وصف طريق.....

[ولد الشام]

السلام عليكم يالربع جميعا

صراحة بعد هالصورفي المنتدى مابعدها جلسة الأسبوع هذا بالرياض,,, وعزمنا أنا وربع لي نطلع للصمان والشعبان هناك

لكن ودي بوصف واضح لأماكن الربيع في الصمان ، والتنهاة ، والشوكي..... أنا عارف أني بثقل عليكم

لأني صراحة ما معي جهاز قارمن ولا غيره ،،،،، يعني مالكم إلا ( أمسك طريق ولف مع مفرق وانت ماشي))

الله لا يهينكم، أبطلع من بكرة إلى ا لجمعة

تحياتي

[ولد الشام]

يا شباب وش بلاكم الله يهديكم

كل هذا على شان ما معي جهاز قارمن أو ماجلان

ترى كله توصيف طريق

سلامتكم

[سهيل واحد]

السلام عليكم ورحمة الله وبركاته >>>>>>>>>>>>

الاخ ........... ولد الشام

خذ عندك وصف روضه من احلى ما شفت خلال موسمنا هذا لكن اعتقد انك تحتاج بوصله.
تطلع من الرياض مع طريق الثمامه وبعد 100 كم يجيك مفرق يمين (الحفنه , حفر العتش , الصمان). تفرق معه وتمشي لين يجيك دوار (قبل الدوار فيه محطة بنزين - تحتاج تفلل السياره بنزين) من الدوار تاخذ الخط اللي يروح يمين (إلى الصمان) تمشي 90 كم (نهاية الخط سابقا) يجيك برج جوال على يمين بعده 200 متر لوحه على اليسار (مدري وش مكتوب عليها). جنب الوحه خط يوجهك الى شرق شرق شمال اتبع ها الخط (إنتبه من الطين). بعد تقريبا 5كم يجيك قور(جمع قاره) خلهن على يمينك(الخطوط كثيره بس شف لك واحد واطيته السيارات مزبوط) إتجاهك الآن شمال شمال شرق(يعني اتجاهك لشمال اكثر من الشرق). بعد ما تمشي حوالي 10 كم إبدء الآن تتجه شمال قص(يعني شمال بس). تمشي من 10كم إلى 12كم وتبي تنزل على رياض و فياض يا الله من فضلك تشقق (الغنم و البعارين وصدور البني آدمين منشرحه)وتبي تسمع صوت ذكر القوبعاء ويسمعه كل اللي با الصلب و الصمان ومثل ما قال ابو دباس (الصلب و الصمان دروبه عسيره) لا اوصيك إنتبه من الطييييييييين.

و رحله موفقه يا ولد الشام.

[أبا أكشت]

منقوله من مشاركة أخونا أبو ساره (وصف لطريق شعيب الشوكي)

تحية عطره لكم اخواني رواد مكشات

شف طال عمرك الوصف سهل بالحيل ،،،
امسك خط القصيم باتجاه الشمال انطلاقا من مدينة الرياض لين يجيك بعد 120 كيلو مخرج يقولك تمير رح معه يمين ثم سيد ليمن تدخل اتمير وباخر الديره راح ينعطف بك الطريق يمين رح معه وسيد تجيك ديره ثانية تعدها وباخرها حرف تي رح معه يمين ثم سيد تجيك الشعب تعدها وخلك مهدي لان الطريق منعطفات وفيه مناظر حلوه بعد ما تخلص من المنعطفات بحوالي ثمانية كيلو او اقل ممكن تحصل لوحة تقولك الشوكي يمين وممكن ماتحصلها ( يكون مطيرها السيل زي العاده ) المهم اذا ما لقيت الوحة تلقا السيل قاطع الطريق وتشوف على يمناك اطراف فيضة شعيب الشوكي واذا برضة ما فهمت ارسلي رسالة بالخاص اتصل عليك وافهمك ول فهمت الوصف بس تخاف تتعدى مدخال الشعيب ولى يهمك اروح لسيارة واجيبلك الجارمن واعطيك احداثية المدخل حق الشعيب .

منقولة عن أبو ساره

أخو أبا أكشت

[ولد الشام]

الله يجزاكم خير ما قصرتم, أبا أكشت و سهيل واحد

يسهل الله،

تحياتي