ارائكم يا اخوان حول 00(( زيت التروس ))00

[ابو مريم]

السلام عليكم ورحمة الله وبركاته
واسعد الله جميع اوقاتكم بكل خير
وتقبل الله منا ومنكم صالح الاعمال وغفر ذنوبنا
وجعلنا من اهل الفردوس الاعلى من الجنه ووالدينا واهلينا والمسلمين اجمعين
الموضوع باختصار يا اخوان كثر الكلام عن تغيير زيت التروس من قير و دبل ودفرنسات بين مؤيد ومعارض
نبي الحل القاظع من اصحاب الخبره او من لهم تجارب في هذا الموضوع
في ناس يقولون ضار لان برادة الحديد تنزل مع الزيت القديم ويصير فيه فضاوه
وفيه ناس يقول بالعكس الموتر يخف اكثر من اول
يعني يمكن يكون نوع السياره او الحديد له دور
نأمل من الاخوان الايضاح حول هذا الموضوع
وللجميع الشكر 000 والسلام عليكم ورحمة الله وبركاته

[90 BLAZER]

طبعا كما هو معروف التشييك ع السيارة وقطعها الإستهلاكية امر مهم جدا

وخاصة تغيير جميع زيوت السيارة اما بالنسبة لزت التروس مااذكر اني

غيرتها ولم اسمع احد ذم او مدح بتغيرها ولكن والله اعلم يفضل تغيير

جميع زيوت السيارة بعد فترة من الإستهلاك ,, وبالتوفيق

[سوبر VTC]

هلا اخوي
انا اخبر الجيوب 97 وتحت تلقاه ما شيه
حول 500000الف
و لا خربت الكوارين
***
ميكانيكي مختص بالجموس يقول الزيت لا يغير و اذا غيرت الزيت راح تضر الكارونة واذا مافيه صوت لا تحرك ساكن اتركه
***
ميكانيكي اخر
يرى ضرورة التغيير كل 80الف
***
اخر
يرى انه اذا ما تعديت في السرعة 140 فباذن الله تعيش الكارونة الى الابد اهم شي انك ماتدوس فجاة عشان ماتضرر تروس الكارونة اما السرعات العالية فانه تخرب الكارونة والدليل اكثر ما يخرب الفورد تقلى به صوة ونة بسبب السرعات العاليه
***
انا اشوف مسئلة تغير زيت الكارونة بالذات هي دعاية و استنزاف لاموال الناس
***
توجد الان جيوب 99 و طالع و حتى جموس و ما شية حول 300000الف
و لا خربت الكوارين
***
زيت القير يغير فقط للتماتيك فقط + الفتلر
عشان يعيش معك القير و تصير تعشيقاته خفيفه و ايضا ما تخرب حساساته






تحياتي

[6670]

السلام عليكم ورحمه الله
أما بعد:ردا على من يقول من المكانيكيه والأخوان أذا غيرت زيت القير ولا الدفرنس يخرب ولايطلع صوت.
أقوله :لأن الزيت القديم تعود عليه وتلبد وطلع زي الشحم واذا غيرت الزيت زال الشحم والتلبد بس انتبه السنن متحككه مع طول الأستخدام .(الشحم:هو الدواء) وأذا ركبت الزيت الجديد ماشي مع السنن والرمانات وهي متحككه أصلا بس منعها الشحم القديم من الاصوات.
عشان كذا يطلع الصوت بعد تغيير الزيت.
وغالبا الزيت مع الوقت تخف اللزوجه ويصير زي المويه وأذا غيرته ويمكن قبل لاتغيره يطلع صوت معاك .
(حسب نوع الزيت في السياره)
والوكاتلوج في السياره مبين فيه الوقت الأنسب للتغير.
يعني مافيه أحد أعرف من الصانع.
وبيرد علي واحد بيقول مو بكل شئ اقوله صحيح بس الأشياء زي المكينه القير الدفرنس هم أعلم.
ولافيه زيت ألا يتغير.
تنبه(وظيفه الزيت تقليل الاحتكاك)
وأسف على الأطاله.

[بدوي جنوبي]

الحل القاطع اخي ابو مريم

اذا كانت السيارة قديمة يعني عمرها تجاوز ال 10 سنوات
ينصح بشدة بعدم تغيير الزيت وهذا الافضل
وانت ذكرت السبب ان الزيت القديم يكون ملئ بالرايش (برادة الحديد)
لكن بنسبه قليلة وقد لا ترى بالعين ،، وفي نفس الوقت يكون اثقل من قبل
واغلب اللي يغير الزيت يكون عيار 90 وهو اخف من القديم حتي لو كان
عيار 90 ،،،
لكن هذا ما يمنع التشييك علي الزيت ،، فمثلا لو كان ناقص الافضل تزويدة بعيار اثقل مثل 140 ،، وهذا لا يضر التروس البته
علي العكس ينفعه اكثر ،،

والسيارات الجديدة ما تختلف عن القديمة في صناعة الدفرنسات او القيور
نفس الحديد ونفس الخامه ،،

* السيارات الحديثه اللي عمرها 5 سنوات ودائما يتم التشييك عليها في الوكالات ما عندهم اي مشكله اذا تم تغيير زيت الدفرنسات او القيور
لان زيوتها يتم تغييرها بأستمرار ،،

واذا لم يتم تغيير الزيت لهذه السيارات الحديثه لن يضرها البته ،،
مع مراعاة التشييك علي الزيت كل فتره ،،

في حالات استثنائيه لتغير زيت الدفرنس او القير
اذا اصبح الزيت عديم الفائدة بسبب دخول ماء او اتربه لاي سبب كان
ينصح بتغييره بعيار ثقيل 140 ،، او عند التوضيب مثلا

ملاحظة مهمه جداااا بالذات لسيارات الدفع الرباعي الحديثه
جيوب تويوتا ونسيان وشيروكي خاصة ،،
اذا كان الدفرنس يتكون من نظام LSD هذا له زيت خاص يوجد في محلات قطع الغيار المعتمدة او الوكالات
وغالبا يكون مكتوب في جنب الدفرنس وهو بمثابة تحذير


اغلب السيارات الحديثة وخاصة الامريكي يوكن تاهو افلانش جيب شروكي الخ ،، ( راجع الكتلوج ) او نوعية الزيت القديم
يكون زيت الدبل والجيربوكس عيار 10 احمر او اصفر (بعضهم يسميه ابيض)،،

كنت مسافر ومريت بنشري ونزلت حفرة الزيت بشيك من تحت السيارة اخاف يكون في تهريب او اي خلاف ،، كلمت البنشري قلت عطني مفتاح 15 ابي اشيك علي زيت الدبل ،، طلع الزيت فيه نقص بسيط ،،
كلمت البنشري يزود الزيت ،،

تتوقعون ايش الزيت اللي بيزودة ،،


الاخ يبي يزود زيت عيار 90 ،،

انا بصراحه زعلت عليه،، قلت يا اخي بالله وقف لا تعبئ زيت
لاني بسئلك سؤال ؟
انت تعرف نوعية الزيت اللي في الدبل ؟
ما رد على طول ،، سكت شوي وقال عيار 90
قلت حرام عليك ،، هذا عياره 10
اكيد في سيارات كثير جبت العيد فيها ،، الله المستعان
طبعا البنشري شاب توه جديد في عالم الزيوت
قلت له تبي نصيحه ،،
قال تفضل ،، قلت يا اخي سيارة ما تعرف نوعية زيوتها
لا تعبيها وما فيها شيئ اذا سئلت صاحب السيارة ولا تدخل نفسك في متاهات


ملاحظة للقارئ : كل كلامنا عن القير العادي
والله الموفق

[بدوي جنوبي]

***
انا اشوف مسئلة تغير زيت الكارونة بالذات هي دعاية و استنزاف لاموال الناس

تحياتي



اضف اليها زيت المكينة اللي يغير كل 2000 كيلو

[سطام vip]

بيض الله وجهك مشرفنا العزيز وكلامك صحيح مئه في المئه

وانا صارت معي قبل اسبوع عندي القير يهرب ورحت لمحل الزيوت وقال ناقص قلت اوكي زيده قال اوكي طق طق طق قال 7 طقات

قلت طيب عطيته الحساب ومشيت وواذا غيرت للثالث خاصه يقر القير

واستمرت المشكله الين سئلت مهندس وقالي اكيد حط لك زيت خفيف

وبالفعل رحت لمحل ثاني وقلت له السالفه وزود لي زيت الظاهر الي تقول انه 140 والحمد لله راح الصوت

[ابو مريم]

اخوي 90 Blazer
مشكور على اضافتك
وجزاك الله خير

[ابو مريم]

الاخ سوبر VTC

اضافاتك ذهبيه لا هنت
والضاهر اللي يقول تغير كل 80 الف متاثر بكتالوج السيارات
لاكن الاقرب والانسب ان موضوع التغيير دعايه واستنزاف
الله لا يهينك ويجزاك خير اخوي سوبر vtc

[ابو مريم]

اخوي 6670
تحليلك منطقي وواقعي
لانه فعلا كل ما ذكرت حاصل
لاكن اخاف الواحد يغير الزيت وبعدين يقول يا ليت اللي جرى ما كان
انا شخصيا اعرف واحد معاه جيب هونداي غير السوائل تلخبط موتره فوق تحت اصوات وطقات
مشكور اخوي 6670 على اضافتك وجزاك الله خير

[سوبر VTC]

انا اشوف مسئلة تغير زيت الكارونة بالذات هي دعاية و استنزاف لاموال الناس

تحياتي


اضف اليها زيت المكينة اللي يغير كل 2000 كيلو


تأكيدا لكلامك :good:
عندنا بالمزرعة :D مكينة كتربلر 620 حصان و قيمته اكثر من 220000الف ريال طبعا لسقاية الزرع (قمح) او عيش و تقوم بتغذية 3 رشاشات او محاور و الماء بعيد جدا حوالي 400متر و اكثر من 63 ماصورة بالبئر
اذا اكتملت السبلة (تكاملت من حيث انها امتلأت بالحب) خلاص نجلس تقر يبا شهر كامل و
بعز الحر المكينة ما تطفى
و الحرارة على النص
اللهم اذا صار يوم الجمعه طفيناه :p
و عايرنا الزيت و شغلنا الى الاسبوع القادم
يعني اسبوع كامل ما تطفى 24 ساعة
ما تطفى ثم كل 12يوم نفضي الزيت و نحط زيت جديد طبعا الزيت اسود جدا بمعنى الكلمة لكن توجد لزوجة و لا ضر المكينة علما ان المكينة لها الان من يوم شريناه 12سنة و نحن على الطريقة كل سنة علما ان المكينة تشتغل باقصى طاقتها 16.5 مقياس السرعة :cool:





الاخ سوبر VTC
اضافاتك ذهبيه لا هنت
والضاهر اللي يقول تغير كل 80 الف متاثر بكتالوج السيارات
لاكن الاقرب والانسب ان موضوع التغيير دعايه واستنزاف
الله لا يهينك ويجزاك خير اخوي سوبر vtc


جزاك الله خير يابو مريم
تحياتي

[ابو مريم]

اضافاتك ماسيه اخوي بدوي جنوبي لاهنت
البناشر يتعلمون بالخلق الغافلين عنهم والقليل منهم ضميره صاحي ويخاف الله
وبالنسبه اخوي لنظام lcd هل هو مطبق على جميع سيارات اللاندكروزر ولا بس انواع معينه
وفيه زيت للتروس يجي في براميل مثل براميل البويه خاص في التايوتا مادري هل هو نفس زيت الوكاله الموجود في التروس وهل هو مناسب لجميع التروس قير ودبل ودفرنسات
واخيرا وللمعلوميه كان معاي باترول ورحت للوكاله اسئلهم عن زيت التروس قالي المهندس كلهم غير لهم رقم 90 وغيرته في وقته ولقيت زيت الدبل لونه اسود وبعدها الحمد لله الموتر ماشي تمام بس المشكله في التايوتا ما ندري وش هواه


مشكور اخوي بدوي جنوبي وجزاك الله خير وغفر لوالدينا ووالديك والمسلمين اجمعين

[RJA]

حسب كتالوج الشاص والربع :

*يتم تغيير زيت الدفرنس الامامي والخلفي كل 40000 كم أو كل أربع سنوات ....بلزوجة 90 ....(GL-5).
*اما القير :تشييك كل 40000 كم مع الاضافة اذا كان ناقص (نفس النوعية الاولى) .
*عند الغمر الكامل {بالماء} يتم التشحيم الكامل

واتمنى لك التوفيق....

[ابو مريم]

الاخ سطام vip
مشكور على ذكرك لمشكلتك لانه راح تفيد الكثير
والحمد لله انك جيت مهندس تكانه وعنده خبره ولا كان علوم

مشكور على اضافاتك وجزاك الله خير

[ابو مريم]

اخوي سوبر vtc تغيير الزيت ضروري لانه حتى لو كانت اللزوجه موجوده لاكن الزيت يفقد بعض خواصه التركيبيه بفعل الحراره وتسهيل الاحتكاك
يعني نكون وسط وعلى حسب الظروف مثلا الزيت اثناء السفر يفقد خواصه بشكل اسرع بفعل البقاء لمده اطول على سرعات عاليه اعتقد تغييره من 2500 الى 3000 يكون افضل
اما بداخل المدينه ما عندك مشكله لو تمشي على الزيت 4000 او 5000
خصوصا ومثل ما انتم شايفين كرتون الزيت سعره كل شهر اغلى كنت اخذه 195 واللحين 265

ومشكور اخوي سوبر vtc وجزاك الله خير ورحم الله والديك

[ابو مريم]

اخوي صقر 2003
مشكور على هالاضافات
وفعلا اخوي الشي اللي يغفل عنه كثير من الاخوان التشحيم
واللي يعتبر مهم بس البنشريه ما يجيبون عندهم الا الشحم الرخيص
اللي مع الحراره الزايده والدوران المستمر يسيح ويفضي

مشكور اخوي صقر 2003 وجزاك الله خير ورحم الله والدينا ووالديك والمسلمين اجمعين

[سوبر VTC]

اخوي صقر 2003





مشكور على هالاضافات
وفعلا اخوي الشي اللي يغفل عنه كثير من الاخوان التشحيم
واللي يعتبر مهم بس البنشريه ما يجيبون عندهم الا الشحم الرخيص
اللي مع الحراره الزايده والدوران المستمر يسيح ويفضي



مشكور اخوي صقر 2003 وجزاك الله خير ورحم الله والدينا ووالديك والمسلمين اجمعين



اوضح لك الصورة بشكل ادق
اهل البناشر يؤسفني ان بعضهم حرامية كيف ؟
يحطون مع الشحم ديزل و بهذه الحالة يخف الشحم و هذا
يخرب عليك الربلات حقات ركبه و ذراع و خلافه و تصير لينه
اذا تبي تتاكد
شم الشحم فيه ريحة ديزل + الشحم لونه اسود من الديزل
تحياتي

[ابو مريم]

والله يا اخوي سوبر vtc اني ضحكت اول ما قريت سالفة خلط الشحم والديزل ضحكت رجال مغبون
يعني الى هالدرجه وصل الاستهتار يبون يضحكون على العالم وياخذون فلوسهم بأي طريقه
والمشكله بعضهم على قولتهم نفس (ن) شينه وجلد مروح لا بغى يتكلم كنه يصرف دراهم
لا اوصيكم يا اخوان انا ما اعمم عليهم لاكن الحرص واجب تابع موترك لا وقفته عند البنشري ولا تخليه لحاله ترى الطمع عند بعض البشر يعمي البصر 00 حمانا الله جميعا

ومشكور على هالتوضيح اخوي سوبر لا عدمناك وجزاك الله خير

[قلب ضبع]

يجب تغيير زيوت التروس بمافيها القير,كل 40000كلم اذا كنت تستخدم زيت كثافته 90
اما اذا كنت تستخدم 80/140 فيجب تغيير الزيت كل 80000كلم,
وللمعلوميه فأن الرايش(بشارة الحديد)تتجتمع في اسفل البوكس في وذلك بسبب المغناطيس اللي في كل غطا الصره,(المسمار الصغيراللي تفكه ويطلع الزيت)

[بدوي جنوبي]

وبالنسبه اخوي لنظام lcd هل هو مطبق على جميع سيارات اللاندكروزر ولا بس انواع معينه




اعتقد انواع معينه
واهل الخبرة يفيدوك اكثر :good:

[بدوي جنوبي]

اخوي سوبر vtc تغيير الزيت ضروري لانه حتى لو كانت اللزوجه موجوده لاكن الزيت يفقد بعض خواصه التركيبيه بفعل الحراره وتسهيل الاحتكاك



خصوصا ومثل ما انتم شايفين كرتون الزيت سعره كل شهر اغلى كنت اخذه 195 واللحين 265





الزيت عمره طويل ،، وما يتلف بالصورة اللي نعرفها
لكن يتلوث بفعل الاحتراق الداخلي

واغلب الزيوت القديمة يتم اعادة تصنيعها وتصفيتها وتنقيتها من الشوائب
ومن ثم اعادة تصنيعها وبيعها في السوق

اخر سعر لزيت كاسترول عيار 10w-30 ب 280 ريال كرتون 24 حبه
يعني الحبه تطلع تقريبا 11.6 ريال
والبناشر يبيعهوا ب 16 او 17 و20 ريال عند تغيير الزيت
شف الفرق ،، الفلتر قيمته 15 لأغلب سيارات الامريكي سوبربان - تاهو -يوكن
والبانشر يبيعهو ب 25 و 30 ريال ،،

[ابو مريم]

اخوي قلب ضبع
مشكور على هالاضافات
لاكن اتوقع مع سرعة الدوران والاحتكاك الرايش يطلع من المغناطيس
جزاك الله خير على هالاضافات ورحم الله والديك

[ابو مريم]

صدقت اخوي بدوي جنوبي
انا اشتري الفلتر من الوكاله بــ 12 ريال للجيب لاند كروزر
والزيت اشتريه من محل الجمله ويطلع ارخص
واعطي البنشري 15 ريال زيت مع سيفون او 10 زيت بس
ما قصروا البناشر سنين غبر وهم يضحكون على المستهلك
ويوم عرف المستهلك الطبخه وقلة مكاسبهم قاموا يشتكون من قل المكاسب
ولا جيت للبنشر وشاف الاغراض معك ضاق صدره
نسئل الله السلامه
مشكور اخوي بدوي جنوبي على هالاضافات لاهنت

[ابو مريم]

الله يعطيكم العافيه جميعا على هالاضافات

[يوسف--]

السلام عليكم ورحمته الله وبركاته

اخوي بدوي جنوبي وباقي الاعضاء انا سيارتي باثفندر وابي اغير زيت الدفرنش وزيت دفرنسي lsd ودورت كل مكان ماحصلته حتى باالوكاله يقولون ماحنا جايبين لك هذا الزيت استخدم الزيت العادي 140 ولا اعرف وين احصل الزيت
ويعطيك العافيه