نصيحتكم في شراء شيروكي

[أبو. سعود]

السلام عليكم ورحمة الله وبركاته


يأخوان تكفون في هذا الشهر الفضيل بكره أن شاء الله بروح أشوف لي شيروكي 98 تماتيك قير وقزاز اللون زيتي نص فل جنوط نجمه أمريكي لا يوجد حلا على الماكينة ماشي تقريبا 200 كيلو سوم 16.500 ،
المطلوب :
وودي بورشة كويسة تفحص لي السيارة زين لأن للأسف الورش اللي حول المعارض غالية بالحيل وأهم شي عندي كم يسوى الموتر ووش تنصحوني فيه؟؟؟


والله يرحم والدينة عن النار اللي بيرد علي

[ابو شهد جدة]

طيب انت في اي مدينة؟

وترى سعره طيب نسبياً اذا كان نظيف.

اسأل الله لك التوفيق

[أبو. سعود]

انا في الرياض جعلك في الجنة

[ابو شهد جدة]

والله لو انت في جدة لأقولك بس انت لازم تشيك على نقاط مهمة منها:
1- عشق السيارة وانت واقف وخل رجلك على الفرامل اذا عشق معاك بسرعة معناته انه الجيربوكس ممتاز طبعا جرب في الريوس وعلى قدام.
2- اذا عشقت زي ماقلتلك فوق وطلع صوت طقة جامدة شوي معناته يحتاج تغيير صلبان بعد فتره.
3- خلي السيارة شغالة لو ربع ساعة وشغل المكيف لتتأكد من الحرارة. طبعا شيك على الساعة وعلى ضغط الخرطوش الي طالع من الرديتر للمكينة.
4- جرب الدبل اذا قدرت وافضل طريقه هي انك تعشق الدبل الثقيل وتكون في مكان واسع شوي وعشق السيارة وانقز فيها نقزة خفيفه كأنك تنتش واحد بالبر. اذا حسيت بثقل السيارة وسمعت الكفرات الامامية تطلع صوت مثل التفحيط بس على خفيف معناته الدبل 100%. ان شاء الله. بس لازم تسمع صوت صياح الكفرات.

هذا الي اقدر افيدك فيه وأسأل الله لك ولنا التوفيق ان شاء الله

[أبو فهد11]

أخوي العزيز أنا نصيحه أبعد عن أي شيء أسمه شيروكى

والسبب لراحة الباااااال من الورش اللي بتسير عليها كل مره


والله يكتب اللي فيه خير لكــ

[أبو. سعود]

الحقيقة ياخوان ابيه للبر انا وعيالي ماني راعي تطعيس يعني شي خفيف والله يجزاكم خير،وادري ان الشيروكي مشاكلة كثيرة بس وش نسوي الجيوب الثانية غالية وانا على قد حالي

وإذا أحد عنده زود يقولي الله يجزاكم خير

http://img119.imageshack.us/img119/6949/87428140hp3.jpg

[ابو شهد جدة]

خدامك يالغالي

[سوبر VTC]

هلابك اخوي و ان شاء الله ان الموتر يبي يطيب خاطرك
و الاخوان ما قصروا لكن بالنسبة للدبل حطه بالثقيل و لف الدركسون يمين او يسار للاخر و دس بنزين فجاة على خفيف طبعا اذا طلع صوت معنى هذا ان فيه مشكلة بجنزير الدبل او بترس الدبل يكون متثلم او فيه كسر طبعا تحس ان الموتر ثقيل و انت لاف الدركسون كانك ماسك الجلنط و هذا طبيعي لانه بالثقيل و اهم شي لا يكون فيه صوت
لكن انا اللي اعرفه ان قير الشيروكي قير لكزس يعني حمار كده قليل خرابه و اهم شي تعاير اعيار زيت القير اذا كان الزيت اسود معنى ذلك ان الكلتشات مقبلة على الخراب
بالنسبة للكوارين بعضهن يكون بهن صوت رمان او فضاوة بالبنيون ثم يقوم بعض الشريطية بتعبئة الكارونة شحم حتى تثقل و يختفي الصوت
******
هنا رابط لشيروكي بمعارض الشفا م2001 كلاسيك تماتيك دموي حاده راعيه ب185000
http://www.mekshat.com/vb/showthread.php?t=146033 (http://www.mekshat.com/vb/showthread.php?t=146033)
***********
هنا نصائح عند شبك الدبل


الخفيف تشبكه عادي حتى لو انت تمشي 140لكن اهم شي ترفع رجلك عن البنص
ثم امسك الدبل و اسحبة طقة وحدة هذا الخفيف
الثقيل ما يشبك الا بالهيار او اذا بغيت تسحب احد مغرز بس انتبه تمتل الموتر اللي تجره لانه راح يعدم عليك صليبات العمودين كلهن و يضر القير ايضا
لكن عند شبكه (الثقيل) لازم توقف و تحط القير (n) يعني فاضي ثم تسحب الدبل الى اخر خانة (بسرعة عشان ما تتطلع قرة و صوت الترس)
اللي هي (L)الثقيل طبعا و عند الفصل تفصله بسرعه لازم تصير يدك خفيفة و سريعة عشان ما يقر الترس
نفترض انك غرزت برمل شديد و جيت تبي تشبك الدبل الثقيل
((اهم نقطة)) حاول تقدم او ترجع الموتر لو مسافة (شبر)لان الدبل الثقيل ماراح يشبك الا اذا حركت الموتر خفيف
طبعا لو ما سويت هذه الحركة وشبك الدبل على طول ثم حطيت الموتر بالدي و دعست بنزين راح تسمع طقة قوية جدا بسبب ان الدبل الثقيل شبك و لذلك
احذر من ذلك لانه فيه خطورة على الترس انه ينكسر كما يضر جنزير الدبل و طبق الطريقة السابقة
عند شبك الدبل الثقيل//يفضل انك تحط القير على 3 الا بغيت تسحب احد تحطه على 2*1 عشان يرتاح القير يصير بنمره ثقيله كانك حاط القير العادي بواحد و انت تسحب
عند شبك الدبل الخفيف //يفضل انك تحطه على 3 عشان يرتاح القير من كثر التعشيق و لا تحتمي الكلتشات و عشان ما يبدا كل شوي يعشق القير اذا
جاك غراز شديد و انت تمشى نزل القير الى 2*1 او ادعس بنزين حتى لو هو على 3
الشيروكي يمتاز بميزة//خفة الوزن و ايضا اذا كانت كفراته هانكوك و الهانكوك لين و حطيت بهن 20 راح يمشي معك بالخفيف مرتاح
انا دايم بالديرة و بالنفود بهن الكفرات 20
********************
معلومة جانبية//
انا كان عندي موتري فيه حرة اذا وصلت سرعة 110 و طالع يستمر الصوت و يبدا يطلع و يروح كل 5ثواني
طبعا ساق موتري شخص مختص بالشيروكيات يوم وصل سرعة 130 قام و رفع رجله من البنص و شبك الخفيف ثم دعس بنزين يوم اختفى الصوت
**من اين المشكلة**
قال من عمود الدبل العرموطة الاثنى و الذكر متوسعة والحديد اكل بعضه و السبب من عدم التشحيم لانه لما شبك الدبل حمل العمود على بعضه و اختفى الصوت فلازم تحط ببالك ان العمود يشحم كل شهرين اقل شي
***********
اي استفسار حنا حاضرين


تحياتي لك

[سوبر VTC]

طبعا ان الله وفقك بالموتر لازم تغير زيت القير كل 20000الف او 25000 عشان يعيش معك القير و لا تخرب الكلتشات و التروس من رايش التروس اما فلتر القير فهو شخال حديد يعني ينظف ببنزين فقط و يغسل و لا يغير و لازم تشيك على طرمبة الماء و على بلف الماء و على غطاء الاديتر اما طرمبة البنزين فيفضل استبدال فلتر البنزين و مكانه فوق التانكي مباشرة اعلى الطرمبة و لا تنسى البواجي اما الكويلات قليل تخرب
****
توجد ورشة البريدي شرق المعارض رجال سعودي يفحصلك الموتر و تراه رجال اجودي ما يقصر معك اسئل اللي هناك يعلمونك مكانه

[جمعان 22]

الشروكي ....اداء قوي

اعطال كثيرة - عندي كم واحد من ربعي - وايضا حسب كلام الاعضاء

حجمه صغير من الداخل .... واذا حملت فيه شيئ بينزل كثير من الخلف


اذا انت معزم حاول تكون عندك خبرة باعطاله ....لانه يمكن يوقف عليك ويتعطل في البر او ترتفع حرارته

[أبو. سعود]

بارك الله فيكم ورحم الله والديكم كفيتوا ووفيتوا

[أبو. سعود]

رحت وشفت الشيروكي وياليتني ما رحت ( طار الحلم ) :(
مقرقع ولا ينبغى لو قالوا لي بخمسة ما شريته الله يعوضني بخير ان شاء الله

[راعي طويلات]

الخيره فيما اختاره الله
والشروكي بالذات لاتطيح الا على النظيف والا بيبهذلك

[ابو شهد جدة]

ابو سعود لاتشيل هم ربك كريم امكن الله مو كاتبلك هذي السيارة.

لكن ابشر اذا تبي ادورلك عندنا في جدة وش رايك؟

[أبو. سعود]

الله يبارك فيك اخوي ابو شهد ماتقصر والله بس خلاص يارجال طابت النفس لأني من العام وربي ادور ومليت ....في الجنة ان شاء الله :)
على العموم كلمة حق بقولها لاعضاء هذا الموقع وبقولها بختصار مره وهي :

رجاااااااااااااااااااااااااااااال

[سوبر VTC]

تبي المواتر الطيبة و ما هنا اكثر منهن بعنيزة و يوجد الان شيروكي كلاسيك لؤلؤي داخلي بيج قزاز كهرب و قير تماتيك البدي على الشرط اللهم صدامته بهن مخوش بسيطة طبعا توه موضب و اغلب الشيروكيات موضبات و خبرك الموضب اخت المكينة الجديدة و التوضيب باحسن ورشة طبعا الموتر ماشي تقريبا حول 200000الف اقل او كثر و كان راعيه حاده علي ب27000الف
انا اقول الموتر لا يفوتك
تحياتي

[أبو. سعود]

http://img119.imageshack.us/img119/6949/87428140hp3.jpg