طار علي كفر تريلة كفاكم الله الشر

[أفق]

قبل يومين كفاكم الله الشر كنت امشي بطريق الخرج الرياض السريع ليلا فجأة اللي قدامي طير علي قطعة كفر تريلة منصلخ وضرب بصدام وكبوت السياة ضربة قوية جدا
عفطت الكبوت والحمد لله ما جاء بالقزازة الامامية

مالكم بالطويلة كرما لا امرا افضل ورشة تصليح سمكرة ورش بوية بالرياض ؟؟بالوصف
لان السيارة جديدة ولا ابي احد يتعبث فيها
والحمد لله على قضاء الله

[ابو صقر992]

الحمدلله على السلامه اخوي افق تلقا ان شالله من يعينك على الورشه الزينه الي تظبك المبروك الي معك الله يكفيك الشر

[* الخطيب *]

الحمد لله على السلامة ياأخي الكريم ، والله يوفقك بالورشة الممتازة .

[مسفر الاكلبي]

الحمد لله على سلامتك


وبانتظار الاخوان يفيدونك

[بدوي جنوبي]

صارت معي نفس المشكله علي طريق
حرض والحمد لله جت سليمه
لو اني قريب من التريلا كان صارت علوم
فأحذر عدم الاقتراب من الشاحنات

الله يستر عالجميع

[.أبوعبدالرحمن]

الحمدلله على السلامة والله يعوضك خير


فيه ورشة يسمونها ورشة ابو ماجد بالصناعية القديمة على شارع الجمعية وما اعرف وينها بالظبط في الشارع

بس انهم يمدحونها في السمكرة

[aooa]

الحمد لله على السلامه

يعلم الله اني اكره طريق الرياض الخرج وفي خاطري انه اطول من طريق الرياض الدمام ....... ما اصدق اني اوصل للرياض مره ثانيه .

وانا سوف اورد طلب يكون العنوان اوضح لاني محتاج ورشة ممتازه .

[بيبسي]

لا تروح لورشة ابو ماجد ماتنفع انا قد مريت عليها شغل اي كلام
عندك ورشة المحار او النفيعي بالشفاء

[ابوعبدالعزيز4]

الحمدلله على السلامه

[غالي]

الحمدلله على سلامتك اخوي

وافضل ورشه (( رغم ان شغلهم مو مثل اول للاسف وصاروا اغلى))

عندك مركز الوفاء بالصناعيه

وماي كار مقابل مستشفى الملك خالد للعيون

والله الموفق

[أبـــ سعود ــــو]

الحمد لله على السلامة أخوي
فيه ورشة الضويان في صناعية السلي لكنها غاليه بس خذ شغل
مخرج 15 وجهك شرق

[لعّاب المنايا]

الحمدلله على السلامه وماتشوف شر ,,,

[عاشق ربيع نجد]

**** *****2222

[القلب المحروم]

الحمد لله على السلامة

وش نوع السيارة
لان بعض الورش تضبط نوع دون نوع

[نايف الذيب]

الحمدلله على سلامتك اخوي

وافضل ورشه (( رغم ان شغلهم مو مثل اول للاسف وصاروا اغلى))

عندك مركز الوفاء بالصناعيه

وماي كار مقابل مستشفى الملك خالد للعيون

والله الموفق


الحمد لله علي السلامه

عطاك العلم غالي بس تراها غاليه شوي والشغل لا تسال بعدهم

[بوسعود 180]

الحمد لله على سلامتك اول شي

ثاني شي هالكلام لك ولبقي اعضاء مكشات الكرام

اذا فيه احد يمشي قدامك في خط سريع ولا غيره وطير عليك حصاه ولا كفر وتضررت سيارتك انكسر القزاز مثلا اوقشع صدام وكذا سجل رقم لوحة السياره اللي قدامك وبلغ المرور او امن الطرق ويصير اجباري على صاحب السياره تصليح سيارتك

[سحابه]

االحمد لله على السلامة
فيه ورشه افران الجرفين في الشفاء مرهم وأحكم بنفسك انا مريتهم على شان سيارة واحد من الشباب ولقيت عندهم جمس 2008 أول ماطلع وأعجبني شغلهم ممكن تأخذ رقمهم من استعلامات الدليل وأنا بحاول أدور لك رقمهم وبسأل واحد من الشباب عن ورشه يمدحها
الله يستر من طريق الخرج أنا أداوم هناك

[ابوحماد]

الحمد الله على السلامه


عندك ورشتين

لا تروح غيرها

مركز دريم كار القريني شرق الصناعيه القديمه

مركز وفا شرق الصناعية القديمه

[اعي الذود]

الحمد لله على السلامة


تحياتي راعي الذود

[راعي البندق]

الحمدلله على السلامه

[رأس الزعامه]

الحمد لله على السلامه
والورشه والله إني ما عندي علم

[مخاوي الكشات]

أسمعني ياطويل العمر معروف أن أحسن ورش السمكرة والرش في المزاحمية وبالذات الفيصلية >> بس قلي أنت وش موترك ..

وبأكلمك واحد خبير وبأرد لك خبر ..

تحياتي ..

[الحلطاني]

في ورشه بالصناعية السلي اللي عند الميه اسمها ورشة الخبر التقاطع اللي عند الضحيان وانت متجه شرق .
افضل ورشه بالرياض وفي ناس يجونها من القصيم ,
وحتى اعطيك الزبده قبل مده صلحو جيب لكسزس 2008 .

[ابو الشباب3]

حمدالله على السلامه اهم من السياره ماتشوف شر

[سيف الظفير]

الحمدلله على السلامه وماتشوف شر ,,,


ولية وزارة المواصلات ماتعووووووضك !!!!!!!!!!

[speed 557]

الحمدلله على السلامة والله يعوضك خير

[أفق]

اشكر جميع الاخوة جزاهم الله خير على مرورهم وتعليقهم على الموضوع
وسمعت بوصايا الكثير وذهبت الى ورشة( وفاء) القديمة وشفت شغلهم على بعض السيارات جدا ممتاز
لكنهم رفضوا استقبال السيارة الا قبل رمضان بيوم
وقالو لابد من رش كامل الكبوت والشغل يكلف الف وسبعمائة ريال

[غالي]

الله يعينك ويوفقك ويخلفك اخير منها

[بيرتا]

نصيحه هج عن ورشه الوفاء الي بالصناعيه القديمه

تراو غالي ونصاب وشغله مثل وجهه

وان بغيت الدليل موجود عندي جمس والله ان العماء يدري انه مسمكر

فيه ورشه بالقصيم اول ما تدخل بريده عندهم شغل مب صاحي واكثر شي يعدلون ويرجعه لك بلد ولا تفع له ريال هذا نضامهم

[روافد]

الحمد لله على السلامة

ورشة الكرمة مجربها ممتازة

[شاص2006]

السلام عليكم عندك ورشة وفا شغل صح بس غالييييييين رش صدام الهايلوكس 2006 ب1200 بس ضمان اربع سنوات على البويه والسمكره وموقع الورشه الاشاره اللي عند السالم حق القزاز خذ يمين امش لك مسافه ودورها يمين اسأل ويعلمونك هناك مايقصرون معك اتمنى اني أفدتك دمت بود....................... تراي ما أعرف الوصف بالظبطالمعذره...............

[الكايف2]

الحمد لله علي السلامه علي كل حال

[أفق]

اشكر الاخوة على مرورهم
والحقيقة زدتوني حيرة وتردد
(وصدق من قال اذا بغيت تحيرة خيرة)
والله اني احترت وين اروح علما اني لن اخرج عن ورش الرياض ابدا

[أبو فهد11]

أخي الكريم مركز وفاء اللي بالصناعيه القديمه

أخذ سمعه على غير سنع وأنا شخصيا مشتغل عندهم

وفيه ورشه ثانيه أسمها أرناج قويه بصراحه وانا شايف شغلهم

والعمال اتراك مقابل ورشة المطيويع للشروكيات تفتح الورشه للشمال

وفيه زي ما ذكروا الأخوان MY car

[بـدر]

اخوي الحمد لله على السلامه اولا

انا مجرب ارناج

بصراحة شغل 100% ومر على هالورش كلها وشف السيارات الجاهزة وتعرف مين اللي يشتغل صح

[العشة]

تبي نصيحة

ابعد عن وفاء انا صلحت عندهم شغلهم ماتعطيه ورشة مبتدء

يعني اثر البوية تلقاه بالصدامات وحوايف الشغل

وغاليه مره