الحذر ... الحذر !!! من فصل العداد

[عبدالله2009]

السلام عليكم ورحمة الله وبركاتة

وشلونكم يالربع ؟؟؟

اليوم بالصدفة نسولف انا وواحد من اخوياي ....

قالي بشتري جيب لاندكروزر جي اكس ار 2005 نظيف بـ 130 الف

كم ؟؟؟؟؟؟؟؟؟

قال وكالة .......!!!!!

ليه يا ابو الشباب ؟؟؟؟ سعره على ايامه 140 - 155

قال ممشاه قليل مرة .......!!!!

كم ماشي ؟؟؟؟؟

30 الف
3سنوات وشوي وداخلين في الرابعه ويقول 30 الف

هههههههههههههههههههههه بالله هذا اهبل والا يستهبل ؟؟؟؟؟؟؟

ما ندخل في النيات ... كلن وضميرة

قصتين مؤكدة ...... قسم بالله اني اعرفهم عز المعرفة
لكزس 2002 مفصول عدادها انباعت ماشية 93 الف ........ راعيها يقول طقت الـ 400 الف وزود
كامري يا ربي ما ادري اهي 2001 والا 2002 انباعت بقيمة طيبة يقول راعيها فكينا مكينتها مرتين
مرة توظيب ومرة تغيير ... والمضحك ماشية 46 الف ,,,,,,,, جديد الله لا يضر الي شراها


واحسن الله عزائكم في الذمم ,,,

[القلب المحروم]

الله يرحم ايام اول يوم كان فيه ذمة وضمير

إلا ماشاء الله عشان ما نعم كل الناس

[ريلاكس]

أزودك من الشعر بيت

واحد يبي يبيع شاص 2007

ومركب له جنوط

وتوقع كم ماشي

ماشي سلمك الله(33) كيلو فقط !!!

مادري يلعب على مين ؟؟

شكرا لك

[غالي]

شيء محزن والله العظيم

هذي وانا اخوك اخر الدنيا
يقل الايمان

فيه روايه سمعتها من واحد ((( لا اعلم عن صحتها صراحه لاني تفاجأت الله لايجيب ذاك اليوم لنا)))

يقولك فيه زمان بيمر على الأمه
يسألون بعض :

ماذا كانوا يفعلون اجدادنا من عبادات

فيقول البعض:

سمعنا انهم يقولون لا اله الا الله محمد رسول الله :(

لا اله الا الله محمد رسول الله
الله لايجيب لنا ذاك اليوم ويقوي ايماننا يا ارحم الراحمين

[أبوهيفاء]

لاحول ولاقوة إلا بالله انا اعرف واحد مع حوض 2008 فاصل طبلونه سالته ليش قال علشان مايقطع على 180 الحمدلله العقل نعمه

[مـدحـدر]

طيب...

كيف نعرف السيارة المفصول عدادها والغير مفصول عدادها !!!

[راعي شلهوب]

طيب...

كيف نعرف السيارة المفصول عدادها والغير مفصول عدادها !!!
مافيها الى على ذمه راعيه الا شكل الموتر بين نصبه الموتر ووجهه
لاكن لا تستغرب الممشى القليل انا معي 2004 جي اكس ار ماشي
38000 بس ماخذه من عمي لكن لو اعينه بالسوق ماشريته

[مساير الليل]

أحد الأخوان باع هايلكس 2004 ماشي فوق 140 آلف ومصدوم مع الوجه شراه من شريطي

وبعد فتره حصله في معرض روح واحد كان معه قال أسئله عن الموتر لقاه مرجع العداد إلى 90 آلف ويقول بدي وكاله مافيه سمكره

الآمانه عند معظم الشريطيه ضاعت

[سوبر152]

لا اله الا الله محمد رسول الله
لا اله الا الله محمد رسول الله
لا اله الا الله محمد رسول الله

[ابوسعود 561]

تدرون وش المشكله

اذا رحت للسوق تبع سيارتك وطبعاً ممشاه حقيقي تلقاهم يطيحون قيمته خاصة اذا كانت ماشيه واجد وحتى لو كانت نظيفه مره ويعطون اللي ممشاه اقل منه سعر اكثر حتى ولو هي ماهي بنظافة سيارتك

المشكله ان فيه ناس واجد اذا جو يشترون سيارة يقولون نبي اللي مامشت واجد ويعتقدون ان الممشا اللي بالعداد هو الصحيح يعني يشوفون الممشا ولا يشوفون النظافه

[موادع الشرقيه]

بعض الشريطيه :j الله يجزاهم خير
الذمه عنده توقف فيها طيارات

[عبدالله2009]

شكرا اخواني بكل من تفاعل وعطانا بعض من معلوماتة

ولكن يا اخوان ترى مسئلة فصلة العداد مسئلة خطيرة جدا

ودايم تلقى مكينة الي مفصول عدادها مبوشة والا قريب تبوش ..... ليش ؟؟؟؟

لان راعيها يكرف مندوبها ... وما يدري كم مشت على الزيت ؟؟؟ يمكن حتى يمشيها اوقات فوق 12 الف

وهو مو داري ... حتى بالمناسبة الكامري الي اقولكم عليها

راعيها يقول ... كان يمشي عليها هو واخوة الصغير على الله .....
____________________________________
و بالنسبة لي اذا شفت سيارة ماشية واجد والله اني ارتاح ...

واما السيارة الي مشيها قليل اهم ما يلاحظ الواحد وجهية السيارة

لو هي مصبوغ صداماتها والا الانوار متخمشة شوي .... لو يحلف انه جايبها لك من الوكالة

انحش منها ....

[خلفهم]

سبحان الله ..

أنا وهذي عادتي بشراء السيارات .. السياره أول ما أشوفها وترتاح نفسي للموتر مهب راعيها .. أستخير وأفحص .. وفيه بعض المرات إذا كان معي وقت أسأل عن اللوحه .. وفيه ناس ما شاء الله عندنا في الرياض موسوعة لوحات يطلع برنت كامل عنها ما شاء الله ...

أذكر مره كنت راكب مع واحد من الزملاء .. ودق عليه واحد يطلب الموتر .. سام الموتر .. عاد الكلام للمتصل يقول انا ادري إن بيتكم في الحي الفلاني وأدري إن لوحتك كانت كذا وأدري إنك ركبت جنوط وكفرات كذا .. وأذكر إني شفتك تتطاعس بمكان الفلاني .. المهم الرجال عطاه برنت كامل عن حياة السياره ما شاء الله .. :)

ومن ناحيتي لو الامر لي كان اخذ موتر أعرفه وأعرف راعيه حتى لو ماشي واجد .. :)

[خلفهم]

طيب...

كيف نعرف السيارة المفصول عدادها والغير مفصول عدادها !!!


كني سمعت مره في مجلس فيه بفحص البريدي عامل يقدر يطلع المفصول من غيره من خلال بعض القطع الإستهلاكيه بس منب متأكد لأن المعلومه قديمه ..

[tarazan2005]

ممكن يكون الممشى حق السياره صحيح
انا بايع سيارتي موديل 2006 قبل اربعه شهور وانا شاري السياره شهر 8 -2005 السياره ماشيه 30000 الف بس

[النحيف]

أتوقع إذا تبي تعرف الممشى الصحيح شف الفحمات والهوبات وشف تحت السيارة عموما ً وراح تلاحظ الممشى




وعلى طاري العدادت أحد السنوات كان معي هاي لوكس 2004 بعد ما مشت تقريبا ً 55000 طلع صوت بالعدادات ورحت فيها للوكالة وركبوا لها عدادات جديدة أصفار ويوم جيت أبيعها والله ماسمحت نفسي رحت للكهربائي وخليته يزود العداد .

بعض الناس قالي أنت ما لعبت بالعداد ليش تقدمه !!

[جبل راف]

لاحول ولاقوة الا بالله

[عبدالله2009]

فيه حركة تعرف اذا كان العداد ملعوب فيه بالنسبة للعدادات التقليدية


طبعا طريقة تغيير الارقام انه يفك الطبلون ويقوم يفر الارقام

مثلا سيارة ماشية 264556

يحرك الرقم (2) ويخلية (1) او يمكن بعد يحطة (0) اذا كان وسيع وجة وضمير :rolleyes:

انت كيف تعرف ان العداد انلعب فيه ؟؟؟؟؟؟؟؟؟؟

تلقى الابرة حق السرعة اذا مشيت 40 او اقل وخليت نفس الدعسة تلقى الابرة تلعب بشكل قوي

والله يستر علينا من الغش والتلاعب

[محب الغيم]

يا إخوان في ناس ترى مشاويرها قليلة

يعني ما كل الناس يكذبون

الوالد الله يحفظه عنده الجيب 2008من كم شهر ما تصدقون لو اقول لكم كم مشى .

بمعنى الوضع ما هو غريب

[جمعان 22]

بعض الناس قالي أنت ما لعبت بالعداد ليش تقدمه !!



هذولي شياطين الانس ..لا كثر الله من امثالهم


ابليس اول ما يجيك ما يقولك... اكفر !

[ابودهام]

والله ياشباب ماحلفتكم

فيه جيب Gxr فل كامل موديل 2005 ذهبي سعودي ( إصدار خاص انواز زينون طبعا الواطي وشاشة Dvd ، وونش ، الصراحة البدي نظيف والموتر يعجبك اول متشوفه

كنت ادور جيب ومعي واحد من الربع ودخلنا معرض المقرن بالنسيم قبل مايذن المغرب ولقينا الجيب ويوم سألنا الزيدي عن الموتر قال مسيوم 125 والبيع 130 قلت طيب كم ماشي قال 9000ك :confused:

قلت 9000 بس ، رح جب مفتاح الموتر ، وفعلا جاب المفتاح وناظرنا العداد ماطق 9000 بعد :confused:

والمشكلة فيه واحد نفس موديلة وذهبي ولا هو فل كامل والعداد حول الـ 90000 ومسيوم 130

بس استخرت الله وصليت ركعتين ورحت من بكره ولا الشبك الامامي لونه ذهبي ومحكك بادي يروح اللون يعني

وبعد كذا طابت نفسي منه قلت يعوض الله خير

والله ياخوان هاللعب الي صاير بالمعارض ودك تفتك وتطق جديد وتريح بالك

[خلفهم]

والله ياخوان هاللعب الي صاير بالمعارض ودك تفتك وتطق جديد وتريح بالك

حتى الجديد بدينا نخاف عقب بعض القصص ..

احد الشباب قالي والعهد عليه يقول واحد من اقاربه طلع ربع 2006 خليجي من الجميح بالنسيم .. مشى الموتر فتره معه ونصحوه بعض الشباب إنه يدبل مساعدات راع عند أبو يمن يوم شافه قال الرفرف حق موترك مغير ومرشوش قال أنا مطلعه وكاله وشلون وأنا اول من ساقه مشت الامرو وخوينا ما ارتاح راح لفحص البدي كمبيوتر وصار بالفعل الرفرف مغير ومرشوش .. !!! الله يخلف عليه .. ويعوضه .. احيانا يصير راعي المعرض أو أحد العمال يلبقونه وحكو لهم شئ ويزينه ويبيعه على إنه جديد ..

[محسن اليامي]

وعليكم السلام ورحمة الله وبركاته

أنا صارتلي سالفه عندي كابرس 92 فاكه من الوكاله وبعته ب2750 دينار كويتي بعد 4 سنوات ماشي فوق ال 200 الف اللي شراه مني الله يسامحه نزل العداد إلى 80 الف وباعه ب3100 شلون دريت ؟

دق علي اللي شراه وقالي أنت فاك الموتر قلت نعم والموتر نظيف مافيه صدمات قالي كم ماشي (( هنا الصدمه ))
قلتله فوق الميتين والله يارجال قام يدعي عليه (( الله لا يوفقه الله لايوفقه الله لايوفقه )) والله اني حسيت ان دعاءه بيستجاب

عاد أنا طمنته قلتله ماعليك منه والله الموتر نظيف وأنا محافظ عليه واي شي تبيه حاضر

[ridan]

والله اللعب بصراحة بالمعارض شيء يروع
الوالد قبل سنتين ونص شرى هايلكس 2003 من النسيم ماشي000 110كم الف تقريبا والموتر ماعليه نظيف
بعد ماشريناه بفتر ةلاحظنا ان العداد السرعة يهز الى سرعة 120 تقريبا هزة قوية ودينا الموتر للكهربائي قال العداد مفصول ومرجع لورى
تقدر تقول ماصدقنا فلنا انا شارينه من شريطي مطوع وانشاء الله انه ثقة على الأقل عشان شعر وجهه
اللي صار معنا ان الموتر بيد الشايب يعني استخدام حشمة ومشاويرة قليلة قبل اسبوعين وظبنا كارونة كامله بالتروس حقتها والرمانات وجرم الكارونة حتى اللي مايخرب من النادر يخرب
شمعناتها انا الموتر جايه كرف وممسوك به خطوط الى انعمى
فما اقول الى حسبنا الله ونعم الوكيل

[سوبر VTC]

مشكور على التنبيه لا هنت

و الله يرحم الحال حديث الرسول صلى الله عليه و سلم بمعناه/ ان المؤمن او المسلم لا يكذب


انا سمعت من بعض الاخوان انه عن طريق فحص الكمبيوتر تقدر تدري كم ماشي


تحياتي

[سليمان 10]

عندما قل الايمان في قلوب بعض البشر اصبحوا لاهم لهم الا جمع المال من اي باب سواكان حلال ام حرام فقد قال الرسول صلى الله عليه وسلم من غشنا فليس منا 0 والذي يعمل في بيع وشراء السيارات لابد ان يتصف بالصدق والامانه حتى يتأثر فيه من حوله من الناس العرب والعجم 0وفي الماضي انتشر الاسلام في بلاد الغرب عن طريق التجار لحسن تعاملهم واخلاقهم وهم لايشعرون ولكن الاسلام يربي الانسان على التصرفات السليمه ولله الحمد والمنه 0ولنتذكر اننا ميتون ثم مبعوثون ليوم عظيم فمن عمل صالحا فلنفسه ومن اساء فعليها 000

[L I M I T E D]

على طاري فصل العدادات ..

اذكر مره شفت ابى شريطي

عند غماره 2004 ممشى الطبلون 74.000 الف

والموتر البدي ماعليه كلام ،، المهم وانا اقلب في ورقه الفحص

والقى قراءه العداد 150 الف وكسووور

وفريت من الموتر مثل فراري من الاسد

والله يحمانا واياكم من كل شر

[رمال النفود]

هذولا والله العظيم مساكين .. همهم ربح بعض الريالات بس الله ما يهملهم (من غشنا فليس منا) الله يخلف على دينهم ، ويخلف على بيعتهم ما فيها بركة وان كسب ألوف بالبيعة ، الله لا يعاقبنا ..
هذا اللي يغش المسلمين ما يخاف أن الله يجعل ميتته شنيعة ..
لا حول ولا قوة الا بالله ..

[عبدالله2009]

بس استخرت الله وصليت ركعتين ورحت من بكره ولا الشبك الامامي لونه ذهبي ومحكك بادي يروح اللون يعني

وبعد كذا طابت نفسي منه قلت يعوض الله خير




هذي زبدة الكلام ...


الله يوفقك اخوي ابو دهام ... وفعلا الي ينوي على شي ... لازم انه يستخير الله قبل ما يقدم

وبعدها يسوي الي عليه من تشييك وفحص وتجربة

[جفيل]

واحد من الأقارب عنده كامري 2000 ماشيه 300 ألف ..حطها بمعرض

جاء عقب مده لقاها ماشيها 50 ألف !!

سرق عيني عينك
شي غريب

[aass1122]

الله يهديهم من غشنا فليس منا

[ابودهام]

وازيدكم من الشعر بيت انا سمعت كلام مؤكد ان" بعض " الشريطية متفقين مع كهربائي فلبيني يصفر العدادات بـ 500 ريال .

انا ودي بس اشوف معارض تل أبيب وشريطيتهم :)

[mrayman]

والله شعب ما تدري وش يبغى حسبنا الله عليهم المشكلة لاجاك الصالح ويبغى يتكسب بين الشريطيه يضيع ... والخوف من عاشر القوم 40 يوم ...
ما اقول الا الله يرزقنا بحلاله عن حرامه ولابد من وجود طريق لمعرفة اللعب بالعددات

[بوسعود 180]

عادي فيه سيارات ماتمشي

انا مستعد اجيب لك مرسدس شبح 320 موديله 93 الى الان توه ماشي 53000 فقط وهو على يد صاحبه من خذه من الجفالي

ياخوي فيه ناس تشوف سياراتها مامشت لانهم ماعندهم ذيك المشاوير او عندهم سياره ثانيه

[ABO AL-HESH]

والله مدري اخوي لكن انا شريت باترول 2005 ماشي 17000 بس وواضح من ريحة الوكاله وفحص الكمبيوتر اذا كان فيه فيش بالمكينه يتبين الممشى والغالب ان البخاخ كله فيه فيش حتى الددسن,,

[أبو فهد11]

أذكر أخوي قبل تقريباً أربع سنوات شرى أوبل 2002 فل كامل من شريطي

يقول ماشيه 52000 ويقول البدي وكاله وطلع الكبوت مرشوش والموتر ماشي أكثر من كذا

والدليل كان فيه ورقة فحص وماسح من الورقه كم الممشى

والحمد لله ما خسر من سعرها إلا تقريباً 3000 بعد 6 شهور

حسبي الله عليه وعلى كل من يغش المسلمين

[سيف نجد FJ]

يا اخوان عشان لا تجون على ذمتكم

عن نفسي انا بايع بي ام 750 موديل 98 ماشي 42 الف والله انه مرمي في البيت من زمان وما يمشي الا في السنه حسنه

وغيره عندي الارمادا 3 سنين وما مشى الا 38 الف يعني مهب شرط

لكن الحل للمستعمل شي من اثنين وهذا من خبرتي
1- انك ما تشتري موتر من معارض ( روح واشتريه من صاحبه ازين لك ولا تقعد تضغط عليه عشان يقولك العلل .
2- لا تشتري موتر الا وله تاريخ في الوكاله يعني ينفحص بشكل دوري عندهم .

اما المعارض و الشريطيه الله يخلف عليهم و يصلحهم

[اسير الغضا]

ياشنبات طيب انا سمعت ان الوكاله يدرون انك فاصل عداده اذا جيت لمهم
هوصح ولا لا