اسعار التشاليح والجديد ..قصه وصوره

[واطي الجمرة]

السلام عليكم ومبارك عليكم الشهر

هذه القضيه تجددت في ذهني بعدما ذهبت بالأمس لتشليح الحاير من اجل قطعة بسيطه وهي يد باب الشنطه الخلفي للشيروكي..الظاهره في الصوره
http://up5.m5zn.com/photos/00241/24hphhqqtl9d.jpg
طبعا انا سعرت القطعه عند الوكيل (المتحده) لأني لم اجد تجاري وذلك في الصناعيه القديمه وقال لي بعد الخصم 260 وليست عندي اذهب الى فرع خريص...المهم قلت ياولد رح للتشليح وخذها القطعه عاديه لاهي كهرب ولا ميكانيك وتعرفون تشليح المطيويع هو المتخصص في الشيروكي وذهبت لهم بعد التراويح والقطعه العطلانه في يدي والقى الزول توه فاتح ويبي يستفتح قلت له عندك زي هاذي قال موجود قلت بكم قال 250؟؟؟؟؟؟؟؟؟؟؟ مواتر منطوله في الشمس لها سنيين وقطعتي بلاستيكيه يعني لو اخذها بتنكسر 100% المهم تلاغيت انا وياه وكان فيه زباين ورفعت صوتي عشان يسمعون وقلت ياخي زي الوكاله ولا اغلى بعد قال خذها ب 150 وقلت معصي ومشيت ويرزفني الله بتشليح على نفس شارع المطيويع بس على اليمين اسمه المركز الدولي فيه شاب سعودي ورخيص ونصوحي واحصل عنده باب شيروكي خلفي قلت ابي اليد بس قال عادي ب 100 ريال مع ان ملاحظة ان التشليح مضلل بالكامل والباب جديد ولله واخذها واركبها وطلعت تمام واخف من الأوله


والمطيويع لي معه اكثر من قصه في الغلاء الفاحش عند الزوله الي يعطيك السعر من راسه

ودي نتناقش عن اسعار قطع التشاليح وجودتها

[بواسامه]

صدقت:good:
التشليح اكبر غلطه ان الواحد يروح لهم يوم الجديد موجود ولو بزيادة سعرمايخالف اسمه جديد ومتوفر


واسمحلي ان هالقطعه اللي خذتها عمر اللي رميتها يعني تخاف من خرابه يكون قريب
سلمني على الجديد ووكاله
ناهيك عن اسعارهم الفاحشه وفوق الخيال
والبعض يبدأ بهم واهذه اكبر غلطه:no2:
ويمكن تشتري من التشليح واللي قبلك مركب تجاري موب اصلي
التشليح يحتاج له اللي القطعه مو موجوده عند وكيلها
ولا تكون غاليه باضعاف عند الوكيل ولا لا تباع الا كامله بقطع اخرى ممكن اروح للتشاليح واطلب الضمان لعمل اي قطعه اريدها


التشاليح اكذب من الوكالات في الاسعار واغلى واقدم وقابله للخراب اسرع

[شامخ ألهيلا]

صدقت والله

واكبر رزق التشليح عند الناس الي مايعرفون سعر القطعه بالوكاله
ويفكرون ان التشليح اقل سعر من الوكاله

ونش استبنه لجيب لاند مع القاعده كامل بالتشليح 1250

كامل من الوكاله 800 ريال

قمة النصب والله

[أبو أسامة]

والله أنك صادق

يا أخوان أنا مرة بالتشليح وبالصدفة شفت لي أرمادا قلت خلنى أسئل عن شمعاته الأمامية رغم أن موتري أيامها الأرمادا مابه مشكلة المهم قالي صاحب التشليح ... بـ1000 ريال كاسرت معه يالحبيب منا منا قال آخر شيء مره ...... وتمر الأيام وأمر الوكالة وأطلب لي قطعه لموتر ثاني وأذكر سالفة راعي التشليح وأسئل الوكالة عن أسطب الأرمادا قالوا لي قبل الخصم بـ656 ريال ........ يعني بتصير بعد الخصم بـ 550 تقريباً يعني التشليح دبل قيمتها بالوكالة .........

[وقيان]

انا شايف ان اللي سواه اخونا واطي الجمرة صحيح...يعني اسأل عن سعر القطعة بالوكالة...و بعدها رح التشاليح عشان تقدر تقرر هل السعر مناسب ولا لا..

[الشهابة]

خذ هالقصة عندك اخوي واطي الجمرة ..

في يوم من الأيام في ما مضى .. واحد من خوالي طب المعارض يدور سيارة .. المهم الرجال شاف له فولفو و اعجبته بمميزاتها .. كتب الله الامر و اشتراها الرجال .. مع الايام انكسر الأسطب الخلفي الأيسر .. قال السيارة فولفو و قطع غيارها غاليه و المحلات اللي يشتغلون في الفولفو و قطعها قليل .. المهم رحنا للتشليح و دوران لين لقينا الأسطب بالقوة .. اشترينا القطعه بـ 600 ريال .. وقلنا اذا التشليح يبيعها بالسعر هذا اكيد المحلات و الوكاله اضعاف السعر يعني كنا شبه متأكدين إن سعرها بيتعدى الألف بالراحه .. المهم ماعرفنا نركبها و رحنا للصناعيه نبيهم يركبونها .. و قفنا عند ورشه يركبونها و قريب منهم محل قطع غيار فولفو .. رحنا و سألنهم عن الأسطب الخلفي .. لقيناه جديد و اصلي و كامل بـ 350 ريال بس .. و هاتك يا قهر و غبنه .. بس ما نقول إلا حسبي الله ونعم الوكيل .. و الدنيا دروس و عبر ..

[صقااارالدمام]

الله لايهينك على التوضيح وتقبل مروري

[escape_man]

الاشياء الاستهلاكية ما اشتريها من التشليح ابداً

لكن صداديم - رفارف - مراتب .. يعني الاشياء الي ماتتوفر بالمحلات خصوصا للمواتر القديمة

فهذي الي اخذها منهم

[ابوعبدالله678]

كلامكم 100% صحيح
صار مع اهل التشليح موقف
رحت اسئل عن ربلة صدام باث فايندر خلفي قال الزول نبيعها مع جسر الصدام ( 2500 ) ولا ادري القطع اصليه او لا ، تركته ورحت للوكاله لقيت الربله والجسر ( 1000)
حسبي الله عليهم ان كانو يدرون عن الاسعار.

[أبو حطب 2008]

نفس سالفه الاخوان واحد من الاقربا عنده شمعة الهايلكس 2002
خربانه راحللوكاله قالهم بكم قالو260
وراح لتشليح الحاير في تشليح متخصص بالهايلكس ناسي اسمه
المهم سالهم بكم قالو 250 تطاق هو وياهم وخذها من الوكاله
وحسبي الله عليهم

[القناص-sniper]

انا واعوذ بالله من كلمة انا صارت لي سالفه مع التشليح الا سوالف باذكر واحده

والله التشليح يا جماعه الي يدور فيه ويتعب بيحصل الي يبيه وبالسعر الي يبيه

المهم انا عندي سيارة صغيره اكنسنت موديل2001 راح علي العكس الأيسر

اذا مشيت تسمع طقطقه قويه مع الملفات قلت اغيره رحت للوكاله قطعه كامله الاصليه ب 900 ريال

والله اني حسيت بالمحل يلفبي لف وانا اطلع واهوجس واروح لتشليح الحاير وادور وافر ويمين ويسار

والاقي اكسنت 2005 مصدومه والزول مطلع العكس والربلات الي عليه مفقعه بس بصراحه عكس جديد

والله يالمعته ما شاء الله جديد اخذته ب 150 ريال واروح اشتري ربلتين ب 150 اصليه وتركيب شغل يد 100 ريال يعني الشغله طلعت علي كلها ب 400 ريال شفتوا الفرق كم ؟؟؟؟ 500 ريال

امل اني ما طولت عليكم وتحياتي للجميع

[واطي الجمرة]

طرحكم اثرى الموضوع وهناك نقطه يجتمع عليها الجميع وهي انه يجب عليك معرفة سعر القطعه وكاله قبل ذهابك للتشليح حتى لاتكون فريسة سهله لهم

[مطحن]

السلام عليكم ورحمة الله وبركاته

الدبل يهوووووون ...

القصة صارت مع تشليح الخضير ببريدة

القطعة: تماتيك النور للكابرس

القطعة بالتشليح: 250 ريال

القطعة عند الجميح على طريق خريص بالرياض: 12 ،،،،، ايه اثني عشر ريال (اثنعش)

اخوكم عبدالرحمن

[شامخ ألهيلا]

الافضل قبل تذهب لتشليح

أسال عن سعر القطعه بالوكاله والموزعين
:cool: :cool:

[محب الفتك]

أنا بحث عن عروة جلنط لإحدى سيارات تويوتا ، عند الوكالة بـ 105 ، وعند التشليح بـ 300 ومنعفطة .

[ابو سحاب]

والله أنك صادق يا أخوي
أن ذا الزوله يلعبون فينا ولا حسيب ولا رقيب
الله يلطف بنا بس
تقبل مروري :D
أخوك أبو سحاب :good:

[ري ق 801]

قاعدة عند أغلب محلات التشليح ......!
أن الشخص ماجاهم إلي بعد مالف كل الوكلات وماحصل القطعة لذلك أصلخوه بالأسعار.....!
أنا شخصيا أنطعجة معاي الفلنجة الي تركب بالكرونة الخلفية للجيب حصلتها بالتشليح 150ريال ورحة للوكالة حصلتها 180 ريال

[واطي الجمرة]

ولله اذا كان الفرق 100 ريال اخذ من الوكاله يعني حسب سعر القطعه

[ساري 111]

هههههههه
ذكرتني بسالفه قبل كم سنه

كان معي رنج روفر 2004
رحت للتشليح (بالرياض) ابي الغطاء الصغير اللي على الجنط
وقبل اروح للتشليح اتصلت على الوكيل قالي بـ 50 ريال
قلت خل اروح للتشليح القاه بـ 5 المهم رحت ولقيته عند واحد والله ماادري وش اسمه
قلت بكم الغطاء قال بـ 200 ريال!!
قلت مجنون انت بالوكاله بـ 50 ريال
قال اخذه 150 قلت قسم انك احمق واطلع واخليه واروح اشريهن من الوكيل

والموقف الثاني انكسرت عندي شمعه النور الصغير وكنت بالقصيم ولافيه وكيل لرنج روفر بالقصيم رحت لتشاليح بريده (العجلان( لقيت عنده القطعه قلت له بكم ؟؟ قال بـ 800 قلت ياخبل جديده بـ 250 وحطه على طاولته وروح واخليه

[سوبر VTC]

موضوع في قمة الفائدة
تشكر عليه اخوي واطي الجمري
سياسة الوكالات خصوصا الجمس و التويوتا تقول كتالي
اشتر (طبعا بطريق غير مباشر) القطع من الموزعين لان الموزعين هم الذين يمشون بضاعة الوكالة...
لكن بعض الناس ما يرتاح و يظن ان الاصلي موجود عند الوكالة و هذه نظرة خاطئة لذلك يكون سعر القطعة دبل عن الموزعين
و الوكالة لاجيت تشري منهم تفرح بك عشان يقصبونك مهيب قايله رح اشتر من الموزعين ارخصلك
***
بالنسبة للتشاليح فالاسعار تتفاوت لانه اذا لقيت قطعه و باعه عليك غالية يقول و الله مشتراي للسيارة المصدومة غالي و مو معقول
ابيع لك برخيص و شلون اكسب و لو مشتراي رخيص اكيد ابنزل لك بالسعر
طبعا الكلام هذا يحتمل الصدق و الكذب من راعي التشليح
***
بعض المواقف الحاصلة في التشاليح كتالي
شخص يبحث عن لمبة سقف حقت المرتبة الوسطى لجمس م2003 قال بكم ؟ بعد التخفيض و المكاسر قال ب50 ريال طبعا بالوكالة غالية و طلع
وراح لتشليح اخر قال بكم ؟ بعد المكاسر تخيلوا قال ب15 ريال المهم اخذ القطعة و هو مغمض بلاش
***
شخص يبحث عن كمبرسور فان هونداي م2005 سال الوكالة بكم قالوا بعد الخصم سعره ب1600ريال دار التشاليح و حصل واحد قال كم ؟ بعد
الخصم قال ب900 ريال صاحبنا ذكي و سو نفسه غبي قال ياخوي بالوكالة (اظن) سعره فوق 1000 ريال بشوي راعي التشليح يبي (يستغفل)
صاحبنا قال ايه بس ترى تبيعه عليك الوكالة بدون البكرة و الرمان اللي على السير قال صاحبنا لا ياحبيبي الوكالة تبيعه كامل ب1600 ريال
وش الخربطة و استغفال الناس تحسب الناس دبش المهم طلع و خلاه و راعي التشليح يترجاه تعال خذه بالي تبي طبعا شراه من الوكالة جديد اظمن
من المستعمل
***
تحياتي

[سوسة حطب]

وسع صدرك عمود التوازن تبع الباث في الوكالة ب300 تقريباً ومحل تشليح يبي يبيعني بـ 500؟!!!!! غير أشياء ما تحضرني الآن بس هذه أخر نكته

[سيف الظفير]

صدقت والله

واكبر رزق التشليح عند الناس الي مايعرفون سعر القطعه بالوكاله
ويفكرون ان التشليح اقل سعر من الوكاله

ونش استبنه لجيب لاند مع القاعده كامل بالتشليح 1250

كامل من الوكاله 800 ريال

قمة النصب والله




لاحول ولقوة الا بالله

[أبوعبدالله900]

معليش ياجماعه كلامكم على العين والراس
لاكن الي يروح لتشليح وهو ماعنده خلفيه عن سعر القطعه جديده من الوكاله غلطان ويستاهل مايجيه
معروفه الي يروح لتشليح ياانه ماحصل القطعه بلوكاله او ان سعرها جديده غاالي
وبعدين انا بصراحه من المؤيدين لتشاليح طبعا بستثناء القطع الكهربائيه والبلاستيكيه الا المحفوظه جيدا
طيب ليش اقول التشليح افضل
اولا:ـ بالنسبه لسعر90% دائما التشليح ارخص
ثانيا وهو الاهم:ـ القطعه بالتشليح مفكوكه من الموتر وهي اصليه 100% شد بلد يعني كنك شاريها من المصنع مباشره وافضل من الوكاله
تقولي ليش افضل من الوكاله اقولك القطعه المركبه في السياره هي من نفس المصنع الي صنعت فيه السياره ومجربه قبل التصدير للخارج
ماهوب زي الوكاله يصنعون في مصانع الصين وتايلند ارخص تكلفه لهم واكسب في نفس الوقت ويقولون لك وكاله اكيد بتصير وكاله لاني شاريها من الوكاله لاكن هل هي نفس جوده الي راكبه على الموتر من المصنع قله ايه هين بس
تقبلوو مروري والعذر والسموحه على الاطاله

[ساري 111]

قبل فتره رحت ابي عصا المثبت اللي بالطاره

لقيته بالتشليح بـ 200 حق 2001 الكتابه اللي عليه ممسوحه من الكده

وااخذته من الوكاله بـ 150

[سوبر VTC]

بارك الله فيك
سعر يد شنطة باب الشيروكي بالتشاليح تقريبا ب50ريال او اقل
الاسعار للقطع على حسب مشترى راعي التشاليح
بمعنى بعضهم مايبي الخسارة لانه يبي يكسب و هذا لا باس
و بعضهم طماع جشع استغلالي
و بعضهم يتعذر بان المحل عليه اجار مصروفات رواتب...الخ

مثال عصا مثبت السرعه تويوتا نظيف جدا تاخذه ب40 او 50ريال
انت و اسلوبك

[alwssam6]

كثير من التشاليح يعرفون السعر وينقصون شي بسيط من السعر وتحتار بينهم لكن افضل الوكاله ولو سعرهازايد شوي المهم جديد مشكور على هذا الموضوع

[_دربيل_999]

بارك الله فيك على هذا الموضوع الرائع..
أخي الكريم هناك إعتقاد سائد بين الناس إن قطع التشليح قطع أصلية..فبمجرد وجودها راكبة في أحد السيارات نقتنع ونجازف وندفع فيها ثمن يفوق ثمنها بأضعاف..

سيارات التشليج نصف أو ثلاثة أرباع قطعهم قطع مقلدة ورديئة..طبق المثل على نقسك وش كثر القطع اللي استبدلتها في سيارتك...طيب كل السيارات تتعطل وتسبدل قطعها...!!

انا معك ان تروح للتشليح وتستفيد من القطع الأصلية والجديدة ولكن بشرط أن أكون صاحب خبرة أما إذا بروح للتشليح وأشتري قطعة لمجرد أنها راكبة في السيارة فهي أصلية فهذا خطأ ولابد لي من أن أستغل من قبل نصابين التشاليح...

وفقك الله..

الروقي

[ابومحيميد]

الورشة اللي ذكرت انت كنت زبون عندهم واسعارهم نار

[AMERALNET]

ليش تستغربون من الحركات هاذي
ياشباب انتم تدرون انه في تشاليح مابي اذكر اساميها
تشتري الهايلكس اخر موديل سواء غماره او غمارتين مثلاً موديل السنه هاذي 2010 وتبيعها بالقطع
وبكذا يجيبيون سعرها ضعف والله اعلم

[رفيع المقآم]

هههههههههههههههههههههههههههههههههههههههههههههههههه هههههههههههههههههههههههههههههههههه
يالربع التشليح كلن يلعب من عنده تصدقون حكاره مروحه فورد م 97 بالتشليح قالي تجاريه بـ250 قلت لو ابي اشتري سياره ترى راس مالها بلاستيكه لو احط كرتونه وفت وكفت قالي بكيفك قلت طيب ومروحه التبريد اللي قدام الرديتر الكهربائيه قالي بـ300 هلا هلا ياولد ترى راس مالها مروحه قالي بكيفك قلت طيب سلاااام وامر قطع الغيار واخذها بـ250 المروحه مع الحكاره وركبتها بيدي كلها مسمارين وفيش المهم انتبهو من الاستغلال اذكر قبل سنه صدمت ع الفورد واروح للتشليح ابي صدام ورفرف وكبوت قالي بـ1450 قلت وين يابوي مكينه سياره مو قطع واروح وافرفر واروح لم ذاك الواحد اللي يحبه قلبك كل القطع اخذتها بـ450 ياسلام توفير الف ريال والثالثه رحت ابي جنوط قلت بكم ياصديق ابي اربع جنوط قالي بـ800 قلت طيب لو تاخذ جنتوطي قال تزيدنا 600 قلت وين يابوي واروح لم البنشري والقى احلى جنوط مع كفرات برجستون نص عمر واخذها بـ400 مع استبدال جنوطي وكفراتي

[ابو طلال8666]

ما فية شك اخوي واطي جمرة
عندك مثلا مكينة الباتورل 4800 قيمتة حول 25 الاف وش ها الجرام
وشاص 2010 18 الاف قلتلة طيب كم قيمة Fj قالي 14 الاف قلتلة يا محترم كل محركين زي بعض لية هذي بسعر وهذي بسعر الله لا يحدنا عليهم والقارئين قولو امين
تقبل مروري00

[metub1404]

الله يعطيكم العافية كلام الاخوان صحيح
لكن اعرف قيمة القطعة اللي انت تبي تشتريها
قبل لاتروح التشليح علشان تعرف وتكاسر
انا كانت عندي دايو وكانت قطع السيارة غير متوفرة وغالية
المهم انكسرت عندي الحديدة اللي توصل بين عصا القير والقير وهي حديدة صغيرة
المهم رحت للتشليح وسالت عن القطعة قالوا 150
قلت خلني امر الوكالة والقطعة ماهي طايرة
تصدقون ياخواني لقيتها بالوكالة 15 ريال بس
شفت وشلون النصب عيني عينك

[ابو سلطان1234]

[quote=سوبر VTC;1880862]
موضوع في قمة الفائدة
تشكر عليه اخوي واطي الجمري
سياسة الوكالات خصوصا الجمس و التويوتا تقول كتالي
اشتر (طبعا بطريق غير مباشر) القطع من الموزعين لان الموزعين هم الذين يمشون بضاعة الوكالة...
لكن بعض الناس ما يرتاح و يظن ان الاصلي موجود عند الوكالة و هذه نظرة خاطئة لذلك يكون سعر القطعة دبل عن الموزعين
و الوكالة لاجيت تشري منهم تفرح بك عشان يقصبونك مهيب قايله رح اشتر من الموزعين ارخصلك
***

ماهو صحيح ان كل قطع الموزعين اصلي :
شريت فحمات لفورد من الضحيان حسبي الله عليه اللي بالصناعية القديمة الظاهر بـ120 ريال واركبها في ورشة جنبهم واطلع بالسيارة امسك فرامل تقول كأنك حاط بلكه تحت الدعسة وارجع اخرط الهوبات ونفس المشكلة طفشت ووديتها الوكالة وبعد يومين قالوا تعال استلم السيارة ايش المشكلة قالوا الفحمات ماهي اصلية ياولد شاريها من موزع قال رجعها واطق لهم 3800 علشان فحمات وتغيير الهوبات .