مشـكلتي مع الجميـح

[دحيم_99]

بسم الله الرحمن الرحيم
اخوواني انا ابي احكي لكم معاناتي مع الجميح
يا جماعه الخير انا شريت جمس يووكن 2008 فل كامل من الجميح استلمته يوم الاثنين الموافق 1429/8/9هـ بعدها بيووم يعني يوم الثلاثاء اتمشى عليه في الدئري
ويوم مشيت عليه 120 الدركسوون قام يرج المووتر كل مازادت السرعه زادت الرجه وديته لفرع الصيانه يوم الاربعاء اللي على خريص دخلت على موضوف الاستعلامات علشان اشووف وش طريقتهم
قالي لازم تاخذ موعد واقرب موعد 1رمضان يعني بعد عشرين يووم مسكت راسي قلت المووتر جديد قالي رح للمدير دخلت على المدير قلتله الموضوع قالي والله احنا علينا زحمه
قلت الموتر جديد سلني كم ماشي الموتر قلت 280كم قالي اذا مشت2000كيلو جبها وانا وياه اخذ وعطاء قالي طيب انا ابدخله لك اليووم وبنفحصه بس بكره راح نعطيك تقرير بس قلت يعني متا تصلحوونه قالي على حسب الخلل ويبيله مده
المشكله ياجماعه الخير انا ابي اسفر على الموتر يوم الخميس المهم قلت مافي حل قال لا رحت للمدير العام وهو جنسيته امريكي وصاني واحد من الشباب عليه ويوم رحت مالقيته
قال السكرتير ماهو موجود الكلام هاذا الساعه وحده الظهر قالي عندك مدير شؤون الموضفين في دخلت عليه قالي وقلتله المشكله قالي النظام لازم تتنتضر قلت يابن الحلال الموتر جديد ماكمل ثلاث ايام
قالي مو مشكلتي ها هو نظامنا قلت طيب اذا دخلت الموتر انا مامعي سياره قالي احنا نوصلك قلت طيب وانزل تحت عند المدير قالي انتضر احد الموضوفين لينيجي علشان يفتح لك ملف
طبعن في 7 كونترات مافيها اي موضوف وانتضر ساعه لين ماجاني الموضوف وفتح الملف بعدها دخل السياره وانا رحت علشان يوصلني السواق حق الشركه قالي الموضف السواق دوامه يخلص الساعه 2
علمن ان الساعه 2,30
رحت لمدير شؤون الموضفين قلتله وين التوصيل قالي السواق ينتهي دووامه الساعه3,30 واذا وداك راح يجي متاخر المهم دبرت نفسي ورحت وجيتهم يوم الخميس اللي هو بكره
رحت لتسليم السيارات قالي عندك الكفرات يبيلها تغير استغربت سياره جديده يبيلها كفرات!!! رحت للموضوف قالي يبيلها اسبوع اقل شي علشان تجي قالت له انا المفروض امشي با السياره اليوم قالي هاذا النظام
رحت للمدير قالي هاذا النظام واذا جت راح ندق عليك(الله يرحم النظام اللي يعرفون) رحت يوم الاحد ابي ادخل على المدير العام(الامريكي)قالي الموضوف ماهو موجود تعال بكره
الغريب ان الساعه وحده ودوامهم ينتهي الساعه ثلاث(والله يا الدوام على كيفهم) وانا اللحين ماسفرت وانحرمت من السفره بسبت عيب من المصنع.
قالو ايش قالو ضمان والله قلتحيا مو ضمان
ياجماعه الخير اللي عنده حل للمشكله ياليت مايبخل علي وانا انتضر ردودكم
وهاذا ايميليtornado_3480@hotmail.com
(((((واسف كاني طوولت عليكم )))))

[راعيية]

اللة يكون بعونك بس الوجب يجرولك سيارة حتى تنتهى سيارتك اسل مجرب مع تويوتا

[Magellan]

أخوي المشكلة واضحة وضوح الشمس
كفرات موترك هي كفرات تخزين مؤقتة وفيها عيب فلات سبوت أو flat spot
وهذي يلزم تغييرها ،،
أنا سمعت إن بعضهم راح لوكيل قوديير وغيرها وأخذ ورقة فاتورة وإستلم فلوسه من الجميح
لكن لابد إنك تراجع الجميح أو يعطيك سيارة بديلة حتى يتم تغيير إطاراتها

[بوفايز]

السلام عليكم اخوي

والله اني انقهرت على شانك.

ادخل على المدير وقول له عطني رقم الموزع في الشرق الأوسط حق Gm في دبي واتصل اشتكيهم. واذا ما جابوا لك فايدة ادخل على موقع Gm وارسل لهم ايميل بوضع السيارة وخليهم يرجونهم رج. ترى الوكلاء عندنا يستخدمون خلطة عجيب شوية نصب على عدم ضمير على تسيب على اهمال على سفالة على حقارة. شي عجيب كأنك معطيهم نوا تمر مو فلوس تعبان فيها.

الوكلاء يبي لهم واحد لسانه اطول منه ولا يدخل من الباب الا وهو يصارخ ويرج الدنيا.

لك حق تبديل كفرات من وكيل الكفرات. وكيل السيارة يعطيك تحويل عليهم ويغيرون لك الكفرات في نفس الوقت وهذا اللي صار مع اخوي. سيارته نيسان التيما 2005 بعد ما مشى عليها كم شهر صارت ترج والكفرات حبلت. رجع للوكالة وعطوه تحويل الى وكيل بريدجستون وغيروا له الكفرات على الضمان وفي نفس اليوم.

الله يوفقك وينصرك على الحرامية

كل الود

بوفايز

[عاشق السيل]

حسبي الله عليهم ونعم الوكيل ،،،

وتراك منت أول واحد ولا آخر واحد يطلعون براسه نخل !!!

ولو شاورت كان الجميع قالك اشتر من العيسى لأنه أفضل بالصيانة واستقبال الزبون أما الجميح نصابين باحتراف وللأسف إنهم يركبون أحيانا قطع تجارية !!!!!!!! وأكثر اللي يسبونهم المهندسين اللي كانوا يشتغلون بالصيانة عندهم لأنهم عارفين فضايحهم ،،،،

عموما قدر الله وماشاء فعل ( وعسى أن تكرهوا شيئا وهو خير لكم ) ألف مبروك السيارة الجديدة والله يطعمك من خيرها ويكفيك شرها والحمد لله إنها جت على الكفرات وهذي أمرها سهل ،، بس الله يعينك إذا احتجت الصيانة مرة ثانية لأي سبب وإن شاء الله ربي يغنيك عنهم ،،،،،،

وتقبل مروري يالغالي ....

[ابوعقل]

الجميح خذينا من عنده جمس مديل 98

الصيانه زفت والأستقبال فاشل

والحين معي جمس 2006

خذيته من العيسى والله ان تعاملهم حليل ((احسن من الجميح بس مهم ممتازين))

والله يعينك عليهم

كل يوم انشب بالصيانه خلهم يملون منك

[السيد60]

الله يكون في عونك اخوي
لكن مالك غير ترسل ايميل لشركة جنرال موترز بدبي
وتشرحلهم المشكلة ولاتنسا تسجل الفرع والوكيل للي اخذت من عندة السيارة
وصدقني راح تلقاهم يكسرون تلفونك بالاتصالات يدورون عليك

http://www.gmarabia.com/action/csContactSectorAction?action=GM&NampltCd=999&cntryCd=SA

وشكرا

[B.A]

نصيحة مالك الا تجي لفرع الشركة بالقصيم وباذن الله مارايح ياخذ معك وقت وان بغيت انا اخدمك ماعندك مشكله من بوكره الاثنين اروح واحجز لك موعد واسئلك عن كل شي تبيه ماتجي الا على وطيه ثابته ان بغيت شي عطني رقمك وابشر بسعدك

[مشاغب شوي]

مشكلتك مثل ماقالوا الشباب تخزين الكفرات


وصارت مع واحد من الشباب على ازيرا 2008

وغيروا الكفرات

[مساير الليل]

آخوي صارت لنا نفس المشكله على جمس 2006 طلعناه وصار يرج دخلنا على الوكاله قال هذي كفرات تخزين

وبتغيرها لك وفعلا بعد أسبوع غيروها لنا

وواحد من الربع طلع جمس 2004 وغيروا له الكفراات

للأسف جميع الجموس تجي كفرات تخزين إذا ماتكلم العميل ومشت معه الكفرات حمدوا ربهم وسكتوا

أما إذا طالبهم غيروها له

[najm]

ابد ياخوي لا يردك الا راعين دبي ارسل لهم ولا اتصال عليهم يرجون لك الجميح رج ..

حاول انك تكلمهم على التلفون

انا واحد قريب لي تعطل عليه جمس جديد في السفر وهو بالخط

وطبعاً من ظمن الخدمات الي قدمونها الجميح والمفروضة عليهم الصيانة والخدمة بالطرق

المهم قريبنا هذا اتصال على الجميح وخبرهم على مشكلته وانه معه عائلة ومتعطل في سفر وبوسط الخط

ماعطوه اي جادة ولا احد اهتم وكلن يحوله


والله ويتصل على مندوب الشرق الاوسط بدبي وخبرهم عن مشكلة وعن اسلوب الجميح وخدمتهم

وخبروه انه ان شاءالله راح يكون خاطره طيب

وبعدها بثلث ساعة اتصل واحد من الجميح وطلب البينات من خوينا وين مكانه وارسلو له سيارة تشحن سيارته وعطوه سيارة ثانية يكمل رحلته لين ماتخلص سيارته الجديدة الي خربت

[خشيمان]

الله المستعان

أول نقول الجميح ازين من غيره

والظاهر انه لحقهم
بس ما الومه

لا رقيب ولا حسيب خله يسوي اللي يبي
زين بعد ان الوكلاء الى الحين يضمنون السيارات ما شالوا الضمان
بس بلاه على الشركة الام والا ان كان ما نشم ريحته

الله يكون بعونك يالذيب وزي ما قالوا الشباب دق على الامارات

[برق تميم]

اتصل على وكيل جنرال في الامارات هذا رقمهم وعطهم كل شي ولا تخلي شي ما تقوله والا تعال لي اخذ حقك منهم حصل نفس الموقف مع اخوي وقريب لي وكلم الشركه في الامارات ودقائق ويدقون الجميح عليه ليه يا ابن الحلال تشكي وليه وليه قالوا تعال ودخلو السياره وبعد 3 ساعات استلم السياره

دق وعطهم كل الي في قلبك وعلى بالك
0097143325023

خذ حقك كامل مكمل وان حصل الي انت خابر يا فوحة كبدي فاقعين قلبي هالوكلاء حسبي الله عليهم

[as-315]

الله يكون في عونك