معك Vtc ؟؟ تفضل باالدخول موضوع يهمك !!

[ساري 111]

السلام عليكم ورحمه الله

الحقيقه قبل كم يوم كنت عند صاحب ورشه وكان يرهم لباترول تماتيك 2003 رديتر اضافي
سألته وشوله ؟؟
قال ان رديتر الباترول صغيرعلى المكينه ومع صغره إلاانهم دامجيين رديتر تبريد زيت القير معه
ويقول انه اذا تعرض الموتر لجور باالبر يحتمي زيت القير
المهم هو شرح لي وش اللي يصير بالضبط لكن نسيت وش قال بالضبط
لكن الشاهد انه تصفي على ان ماء المكينه يدخل على زيت القير وبعده يدخل على القير ويخبط بسبب الرديتر

قلت طيب والحل ؟؟
قال الحل جب الموتر لي قبل يصير له شي وارهم له رديتر خاص للقير

قلت والتكلفه ؟؟ قال الرديتر راكب بـ 600 ريال

وسألته عن زيت القير لأني اذكر كذا مره شفت احد يسأل
قلت ان الوكاله يقولون لاتغيره إلافوق 150 الف
قال لايهمونك المفروض يغير كل 30 الف ويحط له زيت لكزس


طبعاً الورشه هي ورشة العثمان بتشاليح بريده

وصفها كاالتالي
إذا صرت طالع من بريده رايح للتشاليح اول ملف يمين للتشاليح اطلع معه
تمشي تقريباً 5 كم اقل او اكثر شوي تجيك كبره على اليسار لونه ازرق هي الورشه
طبعاً هم اخوه اثنين يشتغلون بالورشه عبدالعزيز وسليمان واللي يشتغل بالشغله ذي سليمان


اتمنى ان اكون قدمت لكم مايفيدكم ,,

[سوبر VTC]

موضوع رائع لاهنت


للايضاح ادتير الماء توجد به طبتين يمين و يسار


و كل طبه به خزان صغير يمر من خلاله زيت القير الطبة الاولى يدخل الزيت اللي جاي من القير و يكون حار جدا و الطبة الثانية يخرج الزيت نفسه الى القير و تكون حرارته معتدله

***

طبعا اذا احتمى الموتر بسبب ما فان احد الخزانيين ينشق و احيانا ينسم من عند مربط الخران من عند السيلة او الوجه
لذلك تلاحظ اذا فتحت غطاء الاديتر ستلاحظ على الماء اثار او بقع زيت او سحبت حتى عيار زيت القير ستلاحظ وجود نسبة من الماء و هذا يدل على دخول الماء و اختلاطه مع الزيت
***
هذه تحصل في بعض الفكسار و الجيب الشيروكي و حتى الباترول بنسب متفاوتة
***
انا ارى ان مميزات الاديتر الخارجي كتالي
ضمان عدم خراب القير
برودة القير و يكون على مستوى حرارة ثابته
تغير درجة حرارة المكينة للافضل بسبب الغاء خزان القير
لذلك ما تحتمي المكينة في عز الحر و تكون حرارته معتدله حتى لو شغلت المكيف
***
للمعلومية
درجة حرارة القير التماتيك تبدا من 38 درجة مئوية
حتى 130درجة مئوية تقريبا
على حسب ظروف المكان و الزمان
اذا وصلت الحرارة 135 يبدا القير يفلت بسبب الكلتشات محتمية و ما يعشق زين و خصوصا في داخل المدن و عند اشتداد الحر و في الاماكن المزدحمة لان سرعة مروحة المكينة بطيئة فما تلحق على تبريد زيت القير يضاف الى ذلك ان الموتر يقل عزمه بسبب تفليت الكلتشات ايضا الاستخدام السيئ للقير
لذلك ينصح بالتوقف على جانب الطريق 10 دقائق لضمان حتى تنخفض حرارة زيت القير
تحياتي

[شامخ ألهيلا]

مشكوور اخوي سوبر على هالمعلوماات القيمه

[اثنان]

ياناس مهوب معقول الكلام اللي تقولون اللي صانعين السياره فاهمين لبيئتنا والجو وقبل مايصنعون السياره يصنعون نموذج تجريبي يتعرض لاقوى الاختبارات وبعدين تراكم ظالمين النيسان بقوه صح انه في بعض المشاكل البسيطه لكن يمكن ان تتفاداه.....لكن على طاري ترهيم رديتر اوغيره هذا كلام فاضي ماله اساس والدليل فيه باترولات واجد موديلاته 2002 وفوق تكد وتمد الى الحين بدون ترهيم رديتر وغيره ...

[معوكس]

السلام عليكم ورحمة الله وبركاته ...


اخواني الحين رديتر الجير بس للتماتيك ولا يجي بعد للعادي ؟؟؟

[أبو أسامة]

أخي الكريم :

لا يغرك الشباب اللي يطعسون ويفجرون الموتر بعدين يقولك الموتر رديتره ما يتحمل شف كم من واحد موجود بالمنتدى معه نيسان فتك ما أشتكى من ها الشيء لأنهم ناس أستخدامهم طبيعي .........

بعدين لا تنسى أن الأخ فتك قال أن المشكلة موجوده بالفي أكس آر والشروكي أيضاً ...........

أنا ردي هذا لأني أستغرب من كلامك أنك من عشاق الباترول و كل موضوع لك تسب فيه لكن صدقني أني أبي اللي يسبونه أكثر من كذا بكثير عشان أول شيء تطيح قيمته وثاني شيء عشان يطورونه ويتفادون المشاكل اللي فيه ........ ما أقول إلا يا عيني على صور الجيب اللي في توقيعك على هو نيسان باترول..........

[أبو أسامة]

لا أخوي يجي للتماتيك فقط

[معوكس]

يا لله لك الحمد :)

<<--- ناوي على باترول عادي ان شاء الله


ادعوا لي .

[أبو أسامة]

عسى الله يوفقك ويبارك لك بس لا تنسى مشكلة الكتاوت ........ لازم تشتري كتاوت طرمبة البنزين من الوكالة قيمته 30 ريال بعد الخصم ..... وتحتفظ فيه أسبير في الدرج معك ......... ولا أوصيك أقرأ كل مواضيع الأخ خشيمان والأخ سوبر vtc عشان تستفيد ولا تواجه مشاكل بإذان الله .........

والله يعطيك من خيره ويكفيك شره ..........

[ساري 111]

حيااااكم كلن بأسمه
ويعيطك العافيه سوبر على الأضافه المفيده

لكن اشوف البعض شال بنفسه علي

وانا اقسم لكم بالله العظيم اني ماقصدت الأساءة للمذكور (باترول)
وإنما كتبت الموضوع ليستفاد منه

فما أنا إلامجرد ناقل لكلام صاحب الورشه

وانا اعتقد ااني ذكرت كلام اخونا سليمان العثمان >>
ويقول انه اذا تعرض الموتر لجور باالبر يحتمي زيت القير

[ساري 111]

أنا ردي هذا لأني أستغرب من كلامك أنك من عشاق الباترول و كل موضوع لك تسب فيه لكن صدقني أني أبي اللي يسبونه أكثر من كذا بكثير عشان أول شيء تطيح قيمته وثاني شيء عشان يطورونه ويتفادون المشاكل اللي فيه ........ ما أقول إلا يا عيني على صور الجيب اللي في توقيعك على هو نيسان باترول

مااخفيك كنت من عشاق الباترول واتمنى ان يعود الباترول كما كان يضرب فيه المثل بقله الأعطال
صحيح ان ديكوراته الدخليه تفكك وماتصبر ومع ذالك كنت معجب فيه
ولكن طفيته بكل ربعه هذا شي لايطاق

وأيضاً ماالومك لأنه ماطفى عليك بالنفود الكبير وجلست تجرجره 90 كم من طعس لثاني وراحت كشتك كله جب الواير رد الواير (جيتك ياعبدالمعين ابيك تعين ولقيتك تبي من يعينك) وهاك الكشته اخذناه نبيه يشيلنا والواقع حنا اللي شلناه)
وبعده كرهت الباترول وتحولت للـ تشوفه بالصوره (مكرهاً اخاك لابطل) وإلافلارغبه لي بالتويوتا

وضحت الصورة قدامك اخوي او لا ؟؟؟

[المميـز]

هذا الشيء موجود بالقير التماتيك بس

اما القير العاديي مافيه هذا الشيء

[shaheenshah]

يازين الموتر شد بلد
وسلامتكم

[بدوي جنوبي]

النظام هذا كان في الامريكي سابقا
يكون تبريد زيت القير داخل اديتر الماء

في سياراتهم الاخيره اصبح القير له مبرد خارجي خاص فيه وعادة يكون
امام اديتر المكيف ،،
ومثل ما قال سوبر فتك باقي نظام تبريد الاديتر داخل اديتر الماء موجود في سيارات النيسان والتويوتا
والشروكي وغيرها ،،

والافضل تبريد الزيت داخل الاديتر ،، ولعدم وجود تهريب زيت ينصح بتغيير ماء الاديتر كل فتره

بالتوفيق

[سوبر VTC]

انا اللي اعرفه اذا كان مبرد القير بداخل اديتر الماء افضل من ناحية ان القير يحتمي على طول بسبب ماء المكينه يحمي الزيت بشكل اسرع و بكذا تصير تعشيقات القير خفيفة و سريعة
لكن



والافضل تبريد الزيت داخل الاديتر


هل تقصد نفس كلامي اعلاه :D معي او ضدي :mad:

[بدوي جنوبي]

انا اللي اعرفه اذا كان مبرد القير بداخل اديتر الماء افضل من ناحية ان القير يحتمي على طول بسبب ماء المكينه يحمي الزيت بشكل اسرع و بكذا تصير تعشيقات القير خفيفة و سريعة



لكن



هل تقصد نفس كلامي اعلاه :D معي او ضدي :mad:


اعتقادي الشخصي افضل داخل الاديتر الماء
لان سبحان الله الماء افضل وسيلة لتبريد الحرارة

فيه خواص عجيبه تساعد علي التبريد ولا يوجد اي سائل يبرد مثل الماء
عندما ترتفع حرارة الانسان سواء صغير او كبير ،، افضل واسرع طريقة لتقليل حرارة الجسم بماء فاتر
عن النبي صلى الله عليه وسلم أنه قال الحمى من فيح جهنم فأطفؤوها بالماء أو بردوها بالماء‏)‏‏.او كما قال عليه الصلاة والسلام‏ ...


وردا علي سؤالك ان الماء بيكون اكثر حرارة وتسخن الكلتشات وتصير تعشيقاته غي منتظمة

طيب تخيل في فصل الصيف في عز الظهر ودرجة حرارة الجو 48 وسرعة 120
ايهما افضل تبريد زيت القير داخل اديتر الماء او تبريده في اديتر خارجي

ولو يوجد حساس لقياس حرارة الاثنين انا متأكد ان حرارة اللي داخل الاديتر اقل بدرجات

بعض السيارات الامريكي يجي فيها انمبير لحرارة القير
والامريكي الكندي يجي فيه انمبير حرارة للقير
لكن للأسف المفروض السيارات السعوديه يكون فيها انمبير حرارة للقير

عموما خراب القير بفعل الحرارة حاله شبه نادرة


يعني بعد كل هالرد انا ضدك :D

[سوبر VTC]

نا اتفق معك فيما قلت
انا لم اقل



وتصير تعشيقاته غي منتظمة



بالعكس انا قلت



مبرد القير بداخل اديتر الماء افضل من ناحية ان القير تصير تعشيقاته خفيفة و سريعة


ختاما اشوى انك صرت من المؤيدين لي :D

[فتك08]

ماعليش لو الموضوع قديم
لكن نبي تفاعلكم و نبي المعلومات الصحيحة
اللي عرفته و استنتجته ان فايدة دمج مبرد الزيت مع اديتر الماء تكمن في تسخين زيت القير في فصل الشتاء فقط لان مبرد الزيت داخل الاديتر ليس شرائح تلامس الماء بل انبوب سميك يلامس الماء....القير عبارة عن تروس و لايوجد به نظام اشتعال أبدا مقارنة بالمحرك عبارة عن نظام اشتعال نار داخل معدن مغلق سواءا حديد او المنيوم...فرق درجة الحرارة راح يكون شاسع مابين زيت القير و ماء الاديتر الذي يتخلل المحرك عبر جيوب التبريد بجانب الاسطوانات...بلف حرارة الماء غالبا يفتح على 76.5في النيسان و 82في التويوتا...بالعقل و المنطق الماء راح يكون اعلى حرارة من الزيت بسبب الفرق بين مكان مهمة كل منهم...لا انكر بان الماء سهل تبريده بسرعة بواسطة الهواء بعكس الزيت بسبب كثافته و تركيبته لايمكن تبريده بنفس السرعة اللتي يتم فيها تبريد الماء.....
طلبي من الاخوان...
كم درجة حرارة زيت القير الطبيعية
ابي اعرف تتدرج من(اقل درجة تقريبا)الى(اعلى درجة تقريبا)حتى نستطيع ان نعرف و تتضح الرؤية..و شكرا لكم