صوروخطه عمليه تدعوا الكشاته لتطبيق مقولة(اجعل المكان افضل مما كان) ...!!!

[((( الحر)))]

اخواني اعضاء وزوار منتدى مكشات...!!!

السلام عليكم ورحمة الله وبركاته...!!!

في يوم الثلاثاء الماضي طلعت مع كشاته اول مره اطلع معهم في روضة من رياض المستوي الي على حد الجال...!!!
ولاحظت عليهم قل الاهتمام بنظافة المكان لانه حسب كلامهم مكان بعيد ولا فيه امل ياصله كشاته لانه يبعد عن اقرب خط ازفلت حوالي 30 كم صحراء حزوم ونفود...!!!
وقلت ياولد انصحهم واعلمهم اهمية النظافة ولو كانو في (قفر من الخلا) وان فيه موضوع بمكشات مسويه ابو عبدالله شقردي الله يجزاه خير عن النظافة على انهم مايعرفون مكشات الا باسمه ولاكن لعل... وما فيه فايده ماهتموا...!!!
قلت ياولد تدري خل اسوي لهم خطه ودرس عملي يمكن يفيد فيهم افضل من النظري:D محاضرات جامعه...!!!

بعد ما جمعنا العزبه وحملناه بالسياره وركبنا ولا بقى الا تسكير الباب...!!!
نزلت من السياره قالو وين يابو محمد... قلت دقيقه تفرجوا انتم بس... قمت واخذت كيس فاضي وقمت اجمع كل المخلفات الي بالمكان ولا اخذ معي دقيقه...ثم صورت المكان...!!!

والله العظيم انهم استغربوا من جمال المكان بعد تنظيفه......... وقال واحد منهم والله انه من جمال الكشته وأناستها انك تلتفت لمكانك بعد ماتمشي تلقاه نظيف وجاهز للي يجي بعدك والله انك ماقصرت يابو محمد:D :D :D تشققت يوم مدحوني...!!!

والحمد لله الي من علينا بهذا الخير والربيع واعاننا على نفوسنا حتى نحافظ على حسنه وجماله...!!!

وهذي صورتين توضح الفرق...!!!

الاولى .....قبل تنظيف المكان ...!!!

http://www.mekshat.com/pix/upload/images3/x0051.jpg

الثانيه...... بعد تنظيف المكان..... ولا بقى اي اثر الا مشب النار...!!!

http://www.mekshat.com/pix/upload/images3/x0050.jpg

[ابوجوري]

السلام عليكم ورحمة الله وبركاته

ليت كل الكشاته مثلك بأخوي (الحر). أنت أعطيت درس بسيط لاكنه كبير في الفائده.

شكراً لك اخي الكريم على هذا الجهد

[راعي عنيزة]

اي والله انك ما قصرت يابومحمد
وبفعلك هذا صرت قدوه حسنه لزملائك في الكشته وبدورهم كل واحد بيصير قدوة حسنه لربعه وابتل لحد ما يصير المجتمع كله محافظ على النظافه مثلك يابومحمد :)

ولو انك من تالي ما ودك تحافظ على النظافه وودك الا اقبلت على فيضة مربعه تسحب فيها جلنطات لما يغدي الربيع نسيا منسيا عشان ما يجيك علم عقب كم اسبوع انه طلع له اسفلت يشق البر وحوطت بشبوك وممنوع الاقتراب من مسافة قلايع وادرين ;):D

[صقر]

مشكور اخي الحر على هذه البادرة الطيبة

والحقيقة انك رائع .... اصبحت قدوة لخوياك في الكشتة ... وايضا اصبحت قدوة لزوار مكشات...

بارك الله فيك......

[عاشق البابونج]

اخوي الحر
السلام عليكم ورحمة الله وبركاته

هذا يدل على إنك أنت أصلاً نظيف

وأتمنى من الكشاتة يتركون مكان كشتتهم بما يدل على اصل من ترك هذا المكان

[عاشقة البر]

ما قصرت

ويعطيك العافيه

:)

[Ra7aL]

يعطيكم العافية وما قصرتو

وحمدالله على سلامتكم

وهذا الشي الي أي أنتو سويتوه اندل فيدل على اصالاتكم وياليت كل الشباب
مثلكم.


وجزاك الله خير،،،،،،؛

[سمنان]

اخوي ((( الحر)))

السلام عليكم ..

بارك الله فيك .. وكثر الله من امثالك

بس عندي استفسار لا عدمتك ..

انا روحاتي للمستوي واجد بحكم وجود مزرعة خوال العيال هناك ..

وابي لو تكرمت وصف المكان اللي انتم فيه واحداثياته .. اذا ما فيه كلافه ..

ولك الشكر مقدماً ..

[عاشق الصفاري]

تسلم يمينك يابومحمد هذا الشغل الصحيح..بارك الله فيك اخوي على المبادرة الطيبة.. ومشكورر

[عجاج]

مشاالله عليك يالحر ويعطيك العافية فعلا انت قدوة حسنة .
المشكلة يوجد ناس تطهبل بالنظافة وتزبرق الكلام
الي يسمعه يقول هذا خطر يغمى عليه اذا شاف منديل بالارض
واذا طلعت معه تمشي وتلقط وراه المناديل الي يرميها بالارض
وماقول الا الله ينفع به واغديه مع كثر الطق يلين ويصير نظيف

[الحاتمي]

((( الحر))) شكرا لك على اهتمامك بنضافه المكان
وليت اي واحد يكشت يسوي سواتك اللي تبيض الوجه
مجهود قليل وعمل كبيرلا يشعر به الا من ياتي بعدكم الى
نفس المكان ويرى آثارمشي ارجلكم فقط
من دون وجود اي شي من نفاياتكم....
درس مكشاتي رائع من ((( الحر))) الرائع

[حفرلوجيا]

الحقيقة انك رفعت الرأس يابو محمد .. في سلوكك ... ومن هنا نعرف إذا قالوا ( الوعي ممارسة وسلوك ) وليس مجرد شعارات تقال وتردد بالمجالس والمنتديات ..
بس ودي الله لايهينك .. وعساك على القوة تكرر الكشتة مع نفس الربع .. وتسوي نفس السيناريو .. وإذا ركبوا ولا اهتموا يالتنظيف .. أيضا تنزل بشخصك الكريم .. بس هالمرة تروح لشنطة السيارة وتنزل المشعاب .. وإذا أنت تغليهم تنزل المسحاة .. ومنين مايوجس ( واحدهم ) .. إلا إذا عقلوا ..:p
وبكل الأحوال سلامنا لك ولهم..

[العبري]

يعطيم الله العافية وليت كل الناس مثلك

[ابو عايد]

مشكور اخي الحر على هذه البادرة الطيبة

والحقيقة انك رائع .... اصبحت قدوة لخوياك في الكشتة ... وايضا اصبحت قدوة لزوار مكشات...

يعطيك العافيه اخوي الحر على هذه الدعوه الصادقه

فإذا فعل كل انسان في هذا العالم لن تبقى بيئتنا ملوثه وننعم بالهواء النظيف والمياه العذبه

فهذه الدعوه في محلها ... فلنسارع الى تلبيتها

فتقبل تحيات اخوك// العاشق الولهان

[abos3d]

الله يجزاك خير يالحر وانا اشهد انك حر بتصرفاتك الي ترفع الراس تسلم والله يكثر امثالك

[((( الحر)))]

(((اخوي ابو جوري)))
بارك الله فيك ومشكور.... واعجبني بيت الشعر الي بتوقيعك يابعدهم...!!!

((( اخوي راعي عنيزه)))
مشكور يالغالي ومن ناحية التسوير والشبوك ارض الله واسعه وكل مابعدت كل ماكان اوسع صدر وتعرف اراضي جديده ورجال شرواك يابو حمد...!!!

((( اخوي صقر)))
يامرحبا تراحيب المطر والله تشرف الموضوع برد مثلك وشرواك ..... والقصد يالغالي الفائده للجميع...!!!

((( اخوي momjam )))
النظافه وانا اخوك نظافة القلب وطهره من النجاسه والانانيه لان المكان لك اليوم.... ولغيرك غداً...!!!

((( اختي عاشقة البر)))
الله يسلمك الف شكر...!!!

((( اخوي Ra7aL)))
بارك الله فيك وماقصرت لاكن كلمة(( اندل)) باي قاموس:D :D ...!!!

((( اخوي سمنان)))
ابشر بسعدك يالغالي والي تبيه اتتشرف بتزويدك فيه...!!!
هالموقع هو الجال الي بين جال حزوم المستوي الي من عند نفود راس الملحا من النفود (( نفود السر)) وكله فياض ورياض وهالوقت الفياض مليانه ماء والاحداثيه بالجهاز.... والجهاز بالسياره واذا انت صامل بالاحداثيه ابشر بسعدك...!!!

((( اخو عاشق الصفارى)))
العفو يالغالي وبارك الله فيك...!!!

((( اخوي عجاج)))
كلامك صحيح وفي محله الفعل ابلغ من القول وتسلم والله ...!!!

((( اخوي الحاتمي)))
تسلم يالغالي وانا ماسويت الا مايمليه علي ضميري من شكر نعمة الله...!!!

((( دكتور القلم حفرلوجيا)))
ههههههه الله يقطع بليسك ردود هادفه وساخره بنفس الوقت ولاكن حلووووووه واضحكتني بارك الله فيك ابو سليمان...!!!

((( اخوي العبري)))
مشكور اخوي وبارك الله فيك.... وعلى فكره اسمك نسبه الى العبري الشجر المعروف... او العبري الرجال الي يأشر للسيارات بالخط :D ...!!!

((( اخوي ابو عايد العاشق الولهان)))
جعلك والله سالم وماقصرت...!!!

((( اخويabos3d)))
مشكور يالغالي وهذا واجب على الجميع...!!!

[ابو عمر اللاحم]

يامال العافيه يا ابو محمد على هالدرس العملي الجميل .. اثابك الله والنظافه من الايمان .

الله يعطيك العافيه ويكثر من امثالك .

تقبل احلى تحيه ،،،

[كحيـــــــلان]

أخوي ابو محمد أنا اشهد انك حر وسويت الواجب وأكثر.
بعض الأخوان يستحي يقوم يقش الزبايل أكرمكم الله. بس هذا هو الأسلوب اللي يحرجهم.

المشكله الحين إذا طلع معك بزران وعوايل من غير بيتك. بالنسبة لعيالي انا عاسفهم على إحترام البيئة والمحافظة عليها، لكن عيال الأخرين وش تسوي معهم. لذلك اتبعت طريقة آتت ثمارها وهي اني جمعتهم وقلت لهم " مين صديق البيئة يا شطار ، وأول من قال أنا أنا أنا (عيالي)، المهم قلت لهم صديق البيئة هو اللي يحب يحافظ عليها ويحميها ولا يخلي أحد يخربها ، بعدين يزعل عليه ربي. وعطيت عيالي الأكياس وقلت كل واحد ياخذ معه كم بزر ويدج من جهة:). المهم البزران قاموا يتناظرون وكنهم يقولون ( وشفيهم ذولا يلحطون البر):) والله ياشباب انهم قاموا يظفون المناديل والقشاش لين خلوا المكان زي الفل. وبعدين عطيتهم جوائز. وفي المرة الأخري جمعتهم وقلت من هو قديق البيئة ياشطار؟ ما وعيت الا كلهم يناقزون ويقولون أنا أنا أنا.
وبهذي الطريقة خليتهم يهتمون بنظافة المكان.

هذي قصة البزران، أما سالفة أبوهم فهي بعد ما شلنا الخيام وربطنا القش وكلن ركب سيارته خذت كيس مثل ما سوى أخوي أبو محمد ونزلت القط ماتبقى من الأوراق والمناديل وقراطيس الكتكات والحلاو. جا الرجال وقال خير يابو سعد وش تسوي؟ قلت، لا ابد رح أنت ابا انظف شوي. نزل الرجال من الأحراج وقام يلقط معي والبزران طبعاً نايمين بالسيارات والا كان نزلوا ولقطوا. وبعدين قال: يابو سعد والله لو ان كل الناس مثلك كان حنا بخير. قلت له ترى مثلي كثير انت ما تدخل مكشات المهم الواحد يتعلم والحين انت بكره إذا طلعت مع أحد ثاني بتسوي زيي وأكثر . قال صدقت والله.

ياشباب حبيت أجيب هالسالفه علشان نقطتين مهمتين وهي :

1) انك لازم تكون قدوة للكشاتة اللي معك ولا تستحي منهم وتقول بيقولون "الله وأكبر يالنظيف" ما عليك منهم لأن فيه ناس من هالشكل لا تستحي ولا تنتخي.

2) زرع هذا السلوك في الأطفال منذ الصغر لأن الطفل بكره إذا كبر أكيد بيسجل بمكشات وبيكشت.

أرجوا اني ماطولت عليكم ، معليش استحملوني داري ان صدوركم وسيعة مثل الصمان.

تحياتي،،،،،

[سمنان]

الشرف لي وانا اخوك يا ((( الحر)))

ما قصرت جعلك تسلم .. وان حصلت الاحداثيات فياليت .. وترى ما من عجله .. متى ما حصلك واخذتها من الجهاز وذكرتني .. ارسلها لي على الخاص

عاجز عن الشكر .. وكلك ذوق اخوي

[نفل]

السلام عليكم ورحمة الله وبركاته

جزاك الله خير ابو محمد والله يكثر من امثالك ولو كل الكشاته مثلك كان ما به داعي نكشت بعيد علشان
ندور مكان قفر ونظيف .

والله يمتعك بالصحة والعافية

اخوك ابومحمد

[عبدالعزيز الدباسي]

هذا الشغل السنع يا ابو محمد ،، بارك الله في جهودك ،، انت يالغالي قمت بممارسة شعارات تنادي بها ، فانت من الاعضاء الداعمين للحملة التوعوية التي اوجدناها في مكشات ،،، ونعلم ان هذا التصرف ليس جديداً عليك وانما تفعيلاً لما ننادي به .

آمل ان يكون هذا التصرف ايجابياً من ناحية المكان ،،، وايجابياً من ناحية انطباع السلوك لدى بقية الزملاء .

وتقبل تحياتي

[((( الحر)))]

((( اخوي نهار)))
يشرفني مرورك على الموضوع وتسلم يالغالي وهذا واجب على جميع اعضاء مكشات...!!!

((( اخوي كحيلان)))
احسنت بارك الله فيك ....!!!
نعم هذي النفاط الهمه بالموضوع...!!!
1) انك لازم تكون قدوة للكشاتة اللي معك ولا تستحي منهم وتقول بيقولون "الله وأكبر يالنظيف" ما عليك منهم لأن فيه ناس من هالشكل لا تستحي ولا تنتخي.
2) زرع هذا السلوك في الأطفال منذ الصغر لأن الطفل بكره إذا كبر أكيد بيسجل بمكشات وبيكشت

((( اخوي نفل)))
هلا وغلا بملك الروعه والتفوق الرقمي.........الف مرحبا...!!!
كلامك صحيح بارك الله فيك...!!!

((( اخوي شقردي ....ابو عبدالله)))
ارجو ان ترى املك حقيقة امام عينيك...!!!
واسال الله العلي العظيم ان يمتع الجميع بالصحة والعافيه حتى نرى حلم الجميع عامة وحملة اخوي شقردي خاصة واقع ملموس ومشاهد...!!!
ولعل صلاح او وعي احد افراد الرحله يمتد الى الجميع وهكذا حتى يعم الوعي الجميع...!!!

تحياتي للجميع..................((( الحر)))..................ابومحمد...!!!