انصحوني بالتماتيك ...............!!!!؟

[ridan]

السلام عليكم
كيفكم يالربع



السالفه ومافيها انا مقبل على شراء موتر جيب وانا متعود على القير العادي وهالمره قلت خل اخذ تماتيك اريح لي بالديرة بس مدري وشهو من شنب بالبر وخصوصا الطعوس والرمله فقلت مالي الا الشنبات اللي بمكشات يفيدوني
فوش رايكم فيه القير التماتيك (بالنسبة للشروكي واللاندكروزر خصوصاً)وبقية السيارات بشكل عام

لاعدمناكم .... شاكر لكم مسبقاً.

[سهم VTC]

لالا

لا ند ما انصحك تاخذ قير تماتيك اذا كنت راعي طعوس..

اما انت رجال منتب راعي طعوس خذ لا ند ولا تشاور احد..

[بوسعود 180]

اللند كروزر قير تماتك ممتاز للبر لاكن مش مثل العادي طبعا لاكنه مش بطال

[سوبر VTC]

هلا بك اخوي
اذا تبي تاخذ لاند تماتيك نصيحة لوجه الله عمي شرا 6 سلندر تماتيك عزمه ضعيف جدا و ايضا صرفية بنزين
لكنه تراه يمشى حالك اذا كانت قروشك شوية :)
طبعا باعه و شرا 8 سلندر عزم ما شاء الله و صرفية اقل و المكينة مرتاحه بالخط
ايضا مواصفات اضافية مثبت سرعة و فتحة.......الخ
تماتيك الاند بالنفود حط تحت الدي بنمرة او نمرتين عشان يصير القير شاد بنمرة ولا تحتمي الكلتشات و عزمه ثابت يعطيك اذا كان كل شوي يعشق فانه يضر القير و يحتمي و يخرب الكلتشات و ايضا حتى المكينة تحتمي
و التماتيك قوي بالنفود ما عليه كلام و الناس الان اتجهت للقير التماتيك بس نزل القير نمرتين و شف وش يعيطك يطرب خاطرك
اغلب راعين البر تماتيك خصوصا الباترول و الجمس الغمارة و نص و ايضا الاند

****

بالنسبة للشيروكي
طبعا الكلام هذا يقبل على الاند بشكل كبير
الخفيف تشبكه عادي حتى لو انت تمشي 140 لكن اهم شي ترفع رجلك عن البنص
ثم امسك الدبل و اسحبة طقة وحدة هذا الخفيف
الثقيل ما يشبك الا بالهيار او اذا بغيت تسحب احد مغرز بس انتبه تمتل الموتر اللي تجره لانه راح يعدم عليك صليبات العمودين كلهن و يضر القير ايضا
لكن عند شبكه (الثقيل) لازم توقف و تحط القير (n) يعني فاضي ثم تسحب الدبل الى اخر خانة
(بسرعة ----> تصير يدك خفيفة لكن مهوب على غشامه بمعنى (تمتله) عشان ما تتطلع قرة و صوت الترس)
اللي هي (L)الثقيل طبعا و عند الفصل تفصله بسرعه لازم تصير يدك خفيفة و سريعة عشان ما يقر الترس
نفترض انك غرزت برمل شديد و جيت تبي تشبك الدبل الثقيل
((اهم نقطة)) حاول تقدم او ترجع الموتر لو مسافة (شبر)لان الدبل الثقيل ماراح يشبك
الا اذا حركت الموتر خفيف
طبعا لو ما سويت هذه الحركة وشبك الدبل على طول ثم حطيت الموتر بالدي و دعست بنزين
راح تسمع طقة قوية جدا بسبب ان الدبل الثقيل شبك و لذلك
احذر من ذلك لانه فيه خطورة على الترس انه ينكسر كما يضر جنزير الدبل و طبق الطريقة السابقة
عند شبك الدبل الثقيل//يفضل انك تحط القير على 3 الا بغيت تسحب احد تحطه على 2*1 عشان يرتاح القير يصير بنمره ثقيله كانك حاط القير العادي بواحد و انت تسحب
عند شبك الدبل الخفيف //يفضل انك تحطه على 3 عشان يرتاح القير من كثر التعشيق و لا تحتمي الكلتشات و عشان ما يبدا كل شوي يعشق القير اذا حسيت ان العزم ضعيف دس بنزين او حط القير على 2*1
اذا جاك غراز شديد و انت تمشى نزل القير الى 2*1 او ادعس بنزين حتى لو هو على 3
الشيروكي يمتاز بميزة//خفة الوزن و ايضا يساعدك بالرمل اذا كانت كفراته هانكوك و الهانكوك لين و حط بهن 20 راح يمشي معك بالخفيف مرتاح
انا دايم بالديرة و بالنفود بهن الكفرات 20

********************

معلومة جانبية//
انا كان عندي موتري فيه حرة اذا وصلت سرعة 110 و طالع يستمر الصوت و يبدا يطلع و يروح كل 5ثواني
طبعا ساق موتري شخص مختص بالشيروكيات يوم وصل سرعة 130 قام و رفع رجله من البنص و شبك الخفيف ثم دعس بنزين يوم اختفى الصوت
**من اين المشكلة**

قال من عمود الدبل العرموطة الاثنى و الذكر متوسعة والحديد اكل بعضه و السبب من عدم التشحيم لانه لما شبك الدبل حمل العمود على بعضه و اختفى الصوت فلازم تحط ببالك ان العمود يشحم كل شهرين اقل شي

******

تحياتي لك

[ridan]

8888888888
حياكم الله جميعا وشاكر لكم نصيحتكم من الأعماق

اخوي سوبر Vtc والله شكلي والله العالم باخذ شروكي اتونس عليه بس كيف الموتر معك بالبر والديرة والخطوط إستخدام يومي يعني ؟؟؟
اذا اردت اجابتي هنا او على الخاص.. شاكر لك.

[عاشق السيل]

وعليكم السلام ورحمة الله وبركاته ،،

والله الشباب ماقصروا الله يعافيهم ،،

وأضيف : أنا معي تماتيك وطلعاتي للبر كثيرة وماشاء الله ممتاز جدا ويتميز عن العادي إنه يرد نمرة إذا ثقل الموتر بسرعة ويمشي الموتر تمام أما العادي أحيانا إذا رديت نمرة يطيح الموتر ومايمديه يمشي ،،

لكن العادي يتميز بقوة النشاط أكثر من التماتيك وخاصة بالبر ،،

ومن ناحية الشيروكي أنصحك ماتقرب التماتيك لأن أعطاله كثيرة وأغلب الشباب اللي أعرفهم يسبونه من كثر زيارة الورش ،، وترى عزمه مهب اللي أنت تبيه بالنفود أما العادي نشيط بالحيل !!

أتمكنى أكون أفدتك وتقبل مروري يالغالي ...

[ridan]

اشكرك على مرورك اخوي عاشق السيل والصراحه غريبه كلامك ان القير التماتيك هو اللي خراباته اكثر من العادي
اللي اعرف العكس القير العادي دائما يخرب كلتشه ؟؟ غريييبه

بإنتظار اخي سوبر Vtc

[ساري 111]

على حسب

تبي تاخذ 6 سلندر خذ عادي
اما 8 سلند خذ تماتيك

[قناص1975]

انا مره رحت النفود عندى باثفندر تماتيك حاطه بنمرت D حاشره طلوع ونزول لاحظت الحراره ترتفع والعزم راح فيها الى درجة انى قلت الجير انفطع قالى واحد انت وين رايح مدوج قلتله ليه قال اخوى تعامل مع التماتيك مثل العادى اذا الطلعه قويه نمره L وبعدين 2
ولا يمر على نمرة D