فزعتكم و اقتراحاتكم ياشباب

[majed]

السلام عليكم ورحمة الله وبركاته
مساكم الله بالخير.....................

اخواني اعضاء مكشات
حنا مجموعة شباب ناوين نكشت ان شاء الله من يوم الخميس الجاي الى الاثنين او الثلاثاء
اول يوم في خريم بعدين للتنهاة وباقي الايام ما ندري وين روح له. ممكن تتفضلون علينا باقتراحاتكم
لو تكرمتوا.
وبثقل عليكم شوي ترى محاكيكم ثقيل دم وما ينعطى وجه بس اصبروا عليه شوي

ممكن اقرب طريق من خريم للتنهاة؟
وممكن لو تزودونا بالمسافات والإحداثيات. وايش شي بيفيدنا

وكانكم عاد بتخاونا ترى نتشرف والله.


ونكون لكم شاكري بالحيل مره

[راعي عنيزة]

اقترح اخوي من بعد التنهاة تطمرون للصمان وخصوصا بربك دغيم والفياض الي حول حسنا

ورحله موفقه وسعيده

[الطبيب]

انكم تصيرون جيلوجيين

يعني تمشون على غير وجهه معينه

يعني مغداكم بمكان

ومعشاكم بمكان

ترا ما فيه احسن من المغامره

والمشي بركاده وهون ( يعني لا تطيرون )

وانتبهوا للبانزين

ترى مع التمشيات الواحد ينسى نفسه

ورحله موفقه وسعيده

[majed]

مساكم الله بالخير
يعطيكم العافيه اخةي راعي عنيزه واخوي الطيب

والله اني قايل لهم نروح للصمان وناخذها قطوع للشمال
بس معنا واحد من ربعكم من عنيزه يقول لا نبي نفود
قلنا له ياخي النفود ملحوق عليها بس عيا تكفى اقنعه


مشكورين

[majed]

السلام عليكم ورحمة الله
ياشباب وينكم ما بقى الا يومين وما احد عبرنا
تكفون فزعتكم

[kobra159]

والله اني اري انكم تهونون بس ؟؟؟؟؟؟

مالله حد تروحون اقعد بيتكم ازيلك والا رح منتزة الياسمين وانبسط هناك ورب البيت كريم؟؟؟؟؟
بعدين كان الدعوة شباب مايدخلونكم الياسمين انا اتوسطلك ولا تزعل بس؟؟؟؟؟




يا شباب وين الردود ردوعلى الرجال لايصدقني ويهون؟

سلام:D :D :D :D :D :good: :D

[خوي حسن]

اخوي ماجد والله يقترحا عندي وناخوي حسن تقاطو وشترو قارمن وخزنو
الاماكن المشهوره ومحطات البنزين وحطو رجليكم ترى القارمن خوي
يعتمد عليه بعدالله ثم اخذ المشوره من اصحاب الراي ورحله سعيده
ولا تنسون الكميره علشان تورونا الصور مثلك عارف الاجازه قربت
ونبي الاماكن الحلوه على شان نقوم بالذهاب لها انشاء الله

[الشبارم]

اخوي ماجد

صبحك الله بالخير رداً على استفسارك خذ عندك

الى طلعتو من خريم خذ خط المزفلت الى الرمحيه و اطلع من هناك على الحفنه و من مفرق الحفنه خذ يمين الى التنهات كله مزفلت . هذا في تصوري اقرب و افضال طريق.

اما بالنسبه للصمان اقترح عليكم الشمال الشرقي مربع اكثر بس " انتبه من الخفاس الصمان كله رطرط عكب السيول السبوع هذا و لا اوصيكم معشا في محل و مضحى في محل.

اما بالنسبه لخويكم راعي النفود الوقت الحالي النفود زين عقب الامطار مافيه طين و تغاريز بس مثل ماقلت النفود ملحوق عليه بس متى الصمان يربع.

اتمنا لكم رحله سعيده و موفقه انشاء الله

اذكركم و اذكر نفسي ان هناك كشاته بيكشتون عقبكم فالرجاء ترك المحل كما تجدونه او احسن.

و اسف على الاطاله

اخوك

الشبارم

[الشقردي]

السلام عليكم
أنا أقترح انك تلغي خريم من الخطة لانها قريبه وينفع تروح لها نص يوم وهي قريبه من الرياض أي خميس تقدر تروح لها
وطالما ان مكشاتكم خمس أيام أو أزود شوري عليك ابعدوا يعني مثلا خذ خط السير هذا:
-انطلقوا فجر الخميس على طريق القصيم وافطروا في شعيب الدقلة أو ابتلوا الى الشوكي وعقب الظهر تقريبا اتجه للتنهاة وتغدوا هناك (ولو ما يكون الا حول المغرب) بس اهم شئ توصلون التنهاة وتقعدون بمحلكم قبل الظلام ومن بكرة الضحى حرك للصمان جهة دغيم وحسنا ثم الحصبيات ثم اتجه الى لينة عن طريق الحفر وعندك هناك الزعبية وما حولها من الفياض وحولك النفود ووراها فياض وشعبان البسيتينات.

-المسار الثني نفس الاول بس عقب ما تطلع من الشوكي تتجه للشحمة وحولها فياض يمدحونها وكذلك شعيب الاعصل وعقبها اقطع البر الى الارطاوية اللي على طريق المجمعه-الحفر وثم كمل الى لينه

ملاحظة: لابد من وجود جهاز الاحداثيات والايكوم لأن بالايكوم ممكن يدلونك طيور البر على محلات قد شافوها وينصحونك بها قبل ما تتعنى, ومن الافضل تكونون بسيارتين(جيوب طبعا) واحتاطوا للماء والبنزين.
والله الله بالنظافة يا شباب

مجرد اقتراح ,,,
وتمنياتي كم برحلة سعيدة ,,,
وآسف على كثر البربرة وودي لو اني معكم بس الدوام ما يسمح.

[majed]

والله العضيم ما قصرتوا كلكم حتى الاخ kobra الله يسامحه