كييييف الشروكي ...... !!

[ridan]

السلام عليكم ورحمة الله



يالربع شرايكم بالشروكي كيفه بالبر والديرة والخطوط هل هو زين للإستخدام اليومي وكيف وضعه مع الخرابات ووش افضل موديل واقل خرابات

شاكر لكم مقدما..

[ابوحمزة2007]

اقول ... نصيحي ابعد عن الشر وغني له. سمعته تعبانه ومافيه واحد الا ويذم فيه.

[أبوإبراهيم1]

اقول ... نصيحي ابعد عن الشر وغني له. سمعته تعبانه ومافيه واحد الا ويذم فيه.
هذا العلــــــــــــم

[أبو نواف هاشم]

والله ياخوي كان معاي شروكي سبورت موديل 99جلس معاي 5سنوات ثم بعته وأخذت الفتك والله الشروكي روعة في البر والمدينة وسواقته متعة والله أما موضوع الخرابات والله مو ذاك لو تحافظ عليه روعة العيب اللي شكيت منه هو الباب الخلفي ضيق شوي أما القطع الوكالة غالية شوي بس فيه القطع الأمريكي الأصلي رخيصة وحلوة أستخدامها

[نفس السحاب]

الشروكي ممتع جدا في القيادة في البر والنفود والديرة
يحتاج متابعة الصيانة بشرط يكون عند شخص فاهم للشروكيات
(انا اتكلم عن الشيروكي السبورت القير عايدي ام الجراند فهو غير جيد)

[ridan]

حياكم الله جميعا
وانتظر بقية الأخوان

[طواش]

لاتقربه !!!! نصيحه من محب يوم:cool: من تشتريه بتعرف كل الكهربجيه واللحامين وجميع الورش واحد واحد ;) وبعدين ماحد يشتريه منك :confused: أخر شي بترفعه على درامات للتشليح:D

[شروكي ربع]

والله مسكين من لم يجرب الشروكي بكل بساطة :no:

ومسكين كل من يذم فيه :eek:

ومسكين كل من نشب في بر وقام يدورله شروكي يطلعه :D

[ridan]

888
مشكوريين على مروركم

بانتظار البقيه..

[Magellan]

888
مشكوريين على مروركم

بانتظار البقيه..



الشيروكي يا أخوك مجربه (قير عادي، كلاسيك أي ستاندرد)
ممتاز ولابه إلا عذروب صغير ،،
الحرارة ترتفع
والحل: إنك تسافر بأحد هالطايرات وتغافلهم وتسرق واحد من المحركات النفاثة وأضمن بإذن واحد أحد بعد تركيبه ماترتفع حرارته

[انسان مو بسيط]

السلام عليكم
ما في سياره ما لها عيوب وحسنات
والشيروكي موتر في كل مكان
يمكن عيبه انه ضيق مو حق عايله بس
انما قطع الغير حتى لو غاليه بس تركبها وتنساها
تحياتي



انسان مو بسيط

[راعي طويلات]

الشروكي موتر قوي وفي العزم مافيه كلام وفي النفود يطربك بس عليك بالنظيف لو زادت قيمته
واهم مشكله فيه الحراره ولها حلول وقطع غياره غاليه في الوكالة بس في المحلات الثانية اسعارها معقوله
وبحكم أنه امريكي لابد من صيانته والاهتمام فيه من فتره لفتره
طبعا أفضل الانواع السبورت والكلاسيك والكانتري وجميعها 6 سلندر أما الجراند شروكي ابعد عنه ولاتقربه

[ridan]

88
حياكم الله

طيب وش الفرق بين السبورت والكلاسيك والكانتري

[صقرالعرب2007]

والله وناخوك الفرق السبورت يجي فيه سيدي مو كاسيت وجسر بين الراكب والسواق و.. و... و أشياء بسيطه تفرق...
أما الكلاسيك فهو الي ما يجي فيه زي السبورت والكانتري لا أعلم عنه حاجةَ أبداَ...
لكن كلها بالعزم والمكينه واااااااااااااااااااحد ما فيه فرق,,,,

[بـــ نجد ـــرق]

هلابك اخوي

الشيروكي اذا اخذت نظيف فانت اخذت موتر باذن الله

ماشاء الله عزمه قوي

اقتصادي في البنزين (اعبيه من الدمام اذا كان فاضي مره بــ 30 ريال بنزين (91) - وامشي بسرعة 120 واذا وصلت الرياض يصير باقي في التانكي الثلث )

من ناحية الخرابات والله ماشفت منه شي يذكر كلها تحصل في اي سياره مع العلم اني اقشر شوي على السياره

لكن اللي بيحافظ عليه ماراح يشوف منه شر باذن الله .

في الخط ماشاء الله كأنك على سياره صغيره وفي البر موتر ماعليه كلام. كل اسبوع امسك عليه خط 600 كم رايح يوم الاربعاء و600 كم جاي يوم الجمعه وماشفت منه شر

طبعا لكل منا رغبته سواء قير عايدي او تماتيك لكن اشوف التماتيك افضل واقل عكاس ونفس القوه تقريبا بحكم تجربتي الا اذا كنت راعي تطعيس فالعايدي افضل

افضل الموديلات من 97 الى 2001

ومن 2002 وفوق زين بس عذروبه نازل الموتر مره في البر بيتعبك شوي

الفرق بين السبورت والكلاسيك والكانتري كلها اكسسوارات داخليه وجنوط بس لكن المحركات وحده

القطع غالية لكن يجيله قطع اي سي ديلكو وتركب له قطع الكابرس القديم و و و يعني لاتشيل هم القطع

عذروبه انه ضيق شوي لراعي العائله


ملاحظه
* اذا بغيت تشتري اشتر نظيف ولو كان غالي وانتبه من اللي مطعس فيها عشان تسلم من الحراره والعكاس
* لاتقارنونه بالتويوتا من ناحية الاستخدام وناضر سعر هذا وهذا

والله يكتبلك اللي فيه خير

واسف على الاطاله

[ridan]

888
جزاكم الله خير

بانتظار بقية الأراء

[عاشق الرفاليو]

موتر ماعليه كلاا تحس في قيادته رواح المغامره يطربك في البر اقتصادي في البنزين قيادته ممتعه في الصحراء عيبه الحراره اهم شي تدور شي نظيف من 2001 ونازل اتكلم عن السبورت والكلاسيك وابتعد عن الجراند اكرر كلاامي دور شي نظيف راح تنبسط عليه

[صاحب هدد]

اما انا مثلك ما ادري وش الطبخه بالشيروكي وبصراحه انا احب شكله وودي به بس كل ما قابلت احد قالي انتبه خرابات ومن هالرخيص وجاء يوم من الأيام واقابل واحد فني شيروكيات وسألته وهو رجل ناصح نحسبه والله حسيبه قالي الشيروكي من احسن السيارات وقطعه رخيصه وارخص من التويوتا بكثير يعني قالي الدفرنس كامل توظبه بـ 2000 ريال انا معي هدد الكرونا اللي بالدفرنس لحالها 3200 ريال شفت الفرق ومدح لي الشيروكي وريحني وقلت له تكفى شف لي شيروكي قال ابشر ...
بس بشرط زي ما ذكروا الإخوه لازم يكون نظييييييييف ولو سعره زياده لا تا خذ شي مكروف انتبه ..
وان كان تخبر لي شيروكي نظيف تراني ادور ..

تقبل مروري

[باث فندر 2005]

الشروكي مشكلته بالحراره مثل ماقالوا لشباب

[sari sami]

بسم الله الرحمن الرحيم وبه نستعين
انا كان عندي شروكي كلاسيك يازينه زيناه مايحتاج وبعته وندمت الي بعته ، والان عندي قراند شروكي متعبنى شوي طحت به في السيل وخبطت المكينه وصار له سنتين م ما هو مضبوط الي ان وصل الوكاله اليوم والى الان، الصراحة فيه حساسات ما احد يعرف لها الا الوكاله .. لكن الصراحة الشروكيات الاوله حلوه وزينه وسهله التصليح وتصلح للبر لانها مرتفعه عن الارض اما القراند فهو نازل على الارض لكنه ملك الخط مريح لابعد الحدود لكني جنيت عليه في السيل قطعت به اربع سيول في يوم واحد في العلا واخر شيى قال هذا مكاني وراحت المكينه وخسرت فيه كثير الصراحة ..والآن هو جاهز من الوكاله على الظمان الى يبي يشتري يرد علي ...وسلامتكم

[ridan]

مشكوررين اخواني جميعا
اخوي صاحب هدد انا ادور مثلك كانك خبرت لي شيء فلا تنساني بعد..

[مناحي511]

اعقلها وتوكل ودور النظيف خذ معك خبره لايلعبون عليك الشريطيه وانا اخوك

[مناحي511]

حياك اخوي
إذا كنت ناوي على شروكي انتبه من حاجة وحده وهي الكرباء يعني قبل تشريه شيك على الضفيرة قبل تشوف المحركات والبدي لأنه إذاكانت الضفيرة ملعوب فيها سلم على الموتر لو مامشى الا 2000 كم
وبالنسبة للحرارة أنا معي شروكي كلاسيك 96 وصلت حرارته H يمكن خمسين مرة والحمد لله ماأثرت فيه ابد الي يتأثر فقط باالماكينة من الحرارة الطبات خلهن معك على طول الوحه بـ 8 ريال
(بس مااخليه يثبت على H إذا كنت أطعس اوقف على طول وافتح الكبوت وإذا كنت مشغل المكيف وانا واقف اطفيه على طول وماشفت فيه أي شي)
أما بالنسبة للمغامرات بالبر خذ موتر إلعب فيه على كيفك ونسبة إنقلابه وانت تطعس أو تحذفه يمين ولا يسار تقريبا 20% أسأل مجرب
أنا جربت مره بالبر كنت ماشي باليل وفجأه طلعلنا ابو الحصين (ثعلب) وأنا انبسط عليهن والله لاطاحت عيني عليهن وانا معي الشروكي والله مايفر لان ابو الحصين إذا لحقته يمشي عدال وإذاقربت له يفر يمين او يسار 90 درجة والشروكي الوحيد الي يفر معه على طول بكل امان بنفس الزاوية
ولاتنسى إذاوفق الله واشتريته بعد كل رحلة بريه التشييك عليه من الصدام الى الصدام ويعيش معك
أما قطع الغيار بالنسبة لي معقول جدا
القير التماتيك بالصناعيه بـ 1500 ريال راكب ومضمون شهر
- الماكينه بـ 4000 ريال راكبة مضمونة شهر
- الدفرنس الخلفي بـ 1500 ريال ياباني جيد جدا راكب ومضمون اسبوعين
- الدفرنس الامامي بـ 1000 ريال راكب ومضمون اسبوعين
- عامود الدبل بـ 400 ريال
- الراديتر كندي بـ 550 ريال رصتين وسعودي 3رصات بـ 450ريال
- طرمبة البنزين اصلي بـ 250 ريال امريكي بـ 150ريال
- كرسي القير التماتيك امريكي بـ 60 ريال
- جلد رباط الوحده بـ 25 ريال وعددهن 8 حبات 4 فوق و4 تحت وجلد الرباط هي الموجودة بالذراع الي يمسك الدفرنس
- علبة الدريكسون بـ 150 ريال الى 250 ريال بالتشليح
- الكمبيوتر بـ 550 الى 800 ريال بالتشليح وبالوكالة من 3000 ريال وفوق
- السير بـ 150 ريال اصلي و 60 ريال امريكي
- وباقي القطع الصغيرة مثل حساس وزرار طفاي وسلك والجاجات هذي تحصلها بالتشليح من 10 ريال الى 50 ريال
وأخيرا آسف جدا جدا جدا على الإطالة والي عنه معلومات عن اسعار لم تذكر او عنه تعديل على الأسعار المذكورة لايبخل علينا
وعساكم تعرسون كلكم

[ridan]

http://www.mekshat.com/vb/images/frames/1_cur.gif http://www.mekshat.com/vb/images/frames/1_cul.gif
وعساكم تعرسون كلكم
http://www.mekshat.com/vb/images/frames/1_cdr.gif http://www.mekshat.com/vb/images/frames/1_cdl.gif


امييييييييييييين

وجزاك الله خيير

[بدران9]

الله يعطيك العافية يامناحي وبعد اذن صاحب الموضوع وش الفرق بين السبورت والكلاسيكي؟ وش الاحسن؟ وبالنسبة للقير وش الافضل تماتيك ولا عادي؟ اكيد العادي احسن لكن هل التماتيك فيه خرابات؟؟

[واطي الجمرة]

بالنسبه لي جربت الكلاسك قير عادي قزاز يد يعني كلش عادي وريح راسك من الخرابات وابعد عن القراند لأن مشاكل الكهرب فيه كثيره مامثل العايدي

[ابومحالة]

مساكم الله بالخير يالربع

انا عندي شروكي 2001 ولله الحمد منبسط عليه مرررة

وفي البر يطربني وممشاه جيد

بالنسبة لاسعار قطع الغيار

اخوي مناحي 511 كفى ووفى
ولكن لي تعديل بسيط عليه

وهو ان سعر طرمبة البنزين فوق 1000ريال اصليه
أما فلتر البنزين فهو 250 ريال تقريبا

[فني الشروكيات]

الشروكي، وما أدراك مالشروكي..

أفضل سيارة ممكن انك تقتنيها،، جربتها في البر والديرة والسفر، والشعيب وقنصت عليها،، وكل شئ،،

سعر الموتر رخيص وقطعه ارخص، وقوة وعزم يطربك،،،

فيه بعض العيوب البسيطة جداً مثل الحرارة،، لكن علاجها بسيط جداً، يمكن التعديل عليها بحيث تكون أفضل من حرارة التويوتا،، وبدون مبالغة..

أنا أنصح بالشروكي وبقوة، ولي فيه خبرة جيدة، بل ولدي مركز متخصص في صيانة الشروكيات..

بس أهم شي تاخذ النظيف، لا تاخذ شي مكسر والله ان يهبل بك ..

واي استفسار ترانا حاظرين ...

ملاحظة: هذا الكلام لا يشمل القراند شروكي الثمانية سلندر ..

[بـلـيـهـان 1]

حياك الله

كيف حالك

مع احترامي لأهل الشروكيات جميعاااا

نصيحه ابعد عنه

انا معي شروكي 2000 سبورت 6 سلندر

و الله بهذلني

توني حاط عليه تجديدات بسيطه

تغيير رديتر

و مرواح

و تجديد بوجه عاااام

كلفتني بما يقارب 3500 ريال !


سعر توضيب ؟؟ !!


قطع غياره غالي

خراباته كثير

حرارته ( تخليك تحتر معها )

ما تضمنه

ما يصلح للكرف

يصلح استخدام بسيط

و ايجابياته

سواقته حلوه ، مرن ، قوي ، شكله حليو


فقط لا غير


و نصيحتي ابعد عنه

ولاكن على كلام اهل الشروكيات .. الشروكي ما يصلح إلا للي يفهم له و يعرف له


،

لكن أنا اقول ابعد عنه

[cherokee ls1]

الشروكي (cherokee)

هي افضل سيارة مرت علي موتر خفيف نشيط ...
في البر .. جيب يطربك ..
وفي الديرة .. خفيف وصغير ..
وصرفية بنزين ما احسن منها ..
ممشاه في الخط ممتاز ..
مشكلته الوحيدة الحرارة بس علاجاتها بسيطة وكثيرة ...
بس اهم شي عليك بالنظيف .. ولا تاخذ قراند 8 سلندر ..

[واطي الجمرة]

فني شيروكيات ولله ودي اسير عليك بالورشه ----ودي اشوفك واستفيد منك خصوصا اني بالرياض

[ahmednai]

أنا اشتريت والله أكثر من 30 شيروكي نعم أكثر من 30 شيروكي وكلهن من موديل 98 حتى 2001 لا تتعداهن والله انهن سيارات لكن انتبه تتوهق في واحد مفجور عقب مراهق لاعن والديه
واللي يقول لك انحش تراه متوهق في شروكي ملعون والدي والديه عشان كذا أخذ عنه سمعه سيئه زي ما قلت لك خذ من موديل 98 حتى 2001 وغيره لا
وإذا حصل لك امريكي توه جاي من ديرته يعني (غر) لا تفوته وانتبه للصدأ صح تلقى أغلب الامريكي ماشي كثير لكن تراهم هناك أوادم يسوقون صح ويصينون صح مو مثلنا نحرقها حراق تقل جايتنا السيارة ببلاش

[ابن قرطبة]

عندي شروكي له أكثر من 11 سنة .ولا أشكي من شي القطع الغالية ما تخرب الا كل 5 سنوات تقريبا. حارق الموتر بر و بحر وسفر طويل (3000كم) سنويا و جبال ووديان....
الموتر ما عليه كلام بس أهم شي انك تهتم بالصيانة الدورية. و لا تترك العطل يسبب لك اعطال اخرى انت في غنى عنها .و مثل ما قال الاخوان 97 -2001 هو الاحسن و عليك بالنظيف

[ridan]

جزاكم الله خيير وماقصرتوا

[صاحب هدد]

طيب يا اخوان ابشركم لقيت لي شيروركي 98 الحمد لله الموتر طيب

بس عندي استفسار وش الصيانه الدوريه اللي اسويها وكل كم اسويها الله يجزاكم خير ؟؟؟؟؟

[المرابط]

الذيب للبيع




http://www.mekshat.com/pix/upload02/...0080410141.jpg




اللى له نظر
http://www.mekshat.com/vb/showthread.php?t=152548

[تيرنيدو]

موتري انا شيروكي 2003 سبورت قير عادي
موتر جامد واتحدى فيه الباترول واللاند والدليل اني سحب وندستار بالهاف مون مغرز وخوينا الجي اكس ار تفل دم علشان يحركه من مكانه انا كنت اكرهه الشيروكي بس قلت بجرب واشوف طلع اللي يقول عنه غير غلطاااااااااااااااان والله موتر يطربك وخاااااااصه العادي صح ضيق مو بوسع اللاند بس والله انه اقوى وبالطعوس يمديك تحط بساطك فوق وتشرب قهوتك والجيوب تحت يتفرجون عليك اتمنى ما بالغت تحياتي