صارت معي بسياتي ولقيت السبب
ان الزايد حق الماء للمكيف يصب بالسيارة
صلحتة وخليتة يصب براء والحمدلله زان

[كاشخ 24 ساعه]

انا عندي نفس المشكله بس في مكيف المكتب

كل ما أشغله يطلع ريحه خايسه مره

مدري وش الحل معه مع انه جديد

[صليب الراي]

الاخوه الاعزاء
رجل كريم
شيكت على السيارة من الداخل وما لقيت شي وشكراً لك يالغالي على المداخلة
الداهية
شكراً على النصيحة الطيبة وعلى المداخلة
Magellan
الظاهر انك ساكن في مكان بارد وانا اخوك ;) الله يتم عليك نعمته وشكراً للمداخلة
ابو عقل
شكراً على النصيحة الطيبة وعلى المداخلة
مهوس الصيد
شكراً على النصيحة الطيبة وعلى المداخلة
ساري 111
شكراً على النصيحة الطيبة وعلى المداخلة
النحيف
مشكور يالغالي والظاهر ان هذا الي بسويه
منظور
شكراً على النصيحة الطيبة وتراني شيكت على البطارية ولقيتها تمام مشكورعلى المداخلة
الشامخ11
شيكت على السيارة من الداخل وما لقيت شي وشكراً لك يالغالي على المداخلة
كاشخ 24 ساعه
جرب انك تميل المكيف على برى اقصد يعني تخلي ميول علشان الماء يطلع برى وشكراً على المداخله


الاخوة المكشاتيه الله يعطيكم العافية ومشكورين على تجاوبكم السريع .. وبعلمكم وش سويت
- شيكت من داخل السيارة على نصيحة احد الاخوة الله يعطيه الف عافيه وما لقيت اي تهريب ماء داخل السيارة .
- رحت امس لكهربائي وشيكت على الفلتر الي تحت الديكور والغريب ان الكهربائي ما لقاه الظاهر ان صاحب السيارة القديم شايله .. لكن الكهربائي اكد لي ان المشكله ماهي منه .
- طلبت من الكهربائي يشيك لي على الفلتر الخاص بالثلاجة الي داخل الماصورة الصغيره لكن الكهربائي اكد لي ان فلتر الثلاجه لا يمكن يكون هو السبب .
- طيب والحل .. قال الكهربائي انصحك بفك الثلاجة ومواصيراها الخارجية والداخلية الي وعمل تنظيف كامل لها (ويمكن يتغير الوضع) يعني مو اكيد قلت بفكر وبرجع لك بعد كم يوم .
العضو الغالي النحيف قال في مداخلته بالموضوع




شف وانا أخوك






افتح الهوايه -الهواء الخارجي - اذا وقفت السيارة بالليل ونسم للدرايش يومين أو ثلاثة وتروح الريحة والأفضل انك كل المدة تفتح الهواية ( عن تجربة )




واسأل مجرب :good: :good:


قررت اجرب الطريقة هذي ثلاث ايام واشوف الوضع وبعدها اقرر

اكرر شكري للجميع على هالتفاعل ويعطيكم الف عافيه

[سيف الظفير]

والله من يوم شريت الجمس ماقد فتحت الهواية الخارجية ابد


وجاري التجربة

[منوانت]

اخوي شغل المكيف الحار لمده من 15 الى 30 ساعه وانسى

[منوانت]

معليش ربع الى نصف ساعه

[mushari-saud]

بختصار لا توقف موترك تحت شجرة

[راجح]

حياك الله اخوي
صارت معي بسياتي ولقيت السبب
ان الزايد حق الماء للمكيف يصب بالسيارة
صلحتة وخليتة يصب براء والحمدلله زان
:good: :good: :good: :good: :good: :good: :good: :good:

[رجل كريم]

طيب اخوي ابغى اسألك دفع الهوا قوي او خفيف ؟

عادة الفلتر يكون في نفس حجرة المروحة اللي تحت الراكب يعني ما تقدر تشوفه ا لا اذا طلعت المروحة مع بيت البلاستيك اللي تحويه , بتحصل شبك او فلتر يشبه حق المكيف النافذة نظفه او غيره وغير كذا انصحك بتنظيف فتحات وممرات خروج الهواء جميعها عند الكهربائي .



تقبل تحياتي .,

[مسفر الاكلبي]

عاد انا اول ماقريت عنوان الموضوع شكيت في البطاريه بس مدامك شيكت عليها زين

بس شغل المكيف الحار وشغل الهوايه الخارجيه كلها حلول جميله

ولا تصدق الكهربائي اللي يقول ينظف الثلاجه

تحياتي للجميع

[ابوشجاع911]

هل اخذت رأي الوكالة في الموضوع؟! حاول تاخذ رايهم بس لاتخليهم يغيرون شي الا بموافقة منك عشان مايستغلونك وانا اظن (ان بعض الظن اثم) ان هناك تسرب لغاز الفريون داخل الثلاجة لانه قد يسبب هذه الرائحة
واما اللي قال شغل المكيف على الحار لمدة نصف ساعه فانا اشوف انها فكرة طيبة وممن تفيد باذن الله

[سوبر VTC]

تاكد من فلاتر الهواء اللي اسفل الديكور بين الراكب و السواق و مكانهن تحت ديكور ازرار المكيف او بمعنى اصح تحت الولاعات
تحياتي

[Mohammad]

علمت من مسؤول فى ورشة الوكاله ان الموديلات الجديده لا لا لا يوجد بها فلتر مكيف

الغت شركة جى ام الفلتر!!!

وعلمت ايضا انك عندما تغير دخول الهواء من الداخل ..شركة جى ام ابقت مجال لدخول الهواء الخارجى بنسبة 25% من اجل السلامه!

حاول تغسل المنطقه التى تحت المساحات..اعتقد هناك مكان لتجمع الماء

والله اعلم

[vip4800]

فك فلتر المكيف الي داخل الديكور ادرج الي امام الراكب و تحصل على الفلتر وقم بتنظيفه بالماء واصابون وجففه
وإذا تبي يجي مع هواء المكيف ريحة طيبة ، قم بتطييب الفلتر اما بدخون او طيب بخاخ بعد التنظيف طبعن اكثر المشاكل تضهر بزياده عن اهل المناطق الساحليه لوجود الرطوبه العاليه 0 نصيحه لاتلغي الفلتر لانك تقدر تفك الفلتر اذا تسكر بنفسك لاكن ماتقدر تضف الاديتر الى بعد تنسم الفريون وتعبات مره ثانيه وتبي تطول المسأله وشكراً

[مرقاب]

اخوي صليب الراي بالاضافة الى كلام الاخوان قد يكون دخول جرم -عصفور اوغيره- وانت ماسك خط من خلال فتحات المكيف الخارجيه.

[musaeed20098]

حصلتلي نفس المشكله وطلع عندي تسريب خفيف بالدفايه مثل ما انت عارف الفايه لها هوزين طالعين من الراديتر واحد طالع واحد داخل ويمكن يكون في تسريب لانه يطلع نفس الريحه الي قلت عنها عزك الله وحلها الوحيد تكنسل الدفايه يسدون الهوزين وتروح الريحه لاني اول شي كنت اسوي الفلتر وكانت تروح وبعد فتره ترد وبعدين عرفت انه الدفايه ومن سديتها حتى عزم الموتر تغير وياي:) ولك جزيل الشكر

[turkiq]

صارت معي في سيارة سوناتا 2006 قعدت لمدة ايام اشم نفس الريحة اللي توصفها
واتجاهلها ... بعد ايام بدأت احس ان التبريد بدأ يخف يوم عن يوم...
وفي الاخير رحت لفتي مكيفات وقلي ان الثلاجة تهرب وفعلا طلعت تهرب فريون
واضطريت لتغييرها
ومن بعد التغيير رجعت البرودة الاولى واختفت الريحة تماما
لذلك انا اربط الريحة بالتهريب

وممكن ان التهريب عندك بسيط مثل اللي كان عندي

والله يعينك



تركي

[غربي هواوي]

افصل الحاااار




.