طارة اللاندكروزر .. تشبك و تفك .. وش سالفتها ؟؟!!

[الشهابة]

مساء الخير للجميع ..


يا رجال .. عندي مشكلة غريبه بصرحه ..


عندي لاندكروزر Gx-r موديل 2003


و الدركسون (الطارة) انهبل .. مره يصير ثقيل كن السيارة طافيه و اذا دعست على البنزين صار خفيف


و مرة يرجع الوضع طبيعي .. مافيه اي مشاكل ..


شيكت زيت الدركسون ممتاز و لافيه اي تهريب ..


صار لي يومين و السيارة على ها الحاله .. وش السالفه .. اخاف اروح للورش يلعبون فيني و تصير المشكله بسيطه ..

[سرابوه]

تبي نصيحه اخو لاخوهـ لاتروح لالورش ولا هم يحزنون حتى لو كانت ايش وصاحبت سمعه الا الطاره ما احد يلعب بها سيارتك متوقفه على الطاره لا يصير فيك شيء لا قدر الله

ماعندك الا الوكاله هم اصحاب الخبره ولا بتحصل الاسعار متقاربه والوكاله بتمضن لك القطع والتركيب ويمكن ما تكون الا مشكله بسيطه انت وده وشيك وشوف وش يصير معاك

بالتوفيق يالغالي

[a.الخثلان]

أتوقع ولاني متأكد إنها مكسبه هواء علبة الدركسون

[الشهابة]

اخوي سر ابوه .. صدقت في سالفة الورش .. اخاف يلعبون فيها و تجي في الأخير على راسي .. بس يا طويل العمر الوكاله ماعندهم تصليح مافيه إلا تغيير القطع بجديد .. و الأسعار نااااااااار ..

[الشهابة]

اخوي الزينون .. (مكسبه هواء علبة الدركسون) .. وش سالفتها ؟ .. و كيف افحصها ؟ .. وهل هي تتغير و إلا تتصلح ؟

[أبو أسامة]

السلام عليكم ورحمة الله وبركاته

أخي الكريم : تأكد من سير علبة الدركسون وتأكد من البكرة أنها سليمة إذا صارت تمام كلها إن شاء الله أجل ما لك إلا أنك تكب الزيت اللي بالعلبة والليات اللي فيها ثم تعبي زيت جديد لأنه يمكن يكون بها وسخ أكرمك الله أنت والأعضاء الكرام والزوار الأعزاء .

وعسى الله ييسر لك أمرك ..............

[الشهابة]

أبو أسامة ..

و عليكم السلام و رحمة الله و بركاته ..

تقدر تقول إني يا الغالي اشك في سير الدركسون و البكرة .. لأنه أيام الغبار و العج اللي على الرياض كانت السيور تطلع نغمات عجيبة .. و شديتها بس الظاهر إني شديت عليها بزيادة .. أما بالنسبة للزيت فكان التشييك عليه مبئي و كانت أمورة سليمة بس حسيت إنه زايد و يهرب من فوق مع الضغط .. و الله يسهل الأمور

[المميـز]

اخوي الشهابه

انا معي فتك وحصلت معي نفس المشكله اول ما اشغل الموتر الطاره هواااء

وبعد خمس دقايق تصير ثقيييييله واذا دعست بانزين تخف مثل ماتفضلت انت

بعد مالفيت على كذا ورشه كلهم اجمعوا على ان علبة الديركسون يبي لها
تغيير والسبب انها صارت ضعيفه وماتشتغل زين ,,, وقبل لاتصير المشكله معي

كنت اذا لفيت اسمع صوت يطلع من علبة زيت الدريكسون ومع العلم ان السير جديد وزيت العلبه ما قد نقص ولله الحمد

طبعا سعر العلبه 1800 ريال بالوكاله بالنسبه للباترول وبالتشليح بـ 500 ريال وغير مضمونه

والصراحه الى الحين ماغيرتها

احس اني ضيقت صدرك بس هذا الواقع

وكل عام وانتم بخير ...

[الساهر2003]

السلام عليكم
ممكن اقول لكم حل ورجاء لا تضحكون منه لانه عجيب وغريب وصارة مشكلة في جيب سوزوكي فيتارا وثقلت الطارة فجاة وكل الفنيين يقولون غير العلبة والعلبة سليمة ولا فيها تهريب ولا صوت
الحل ان راعي السيارة راح لفني مختص في الدركسون ومشاكلة وبسرعة اعطاه الحل وهو
فك وتنظيف عامود الطارة مع تنظيف الصليبات تنظيف جيد
الحل تشتري بخاخ الصدى وتشغل السيارة ويكون واحد من الشباب يلف بالطارة وانت تبخ على الصليبات وكثر وان شاء الله بتخف وتنتهي المشكلة
الف شكر للجميع
معلومة علبة الدركسون ماتتعطل الا اذا صار فيها تهريب وصوت واضح فقط

[الشهابة]

اخوي المميز ..

و انت بخير و الف سلامه ..

و الله انا خايف انها تصير علبة الدركسون .. سألت عنها في الوكاله قالوا بـ 1200 ريال و معها شي يجي بس نسيت اسمه قيمته 300 ريال مع الزيت و شغل اليد بتكلف السالفة 2000 ريال ..

بس السالفه صارت بدون اي مقدمات .. فجأة طلع العطل هذا .. يعني ما كان عندي صوت او تهريب .. و الغريب أن الثقل في الدركسون يروح و يجي مايستمر طول اليوم ..

[الشهابة]

الساهر 2003 ..

اول شي يالغالي تسلم على ردك و تجاوبك للموضوع ..

و الدعوى يا طويل العمر مافيها ضحك .. و انا ماعرضت مشكلتي على المنتدى إلا و انا ادور لها حل من الرجال شرواك و شروى الاخوان اللي شاركوا مشكورين بالردود و الحلول السابقة ..

و بالنسبة للتنظيف .. يمكن اغسل السيارة بستم و اانفضها من تحت عل و عسى يتبين اذا كان فيها تهريب للزيت او يمكن تروح المشكله .. مع العلم انه مافيه حالياً اي تهريب او صوت في الدركسون بس ثقل متقطع من فترة لفتره ..

[الساهر2003]

الف شكر لك اخوي
لكن اللي اقصده عامود الدركسون الطارة اللي طالع من الدركسون في الطبلون ورايح لدودة مايقدرون ينظفونه المغاسل انت نظفه لانه يجي فيه صليبين 2 صغار مشكلتها مافيها مشاحم وتتاثر مع الغبار والماء
ونفس ماصار لربعي تروح وتجي الثقل وهو صار فجائة

[مخاوي الشيبان]

هلا أخوي أنا أبقولك إلى حصل معي :
كان معي جيب 2002 وحصل معي ثقل في الدركسون يشابة ماتقول وذكر لي صاحب ورشة سعودي في بريدة يقالة ابوعبدالله القربان أن المشكلة في السيور وغيرت السيور سير المكينة والمكيف يعني طقم وذهبت المشكلة ربعد التغيير مباشرة يعني طلعت بسيطة ولله الحمد .

[الشهابة]

اخوي الساهر 2003 ..

كلمت احد الزملاء صاحب محل تلميع سيارات .. و قال جب السيارة و علمني اللي تبي و اخلي العمال يسوونها .. و وعدني خير بإذن الله ..

[الشهابة]

اخوي الثلج الدافي ..

السيور و البكرات بعد الفحص كلها سليمه .. لكن قبل فترة ايام الغبار طلعت صوت و شديت عليها .. بس مادري اذا المشكله حصلت بعد الشد ..

[شامخ ألهيلا]

اخوي موترك فيه فضاوه في الطاره هذا من الدوده وتعمل ثقل في الطاره
اذا موترك ثقل بس اعرف ان الخلل في علبة الدركسون وويبي لها فني واصلاح ولا تغيرها

[الشهابة]

شامخ الهيلا .. الله يستر لا تكون الدودة .. على العموم الظاهر إن الموضوع بيتحول للوكاله لقطع الشك باليقين

[ابوفواز]

علبة الدركسون
مافيها كلام

[شامخ ألهيلا]

اخوي الشهابه

لاترووح للوكاله وانا اخوك ترا الشغله بسيطه وماتحتاج وكاله ترا فيه ورش افضل شغل من الوكاله

رح طال عمرك لميزان اليرموك بالاول وقل سوو لي تشيك ترااه مجاني اذا الخراب بسيط يصلحونه لك ويعطونك ضمان

واذا الشغله فيها دووده رح لمركز الهيدوليك بالصناعيه القديمه او الطاير
ويوضبون الدووده وشغلهم ياخذ له 4 ساعات الى 5 ويعطونك ضمان 6 شهوور

وسعرهم من 450 الى 500 ريااال

انا موضب الدوده عند مركز الهيدوليك ولها الان سنتين زي الحلاووه

[الشهابة]

يعطيك العافية اخوي شامخ الهيلا ..

بس لو تكرمت ابي وصف مركز الهيدروليك بالصناعية القديمة .. او شي يكون واضح قريب منه

و يعطيك العافيه تعبتك معي ..

[شامخ ألهيلا]

ربي يعافيك اخووي

طال عمرك اذا جيت الصناعيه القديمه الى بطريق الخرج وانت جااي من جنووب وجتك الاشاره الى عندها محلات الزجااج
لف يمين من الاشاره وامش اليت تجيك الاشاره الثانيه وبتل الين يجيك تقاطع شارعين لف مع يسار ورااح تشوف مركز الهدروليك على يدك اليمين

واذا ضيعة ارسلي على الخاص واعطيك رقمي اوصف لك بالتلفوون


اخوك شاامخ