المساعد الشخصي الرقمي

مشاهدة النسخة كاملة : لاصحاب اليوكن مشكله بالدبل ابي حل


كاشت المدن
07/08/2008, 11:14 AM
السلام عليكم
عندي يوكون 2005

ولما اشبك الدبل يطلع صوت حك حديد طول مايمشي
ولما افصله مافيه مشكله مع انه الصوت توه بادي ويطلعلي احيانا افحص الدفع اربع عجلات واحيانا يعيي يشبك الا لما اطفيه واشغله مره ثانيه
شيكت عليه مافيه اي تهريب مع انه كان مع واحد ما يشبك دبله الا قليل
فاللي يعرف حل لها يفيدني او يدلني على ورشه يضبطونه لي لاني خايف من النصابين حقين الصناعيه فقلت ماللي الا استشيركم
الله ييسر اموركم ويرحم والديكم
ابوعقل
07/08/2008, 11:24 AM
السلام عليكم
احيانا افحص الدفع اربع عجلات واحيانا يعيي يشبك الا لما اطفيه واشغله مره ثانيه


انا معي جمس 2006

دايما تطلعلي اصلح الدفع الرباعي

وما يشبك الا اذا طفيت السياره

وشغلته مره ثانيه

ومخليه

بس انت وين ساكن؟؟؟
ابوعقل
07/08/2008, 11:30 AM
http://www.mekshat.com/vb/showthread.php?t=147000
كاشت المدن
07/08/2008, 01:29 PM
اخوي ابو عقل اشكرك على تفاعلك
انا بالرياض
وانا اخاف اخليه وتكون المشكله بسيطه وبعدين تزيد
Magellan
07/08/2008, 02:03 PM
من المعروف أن دبل اليوكن عبارة عن أزرار وهذه الأزرار تتوجه لدينمو كهربائي في الدفرنس لإختيار التعشيق المناسب،،
بالنسبة لمشاكل الدفع الرباعي بهذا الموديل فيتخلص من جهتين :
1- أزرار الدبل وقد شرحت حلها في
http://www.mekshat.com/vb/showpost.php?p=1766542&postcount=70
2- الدينمو ومشكلته أنه يجيَم (ينعطب) في بعض الحالات بحيث مايقدر يعشق التروس وسبب خرابه من قلة الإستخدام لأن الدبل لابد أن تختبره مرة كل شهر ولو على أرض صلبة وللمعلومية فحتى السيارت المزودة بدبل يدوي أرضي يواجهون نفس المشكلة
والحل بتغيير الدينمو (حساس الدبل) بسعر 400 ريال وتركيبه بحدود 200 ريال،وطبعاً شكله واضح عبارة عن قطعه مشبوك بالدفرنس وموصل لها سلك كهربائي،وهو سهل الفك والتركيب،وفي مركز عبدالرحمن الجميح بالصناعيه القديمة بالقرب من الجابري يصلحونه بضمان ..
وإذا كان الدبل مايعشق لاخفيف ولاثقيل فالمشكلة من الدينمو وإذا كان يعشق بس تلعب اللمبات فالمشكلة بالأزارير
سوبر VTC
07/08/2008, 02:18 PM
السلام عليكم و رحمة الله
عن اذنك ياكاشت المدن لا هنت
طبعا هذه معانتي مع الجمس كتبتها من اجل الفائده لاعضاء منتدانا الاعزاء
طبعا معي جمس 2001 دفرنسين و اللي صار لما مشى 25000 الف كيلو طلعت للبر و شبكت الدبل الخفيف و
و اجي مكان به هيار و اشبك الدبل الثقيل و يوم اني طلعت من الهيار يوم انتبهت و تطفى لمبات الدبل اللي يسار
و لا اقدر افصل الدبل و ابلش بعمري و يفرجه الله و اقوم على فيوزات الدبل اللي عند البطارية و ابدا افصلهن و
اشبكهن عدة مرات و الحمدلله اشتغلت اللمبات و يوم صار عقب كم يوم تبدا تطلع رسالة افحص الدبل اللي فوق
امبير الضغط او الكمريشن تولع و تطفى عدة مرات و قمت ودخلته الوكاله قالوا عندك الدينمو حق اللي
يعشق الدبل طبعا لونه اسود خربان و طبعا غيروه على الضمان و الحمدلله الى الان تمام
مكتوب عندي بالكتالوج يتم شبك الدبل الخفيف و انت تمشي الى حتى 80 بشرط ترفع رجلك عن البنص
حتى يعشق اما الدبل الثقيل لابد من الوقوف تماما
الحمدلله الان الجمس ماشي 180000الف كيلو و لا فيه مشاكل


/////سؤال ياماجلان طال عمرك/////
انت تقول الدينمو اللي بالدفرنس الامامي انه هو يشبك الخفيف و يشبك الثقيل صح او لا؟؟
طيب الحساس الاسود اللي راكب على جرم القير من جهة اليسار تحت الراكب هذا وش وظيفته؟؟
انتظرك يابعدك
تحياتي
عاشق الموج
07/08/2008, 07:11 PM
السلام عليكم

انا معى بليزر مديل 93

وفي قطعه في الدفرنش الامامي هذا دايم تخرب الظاهر انها حساس او فيوز

المهم هذا تغيرها بسيط جدا افصل الواير عنها وافتحها بزرادية او مفتاح عباره عن فر فتحها

سعرها اصلي 400 ريال والامريكي 250 ريال والامريكي ماشي حاله يعمر معك
ناوي نيه
07/08/2008, 08:04 PM
صوت الحديد الي تقول عنه يطلع عندي تسمعه تحت من عند الرجول وانت بكرامه
كاشت المدن
08/08/2008, 01:42 PM
ما قصرتو بيض الله وجيهكم ورحم والديكم
ياشباب زادت المشكله امبير البنزين والزيت طاحت يعني صارت فوق المليان
ابي ورشه زينه وتمدحونه بالرياض وياليت اذا حصل احداثي الورشه او وصف واللي مثلكم مايقصر
سوبر VTC
08/08/2008, 02:45 PM
استلم طال عمرك و اي شي حنا بالخدمة:) :)

و هذا رابط عن اسباب الخراب

http://mekshat.com/vb/showthread.php?t=143584 (http://mekshat.com/vb/showthread.php?t=143584)

و هذا رابط عن اعطال دبل و طرمبة الجمس
http://mekshat.com/vb/showthread.php?t=146219 (http://mekshat.com/vb/showthread.php?t=146219)
كاشت المدن
08/08/2008, 03:05 PM
بارك الله فيك وبيض الله وجهك اخوي سوبر وياليت توصف لي ورشة العثيم او رقمه اذا كان بالرياض
Magellan
08/08/2008, 03:14 PM
يقولون بالمثل ماعلى كريم تشرط ...

ويا أخوك قلت لك في مركز عبدالرحمن الجميح بالصناعية القديمة بجنب الجابري
والجابري معروف محله ..
هناك صلح الدبل عندهم


2- العدادات كذلك عند الجابري يصلحها بـ650 ريال وعند البيان للسيارات الأمريكية يصلحها ،وفيه واحد مذكور يمدحونه حيل ورشة على شارع فاطمة الزهراء بالملز يقولون رخيص ومضمون ولاأعرف بالضبط أي ورشة بس أعرف إن على هاك الطريق يجي 3 ورش
كاشت المدن
08/08/2008, 07:12 PM
اشكر كل من شارك او دلني على شي خصوصا انت ياmegellan ماقصرت
وبيض الله وجهك
وزي ماقلت ماعلى كريم تشرط واشهد انك كريم
لكن خويك غشيم مايدل زين يبي الوصف واليوم رحت للصناعيه وعجزت القاه ونص الورش مقفله وقلت استنى الوصف وارجع بكرى
مره اخرى اكرر شكري لك ولكل من شاركنا
سوبر VTC
08/08/2008, 11:04 PM
بارك الله فيك وبيض الله وجهك اخوي سوبر وياليت توصف لي ورشة العثيم او رقمه اذا كان بالرياض



لك رسالة على الخاص
Magellan
08/08/2008, 11:45 PM
إيه ياعم إنبسط شويا ..
فيه شرح موجز ومفصل بأخر الأخبار
وياخوي سوبر vtc قريت الرسالة على الخاص بس شكلك تبي تحشرني بالإجابة:D
أولا أنا أحب أوضح إن مسألة إفحص الدفع الرباعي مشكلة مزمنة تتطلب الحل ، ناس تنفع معهم وناس لا ،،
طبعاُ المشكلة من 3 أجزاء
1- أجزاء السويتش وإلتماساته
2- محول القدرة أو الدينمو ويسمى actuator
3- الحساس ويسمى encoder motor sensor

طبعا ماودنا نتعمق شوي لكن أحسن حل هو بإعادة تلحيم الأزرار الخاصة بالدبل قبل كل شيء ومن ثم لو فيه (مٌشكل زيادة) نروح للي أصعب:
بسم الله
1- نفك الديكور
http://farm1.static.flickr.com/193/471332161_e01b6e4502.jpg?v=0

2- نسحب الماخوذ من تلاليبه:D
http://farm1.static.flickr.com/175/471312266_213a2809b7.jpg?v=0


3-نشيل المساكات حقات الكهرب
http://farm1.static.flickr.com/228/471312056_dc534d8146.jpg?v=0


4- نحطه على أرض مستوية
http://www.assayyarat.com/myimages/Aug08/fawaz_01.JPG
5- نفك الغطاء ونلاحظ الرؤوس الثمانية
http://www.assayyarat.com/myimages/Aug08/fawaz_02.JPG

6-نعيد التلحيم بالكاوية بشكل جيد حول هذه الرؤوس بشكل كامل
http://www.assayyarat.com/myimages/Aug08/fawaz_03.JPG

وكذا نقول إنتهينا من طبختنا ، وإن شاء الله تضبط
سفاري 2008
09/08/2008, 01:43 AM
اخي كاشت المدن غيرزيت الدفرنس الأمامي والخلفي زيت بترومين أوشل عيار 90 وغير زيت الدبل زيت اصلي ولون الزيت ازرق وتحصله عند الجميح فقط بسعر 28 ريال للعلبة ويكفي علبتين للدبل ورقم الزيت 12378508
ناوي نيه
09/08/2008, 02:32 AM
بعد اذن راعي الموضوع والي حاط زيت الدفرنش 140 يضر
Magellan
09/08/2008, 02:41 AM
عاددتاً زيت الدفرنس يُضاف ولا يُستبدل
والعامل اللي يشيك الزيوت يتأكد من الصرة هل بالإمكان الزيادة وإلا لا .......
أخوي ناوي نية الزيت اللي حطيت منه حق النقل الثقيل، يعني سيارات المرسيدس التريلات يستخدمونه
سفاري 2008
09/08/2008, 04:06 PM
زيت الدبل زيت خفيف عيار 10 لونه ازرق فاتح مخصص للدبل يغير كل 40الف كيلو متر
سفاري 2008
09/08/2008, 04:18 PM
( عاددتاً زيت الدفرنس يُضاف ولا يُستبدل )
هذا اكبر خطاء نقع فيه غيرزيت الدبل والدفرنسات كل 40 او50 الف كيلومتر من اجلا الاتتأكل الرمانات والتروس ويصير فيها فضاوه وصوت ونيين
من واقع خبرة وتجربة
سوبر VTC
09/08/2008, 05:44 PM
عاددتاً زيت الدفرنس يُضاف ولا يُستبدل
والعامل اللي يشيك الزيوت يتأكد من الصرة هل بالإمكان الزيادة وإلا لا .......
أخوي ناوي نية الزيت اللي حطيت منه حق النقل الثقيل، يعني سيارات المرسيدس التريلات يستخدمونه



اثرك هنا و انا اتحرى انك تجاوبن:D :D
هين:mad:
سفاري 2008
09/08/2008, 05:53 PM
وش عندك من العلوم :no2:
سفاري 2008
10/08/2008, 02:16 AM
الأخ ناوي نيه زيت 140في الصيف ممتاز امافي الشتاء مايضر لكنه يثقل الحركه الى ان يسخن
ابو شكاع
10/08/2008, 02:58 AM
( عاددتاً زيت الدفرنس يُضاف ولا يُستبدل )
هذا اكبر خطاء نقع فيه غيرزيت الدبل والدفرنسات كل 40 او50 الف كيلومتر من اجلا الاتتأكل الرمانات والتروس ويصير فيها فضاوه وصوت ونيين
من واقع خبرة وتجربة

يعني وش الصح الله يسلمك ...نزيع أو مانزيعش
قصدي نغير الزيت أو مانغيره ؟ :D
سفاري 2008
10/08/2008, 03:15 AM
خليه زي مهو متغيرش حاجه
كاشت المدن
10/08/2008, 12:19 PM
يقولون الا جاك ولد سمه سوبر vtc او megellan لا يبعد عن هالاسمين
عز الله انكم ما قصرتو كفيتو ووفيتو
رحت لورشة الجميح اللي جنب الجابري (المعاناة)
وقالي لازم فحص قلت افحص قال ب100 ريال افحصلك كل شي مكينه وقير والدبل والدفرنس وكهربا وطبلون
قلت مهب مشكله بعد الواحد يتاكد من كل شي احسن ويثق بالموتر دخلت الموتر وشبك الكمبيوتر وجتن عطسه وعطست وما امدان اقول الحمدلله الا وهو فاصل الكمبيوتر وقال خلصت فاحص كل شي
قلت ما شاء الله كل شي بها السرعه؟؟؟؟ قال ايه
قلت اكيد قال مايحتاج المكينه والقير والدفرنس والدبل مافيها الا حساس الدبل والطبلون فيه عدادين خربانه
قلت حنا صحيح بعصر السرعه لكن مايمديك تفحص كل شي كذا قال الا ومتاكد قلت طيب وكم يكلف قال 1100 الحساس والعداد الواحد ب600
قلت ليش الحساس ب400 و700 تركيب كثيره بالحيل والعداد عند الجابري ب400 الواحد
قالي صحيح الحساس ب350 والباقي تركيب وبرمجه والعداد مافيه مجال الواحد ب600
قلت طيب تخصمونلي حق الفحص السريع اذا صلحت قال الفحص شامل مو سريع والفحص غير الاصلاح قلت اجل الفحص السريع وشلون اذا الشامل وقت عطسه السريع ربع عطسه
المهم طلعت وقلت انلعب علينا بالفحص مهب ملعب علينا بغيره

والعداد مريت الجابري وقالي العداد ب400
ومريت البيان الجديد قالي ب300 مع انه سوري لكن العامل فلبيني وانا واياه ويصلحلي الواحد ب250 مع ضمان شهر يعني المجموع 500 والجميح بيطلعلي المجموع 1200
والعثيم ماقصر قاللي تعال وما يكون الا كل خير والفحص (وقت العطسه )مجاننا لكن ابحاول اشوفلي وقت واروحله

هذ واكرر شكري لكل من شارك في موضوع او دلني على شي
والل يخبرلي ورشه صادقين لايبخل علينا يعطينا موقعه وماله الا دعوه بظهر الغيب
سفاري 2008
10/08/2008, 02:54 PM
اخي كاشت المدن حساس الدبل الذي غيره في الدبل داخلي ولا خارجي او في الدفرنس الامامي لوتكرمت اوصفه لنا ولك جزيل الشكر والتقدير
كاشت المدن
10/08/2008, 03:38 PM
اخوي سفاري 2008 الحساس عبارة عن قطعه مشبوكه بالدفرنس وموصل لها سلك كهربائي،وهو سهل الفك والتركيب ماياخذ 700 تركيب
Magellan
10/08/2008, 04:12 PM
اخوي سفاري 2008 الحساس عبارة عن قطعه مشبوكه بالدفرنس وموصل لها سلك كهربائي،وهو سهل الفك والتركيب ماياخذ 700 تركيب


حياك أخوي كاشت
وماشاء الله نتائج مبهره
بالنسبة لمركز عبدالرحمن الجميح فغالي لكن مضمون والجابري لايقل عنه غلاء ،،
إلا أن أسعاره غير معقولة ..
أنا أعتقد إذا كان الدبل يعشق لكن بعض الأحيان السويتشات تلعب وتنقل بين الخفيف والثقيل من الأفضل تلحيم لوحة البورد مثل ماشرحتها في الصفحة الأولى قبل ماتتخسر فلوس على الفاضي
والفك والتركيب ما أتوقع يتجاوز 40 ريال عند محلات زينة السيارات والمسجلات
سفاري 2008
10/08/2008, 04:24 PM
الأخ كاشت المدن غيرزيت الدبل والدفرنسات كل 40 او50 الف كيلومتر من اجلا الاتتأكل الرمانات والتروس ويصير فيها فضاوه وصوت ونيين
من واقع خبرة وتجربة مع جمس دبل 83 و يوكن 2003 دبل وان حصل تضيف زيت مانع الأاحتكاك بنسبة 1/ 4 وللجميع التوفيق وقلة الأعطال .
ابو شكاع
10/08/2008, 04:26 PM
سفاري 2008
جزاك الله خير على الإيضاح
كاشت المدن
13/08/2008, 10:33 PM
شكرا لكم على التفاعل