المساعد الشخصي الرقمي

مشاهدة النسخة كاملة : الصمان ..... آخر تقرير و( صور ) 15-16-17 / 11 / 1424


حفرلوجيا
09/01/2004, 11:53 PM
سلام يالربع
ياللي تحبون ( مكشات الصمان .... ابشروا بالخير )

اعتذار : بسبب ظروف ( العمل ) .. لي سنتين ماوطيت درب الصمان من الرياض .. لذلك لاتواخذون اخوكم اذا ظهر لكم شيء ( عارض ) .

الأنطلاق : بدأت رحلتنا نهار الإربعاء.. ولكن للأسف بسبب الغبار والعجاج .. لم نستطع رؤية على مسافة خمس أمتار في عروق النفود مما جعل زميل لنا في السيارة الأخرى يعتذر من مواصلة الرحلة بسبب ان والده الذي يرافقه قد يتعب بسبب الربو .. لذلك لم يكن مسيرنا في الذهاب إلا ليلا أو في رؤية معدومة.. وواصلت انا والرفيق اللي على الدين والملة ( حتى لو عجاج )... ولكن للاسف نسينا الخيمة ( الحمار ) مع اللي رجع .... واللي واجهنا بالرحلة أمطار ورش وغيم ماشفنا الشمس نهائيا .. ولكن انحلت .. ولا تحلو إلا كذا ..

المحطة : التزود بالبنزين والنواقص من محطة دوار ( التنهاة - الصمان - حفر العتش ) من طقوس كشاتة الصمان من الرياض .. ولم أشاهدت فيها ازدحاماشديدا و لم إلاحظ إلا ( شباب كبار ).. يعني مافيه طلبة شقردية مثل ( الرحال 2003 , المرصاع .. وغيرهم ) ..ماشفت إلا شيبان هقوتي مثل أخونا ( كشات ) .. وفي المحطة كان بودي ( بعلو صوتي ) أقول ( يالمكشاتيين الكاشتين تبينوا ودي أسلم عليكم ) .. كان عندي إحساس ان بعضهم موجود .. لكني خفت إن خويي يرجع ويقول عني ( معربج ).

مصيبتي : من قربنا إلى نهاية الأسفلت سابقا .. بدأ قلبي ( يرقع ) .. وأخيرا رجعت و( وطيت ) الدرب بعد طول فراق .. وكل مامدينا بالمسير زادت ( القرقعة والرجفة) ..وجاني بلاي وأنا أسوق السيارة يوم وصلت نهاية الأسفلت سابقا .. وتبدأ رجليني تصافق ( بحلم أنا وإلا بعلم ) لأن المكان فيه ذكريات .. ياما تواعدنا فيه مع حبايب ( شرواكم ) .. اللي نوديه لهالمكان واللي يجيبنا .. ومنه نتفرق .. وياما كسرنا فنجال نحتري عزيز مضيع أو ( مضيعين نحتري من يدلنا ) .. ذكريات .. لكني تشجعت يوم شفت هالجيوب ( على قلتها ) تعدانا متجهة شمال .. وأدعس على الأبنص..

الطريق والمواقع الرئيسية : مجرد ماتعدينا بإتجاه الشمال الغربي جهة ( جو ريطي ) بدأت علينا( الاربعاء بالليل ) ( رش خفيف ) .. وصلنا خبيراء في الجو الساعة التاسعة ومنها نبدأ( الكشتة الحقيقية ) ومرينا في الرحلة كثير من الخباري ( من الجنوب للشمال حتى عودة الحاصبيات) والفياض والأجواء ( دغيم والقريب منها , حسناء والأجواء اللي حولها , أم الهشيم ( شمال حسنا ) , الثليغاء , جغبقا , أكثر خباري الحاصبيات ,.. وبعده عودنا اليوم الجمعة جنوب بإتجاه مكان ( القرقعة ) .

أثر الأمطار : خلال ثلاث أيام متواصلة لم نرى الشمس .. ماغير مطر ورش وفي مناطق أثر سيل لم نشهده .. ففي ليل الإربعاء في ( ريطي ) ديمة متقطعة حتىالفجر ..ونشوف البروق ( شمال ) ومن الساعة الثامنة صباحا حتى مغادرتنا الساعة العاشرة ( رش ) .. وفي مسيرنا ( من ريطي حتى حسنا ) واضح أن الأرض ممطوره البارح وأكثر المناطق التي مررت بها في الخميس الخباري مربعة .. أما ( عشب الرعي ) على أوله ولكن تميزه ورويان ... بعد حسنا بإتجاه الشمال( مسافة 15 كم ) الخباري والفياض عشبها أحسن مارايت .. ووسط كل الخباري غدران .. وسبحان الله المنطقة اللي بعدها ( قبل أم الهشيم وحتى بعد الثليغاء ( مافيها ولا عود خضر ) وإن كانت توها ممطورة وأرضها رويانه من مطر البارح.
قبل وصولنا ( جغبقا وإلى 5 كم تقريبا بعدها ) غدران وجغبقا..... صايرة( بحر ) ..
أما الحاصبيات فهي المنطقة الأجمل ( عشب ومطر وغدران ) وعشب الحزوم ( الرعي ) أفضل مارأيت وإن كان على أوله. .. لكنه رويان. .. ويذكر بالأجهزه يوم الجمعة أمطار جهة الحفر وسيول جهة النعيرية..
الربيع : حنا مشافيح ودنا مثل بعض السنين اللي ( يوسم ) بها الصمان عدة مرات .. فيكون مثل هالوقت ( يسر ويبهج ) .. ولكن الأرض تبشر بالخير ( حتى لو ماتبع لبعض الخباري أمطار .. وبعضها فيها أثر ماأسمعه من الشيبان ( فسق أرض ) اللي راح تشوفونه بالصور .
فيبدو أنه ستكون ممتعة هذه السنه وستصبح الحاصبيات والخباري اللي شمال حسنا الأفضل ..
.
.
.
.
ولكن.
.


يالأجواد مانعدم الخير في الجميع .. هذي مناطق نزهة انا اليوم فيها وتركتها لك للاسبوع الجاي ( ماكأني طبيتها ) نظيفة.. لأن الجميع يستاهلون اني أنظفها لهم فما بالك إذا كانت المخلفات ( من عندي ) .. وإذا جاء طيب مثلك الأسبوع الجاي أو غيره أكيد يبي يحافظ على نظافتها .. صحيح ان المكان ( خلا ) لكن ( المسلم ) عنوانه النظافة .. فليس أقل من أن تتخلص من ( زبالتك ) إلا إذا كان هذا ( شغلك ) ببيتك .. نقول ( ياحيل الله ) .. وفي هذا المنتدى يناشدكم جميع من ينتسبون إليه بالتخلص من ( القمايم ) مايبي لها إلا تكومها وبعود كبريت وأنت مغادر .. إذا لم تستطع دفنها في الحزوم .
-------------------------------------
الصور ................. يتبع علما أن عدم وضوحها بسبب أننا ماشفنا طول الأيام الثلاثة الشمس ( ماغير مطر ورش وهتان ) .. كنت أحسدكم بالديرة ( شفتوا الشمس ;);)
أيمن
10/01/2004, 12:25 AM
ماشاء الله تبارك الرحمن ..
بيض الله وجهك ولا تعبت يا ابوسليمان ..
والحمد لله على سلامتك وسلامة ربعك ..
وصفك جميل واضح، لم أستطع انتظار الصور حتى أبلغك تحيتي وإعجابي ..

تحيتي
جبل كميت
10/01/2004, 12:37 AM
معاد نبي صور

هالوصف الرائع والدقيق ( مهوب دقيق القمح )
يكفي عن مليون صورة
تسلم والله يا حفرلوجيا أسلوب رائع وسهل في نقل الخبر بدقة 5 مليون بيكسل
الله يعطيك ألف عافية
تقبل تحياتي وتقديري
أخوك
جبل كميت
حفرلوجيا
10/01/2004, 12:43 AM
اكرر التذكير بأننا ماشفنا الشمس طوال الثلاث أيام ..... وعلى أي حال إليكم الصور :

1- التالي ............. جانب ( جميل ) في ........ ( دغيم )

http://www.mekshat.com/pix/upload/images3/SHS01.JPG

2- التالي .... في يوم الجمعة الساعة الثامنة صباحا .. شارب دلة قهوة بعد كيلو حنيني ... و بعد توقف الديم .. بدأت ( تذرذر ) .... ومن تحت السدر كانت الصورة ... لحظتها تمنيت ممن ابتلي في التدخين أن يعيش مثل هذا الجو لربما كان ذلك أدعى للإقلاع ..

http://www.mekshat.com/pix/upload/images3/SHS02.JPG

3- التالي ... بعد حسنا شمالا حوالي عشرة كيلو متر ... هذا الفطر أسمع من الشيبان ( انه فسق أرض .. إذا رويت )

http://www.mekshat.com/pix/upload/images3/SHS04.JPG

4- والصورة القادمة ...... تجميع للفطر ...... أو ( الفسق ) ......... هل هذه المعلومة صحيحة ؟ ... لاأدري

http://www.mekshat.com/pix/upload/images3/SHS06.JPG

5- التالي ..... الفسقة الحقيقية .... والجانب ( القبيح ) لبعض الكشاته في دغيم ....

http://www.mekshat.com/pix/upload/images3/SHS10.JPG


-------------------------------- يتبع
حفرلوجيا
10/01/2004, 01:04 AM
اخوي أيمن .. شكرا الله يسلمك
أخوي جبل كميت .. شكرا الله يعافيك
--------------------
6- بربك الحاج .... وغيرها رديفتها ... وحسنا ( طين وعشب على اوله ) .. ودغيم ... جميعها مسيجه

http://www.mekshat.com/pix/upload/images3/SHS11.JPG


7- التالي .....جغبقا .... بدت من بعيد كالبحر

http://www.mekshat.com/pix/upload/images3/SHS09.JPG


8- في جو ابا القبور مقبرة صغيرة قيل انهم قديما .. توفوا من جراء معركة وقيل بسبب مرض ... وعلى أي حال ربما كانوا بحاجة للترحم عليهم والدعاء لهم بالمغفرة

http://www.mekshat.com/pix/upload/images3/SHS12.JPG


9- لم أجد الا قليل من الكشاته ... وشاهدت ( خليجيين ) واستغربت من تحفظهم عندما أوقفتهم وسلمت عليهم .. وعندما سألتهم عن الأرض والأمطار كانوا متحفظين جدا .... هل لضياع دورة الخليج عليهم تأثير .. عموما .. نقول لهم دايما ... عشاكم بـ( مكشات ) .. تفضلوا

http://www.mekshat.com/pix/upload/images3/SHS13.JPG
السمح
10/01/2004, 01:10 AM
الحمدلله على السلامة حفرلوجيا
تبي الصدق خل عنك بس اللي ما يكشت للصمان ما كشت !!!
تحس بطعم البر وسعة الصدر والوناسة ولا تشعر أبداً بالملل !!
هذا الموضوع حقيقة درس مجاني لكيفية وصف الرحلة وكيف يجب أن يكون .
بارك الله فيك وأشهد إنك ما قصرت وشوقتنا للكشتة هناك ، وأشعر إني بدأت أخطط للروحه هناك من هالحين .

يالأجواد مانعدم الخير في الجميع .. هذي مناطق نزهة انا اليوم فيها وتركتها لك للاسبوع الجاي ( ماكأني طبيتها ) نظيفة.. لأن الجميع يستاهلون اني أنظفها لهم فما بالك إذا كانت المخلفات ( من عندي )

أحلى تحية
صقر
10/01/2004, 01:26 AM
ما شاء الله عليك حفرلوجيا مبدع حتى في التصوير

وخاصة صورة الربيع وجذع السدرة باين في الاعلى ...;)

وعلى فكرة الصورة الاخيرة وفيها الكاتم .... شكل اللي رجعوا يوم الاربعاء نسيوا كرسي النار معهم.. لكن طيور البر ما ينخاف عليهم....

وعساك استفدت من آرائهم (http://www.mekshat.com/vb/showthread.php?s=&threadid=14549)


مشكور على الصور الرائعة وبارك الله فيك :good:
حفرلوجيا
10/01/2004, 01:29 AM
أخوي السمح شكرا ..صدقت ... ماكشت .... والبركة بالمكشاتيين اللي علمونا ياريس..
أخوي صقر : شكرا .. ياحبي لك أنت وغمزاتك ... شفت وشلون !! عساي بس طبقت التعليملت صح.

10- الجانب النظيف .... ( في دغيم ) هذا :


http://www.mekshat.com/pix/upload/images3/ASSH13.JPG


11- يبي يكون بعد فترة التالي ......( في الحاصبيات ) ... أحسن :

http://www.mekshat.com/pix/upload/images3/SHS07.JPG


12 - وكأني بالفياض والخباري والرياض تنطق ... وتقول بالعلامة التالية ( ممنوع ) على العابثين ... بس المكشاتيين ....

http://www.mekshat.com/pix/upload/images3/SHAS11.JPG

وسلامة الجميع
شبوب
10/01/2004, 02:12 AM
السلام عليكم 00

ابو سليمان 00

اقووووول كل هالززززين وتقوووووول

ما عرف اصووووور 00 ؟


على فكره وين المركاب 0000؟
المري
10/01/2004, 05:02 AM
تسلم اخوي حفرلوجيا وماقصرت


على ذا الصور الرائعه........



وفي انتظار رحلة اخرى ان شاء الله .........
راعي عنيزة
10/01/2004, 05:33 AM
يا حليلك يا حفرلوجيا تذكرتني بالدوافير المصاريه ايام الدراسه
قبل الامتحان تلقا الواحد يصايح ويقول يالهوتي ما زاكرتش كويس حسئط :D
وبعد الامتحان يطلع وهو يصيح يقول يا خراشي ما حليتش كويس يا مصيبه سودا ضاع مستقبلي
واذا طلعت النتايج ولاه الاول على الفصل والاول على المدرسه والاول على المنطقه والاول على القمهورية بعد :D

وهذا انت يوم انك تقول ماعرف اصور واتلاتها يطلع تصويرك احترافي ;)


يعطيك العافيه يا خلفهم تقرير ممتاز وصور اكثر منتزه :good:
((( الحر)))
10/01/2004, 07:20 AM
راااااااااااااااااااااااااائع...!!!

من اليوم وانا قاعد افكر وش ارد عليك يابو سليمان وانا ماشي مع الردود ويجيب الله اخوي راعي عنيزه ويقراء الي بخاطري كله...!!!

كاتب الرد الاساسي راعي عنيزه...!!!
يا حليلك يا حفرلوجيا تذكرتني بالدوافير المصاريه ايام الدراسه
قبل الامتحان تلقا الواحد يصايح ويقول يالهوتي ما زاكرتش كويس حسئط
وبعد الامتحان يطلع وهو يصيح يقول يا خراشي ما حليتش كويس يا مصيبه سودا ضاع مستقبلي
واذا طلعت النتايج ولاه الاول على الفصل والاول على المدرسه والاول على المنطقه والاول على القمهورية بعد

وهذا انت يوم انك تقول ماعرف اصور واتلاتها يطلع تصويرك احترافي
تحياتي اخوي ابو سليمان والمبدع دااااااائماً...!!!
رعد الجنوب
10/01/2004, 07:51 AM
Originally posted by راعي عنيزة
يا حليلك يا حفرلوجيا تذكرتني بالدوافير المصاريه ايام الدراسه
قبل الامتحان تلقا الواحد يصايح ويقول يالهوتي ما زاكرتش كويس حسئط :D
وبعد الامتحان يطلع وهو يصيح يقول يا خراشي ما حليتش كويس يا مصيبه سودا ضاع مستقبلي
واذا طلعت النتايج ولاه الاول على الفصل والاول على المدرسه والاول على المنطقه والاول على القمهورية بعد :D

وهذا انت يوم انك تقول ماعرف اصور واتلاتها يطلع تصويرك احترافي ;)


يعطيك العافيه يا خلفهم تقرير ممتاز وصور اكثر منتزه :good:

وصف رائع من الرائع ابو سليمان وصور جميلة شوقتنا للصمان وذكريات الصمان الله يعطيك العافية
وراعي عنيزه ياخلفهم ماقصر بموضوع الصور رائع ياراعي عنيزه:D :D :D
راعي الطويلة
10/01/2004, 07:56 AM
الغالي

حفرلوجيا


أنا مصدقك أنك من سنتين ما طبيت الصمان .....

ودي أسال وين ضيعت هالسنتين ؟؟؟


تسلم والله يالأجودي على السرد الممتع وعلى الصور اللي مابعدها .. ياليت مسكت اللي مزبلين وبعدها عرفت شغلك معهم .........:D

الله يقويك ولا يحرمنا من كشتاتك .....

أخوك

راعي الطويلة
الطبيب
10/01/2004, 07:58 AM
واقول تراكم ذبحتوني انت ونفل

حسبي الله ونعم الوكيل



يا ويحيييييييييييييييييييه

حسبي الله عليك

يوم شفت الصور

غديت مثل البعير اللي حملوه فوق قدرته

وصار يبي يقوم وما يقدر

الله اكبر على الدوااااااااام الاقشر

والله اكبر على الموتر اللي ماهو دفرنشين

اويلييييييييييييييييييييييييييييييييييه

واويحيييييييييييييييييييييييه

حفرلوجيا

ودي اقول لك مشكور على الصور

لكن

ابي اقوللك تسلم يمينك

والله عدي معكم بها الطلعه

اخوك

الطبيب
كحيـــــــلان
10/01/2004, 08:11 AM
أخوي حفرلوجيا صراحة صور روعة وماقصرت.
بأنتظار رحلتك القادمة انشاء الله،

تحياتي،،،،،
al-nashmi
10/01/2004, 08:40 AM
Originally posted by راعي الطويلة
الغالي

حفرلوجيا


أنا مصدقك أنك من سنتين ما طبيت الصمان .....

ودي أسال وين ضيعت هالسنتين ؟؟؟


تسلم والله يالأجودي على السرد الممتع وعلى الصور اللي مابعدها .. ياليت مسكت اللي مزبلين وبعدها عرفت شغلك معهم .........:D

الله يقويك ولا يحرمنا من كشتاتك .....

أخوك

راعي الطويلة
عروان
10/01/2004, 08:58 AM
ما شاء الله عليك

عزالله كشتو

صراحة كانت فرصة جو روعة


الحمد لله على السلامة


بس أبي أسئلك ما مريتو على أم قرين.؟


تحياتي لك
سنعوس نجد
10/01/2004, 09:05 AM
الحمدلله على السلامة

غانم انشالله بعد هالمشوار

ويعطيك 1000عافية على هالصور اللي توسع الصدر وتهيض النفس والخاطر

بدون مجاملة اهنيك على التصوير وخصوصاً صورة x السكتين المتقاطعات اللي بوسط الفيضة
وانشهد على قولك ممنوع للعابثين

تسلم لنا

اخوك سنعوس نجد
نفل
10/01/2004, 09:14 AM
السلام عليكم ورحمة الله وبركاته

اخوي حفرلوجيا

دائما انت مبدع حتى في تصويرك وانا احسدك على طريقة شرحك للصور ماشاءالله عنك سعة بال
غير طبيعية للشرح.. وودي اسال عن المناطق حول دغيم جاها مطر الجمعة ؟ لان شكل السحاب عام
ومشكور مرة ثانية وما قصرت وجزاك الله الف الف خير .

اخوك ابو محمد
نقا هشال
10/01/2004, 09:33 AM
هلا وغلا
اخوي
حفرلوجيا
يعطيك الف عافيه
صور ومعلومات رائعه بالفعل
لاهنت يابعدي
وعلى هاالصور اللي توسع الصدر

يااخوك اكشت دايم وزودنا من هاالابداعات

تقبل فائق تحيتي,,,
معمرها
10/01/2004, 09:46 AM
......)(بسم الله الرحمن الرحيم)(........



.............)(السلام عليكم ورحمة الله وبركاته )(.............


ــــــــ:: يعطيك ألف عافيه اخــي



(((( حفرلوجيا ))))


على هالصور


شـــكـــراُ
راعي الملحا
10/01/2004, 10:03 AM
السلام عليكم ورحمة الله وبركاته صلى الله عليه وسلم الحمدلله والصلاة والسلام على رسول الله وعلى آله وصحبه أجمعين

أنا عضو جديد أرجو أن تقبلوني
الموقع ممتاز
الصور روعه .. لاتبخلون بالصور ياجماعة اللي مايقدر يروح علي الأقل يتفرج
شكر علي هالصور .. والشكر موصول لكل من يساهم بالموقع ويرسل صور البران والربيع
عسي هالسنة سنة خير وربيع وفقع ...
حفرلوجيا شكر ا علي الصور والله يعطيك 10000 عافية
:p :p
القانوص
10/01/2004, 11:45 AM
السلام عليكم ورحمة الله وبركاته
عساك على القوة يا حفرلوجيا وصفك وتصويرك رائع جدا
والمثل يقول ( من طول الغيبات جاب الغنايم )
اخوك القانوص
تالي الاولين*
10/01/2004, 12:00 PM
.



يامال السلامة ياحفرلوجيا

موضوع متكامل بالصور الى مايحتاج اني

اقول عنها شي عقب كلام الشباب

بيض الله وجهك

ويعطيك العافية



.
عبدالعزيز الدباسي
10/01/2004, 12:14 PM
الله لنا يا ابو سليمان،،،، حنا ( ينلعب ) علينا ويقولون ترا الاربعاء والخميس عجاج - يعني لا تروحون

وناس ثانين تجيهم اخبار ان الدعوى امطار ورذاد وضباب ، ولا تجلسون . الله اكبر الواسطة حتى في الكشتات.


لكن خل عنك صرت مصوراتي وحنا ما ندري عنك ،،،،،،،، وما شاء الله عليك على هالكرم الحاتمي انتم اثنين وكاتم ( سب ) حق نص تيس ،
عريدان
10/01/2004, 12:28 PM
السلام عليكم ورحمة الله وبركاته
أحب أن أشيد بالصور وأشكر أخونا الفاضل وهو من صور لنا تلك اللقطات ، ووهي التي نعد عددنا ونتهيأ لنستمتع بعطاء الرحمن الرحيم بالربيع اللذي نتهادى بوادره.
" فسبحان المصور الحق ،أحسن و أجمل الصور والتصوير فله الحمد من قبل ومن بعد".
ولا يقوتني أن أذكركم ببركة الدعاء حين نزول المطر وحين السفر.
بركان
10/01/2004, 12:47 PM
تسلم والله يالأجودي على السرد الممتع وعلى الصور اللي مابعدها .. ياليت مسكت اللي مزبلين وبعدها عرفت شغلك معهم .........

الله يقويك ولا يحرمنا من كشتاتك .....

أخوك
بركان
ابو سلطان العتيبي
10/01/2004, 12:56 PM
لله درك.....

الصراحه ابدعتنا ياخي "ابو سليمان" اهنيك على هذا العمل المتقن،

صور اكثر من رائعة وسرد قصصي جميل

سجل اعجابي وتقبل تحياتي

لا عدمناك

اخوك/ عقاب
سمنان
10/01/2004, 02:02 PM
والله ياخوي يا حفرلوجيا .. ما ادري وش اقول لك

لكن .. جهد ..وتعب .. ووقت .. ثم ابداع .. ثم امتاع .. ثم بصراحة تحطيم للي يفكر ينزل موضوع ما ياصل ربع مثل هالموضوع او المواضيع اللي تشابهه

حفرلوجيا فعلاً مميز

وتقبل تحياتي
المواكب
10/01/2004, 02:10 PM
اخوي (( حفرلوجيا ))
السلام عليكم ورحمة الله وبركاته : ارجو منك ان تزودنا بحداثيات الفيضة الأولى من الصورالتصوير تشكر عليه . وذكرت فيضة بعد حسنا بعشرة كيلو متر ارجو احداثيتها وجزاك الله خير على المعلومات الطيبة واصراحة الصور فوق الخيال .. اخوك المواكب .....
ابو عايد
10/01/2004, 02:15 PM
تسلم اخوي حفرلوجيا والله انها علوم توسع الصدر

مشكور الله لايحرمنا منك ومن إبداعك

وتقبل تحياتي // العاشق الولهان
كشاف
10/01/2004, 02:25 PM
الله يسلمك والله على ها الوصف الرائع المصور والله يعطيك العافيه على تنبيهك على اهمية النظافه . والله انا قبل ثلاث اسبيع في الصمان نلف في دغيم ندور مكان نظييف . فأنا اقترح على الأخوة الفضلا في المنتدى لنهم يوحدون شعار واحد او توقيع واحد لجميع اعضاء مكشات يذكر بالحفاظ على نظافة المكان وبعدين كل ما يلزمك اخذ اكياس نفايات ووضع مخلفاتك فيها . ومشكور يا اخوي حفرلوجيا .
مع تحيات اخوك كشاف
ابو عمر اللاحم
10/01/2004, 05:01 PM
الله يعطيك العافيه يا ابو سليمان صور روعه وحترافيه .

اما صورة التقاطع عجيبه كأنه مرسومه رسم . واعتبرها صيد كامرا ثمين .

تقبل تحيات اخوك نهار ،،،،
بليزر
10/01/2004, 06:21 PM
السلام عليكم ورحمة الله وبركاته
تسلم على هالصور
والمشكلة ان ام العيال شافت الصور وقالت والله انشاء الله ما تروحلها لوحدك إلا تاخذني معك واحاول اقنعها
ان المكان بعيد ولا يصلح للحريم ترد علي وتقول بكيفك
وش السواة يا حفرلوجيا في المشكلة إلي انت سببها
المرصاع
10/01/2004, 07:03 PM
تسلم يابو سليمان على الرحلة المصورة:::

والله صور حلوة وشرح أحلى:::

أبشرك خلصنا من الإختبارات(( عطلنا )):::

تقبل تحياتي:::
المسفهل
10/01/2004, 07:35 PM
وش هالزين ياأبو سليمان ..

مثل ما قال أخوي صقر اللي رجعوا معهم الكرسي والظاهر إن معهم الغاز والسكين أشوف

قشور البصل عليهن الكبر إشوي :p
كشات
11/01/2004, 12:11 AM
بسم الله الرحمن الرحيم
السلام عليكم ورحمة الله وبركاته

وش اقول غير الله يهنيك
ويسعدك
ويوسع صديرك بطاعة الله و بالعافيه

يانا كنت مولم(ن) لك رد يحبه قلبك
بس اخخخخخخخ
صخّنا الماء وطار الديتس

يوم زهبت كل شي وقلت (اعتمد الرد) مير يتعومس المنتدى بكبره

مدري وش انت مسوي يا حفرلوجيا

بس هين
ابتقاضا منك ولو بعد حين;)

اجل انا ينقال عن [} ماشفت إلا شيبان هقوتي مثل أخونا ( كشات ) {]
هين ياحفرلوجيا
ان بغيت (مرتن)ثانيه[ كود ام العيال تشوفه] تكشت علمن وانا اجيك لين نهاية المزفلت(قديما)
ودك نعد اينا اكثر شيب؟:confused:

تسلم اناملك يابو سليمان انمله انمله
وماقصرت
وبالنسبه لكلامي لاتزعل منه
تراه كله مزح من اخوك الصغير :cool: (تثات):p

http://maz1.jeeran.com//fyd4.jpg
الماجدي
11/01/2004, 02:57 AM
مشكور وماقصرت ياحفرلوجيا على الصور الي تفتح النفس000

اخوك الماجدي000
aldrawy
11/01/2004, 03:57 AM
السلام عليكم ورحمة الله وبركاته والصلاة على رسول الله وآله وصحبه
بارك الله فيك يا حفر الوجيا على هذا المجهود الكبير في الوصف والتصوير كما اشد على يدك ويد المشرفين على النتدى ويد العضاء والمشاركين بالله الله على النضافه النضافه النضافه ثم عدم السير بالسيارات داخل الفياض والريضان المربعه وركها للأستمتاع واكرر شكري للجميع



اخوكم - الدرعاوي
عاشق الصفاري
11/01/2004, 11:51 AM
مشكور ياحفرلوجيا .. عز الله انك كفيت ووفيت على الشرح والصور الرائعة .. ما تقصر يالغالي .. وننتضر الجاي
aflaj12
11/01/2004, 08:40 PM
السلام عليكم ورحمة الله وبركاته
شكراً لك اخي الكريم على هذا المقال
حفرلوجيا
12/01/2004, 12:10 AM
الأخوان : شبوب , المري , كحيـــــــلان , al-nashmi , سنعوس نجد , نقا هشال , معمرها , القانوص , تالي الاولين , عريدان , بركان , oqab , سمنان ، ابو عايد ، نهار , الماجدي , عاشق الصفاري , aflaj12 :

أشكركم جميعا .. وأقدر لكم ماأبديتموه في ردودكم تجاه أخوكم .. وحسيت بصدق مشاعركم الله يحفظكم..

أخوي راعي عنيزه : شكرا .. أقول عين خير .. انت نزلت بهالفايت صور ( تهوس ) عن الصمان.. وشكلك توهقت يا( الشجاع ) وخايف من الشهبان ينحتونك وماصدقت أحد يجيب ( صور ) .. تبي تصرف النظر عليه .. أنا قاري وردي أولا .. ثانيا إذا فيه أشهب ماهو ناسيك لأن مثلك عارف مايطوفهم شيء ولاتفوت عليهم .. و على شان كذا أنا متطمن ..:p:p

الأخوان :الحر , رعد الجنوب : شكرا .. وترى أنا مثلكم معجب بطريقة ( رد ) المبدع راعي عنيزة .. ومثلكم يعرف ان ( الإبداع ) يجي نتيجة ( المعاناة ) من الشهبان :D .. لكني أشك ان مكشات يدخله شهبان ( الأشهب : كلمة عند بعض مناطق نجد يقصد بها النحوت أو النظول .. اللي يطلق صواريخ من العينين ):mad:

اخوي راعي الطويلة : شكرا .. أما السنتين حكمتها ظروف الوظيفه .. الله لايجعل وظايفنا ترمينا على غير مانشتهي .. لكن هذا النصيب واللي مايعجبه يشوف تقاعد مبكر ;) ويريح ويرتاح .

اخوي الطبيب : شكرا .. وإذا تورطت بحمولك أنت طبيب تعالج نفسك .. والباقي يتيسر لك ان شاء الله.

أخوي عروان : شكرا .. أما سؤالك عن أم قرين ماعندي جواب لأني مامريت عليها لا روحة ولا جيه .. وأظن أحد المكشاتيين ذكر علوم عنها لكن للاسف لاأتذكر بأي موضوع .

أخوي نفل : شكرا .. وعن ( دغيم ) كنت فيها يوم الخميس( مطينة ) .. أما الجمعة بطريق العوده كنت في درب النحل ( ليل ) وشاهدنا أثر سيول وغدران قبل وصولنا للأسفلت بـ( ثلاثين كيلو ) حتى وصولنا وواضح أنها من الجمعة .. ولك أن تستنتج .

أخوي راعي الملحا : شكرا .. وهلا بك ياراعي الملحا .. وستجد في هذا المنتدى من أخوانك مايسرك .. قلب بالأرشيف وتابع وسترى .. ولا تحرمنا مشاركتك .
حفرلوجيا
12/01/2004, 12:31 AM
أخوي شقردي : شكرا ياريس .. إيه واسطات لي وللأعضاء كلهم .. أنت الله لايهينك عندك خيام تكشت بها أقعد طور بها وحسن وحلق .. وحنا نكشت بالنيابة عنك للي تبي .. وبعدين لاتوهق بالقدر زاوية التصوير هي اللي مكبرته .. ولا عندي غيره .. ;)) لايغريك كبره وتطمع تكشت معنا... القدر ذا لـ( أعضاء مكشات وبس ):p

أخوي المواكب : شكرا .. الصورة الأولى كانت في فيضة أو( بربك ) دغيم تجد إحداثيها في أحداثيات المنتدى ( فوق ) .. أما طلبك الأخر .. فلعلك تلاحظ أن الرأي العام في هذا المنتدى يميل إلى عدم نشر الأحداثيات بهذا الشكل (رغم عدم إقتناعي بذلك ) .. وقد يكون لهم العذر فلعلك تعرف أو سمعت ماحدث العام الماضي من بعض العابثين حوالي لينة بعد صور أخونا ( فرد حمزه ).. وعلى شان الرأي عام علينا إحترامه .. وعلى أي حال ساقلب الجهاز وسأوافيك قريبا برسالة خاصة.. تأمر وأنا أخوك.

الأخوان كشاف , و aldrawy : اشكركما .. وماتفضلتما به جميل جدا .. ولعل المشرف ( شقردي ) كان ينبه لأن نستشعر دورنا فيما أشرتما إليه .. وذلك في الموضوع الذي طرحه قبل أيام بهذا الخصوص .

أخوي بليزر : شكرا .. إذا كنت تورطت مع أم العيال في انها تبي تروح معك للصمان .. فاقولك خذها لطراف الفياض اللي حول الديرة .. أما إذا هي ماينلعب عليها وتبي الصمان وأنت ماودك .. عليك بالتالي :

شف لك صورة ذيب مكشر .. وإذا جيت بعد صلاة المغرب وهي تبي تقهويك .. سو نفسك تغبي عنها الصورة .. طبعا ماراح تخليك تبي تسألك قلها ياأم فلان ماودي لكن شوفي هذا ذيب يقولون يأكل الأوادم بالصمان ... بعدها مجرد ماتطري الصمان تبي تنتفض ولا تفكر بكشتات أي بر .. بس أنت تبي تتورط إذا عرفت هي إنك رايح للصمان تبي تخاف عليك وتقضب حلقك ( وتنخاك ) ماتروح .. قلها بهالحالة ترى الذيب صادوه وذبحوه .. تبي تطمن عليك ويستمر خوفها من الصمان وأنت تبي ترتاح بعد خوفها ... شفت اني حليت لك مشكلتك اللي تقول أني مسببها لك .:D

أخوي المرصاع : شكرا .. وزين اللي خلصت من إختباراتك عقبال ماتظهر نتايجك على اللي تبي إن شاء الله .

اخوي كشات : شكرا .. ودي أصدق إنك مانت شايب بس عقب كلمة ( يتعومس ) اللي قلتها بردك .. زال الشك وأيقنت انك شايب وأصلع ... وإذا ودك نعد الشيب بنهاية الزفلت ماعندي مانع .. بس لاتتوهق ترى كشتتنا تصير نعد الشيب كل اليومين ... وإذا انت عجل خذها بالعكس عد السود بشعر راسك ماتاخذ العملية معك دقايق .. :p .. وبعدين لاتفكر اني ابزعل منك ... أنت من شيباننا ونبي نقدرك ونحترمك بكل الأحوال .
حفرلوجيا
12/01/2004, 12:48 AM
أخوي المسفهل : شكرا ..
ويبدو لي أنك انت وصقر من كثر ماتمحصون وتدققون بالأماكن اللي تسوون عنها تحقيقاتكم الرائعة أغراكم وصرتوا ( نقادة ) ... :p لكن خذ من المواقف بهالرحلة .
مانسيت المركاب لأن هذا طريقتي المفضلة بالطبخ اللي تخليك تتحكم بـ( اللهب ) لايخرب ( زوده ) الطبخة .. ثم انك تجهز الحطب اللي فوق لأن تنتقل النار بمكان ثاني.. لأن فيه بعض العلل ( يدعون ) ان النار اللي كان عليها طبخ لحم .. يخرب ( ذوق القهوة والشاهي ) اللي يسوى عليها .. وبهالطريقة تزندهم نار جديدة وتسلم من ( النقادة ).
اما النسيان اللي كاد ان ( يوهقنا ) هو نسيان الخيمة ( اللي يسمونها الحمار) بالسيارة اللي رجعت .. ولكن ربك يسر لأني أشيل معي ضمن العدة حوالي أربع خيام ( خواجات ).. اغنتنا عن نسيان الحمار;):mad: .. وخيام الخواجات اللي اقولكم عليها تسفط بحجم ( الطار ) المتوسط .. وأحرص على ان يكون معي ( ثلاث أو أربع ) للأغراض التالية:
1- ( أرفد ) للأشياء الحادة بالعفش حتى لاتحك بالسيارة .
2- افلها وتكون في الجهة المعاكسة للهواء وتكون ( ذرا ) أحسن من الرواق.
3- أنام فيها بعد ماأفلها داخل الخيمة لأنها تعطيك ( دبل دفى ) لو كنت بالمربعانية أو الشبط.
4- أفلها فوق الحزم وأجلس أتفرج على المطامن إذا جاء سيل ( متعة عندي مابعدها متعة ).
5- افلها لأضع فيها الأطعمة ( في العقارب ) مثلك عارف ذاك الوقت.. الحشرات وخاصة ( أبو جعل ) مابيها تقرب طعامي ..
ولكن في هذه المرة جربتها خيمة ( نفر واحد ) وماهي بطالة لولا ( الخرفشة مع نزول المطر ) ... ومتوفرة بالمحلات أظنها بحوالي 100 ريال ..أو أقل أو أكثر.
وهذي صورتها ( التقطت يوم الجمعه الماضي في واحدة من أشهر خباري الحاصبيات وهي ( أم قرو )...
لاحظ كيسها ( بعد تسفيطها الذي لايستغرق ثواني مثل فلها .. تصبح بحجم الطالر المتوسط )

http://www.mekshat.com/pix/upload/images3/HST105.JPG

وسلمة الجميع.
عاشقة البر
12/01/2004, 11:16 AM
سلااااااااااااااااااااام

مشكووووووووووور

من جد صور تفتح النفس

:)
سيف السيف1
12/01/2004, 01:20 PM
أجل نسيت الحمار , شكلك كاشت كاشت الله لايعوق..
رحلة موفقة ياحفر لوجيا بإنتظار الرحلة القادمة ياحفراض..
ابو دانة
12/01/2004, 01:47 PM
اخي حفر لوجيا السلام عليكم ورحمة الله وبركاته وبعد

ارغب في معرفة الاحداثيات الخاصة بالمواقع التي قمت مشكوراً بعرضها لنا في هذا المنتدى الرائع والجميل واسئل الله ان ينفع به المسلمين عامة واخواني اصحاب الكشتات، لو سمحت ارجو وضعها في الموقع

والسلام

ابو دانة :good:
القماري
12/01/2004, 02:04 PM
مدري ليش دائما أكون متأخر عن رؤية الدرر في مكشات
أحدها ماسطرته أصابعك على الكيبورد وما إلتقطته كامرتك ،
أبو سليمان الظاهر أنك محترف وجالس مع مبتدئين (مواضيع وصور ) ترى والله مهي بنقيصة في إبداعات الشباب ومواضيعهم بس كلها كوم وصورة الغصن المنسدح على الخضرة كوم ثاني.
مشكور يالغالي وللمزيد
حفرلوجيا
12/01/2004, 02:29 PM
الأخوان : عاشقة البر , ابو فارس , القماري : شكرا .. وترفق علينا ياأبو أحمد .. وأما أنت ياأبو فارس .. الظاهر يبي يجي يوم ونتعاقد الشوش .. ياأنت بلشة أنت وهالأسامي اللي تخترعها لي .. وترى خبرك ذيك السوالف اللي بيننا برمضان كان كل شي مربط :mad:

اخوي ابو دانة : هلا بك .. ويشرف هالموضوع وراعية ان أول طبتك بمنتدى مكشات تكون فيه .. وماألومك ( جديد ) الله يجدد أيامك بالعافية ويخلي لك الدانة.. أما الإحداثيات ( ارفع راسك بأعلى الصفحة تجد ( احداثيات ) ..وهي عبارة عن دانة :D تحوي الكثير من الإحداثيات للعديد من المواقع طب فيها وتخير .. أما أشهر المواقع اللي عرضتها فهي ( دغيم , حسناء , جغبقاء , أم قرو ) .. والصورة الأولى كانت بدغيم .. ومثل ماقلت لك تجدها في إحداثيات هذا المنتدى.
الفتى النجدي
13/01/2004, 01:24 AM
السلام عليكم ورحمة الله

أخوي حفرلوجيا ماشاء الله عليك روعه مابعدها روعه

عندي سؤالين ولا عليك أمر

1- طريقكم كان سهل يعني بإختصار الهايلكس ياصله بدون مصاعب ؟

2- الخيمه حقة الخواجات من وين شاريها بالضبط حدد المحل ؟

وجزاك الله خير وعقبال كشتات أروع من هذي إن شاء الله
حفرلوجيا
13/01/2004, 02:07 PM
أخوي الفتى النجدي : شكرا .. تقول هاي لكس .. في الصمان عز الطلب .. بمعنى ان أكثر مناطق الصمان ليست صعبة أو وعرة .. وبالتحديد التي ذكرتها .. ولكن في مثل أجواء المطر والسيول التي تؤدي إلى تحول ( الآراضي الطينية ) فيه إلى ( ورطة ) ان لم تكن حذرا .. قد ( تهلش ) سيارتك .. لذلك عن نفسي لاأفضل اروح هناك إلا بسيارة ( جيب )
أما الخيمة فموجودة في محلات بيع مستلزمات الرحلات في الرياض .. وقد تكون في أماكن أخرى .. لاأدري .. وإشتريتها من أحد المحلات المشهورة في شارع الغرابي ( آخر الشارع : المنطقة الخاصة بالخيام )
هواوي
13/01/2004, 02:37 PM
والله اتعب وانا اقول انك مبدع يا حفرولوجيا

من جد رااااااااااااااااااااااااااااائع

اتمنا القاك مغرز واسحبك :D عشان تشرف بالتعرف عليك:D

عموما والله صور اكثر من رائعه
الامبراطور
13/01/2004, 05:23 PM
لوجيا

ما شاء الله انا في تصوري انك امهر الامهرين في الصور حلو امهر خخخ


بعدين انت كاتب وناقد في نفس الوقت (لا ينتفخ راسك) وماشاء الله عليك عزالله انك
بيضت الوجه يالصور هذي وضيقت الصدر
والله اني كل ما شفت صورك وانا في المكتب جلست قدام الدريشه اطالع السما
ما شافني بيقول هذا مسوس


وانا والله اشكر هذا المنتدى وخاصه في معرفت هذي الاقلام الطيبه

وسلامتكم
حفرلوجيا
13/01/2004, 09:05 PM
أخوي الامبراطور : شكرا .. واللي يرافق المكشاتيين امثالك يرفع راسه .. ماينفخه.. لكن ورى ( لوجيا ) بدون ( حفر ) :p

أخوي هواوي : شكرا .. ترى نبي نزعل من ختاتك .. وين تهفي ؟! .. لاتكون تطعس .. وقت هالاختبارات :mad:
أما عن شوفتك يشرفني .. وكنك داري بـ( التغريزه .. أو الهلشة بالطين ) .. في يوم الجمعة آخر النهار .. طاح الغشيم السواق خويي ;).. بعد ماإنغلث وإنهبل بشوف الربيع .. ( وهلش بوسط الطين ) .. قدم ..رجع .. دبل .. هزاز .. حط الحطب تحت الكفر .. حصى ... شجر ... ( انسى ) .. وحنا نبي الجيب ينقز من الحفرة والباقي يهون ... قال الجيب ( ذا مكاني وماأعرف إلا أدور بوش ) ... وجربت طريقة كان لها مفعول السحر على الجيب ( المتعنفص ) .. وهي جبت طين ناشف ( جمش ) بكمية كبيرة .. وصرت أشيل من الطين اللي حول الكفرات .. وألبد مما ساعد في إمتصاص الماء .. وصار الطين اللي عند الكفرات ( أقسى ) .. وفعلا نقز الجيب وطلع طلعت روحه ;)... من هذا المستنقع :

http://www.mekshat.com/pix/upload/images3/TS011.jpg
هواوي
13/01/2004, 11:27 PM
المبدع حفرولوجيا

شفت كيف اني باستفيد من تغريزك هذا وانا بالكلام استفدت واستفادوا اهل المنتدى من تغريزتك اجل لو كان الدرس على الطبيعه كان باصير استاذ في مساعده المغرزين

عموما والله مبدع واشكرك على الرد الرائع والصوره الاروع الي من جد توضح حجم المعانا وجمال الفيضه وتبشر بربيع لا مثيل له باذن الله

http://www.mekshat.com/pix/upload/images3/TS011.jpg
حفرلوجيا
15/01/2004, 09:22 AM
أخوي هواوي .. شكرا .. وأظن انك شخص مهتم بالتغريزات وإسعاف المغرزين بجيبك الشاص .. اللي وضحته لنا أثتاء جريان الشعبان الفترة اللي راحت .. وأقرأ قبل قليل لاخونا الخبير موضوعا حول فزعته وإنقاذه لصاحب له كان متورط بالتغريز حول أم سدره ..
عاد انت أو غيرك من خبراء التغريز والفزعات .. شوفوا لنا موضوع يعطينا ( آخر المستجدات :p ) في عالم ( نتع ) السيارات من التغريزات والهلشات ... وبعدين وين صاحبك اللي خليته يسجل بالمنتدى ..خبير التطعيس ( راعي الجي اكس آر ) ماعاد شفناه ولاشفنا له مواضيع؟
صقر
15/01/2004, 12:39 PM
حفرلوجيا : عندي سؤال:

منين جبتوا الطين اليابس والدنيا كلها ديم ومطر.... سؤال جال في خاطري كثيرا.

الثانية .... بالنسبة للتغريزات اللي مثل هذي انا ارفع الكفر المغرز واحط تحته حصى (فروش) واحاول ابني له طريق حتى يمسك الموتر الارض (العزاز).
شايب الصمان
15/01/2004, 01:48 PM
السلام عليكم ورحمة الله وبركاته


اخوي ليس هناك كلمات لشكرك لان الصور اعبر من اي كلمه (الصراحه انك ماقصرت)....
حفرلوجيا
15/01/2004, 08:20 PM
ولا تحلى مواضيع الصمان إلا بشايبه .. شكرا أخونا شايب الصمان..

أخوي صقر : ياحبي لكل القرويين اللي منك وحولك ;) .. .. اللي ماتفوتهم لاالواردة ولا الشاردة ..
صحيح وسط الخباري والفياض مع المطر يكون ( غبصة ) لكن كل ماتطرفت حصلت على طين ( أنشف ) .. يعني ماهو ( كود ) يصير مثل الريغة
ولاهو لازم تأخذ من علو الأرض .. ممكن تحفر ويطلع لك أنشف وبلون ثاني ( راجع الصورة وتشوف ) ..
الخلاصة : اذا ابعدت عن وسط الفيضة تلقى لو ماهو ناشف مرة .. والبركة بالمسحاة ( اجعله توسط بجبهة عدوك ) :mad: ياأبو أحمد
المترو
15/01/2004, 08:21 PM
ابو سليمان شكر لك
من يوم الاربعاء 23 /11 الى يوم الجمعه 30// 11 وانا سوف اكون هناك بالمناطق التى ذكرت اسبوع ويالله تروح الحره حقت الربطه عشرة ايام لكن اقول الله يوفقك
والعلامه الخيمه اللي يبي يسير علينا حياه الله وترى بالنهار نواع التمشي بالفياض

هذه الكتابه وانا جالس ازهب العده ومن غير نفس جالس على الجهاز

وسلامتكم الرحــــــــــــــــال 2003