تعقيباً على هذا الموضوع : ( تكفون أنا في ورطة أبي الفزعة )

[عاشق الإف جي]

السلام عليكم
أنا معي جيب إف جي 2008 بعد ما مشى عشرة آلاف طلع فيه صوت وبعد أخذ ورد مع وكالة عبداللطيف جميل قالوا الصوت من المكينة ولازم نفك المكينة
وش رايكم وش الحل
فأبغى منكم الي يعرف إيميل شركة تويوتا باليابان لا يبخل علي وله مني جزيل الشكر .....


السلام عليكم
تذكرون هذا الموضوع كان تقريباً قبل شهر وكان هناك ردود من بعض الأعضاء بعضهم قال الموتر على الضمان وخل أبو جميل يصلحونه على الضمان
والبعض قال أعرض الموتر على كذا مهندس يمكن يدلك بعد الله على الخلل
المهم مالكم بالطوالة وديت الموتر لورشة متخصصة بالتويوتا فحص المهندس السيارة وقالي هذا الصوت من الشداد حق سير المكينة لأن الصوت مايطلع إلا إذا شغلت المكيف أو حطيت القير على
الـ D المهم ما توقعت بأن الشداد هو السبب قلت نجرب قبل ما تفك المكينة بعد يومين دق علي وقالي بأن الشداد وصل ركب الشداد أشغل الموتر بعد فضل الله لاصوت ولا شيء والحمد لله

فنصيحة لا تكون الثقة بالوكالة عمياء
بعد هذا وش رايكم هل أضبط فاكس شكوى على هذا الفرع الي بغى ينثر لي المكينة وأرسله للإدارة بجدة
ولا أحمد ربي وأسكت
شاكر للجميع تفاعلهم معي عندما نزلت الموضوع الأول

[ناوي نيه]

افضحهم كودهم يخافون ربهم

[أبو فهد11]

أنا نصيحتي أرسل لهم وخلهم ينفضحون

هذه الوكالات كلت العالم بالباطل

والمشكله الآخرى أنها ليست خطأ واحد

ويسكت عنه بل أخطائهم كثيره

والحمد لله على سلامة السياره

[راعي المقانيص]

لاترسل لجده وانا اخوك لانها تبي تصير تيتي تيتي مثل مارحتي جيتي

ارسل لليابان واهم شي وضح اذا ماعطوك الحل راح اطرح مشكلتي واستفسر عن طريق الانترنت وباذن الله راح تاخذ حقك وافي وكافي

[فارس تميم]

اخووي الله سهل عليك وعرفت تتصرف

بس مو كل الناس تبي تسوي زيك

فأنصحك لا يرد شكوتك الا اليابان :D

عسا الله يكتب لنا وكاله زي الناس ويفكنا من هالي مسط ما ورانا ودوننا

[بدوي جنوبي]

اذا عندك اوراق تثبت كلام الشركة ان المحرك يحتاج فرط
ارفقها مع الشكوي اللي ترسلها

واذكر انه تم تغيير شداد فقط وانحلت المشكله وارفق معها فاتورة
الشداد واذكر التكلفه ،،، وان اللي قام بأصلاح وتحديد العطل ورشة عاديه

واكتب لهم ليه الوكاله ما تحدد العطل الصحيح
وان الوكاله كانوا بيفرطون المحرك اروجنال (اصلي ) بسبب تشخيص خاطئ

حاول ترسل تقرير كامل ويكون مرفق بالصور

بالتوفيق

[ابوسلماااااان]

من ستر على أخيه ستره الله
لكن مايمنع النصيحه الجاده

[ابوسلماااااان]

عاشق fG ولاله صوره افا ياذا العلم

[أبو أمين]

الله يعينك ولاحول ولا قوة الا بالله

[الصمان 2]

الحمد لله على سلامة موترك من هالوكالة التعبانه

وياليت ترسل فاكس أو أميل للشركة في اليابان مدعم بالصور .

[أبوإبراهيم1]

الله الله عطهم الصالي ولك التحية

[ابو ناصر2020]

لا تصكت لهم انا موتري طلع بوه صوت طقطقه ودخلته الوكاله وقالو يبيلك توظيب كامل او تغيير المكينه

وبعد مافكيت المكينه عند ورشه اعرفه صار اصابع البساتم تجتاج تغيير فقط والحمد لله على كل حال

[أشيقراوي]

اخوي انا معي اف جي , واسمع صوت من المكينة احيانا كثيره

ومريت الوكالة قالولي مع التطعيس السيور تطلع صوت من التراب ,

هلا الكلام منطقي ولاشلون , يعني كل ما اغير سير بيدخله تراب , مب معقول

لاهنت وش رابك

[عاشق الإف جي]

والله يا خوي أشقيراوي
ما أدري بس أتوقع التراب يروح مع المشي

[abu naif]

مساء الخير كانت معنا مشكلة مع الوكاله حيث جبنا جيب ربع حرارة عالية جداً وسوينا انوع الحلول واتوقعات لمشكلة الحرارة كلها بائت بالفشل اخيرا قلنا مافيه الا الوكاله رحنا يمهم وعلمناهم بالسالفه وفحصو الموتر طلعو تقرير ان الماكينة محروقه صدق كذب قلنا نجيكم بكره مرينا بطرقنا ورشت ابن مرضاح الي بالصناعية كان عندهم يماني ماشالله علية كشف على الموتر قال راس المكينة هو المشكلة غير الراس ويرجع موتركم تمام قلنا الوكاله تقول المكين محروقة قال اذا كلامي ماهو صحيح تراها على حسابي وفعلاً كان المشكلة الراس وسلمنا من مشكلة الوكاله وعسالله لايخسرنا وياكم

[مخاوي الكشات]

لا يحدك شيء مع أني اتوقع أنهم مهوب مسوين شيء .. المهم أرسل لهم إن لقيت تجاوب فعال وسريع كان بها وإلا إنشر في الجريدة هذه الفضيحة وأرفقها بلقاء مع المهندس اللي صلحها لك .. وإن بغيتني أعاونك راسلني على الخاص ..

تحياتي ..

[6670]

اذا عندك اوراق تثبت كلام الشركة ان المحرك يحتاج فرط
ارفقها مع الشكوي اللي ترسلها

واذكر انه تم تغيير شداد فقط وانحلت المشكله وارفق معها فاتورة
الشداد واذكر التكلفه ،،، وان اللي قام بأصلاح وتحديد العطل ورشة عاديه

واكتب لهم ليه الوكاله ما تحدد العطل الصحيح
وان الوكاله كانوا بيفرطون المحرك اروجنال (اصلي ) بسبب تشخيص خاطئ

حاول ترسل تقرير كامل ويكون مرفق بالصور

بالتوفيق
أنا رأي من رأي مشرفنا.

[رحال7]

كالة تويوتا بدأ فيها اللعلب والنصب

والاستهتار بحقوق الناس


ورش تويوتا جميل ستنهار مع الوقت وذلك لان هناك سياسه كلما جمعت الورشه مبلغ اكبر من المساهمين!! اقصد الزبائن كلما زاد نصيب مدير الفرع ومدير الصيانه

ولهذا تجدهم يدفعونك باى عذر وباى طريق وعليهم زحمه كبيره

ايضا فقدت الشركه مهندسين يشخصون المشاكل بكل دقه...لا ادرى اين ذهبو!!!

والله اعلم

[رحال7]

ملحوظه احيانا يكبرون المشكله ولكن يقومون باصلاح الخلل فقط بعد فتح المكينه واكتشاف المشكله..هذا اذا احسنا النيه فيهم!

[خشيمان]

لا بد من انك تتصل على الادارة في جدة ..

وين فوضى يبون يفكون مكينة ما مشت الا 10 الاف ؟