موضوع مطروح للنقاش (( ليش الناس يشرون شاص تويوتا ولا يشرون شاص نيسان ))

[book00]

موضوع مطروح للنقاش

(( ليش الناس يشرون شاص تويوتا ولا يشرون شاص نيسان ؟!!))

نبي نسمع منكم يامكشاتيه

[عاشق السيل]

بوجهة نظري هذي بعض الأسباب :

ـ لأن التويوتا كان بالقديم متوفر أما النيسان ماكان فيه شاص ،،
ـ الناس تعودت على شكل النيسان ربع وصالون وماهضموا إنه يجي شاص ،،
ـ التويوتا متوفر بالأسواق وبكثرة أما اللي يرغب النيسان مستحيل يلقاه ،،
ـ غالبا اللي يشتري شاص وخاصة في القديم كان يستخدمه للنقل ( حطب ، بعارين ، غنم ، أغراض الماشية بأنواعها ) علشان كذا يثقون بالتويوتا أكثر من النيسان لأنهم يكدونه كد بمسافات طويلة داخل البر !!
ـ ولاتنس الشريطية ودورهم الفعال بأي سيارة !!!!!

وأكيد فيه أسباب أخرى ننتظر باقي النشاما يضيفونها ،، وتقبل مروري يالغالي ....

[بواسامه]

سبب رئيس ان النيسان توفره للشركات لا للافراد

[Dr.PRO]

تخيلو شاص النيسان تصير مكينته مكينه فتك , وقيره قير فتك ,,,


والله ان يطلع الموتر هباااااااااااااااال ,,

[فاطر]

الشاص التيوتا فلوسه شيك ولا يخسر ويمكن يكسب عند البيع
ام الباترول ماانتشر الا له سنه تقريباً لآن الشباب يصدرونه للسعوديه اللون ازرق وبعدين يرش بويه حسب الطلب تحياتي

[سوبر VTC]

الاخوان ما خلوا شي و انا اضيف انه
الان تغيرت نظرة اهل البر للشاص النسيان و صار مطلوب الان بقوة خصوصا من اهل القنص و الصيد و سعره معقول جدا و في متناول الايدي مقارنة بالتويوتا
تحياتي

[أبو أسامة]

أخي الكريم :

أتفق مع الجميع في كل ما قالوه ........ لكن أختلف مع عاشق السيل في أن البترول الشاص ماهو قديم بل على العكس في شاص باترول من عام الستين الميلاديه ........

وأضيف على كلام الأخوان أن الشاص التايوتا رغم حبي الكبير لنيسان إلا أنه مركب العز في الشاصات يكفيك فقط أن فيه ديف لك أمامي وخلفي من الوكالة وفيه أيضاً ونش ( بكره ) ..... بالإضافه لتوفره بشكل كبير ومن الوكيل ....... لكن شاص النيسان لا ديف لك ولا ونش ولا كشافات وحتى قزازه هندل يعني ونادر تلقاه في الوكيل ....... لكن شاص النيسان فيه ميزه أن الفل منه يجي بثلاجه وقزاز كهرب وكفر عراض...... وللمعلومية شاص النيسان ماراح تحصله في الوكاله إلا طلبيه ........ لأنه بالعاده الشحنه قبل ما تصل لجده تكون محجوزه كامله للدوله ..........

[سهم VTC]

اضيف على كلام اخواني..

ان الشاص النيسان دائما يكون مع الشركات بطلبيات هائله..لا لاافراد

ثانيا ان الشاص النيسان واجد تلقاه في المعارض لكن ديزل وانتم كرامه..

ثالثا والله ان شاص النيسان انه خبال..ودي يخلون وجهيته وجهية الفتك الجديد..

رابعا الوانه بايخه نوعا ما..<<<مهب كلها..

خامسا سلامتكم...

[الجندي2005]

شاص النيسان ما فيه تناسق بين الحوض والغمارة تقول مركب( ترهيم)

[مكشاتي عنيزه]

بصراحه شاص النيسان يفشل فى النفوووود وثقيل مره ويحن حن أعوذ بالله وقوته كلها بنمره واحد لكن فيه ميزه انك اذا سحبت أحد بالونش يرتكى الموتر مايتحرك الا قليل وغير كذا حرارته ماترتفع ,,,, انا أقول هالكلام بحكم تجربه والسلام عليكم

[التعـ King ـديل]

اللي جرب الشاص نيسان مواصفات كويتيه يقول غير الكلام

مراتب مفصوله + ثلاجه بالنص مثل الجيب ومريح بالخط اتكلم عن تجربه

لكن سبب انتشار التويوتا لانه منتشر بالسوق والوكاله تجيبه بكميه كبيره اما النيسان السلق اربع ابواب والشاص متوفره للشركات والقطاع الحكومي ونادر ماتلاقيه بالوكاله للأفراد

[هبوووب الشمال]

مقيوله من قبل.....
واحذر من النيسان يملاك بغبار
ولولا غباره كان مابه عذاريب


اما اتويوتا:
سلعه ثمينه للرجال الثمينين
راع الولع يشريه لوباع ثوبه

وتقبلوا مروري

[السفاح 911]

كلام الرجاجيل على متمها

وأزيد بأن التايوتا من عرفناه أنه هو إللي يصبر ولا يتفكك بالبطناج لأنه صبه وحده ما فيه مجال أن مسمار فيه ينحل

والنيسان من رفاهيته وليونته لابد بعد طلعتين تدخله الورشه تربيط كامل
وبالنسبه للتايوتا حوظه أكبر من النيسان وهاذا إللي يخليه مثل السلحفات ( ينقل بيته على ظهره ) إذا كنت مركب شراع عليه ( غرفة نوم وإسترح ) مو مثل النبيسان ما يقبل إلا القزمان

<----------- سبق وأن كان معه شاص

وبإثبات واحد فقط أنه افضل من النيسان
لماذا أغلب إللي يقنصون بالربع الخالي ما يغامر إلا بجيب التايوتا الشاص ؟؟
شاهد مقاطع القنص بالربع الخالي وأحكم !!!