وكالة الجميح

[أبن الجنوب]

احد الزملاء راح لفرع الشركه بتبوك و طلب شراء سياره نوع كابرس 2008 بنظام التاجير وقدم 10 الاف ريال
واستلم السيارة وبعد اسبوع طلعت ريحة الخياس القير فيه اصوات طقطقه والسياره تطفي عند الاشارات وشوف
الفضيحه 2008 المهم راح للوكاله واخبرهم بالمشكله لكن لاحياة لمن تنادي وقف السياره عندهم وطلع المشكله في كمبيوتر السياره
واستبدلوه من سياره ثانيه كانت متوقفه وتعاني من مشكله وتركها صاحبها المهم رفض زميلي الحل هذا وطلب انهم يغيرون له السياره
المهم قلت له اتصل بالشركه في دبي واتصل قالوا خلاص يغيرونها لكن الجميح رفض وترك زميلي فكرة شراء السياره قالو انتضر نشحنها للرياض ونبيعها هناك ولا ردو له قيمة المقدم وقالوا له لااحنا بنطالبك بباقي قيمة السياره ايش الظلم هذاتشتري سياره جديده
على الضمان مفروض خمس سنوات مايفتح كبوتها ولا كان ياخذ مستخدم ويصلح كل شوي عندكم لنا حل او رأي وشكراً

[سيف الظفير]

خلها على العزيز الحكيم


هؤلاء المحتالون من اين جمعوا تلك المليارات والملالاين !!!!!!!



الجميح والعيسى و الن**** الاكبر الحمراني و ابو جميــــل


تم تحرير المشاركة بواسطة المشرف

[بواسامه]

عليك بالدعاء والشكوى الى الله

[ولد الدواسر]

الله يعين على النصابين أنا من 3 سنوات صار لي موقف
وبعدها حرمت أشتري من الوكالات السعودية بشكل عااااااااااااااام
ياخي وين حماية المستهلك

[ابوعقل]

لا حول ولا قوة الا بالله

[بدوي جنوبي]

اليوم التشهير بالوكالات
اللي تقدم خدمه سيئه للعميل

وذكر الوكالات المميزة في التعامل مع العميل ما بعد البيع

[جمعان 22]

قاطعوهم ... واشتروا وارد اي مكان ثاني

او تقوم مكشات بعمل شركة صغيرة لطلب السيارات للاعضاء من الخارج بعمولة بسيطة :d

[غالي]

حسبي الله ونعم الوكيل

ماله الا يرسل فاكس على قصر الجميح

ويشرح وضعه ويتحيسب ويحط رقمه

عل وعسى يخافون ربهم برمضان

وبيته في التخصصي ياخذ فاكسه من الاستعلامات

والله يعينا وياه عليهم

[ابودهام]

حسبي الله ونعم الوكيل

انا احد ضحايا الجميح وكل ما امر من عندهم اتحسب عليهم

الله يعوضه خير

[فتى التويم]

الله لايعطيهم عافيه

واحد اعرفه معه تاهو 2008 شاريه جديييييييد

طلعه من الوكاله وطلع له صوت ورا على اليمين

وراح لمهم وعلعلوه في الموعد ويوم جا الموعد علعلوه زود

وحطها عندهم وقعدت اربع ايام وراح الصوت

ويوم طلع من والكاله وقعد يومين رجع الصوت من جديد

[othmanll]

السالم من الوكلاء يعرج

[أبن الجنوب]

اليوم زميلي صاحب الكابرس راح لهم يشوف هم يردون له العشرة الاف قالوا حنا نبي منك 15000 ليش مدري حسبنا الله ونعم الوكيل

[الخادم]

الله يعوضة لكن و ين حماية المستهلك الله يهديهم

[مـدحـدر]

هذا الموضوع منقوووووول من منتدى مجاور:D

7

7


7

طبعا الطريقة برقية الى الديوان الملكي

واليك التفاصيل :

كيفية ارسال برقية للديوان الملكي وشكوى وزارة

التجارة والوكيل الموضوع سهل جداً ومجرب ...

1- روح لوزارة التجارة واشتك عليهم وتأكد إن

خطابك تم توريده برقم وتاريخ معين وخذ رقم

التوريد والتاريخ ولا تضيعه ولا ترجع لهم ابد

ولا تروح لهم ثانية.

2- بعد 7 أيام فقط أرسل برقية للملك عن طريق

الرقم 969 ومن هاتف بيتك .. واكتب إنك اشتكيت

للوزارة ولا تجاوبوا معك.

3- البرقية كل كلمة بريال يعني لا تكثر قرق .. لا أنت

عندك قروش واللي يقرأ البرقيات عنده وقت...

نص البرقية للملك يجب أن تكون كالتالي:

"خادم الحرمين الشريفين يؤسفنا أن نرفع لمقامكم

الكريم الظلم الذي وقع علينا من شركة ........... وكيل

سيارات ........ حيث اشترينا منه سيارة جديدة وقد تعطلت

عدة مرات حتى ولم نجد لديهم قطع الغيار اللازمة علماً

بأننا رفعنا الأمر لوزارة التجارة ولم نجد منهم أي

تجاوب .. خادم الحرمين ليس لنا بعد الله إلا أنتم في

أخذ حقنا كاملاً من هذه الشركة وأمثالها "

ولعلمك ترى ما تحتاج تمدح ولا تردح بالبرقية

أصلا الملك ما يشوفها ولا يقراها إلا إذا تكررت

أكثر من مرة لنفس المشكلة...

وعموماً شنبي مهب على رجال إذا ما حلوا

مشكلتك بس عشان يفتكون من برقياتك...

سألني واحد جربتها ؟

1- مع الغرفة التجارية وخفضوا رسم تجديد

السجل من 900 إلى 300 ريال

2- مع البنك الأهلي استرديت مبلغي بسرعة

البرق بعد ما اشتكيتهم مع مؤسسة النقد

ملاحظة: لا يمكن تسجن عشان برقية إلا اذا

قليت أدبك مع الملك أو ارسلت في أمور ما لك

علاقة فيها - مثل ليش ما تفكون الربط بين الريال

والدولار - أما مطالباتك بحقوقك فصدقوني سمعت

قصص يشيب لها الولدان مثلاً:

موظف في أرامكو كل يوم ياخذ طرف غرفة وينام

ولا يشتغل... بعد 5 سنوات نوم رفع برقية إن ترقيته

متأخرة .. جته الترقية قبل اخوياه اللي يكرفون

بتسكتون على حقكم اسكتوا وخلوا الذيابه تاكلكم

[راف]

خذ كلام اخوي مدحدر أعلاه بعين الأعتبار واعمل فيه ..

[صبي غلباء]

كفو والله اخوي مدحدر
هذا الحل لان الاشكال هذي مالهم الا واحد حد سيف مثل ابو متعب الله يطول عمره لو يشمون خبر انك رافع برقيه تضلم يحلون مشكلتك على طول عشان اذا جاء استفسار يقولون احنا حلينا مشكلته بس هو الله يهديه مستعجل ومتسرع مرررررره ههههههههههههههههههه الخوف ومايسوي
وكما قال الاخ ماراح يعطونكم الوكلاء حقوقكم وانتم ساكتين طالبو جهات الاختصاص واذا ما نفعوكم تضلموو لواحد ان شاء الله ويعينه الله ان يرجع حق كل مظلوم
شكرا

[أبن الجنوب]

شكراً لكل من تفاعل مع هذا الموضوع وسنأخذ بنصيحة الأخ مدحدر واطلع زميلي على ذلك شكراً جزيلاً مع عدم السكوت عن اي مخالفه اوظلم من قبل الوكالات ونفسي يكون للشركات العالميه فروع في المملكه اسوة بدبي ونفتك من الوكلاء الغثيثين 0000تحيه عطره لكم جميعا

[0ابوعزوز0]

الله يحفض ابو متعب من كل مكروه ويخليه ذخر للوطن

[ابوعيسى1000]

حسبي الله ونعم الوكيل

[أبـو فـايـز]

لو قاطعهم الناس مدت شهر واحد فقط, كان شفتو اللي يسركم :)

[مطارد]

الشكوى لله .....

[منصوووور]

لاحول ولاقوة إلابالله
متى نفتك من إستبداد الوكلاء:(